Kisa Sé Ansyen-an Sa Apwann An Ègzanp Gidiyonn?

1. Silon 1 Pita 5:2, ki ansayman Jéhova bay sé ansyen-an?

JÉHOVA bay sé ansyen-an wèskonsabilité-a pou otjipé pèp li, èvèk yo byen kontan Jéhova ka konfyé yo épi ansayman sala. Konsa, yo ka twavay wèd pou vini ‘bèwjé ki ka vwéman gadé apwé twipo Bondyé’. (Jér. 23:4; li 1 Pita 5:2.) Wi, pa dé kontan nou kontan nou ni fwè kon sa an sé kongwigasyon nou-an!

2. Ki difikilté adan sé ansyen-an ka èspéyansé?

² Menm kon Gidiyonn, sé ansyen-an ka èspéyansé an chay pwoblenm, mé yo ka twavay wèd pou byen otjipé kongwigasyon-an. Pou ègzanp, Tony sé yon ansyen an Lanméwik, mé i té ni pou konnèt limit li, lè’y vini pou kantité twavay-la i té ka aksèpté. I di: “Lè COVID-19 koumansé, mwen éséyé fè pli pou ògannizé mitin èk pwédikasyon-an. Mé, la té toujou ni twavay pou fè. Apwé on lè, mwen té vini si tèlman anbawasé mwen pa té ni asé tan pou li Bib-la, pou étidyé, èk pou pwédyé.” Osi nou ni ègzanp Ilir. I sé yon ansyen an péyi Kosovo, mé i té ni on diféwan pwoblenm. Lè’y té adan on plas ki té ni ladjè i té difisil pou’y swiv diwèksyon hòd ògannizasyon-an. Ilir di: “Lè sé fwè-a an òfis bwanch-la ban mwen ansayman-an pou édé sé fwè èk sè-a ki té ka wèsté adan on wèt ki té danjéwé, sa té vwéman mété kouwaj mwen anba tès. Pou di’w lavéwité-a, mwen té pè, èk pou mwen diwèksyon-an pa té ka fè sans.” Èk nou ni ègzanp Tim. Tim ka wann sèvis kon on misyonnè an Asia. I té ka twapé’y wèd pou’y fè tout sé bagay-la i té bizwen fè toulé jou. Tim di: “Délè mwen té ka santi mwen té ka twò las pou pwan ka sé fwè èk sè-a.” Alò, kisa ki sa édé sé fwè-a ki ka wann sèvis kon ansyen lè yo ka èspéyansé pwoblenm kon sa?

3. Ki bennéfis nou tout sa twapé lè nou konsidiwé ègzanp Gidiyonn?

³ Kanmenm, sé ansyen-an sa apwann plizyè bagay an ègzanp Gidiyonn. (Hib. 6:12; 11:32) Pou ègzanp, diwan on tan ki té byen danjéwé, Gidiyonn té pwotèkté èk gadé apwé pèp Bondyé. (Jij 2:16; 1 Kw. 17:6) Wi, sé ansyen-an ka swiv ègzanp Gidiyonn, lè yo pwotéjé èk gadé apwé sé fwè èk sè-a jis diwan tan ki difisil. (Twav. 20:28; 2 Tim. 3:1) Anfen, nou tout sa apwann lison hòd sé bèl kawaktè-a Gidiyonn té ni-an. Pou ègzanp, Gidiyonn té konnèt limit li, i té ka toujou abésé kò’y, i té obéyisan, èk i té tjenbé fò. Alò, ki nou ka wann sèvis kon ansyen opa, lè nou konsidiwé ègzanp Gidiyonn, sa ka ankouwajé nou tout pou moutwé sé ansyen nou-an ki ka twavay byen wèd pou otjipé nou pli apwésiyasyon, èk pou kontiné sipòté yo.—Hib. 13:17.

LÈ’Y DIFISIL POU ABÉSÉ KÒ’W ÈK POU KONNÈT LIMIT OU

4. Ki mannyè Gidiyonn té moutwé i té konnèt limit li èk i té ka abésé kò’y?

⁴ Gidiyonn sété on nonm ki té konnèt limit li èk ki té ka toujou abésé kò’y.b Lè nanj Jéhova té di Gidiyonn Bondyé té chwazi’y pou sové jan Izwayèl hòd lanmen jan Midiyann, Gidiyonn wéponn nanj-lan: ‘An lafanmi Mannasa sé fanmi mwen ki ni mwens enpòtans, èk sé mwen ki ni mwens enpòtans an kay papa mwen.’ (Jij 6:15) Alò, wépons Gidiyonn ka moutwé i sété an nonm ki té ka abésé kò’y. Wi, Gidiyonn té santi i pa té kwalifyé pou ansayman sala. Mé Jéhova té konnèt pli mèyè. Èk épi èd Jéhova, Gidiyonn té akonpli ansayman’y byen.

