Ki Mannyè Nou Sa Fòtifyé Lafwa Nou An Pwonmèt Jéhova Pou On Latè Nèf?

1-2. Kisa nou bizwen fè paditan nou ka èspéwé latè nèf-la?

NOU KONTAN si tèlman Jéhova pwonmèt pou tiwé vyé sistèm sala, épi wiplaséʼy épi on latè nèf. (2 Pita 3:13) Magwé nou pa sav ki jou èben ki lè sa kay fèt, nou ni asé évidans ki ka moutwé, nou pa ni pou èspéwé djè lontan pou sa fèt.​—Maf. 24:32-34, 36; Twav. 1:7.

² Alò, paditan nou ka èspéwé nou tout bizwen fòtifyé lafwa nou an pwonmèt sala menm si nou adan lavéwité-a pou an chay tan. Pouki nou ka di sa? Sé paski zapòt Pòl di lafwa ki fèb menm kon péché “ki vlé mawé pyé nou.” Èk sa sa fèt byen ézé. (Hib. 12:1) Anfen, lafwa nou sa fò jòdi-a, mé denmen, i sa vini fèb. Konsa, pou anpéché lafwa nou vini fèb, nou bizwen gadé évidans-lan ki ka moutwé ki latè nèf-la ka vini touswit. Épi nou ni pou fè sa souvan.​—Hib. 11:1.

3. Kisa nou kay diskité an atik sala?

³ Konsa, an atik sala nou kay konsidiwé déotwa sitiwasyon nou pé ni pou aji épi jòdi jou. Èk sé sitiwasyon sala kay méwité nou tjenn lafwa nou an pwonmèt Jéhova pou latè nèf-la fò. Osi, apwé sa, nou kay diskité mannyè nou sa tjenn lafwa nou fò pa nou ka fè sé twa bagay sala: (1) mèdité asou wanson-an, (2) katjilé asou pouvwa Jéhova, épi (3) fè sé bagay-la ki ka fè nou vini pli pwé Jéhova. Èk finalman, nou kay diskité sa Jéhova té di Habakòk ki sa fòtifyé lafwa nou jòdi-a. Apwézan, annou koumansé épi sitiwasyon ki méwité nou tjenn lafwa nou byen fò.

SITIWASYON KI MÉWITÉ NOU TJENN LAFWA NOU BYEN FÒ

4. Ki kalté disizyon nou ka fè ki bizwen lafwa ki fò?

⁴ Touléjou, nou ka fè disizyon ki méwité nou moutwé lafwa ki fò. Pou ègzanp, nou ni pou fè disizyon konsèné asosiyasyon nou, anmizman nou, endikasyon nou, mawiyaj nou, ich nou èk twavay nou. Konsa, i kay bon pou mandé kò nou: ‘Ès sé chwa-a mwen ka fè-a ka moutwé mwen kwè sistèm sala kay vini a bout èk Bondyé kay wiplaséʼy épi latè nèf li? Ès sé chwa-a mwen ka fè-a ka moutwé mwen menm kon moun ki pa ni èspwa pou viv pou tout tan?ʼ (Maf. 6:19, 20; Louk 12:16-21) Bon. Nou kay fè pli mèyè disizyon si nou fòtifyé lafwa nou ki latè nèf-la tou pwé èk i kay vini touswit.

5-6. Pouki nou ni pou tjenn lafwa nou fò lè nou ni pwòblenm? Ba yon ègzanp.

⁵ Nou osi bizwen lafwa ki fò pou aji épi pwòblenm, pwòblenm tèl kon pèsikasyon, maladi ki byen sèwyé èben lòt bagay ki sa dékouwajé nou. Lè pwòblenm-la koumansé, nou ka santi akonmsi nou kay sa tjébé fò. Mé byen souvan, sé sitiwasyon sala ka diwé twòp lontan. Yo ka vini kon on chouval, mé ka alé kon on kalmason. Konsa, nou kay bizwen lafwa ki fò pou nou andiwé èk pou nou kontiné sèvi Jéhova épi djèwté.​—Ronm 12:12; 1 Pita 1:6, 7.

⁶ Bon. On lòt bagay ankò. Lè nou ka aji épi on pwòblenm, nou pé santi latè nèf-la Jéhova pwonmèt-la, pa kay janmen vini. Mé ès sa vlé di lafwa nou fèb? Pa oblijé. Pou ègzanp, lè sézon kawenm-lan koumansé èk sòlèy-la ka fann tè èk nou pa ni glo, nou pé katjilé: ‘I pa sanm sézon sala nou kay ni lapli!ʼ Mé nou sav, lapli-a kay vini. Èk lè lapli-a koumansé, ès nou pa ka byen kontan? Mé wi! Menm mannyè-a, lè nou dékouwajé, nou pé santi konmsi latè nèf-la pa kay janmen vini. Kanmenm, si lafwa nou fò, nou sav Jéhova kay tjenn èk akonpli tout sé pwonmèt li-a. (Sam 94:3, 14, 15; Hib. 6:17-19) Konsa, épi tout konfyans-lan nou ni an Jéhova, nou sa kontiné mété adowasyon nou pou li, pwèmyé an lavi nou.

7. Ki katjil nou pa sipozé ni?

⁷ Nou bizwen lafwa ki fò pou nou sa fè twavay pwèchman-an. An twavay sala, an chay moun nou ka pwéché bay konsèné bon nouvèl-la ka katjilé: ‘Latè nèf-la? Awa. Sa pa posib.ʼ (Maf. 24:14; Izik. 33:32) Konsa, nou pa janmen vlé ni kalité katjil sala. Wi, nou pa janmen vlé ni dout an tjè nou konsèné sa Jéhova ka enstwi nou. Pou anpéché sa fèt, nou bizwen kontiné fòtifyé lafwa nou. Annou konsidiwé twa mannyè nou sa fè sa.

MÈDITÉ ASOU WANSON-AN

8-9. (a) Ki gwo sakwifis Jéhova té fè? (b) Ki mannyè sa Jéhova fè-a ka fòtifyé lafwa nou?

⁸ Yon mannyè nou sa fòtifyé lafwa nou, sé lè nou mèdité asou wanson-an. Wanson-an ka ban nou asiwans-lan ki sa Bondyé pwonmèt kay fèt vwé. Pou ègzanp, Jéhova pwonmèt pou ban nou lavi étonnèl, èk lavi étonnèl sala kay twòp pli mèyè pasé lavi nou apwézan. Konsa, lè nou katjilé asou wézon-an Jéhova potjiwé wanson-an, épi asou sa li menm té ni pou sakwifyé pou potjiwéʼy, sa ka fòtifyé lafwa nou ki Bondyé kay fè tout sa i pwonmèt pou fè. Pouki nou ka di sa?

⁹ Èben, konsidiwé sa: Jéhova èk gasonʼy Jézi si tèlman pwé. Èk Jéhova enmenʼy an chay. Mé Jéhova fè on gwo sakwifis lè i voyéʼy asou latè-a pou bay laviʼy ban nou. Paditan Jézi té asou latè-a, i té ni pou andiwé tout diféwan kalité pwòblenm. Apwé tout sa, i té ni pou soufè èk mò. Èk Jéhova té ni pou andiwé tout sa. Konsa, lè nou gadé tout sa ki té ni pou fèt pou nou twapé wanson-an, ès ou pa ka dakò ki, Jéhova té ni pou péyé on gwo pwi? Absoliman! Bondyé, Papa nou, ki enmen nou an chay-la, pa té kay janmen kité sèl gasonʼy-lan soufè èk mò pou nou senpliman viv an pli mèyè lavi pou on ti moman. (Jan 3:16; 1 Pita 1:18, 19) Paski Jéhova péyé on pwi ki tèlman gwo, i kay fè asiwé nou kay viv pou tout tan an latè nèf-la.

KATJILÉ ASOU POUVWA JÉHOVA

10. Silon Èfésòs 3:20, kisa Jéhova sa fè?

¹⁰ Mi dézyenm bagay nou sa fè pou fòtifyé lafwa nou: katjilé asou pouvwa Jéhova. Sé li ki ni tout pouvwa-a pou akonpli tout sa i pwonmèt pou fè. Mé la ni an chay moun asou latè-a ki kwè, lavi étonnèl asou latè nèf-la pa posib pou nou. Kanmenm, byen souvan, Jéhova ka pwonmèt nou bagay lézòm pa kay sa janmen fè. Bon. Sé pou nou toujou chonjé Jéhova sé Dyé Toupisan èk anyen pa enposib pouʼy fè. (Jòb 42:2; Mak 10:27) Alò, nou pa ka sipwi lè Jéhova pwonmèt nou bagay ki èstòdinè.​—Li Èfésòs 3:20.

11. Jéhova fè an chay pwonmèt ki èstòdinè. Ba yon ègzanp. (Osi, gadé enfòmasyon-an anba sijé-a: “Détwa Pwonmèt Jéhova Akonpli Ki Té Èstòdinè.”)