5. Kisa ki pé fè’y difisil pou yon ansyen konnèt limit li èk abésé kò’y?

⁵ An tout bagay sé ansyen-an ka fè, yo ka éséyé pou konnèt limit yo èk abésé kò yo. (Mayk. 6:8; Twav. 20:18, 19) Yo pa ka bavadé konsèné sa yo sa fè, ében sa yo ja fè. Èk osi, yo pa ka kwè yo pa vo anyen a kòz di lèwè yo ja fè. Mé, délè i difisil pou yon ansyen konnèt limit li èk abésé kò’y. Pou ègzanp, yon ansyen pé aksèpté pli ansayman pasé sa i sa vwéman fè, ében i pé difisil pou’y konnèt limit li èk abésé kò’y lè moun kwititjé’y ében aplodi’y. Alò, kisa sé ansyen-an sa apwann hòd ègzanp Gidiyonn ki sa édé yo aji épi sitiwasyon kon sa?

6. (a) Ki mannyè Gidiyonn té moutwé i té konnèt limit li? (b) Kisa sé ansyen-an sa apwann an ègzanp Gidiyonn? (Gadé pòtwé-a osi.)

⁶ Mandé moun pou édé’w. An moun ki konnèt limit li sav la ni bagay i pa sa fè. Gidiyonn moutwé i té konnèt limit li, paski i té mandé lézòt moun pou èd. (Jij 6:27, 35; 7:24) Alò, menm kon Gidiyonn, sé ansyen-an sa mandé pou èd. Tony nou té palé konsèné an pawagwaf dé (2) di: “A kòz di mannyè-a mwen té lévé, mwen té ka toujou aksèpté pli twavay pasé mwen té sa fè. Konsa, an létid fanmi nou mwen désidé pou diskité sijé-a Konnèt Limit Ou, èk mwen mandé madanm mwen pou ban mwen lopinyon’y asou mannyè i kwè mwen té ka fè. Osi, mwen gadé vidiyo-a Train, Trust, and Empower Others, as Jesus Does asou jw.org.” Èk an plis di sa, Tony koumansé mandé lòt fwè pou ba li èd épi sé diféwan bagay-la i té ka fè an kongwigasyon-an. Wi, sa mennen bon wézilta. Tony di: “Twavay-la an kongwigasyon-an ka fèt, èk mwen ni pli tan pou fòtifyé wilasyon mwen épi Jéhova.”

7. Ki mannyè sé ansyen-an sa swiv ègzanp Gidiyonn lè moun kwititjé yo? (Jémz 3:13)

⁷ Pa lévé faché si on moun kwititjé’w. An lòt tès sé ansyen-an ka èspéyansé sé lè on moun kwititjé yo. Mé ègzanp Gidiyonn sa édé yo. Pou ègzanp, Gidiyonn té sav i pa té pawfé, konsa lè moun an lafanmi Ifréyim té kwititjé’y, i wèsté kam. Épi i pa té faché lè’y té ka wéponn yo. (Jij 8:1-3) Wi, Gidiyonn moutwé i té abésé kò’y, paski i pwan tan pou kouté sa sé moun-lan an lafanmi Ifréyim té ka di’y, èk i palé épi yo adan an mannyè ki té janti, èk sa té fè yo vini dous. (Li Jémz 3:13.) Konsa sé ansyen-an sa swiv ègzanp Gidiyonn lè yo ka byen kouté lè moun ka palé ba yo, èk lè yo wéponn adan on mannyè ki janti lè moun kwititjé yo. Èk lè yo fè sa, yo kay édé kongwigasyon-an pou ni lapé èk lilyon.

8. Kisa sé ansyen-an sa fè lè fwè èk sè aplodi yo paski yo ka enstwi byen? Ba yon ègzanp.

⁸ Bay Jéhova laglwa-a. Lè Gidiyonn té twapé laviktwa asou jan Midiyann èk sé nonm-lan an Izwayèl té onnowé’y, i bay Jéhova laglwa-a. (Jij 8:22, 23) Alò, ki mannyè sé ansyen-an sa swiv ègzanp Gidiyonn? Ében, sé ansyen-an sipozé bay Jéhova laglwa-a pou sa yo ka fè, pito yo pwan laglwa-a pou kò yo. (1 Kòr. 4:6, 7) Pou ègzanp, si sé fwè èk sè-a aplodi yon ansyen paski i ka enstwi byen, kisa i sa fè? Ében, i sa di yo enstwiksyon-an sòti an Pawòl Bondyé, ében, nou tout ka apwann hòd ògannizasyon Jéhova. Osi, sé ansyen-an sa katjilé asou mannyè-a yo ka enstwi èk mandé kò yo: ‘Lè mwen ka enstwi, ès mwen ka bay Jéhova laglwa-a ében, ès mwen ka pwan laglwa-a pou kò mwen?’ Annou konsidiwé ègzanp yon ansyen non’y sé Timothy. Lè Timothy koumansé wann sèvis kon yon ansyen, i té enmen bay diskou piblik. Timothy di: “Lè mwen té ka bay diskou, entwodiksyon mwen té ka lonng èk ilistwasyon mwen té ka èstòdinè. Èk byen souvan sé fwè èk sè-a té ka aplodi mwen pou sa. Mé malèwèzman, yo té ka fiksé asou mwen pito yo fiksé asou Bib-la, ében asou Jéhova.” Kanmenm, apwé on lè Timothy wéyalizé i té ni pou fè chanjman an mannyè-a i té ka enstwi pou’y pa mennen atansyon asou kò’y. (Pwov. 27:21) Èk kisa ki té wézilta-a? Timothy menm di: “Apwézan plizyè fwè èk sè ka di mwen, diskou mwen ka édé yo pou aji épi pwoblenm, pou tjenbé fò lè yo anba tès, ében i ka édé yo vansé pli pwé Jéhova. Èk apwézan, mwen ka twapé pli lajwa lè sé fwè èk sè-a di mwen sa, pasé lè yo té ka aplodi mwen pou diskou mwen.”

LÈ’Y DIFISIL POU OBÉYI ÈK MOUTWÉ KOUWAJ

9. Kisa ki té fè’y difisil pou Gidiyonn obéyi Jéhova épi moutwé kouwaj? (Gadé pòtwé-a ki asou kouvèti-a.)

⁹ Apwé Jéhova té bay Gidiyonn ansayman-an pou djidé nasyon Izwayèl, i té ni pou wèsté obéyisan èk moutwé kouwaj. Èk sa sé paski Jéhova té ba’y yon ansayman ki té byen danjéwé. (Jij 6:25, 26) I té ni pou détwi lotèl-la papa’y té ka sèvi pou adowé Bal. Osi, apwé Gidiyonn té ansanblé sé nonm-lan pou lawmé’y, dé (2) fwa Jéhova di’y i té ni twòp nonm an lawmé-a. (Jij 7:2-7) An plis di sa, Jéhova bay Gidiyonn on lòt diwèksyon, i di’y pou ataké lèlmi’y diwan lannwit-la.—Jij 7:9-11.

10. Ki diféwan bagay ki sa fè’y difisil pou yon ansyen obéyi diwèksyon hòd ògannizasyon-an?

¹⁰ Sé ansyen-an sipozé ‘pawé pou obéyi’. (Jémz 3:17 NWT) Yon ansyen ki obéyisan, toujou pawé pou swiv sa Bib-la ka di, èk i toujou pawé pou swiv sé diwèksyon-an ògannizasyon Jéhova ka bay. Lè’y fè sa i ka kité an bèl ègzanp pou lézòt. Kanmenm, délè i pé difisil pou yon ansyen toujou wèsté obéyisan. Pou ègzanp, i pé twapé plizyè diwèksyon èk sé diwèksyon-an pé chanjé vit, konsa i pé difisil pou’y swiv yo. Délè, i pé jis katjilé diwèksyon-an i wisouvwè-a pa ka fè sans. Osi, ògannizasyon-an pé mandé’y pou fè yon ansayman ki pé annékòz polis pou awété’y. Alò, lè sé ansyen-an ni pou aji épi sitiwasyon kon sa, ki mannyè yo sa wèsté obéyisan menm kon Gidiyonn?