¹¹ Konsidiwé adan sé bagay-la Jéhova té pwonmèt pèp li an tan pasé ki té gadé byen enposib pou fèt. Jéhova té pwonmèt Abrahanm èk Sara, yo té kay fè on gason an vyéyès yo. Èvèk lè tan-an vini, i fèt menm kon Jéhova té di. (Jen. 17:15-17) Jéhova té osi di Abrahanm, i té kay bay désandanʼy péyi Kénann. Diwan sé lanné-a désandan Abrahanm té an èslavaj an péyi Éjip, i té ka gadé konmsi pwonmèt sala pa té kay janmen fèt. Mé nou sav, Jéhova té akonpli pwonmèt li. Pli ta, Jéhova di Élizabèt, i té kay ni on gason menm si i té ja an laj. I té osi di on vyèj, nonʼy sé Mari, i té kay ansèt épi i té kay akouché gason Bondyé. Épi sa té kay akonpli on pwonmèt Jéhova té fè konmen mil lanné andavans an jaden Édenn.​—Jen. 3:15.

12. Ki asiwans Jòchwa 23:14 èk Izaya 55:10, 11 ka ban nou?

¹² Lè nou katjilé asou tout sé pwonmèt-la Jéhova ja fè, èk mannyè-a i akonpli yo, nou pa ni pyès dout ki, Jéhova vwéman ni anpil pouvwa. Konsa, lè nou mèdité asou pouvwa Jéhova, lafwa nou an pwonmèt li pou on latè nèf, kay vini pli fò. Épi a lè sa-a, nou kay adan an pli mèyè pozisyon pou édé lézòt apwésyé pwonmèt-la Jéhova fè-a pou on latè nèf pa on wèv! I wéyal. Èk Jéhova menm di i kay fè on syèl épi on latè nèf. (Wév. 21:1, 5) Konsa, i di nou an Wévélasyon 21:5: “Ékwi sé bagay sala paski sé pawòl sala sé lavéwité, épi ou sa toujou apiyé anlè yo.” Jéhova osi ban nou lòt asiwans an Jòchwa 23:14 èk Izaya 55:10, 11. Annou li sé lévanjil sala. (Li yo)

FÈ SÉ BAGAY-LA KI KA FÈ NOU VINI PLI PWÉ JÉHOVA

13. Ki mannyè sé mitin-lan sa fòtifyé lafwa nou? Ba yon ègzanp.

¹³ On twazyenm mannyè nou sa fòtifyé lafwa nou, sé lè nou fè bagay ki sa fè nou vini pli pwé Jéhova. Pou ègzanp, nou ka twapé an chay bennéfis lè nou atandé sé mitin-lan. Nou ni on sésé, nonʼy sé Anna, ki ja pasé plizyè lanné ka wann sèvis a plen. I di: “Sé mitin-lan ka tjenn lafwa mwen fò. Menm si moun-lan ki ka bay sijé-a pa djè fò an mannyè i ka enstwi, èben pitèt mwen té ja tann sijé sala avan, byen souvan mwen ka tann on bagay ki ka édé mwen konpwann Bib-la pli mèyè. Épi sa ka fòtifyé lafwa mwen.”b Osi byen, lafwa nou sa vini pli fò lè nou kouté sé wépons-lan sé fwè èk sè nou-a ka bay an mitin-lan.​—Ronm 1:11, 12; 10:17.

14. Ki lòt bagay nou sa fè ki sa fòtifyé lafwa nou? Èk an ki mannyè i ka fè sa?

¹⁴ Nou sa osi fòtifyé lafwa nou lè nou patisipé an minis-la. (Hib. 10:23) Wi, Barbara, ki té ka sèvi Jéhova pou pli pasé swasant dis lanné (70) di: “Twavay pwèchman-an ka toujou fòtifyé lafwa mwen. Épi pli mwen palé épi lézòt konsèné sé bèl pwonmèt Jéhova-a, sé pli lafwa mwen ka wèsté vivan èk fò.”

15. Ki lòt bagay ki sa édé nou fòtifyé lafwa nou? Ba yon ègzanp. (Gadé sé pòtwé-a osi.)

¹⁵ Mé la ni lòt bagay ki sa fòtifyé lafwa nou, tèl kon: étid pèsonnèl. Susan di lè i fè on plan pou mannyè i kay fè étid pèsonnèl li, sa ka édéʼy. Mi sé sa i di: “Lé Dimanch, mwen ka étidyé Gad-la pou lòt simenn-lan. Lé Lendi èk Madi, mwen ka pwépawé pou mitin an mitan simenn-lan. Pou lèwèstan simen-lan, mwen ka twavay asou pwojé pou étid pèsonnèl mwen.” Susan pa té ka fè étid pèsonnèl li pa chans. I ka toujou swiv plan-an i fè-a. Konsa, i té sa kontiné ka fòtifyé lafwaʼy. Konsidiwé ègzanp on lòt sésé, nonʼy sé Irene, ki ja wann sèvis pou plizyè lanné an pwensipal òfis-la. I di: “Lè mwen étidyé sé pwofèsi-a ki an Bib-la, sa ka fòtifyé lafwa mwen. Osi, mwen ka twouvéʼy èstòdinè lè mwen wè tout ti détay an sé pwofèsi-a ki an Bib-la, ja akonpli.”c