11. Ki mannyè sé ansyen-an sa wèsté obéyisan menm kon Gidiyonn?

¹¹ Byen kouté èk swiv diwèksyon ògannizasyon-an. Bondyé té bay Gidiyonn diwèksyon ki té byen klè. I di Gidiyonn mannyè-a pou détwi lotèl papa’y, koté-a pou bati an lotèl nèf bay Jéhova, èk ki zannimo pou ofè kon an sakwifis. Ès Gidiyonn té kwèsyonnen èben kwititjé diwèksyon-an Jéhova té ba’y? Non. I annèk fè ègzaktiman sa Bondyé té di’y pou fè. Jòdi jou, ògannizasyon Jéhova ka bay sé ansyen-an diwèksyon an plizyè diféwan mannyè. Pou ègzanp, sé ansyen-an ka wisouvwè lèt, annonsman, èk lòt enstwiksyon ki ka pwotéjé lavi nou èk fòtifyé wilasyon nou épi Jéhova. Èk menm kon Gidiyonn, sé ansyen-an ka obéyi tout sé diwèksyon-an yo ka wisouvwè. Alò, nou vwéman enmen sé ansyen-an pou mannyè-a yo toujou pawé pou swiv sé diwèksyon-an ògannizasyon Jéhova ka ban nou. Anfen, lè sé ansyen-an obéyi diwèksyon yo wisivwè, kongwigasyon-an ka twapé an chay bennéfis.—Sam 119:112.

12. Ki mannyè sé ansyen-an sa swiv konsèy-la an Hibrou 13:17 lè ògannizasyon-an di yo pou fè chanjman an mannyè-a yo ka fè sèten bagay?

¹² Toujou pawé pou fè chanjman. Ès ou ka chonjé Jéhova té di Gidiyonn pou voyé pwèskè tout sé sòlda’y-la lakay yo? (Jij 7:8) Pitèt Gidiyonn té katjilé: ‘Ès chanjman sala vwéman nésésè? Ès chanjman sala kay twavay?’ Kanmenm, népòt katjil i té ni, Gidiyonn obéyi la menm. Jòdi jou, sé ansyen-an ka imité ègzanp Gidiyonn lè yo obéyi diwèksyon hòd ògannizasyon-an pou fè chanjman an mannyè-a yo ka fè sèten bagay. (Li Hibrou 13:17). Pou ègzanp, an lanné dé mil katòz (2014), Pwensipal Konmité-a chanjé mannyè-a nou ka péyé pou bati Sal Wéyòm èk Sal Asanblé. (2 Kòr. 8:12-14) An tan pasé, ògannizasyon-an té ka pwété kongwigasyon-an lajan pou bati an Sal Wéyòm èk apwé kongwigasyon-an té ni pou péyé lajan sala déviwé. Mé apwézan, ògannizasyon-an ka sèvi kontwibyousyon hòd sé kongwigasyon-an owon latè-a pou bati Sal Wéyòm èk Sal Asanblé népòt koté ki ni an labizwen. Èk ògannizasyon-an ka fè sa menm si kongwigasyon-an sa péyé lajan-an déviwé opa. Lè yon ansyen yo ka kwiyé José té apwann konsèné chanjman sala, i pa té kwè chanjman sala té kay twavay. Anfen i té jis di an lidé’y: ‘Yo pa kay fè pa menm yon Sal Wéyòm. Sé pa kon sa nou ka fè bagay isi-a.’ Kisa ki édé José pou sipòté chanjman sala? I di: “Sa Pwovèb 3:5 èk 6 di, fè mwen chonjé mwen ni pou konfyé Jéhova. Èk mwen ka wè sé bon wézilta-a, paski nou ka bati pli Sal Wéyòm, èk nou ka fè kontwibyousyon an diféwan mannyè pou édé sé fwè nou-an an diféwan plas ki ni an labizwen.”

13. (a) Ki asiwans Gidiyonn té ni? (b) Ki mannyè sé ansyen-an sa swiv ègzanp Gidiyonn? (Gadé pòtwé-a osi.)

¹³ Fè divwa Jéhova épi kouwaj. Gidiyonn obéyi Jéhova menm si ansayman-an té danjéwé èk i té pè. (Jij 9:17) Kanmenm, Jéhova té bay Gidiyonn asiwans-lan ki, i té kay édé’y pou pwotéjé pèp li èk sa ba Gidiyonn kouwaj. Alò, sé ansyen-an ki ka wèsté an péyi koté twavay-la anba bann ka swiv ègzanp Gidiyonn. Yo ka pwan douvan an sé mitin-lan èk an twavay pwédikasyon-an, magwé, (1) polis pé awété yo èk kwèsyonnen yo, (2) yo pé pèd twavay yo, ében (3) moun pé jis bat yo.c Osi, diwan gwan twibilasyon-an, sé ansyen-an kay bizwen kouwaj pou obéyi sé diwèksyon-an yo kay wisivwè menm si la pé ni danjé. Pou ègzanp, yo pé twapé diwèksyon asou mannyè-a pou pwéché konmisyon jijman-an, èvèk yo pé twapé diwèksyon asou sa nou ni pou fè pou chapé lè Gòg ki sòti péyi Magòg ataké pèp Bondyé.​—Izik. 38:18; Wév. 16:21.