“I KAY VINI VWÉ”

16. Ki mannyè nou sav asiwans-lan Jéhova té bay Habakòk sé pou bennéfis nou jòdi-a osi? (Hibrou 10:36, 37)

¹⁶ Adan di nou ki an lavéwité-a pou on lonng tan, èk ja ka èspwé bout sistèm sala pou on lonng tan, pé santi i ka pwan twòp tan pou bout-la vini. Mé pa pè. Jéhova sav ki mannyè sèvant li ka santi. Anfen, Jéhova ja adwésé sa lè i té bay sèvant li, Habakòk, asiwans sala: ‘Vizyon-an kay vini vwé a lè-a ki fiksé pou sa. Èvèk lè sala kay wivé byen vit. Sa pa yon mansonj. Menm si i ka gadé konmsi i ka tadé, kontiné èspéwéʼy paski i kay vwéman vini vwé! I pa kay anwita!ʼ (Hab. 2:3) Bon. Ès asiwans-lan Bondyé té bay-la, sété pou bennéfis Habakòk tousèl? Ében ès i sé pou bennéfis nou jòdi-a osi? Èben nou sav, sé pawòl sala sé pou bennéfis nou jòdi-a osi. Pouki nou ka di sa? Sé paski Jéhova sèvi zapòt Pòl pou apliké sé menm mo pawòl sala pou Kwityen ki ka èspéwé latè nèf-la Jéhova pwonmèt-la. (Li Hibrou 10:36, 37.) Alò, menm si nou ka katjilé pwonmèt Jéhova ka pwan an chay tan pou i akonpli, nou sa asiwé, “i kay vwéman vini vwé! I pa kay anwita!”

17. Koumannyè yon sésé té apliké konsèy-la Jéhova té bay Habakòk?

¹⁷ An pil sèvant Jéhova ja apliké konsèy-la i ba yo pou “kontiné èspéyé.” Adan di yo ja fè sa pou an chay lanné. Pou ègzanp, on sésé, nonʼy sé Louise, koumansé sèvi Jéhova an lanné mil nèf san twant nèf (1939). I di: “A lè sala, mon té kwè, Anmagèdonn té kay vini avan mwen antwé gwo lékòl. Sa pa té fèt. Kon sé lanné-a pasé, lè mwen li sé wakont-lan ki an Bib-la konsèné moun ki té ni pou èspéwé asou Jéhova pou akonpli pwonmèt li, sa édé mwen pou èspéwé asou Jéhova pou akonpli sé pwonmèt li-a. Mon li konsèné moun kon Nowa, Abrahanm, Jozèf, èk lézòt. Sé bèl ègzanp sala ja édé mwen èk lézòt pou wèsté fiksé asou asiwans-lan ki latè nèf-la tou pwé.” Épi moun ki ka adowé Jéhova pou on lonng tan, oblijé kay dakò épi sa!

18. Ki mannyè kwéyasyon ka fòtifyé lafwa nou an pwonmèt Jéhova pou on latè nèf?

¹⁸ I vwé, latè nèf-la pʼòkò wivé, mé kanmenm, katjilé asou sé bagay-la ki oliwon nou-a an kwéyason. Pou ègzanp, sé étwal-la, sé pyé bwa-a, sé zannimo-a, èk nou, lézonm. La té ni on tan, lè yo pa té ka ègzisté. Mé apwézan, yo la paski sété divwa Jéhova pou kwéyété yo. (Jen. 1:1, 26, 27) An menm mannyè-a, i sé divwa Jéhova pou fè on latè nèf. Èk i kay akonpli divwaʼy. An latè nèf sala, moun kay enjwi lavi diwant an bon santé. Èk sa kay fèt an lè-a Jéhova ja apwenté-a. Konsa, latè nèf-la kay vini wéyal menm kon sé bagay-la ki oliwon nou-a.​—Izay. 65:17; Wév. 21:3, 4.

19. Ki mannyè nou sa fòtifyé lafwa nou?

¹⁹ Konsa, paditan nou ka èspéwé latè nèf-la, annou fè tout sa nou pé pou fòtifyé lafwa nou. Wi, annou mèdité asou wanson-an, katjilé asou pouvwa Jéhova, épi fè sé bagay-la ki ka fè nou vini pli pwéʼy. Épi lè nou fè sé bagay sala, nou kay anpami “sé moun-an ki wisivwè sa Bondyé pwonmèt-la, paski yo té kwè èk yo té ni pasyans.”​—Hib. 6:11, 12; Ronm 5:5.