LÈ’Y DIFISIL POU TJENBÉ FÒ

14. Poutji i té difisil pou Gidiyonn tjenbé fò?

¹⁴ Lè Gidiyonn té ka wann sèvis kon an Jij, i té ni pou twavay byen wèd. Pou ègzanp, diwan lannwit-la lè Gidiyonn épi lawmé’y té ka goumen épi jan Midiyann, jan Midiyann pitjé kouwi. Wi, Gidiyonn épi lawmé’y kouwi dèyè yo pou sòti dépi an fon Jèzwiyèl-la pou wivé jis Lawivyè Jouden-an, èk pitèt plas sala té plen wazyé. (Jij 7:22) Mé ès Gidiyonn té doubout bò Lawivyè Jouden-an? Non! Magwé i té las, li èk sé twa san (300) nonm li-a janbé lawivyè-a, èk yo kontiné kouwi dèyè jan Midiyann. Alafen, yo jwenn épi jan Midiyann èk yo bat yo.—Jij 8:4-12.

15. Délè, pouki i difisil pou yon ansyen tjenbé fò?

¹⁵ Délè yon ansyen ka santi byen las paski i ka pwan ka kongwigasyon-an èk fanmi’y. Alò, lè yon ansyen ka èspéyansé sitiwasyon kon sa, ki mannyè i sa tjenbé fò èk swiv ègzanp Gidiyonn?

16-17. (a) Kisa ki édé Gidiyonn pou tjenbé fò? (b) Ki konfyans sé ansyen nou-an sa ni? (Izaya 40:28-31) (Gadé pòtwé-a osi.)

¹⁶ Ni konfyans Jéhova kay fòtifyé’w. Gidiyonn té ni konfyans Jéhova té kay fòtifyé’y, èk Jéhova pa té dézapwenté’y. (Jij 6:14, 34) Yon jou, Gidiyonn èk sé nonm li-a té ka kouwi dèyè dé (2) wa ki sòti péyi Midiyann ki té asou chanmo. (Jij 8:12, 21) Menm si sé dé wa sala té asou chanmo, épi èd Jéhova yo tjenbé sé dé wa-a èk yo ganyen batay-la. An menm mannyè-a, sé ansyen-an jòdi jou sa apiyé asou Jéhova menm kon Gidiyonn, paski i sé Dyé-a ‘ki pa sa janmen vini las ében fatigé’.—Li Izaya 40:28-31.

¹⁷ Annou konsidiwé èspéyans Matthew, on fwè ki asou Konmité-a Pou Konminiké Épi Lopital-la. Kisa ki ka édé’y pou tjenbé fò? Matthew di: “Mwen ja èspéyansé sa Filipay 4:13 ka di an lavi mwen, èk sa sé paski, la té ni plizyè fwa lè mwen té ka santi mwen pa té sa fè anyen ankò. Mé lè mwen ka santi kon sa, mwen ka pwédyé bay Jéhova, èk mwen ka mandé’y pou ban mwen fòs-la pou édé mwen kontiné sipòté sé fwè mwen-an. Èvèk Bondyé ka wéponn lapwiyè mwen. Mwen ka santi lisentèspwi Bondyé ka ban mwen fòs, i ka édé mwen pou tjenbé fò.” Menm kon Gidiyonn, sé ansyen nou-an ka twavay byen wèd pou otjipé pèp Bondyé, menm si i pa toujou ézé pou yo fè sa. Kanmenm, yo ni pou konnèt limit yo, èk yo ni pou wéyalizé yo pa sa fè tout sa yo vlé fè. Mé an menm di tan, si yo konfyé Jéhova, èk si yo kwiyé asou’y, yo sa ni konfyans-lan ki, Jéhova kay wéponn lapwiyè yo, èk i kay ba yo fòs-la èk èd-la yo bizwen pou yo kontiné tjenbé fò.​—Sam 116:1; Filip. 2:13.

18. Kisa sé ansyen-an sa apwann an ègzanp Gidiyonn?

¹⁸ An atik sala nou diskité mannyè sé ansyen-an sa apwann an chay bagay an ègzanp Gidiyonn. Pou ègzanp, sé ansyen-an sipozé konnèt limit yo èk abésé kò yo èspwèsman lè’y vini pou kantité twavay-la yo ka fè, èk lè moun kwititjé yo, ében lè moun aplodi yo. Osi sé ansyen-an sipozé toujou pawé pou obéyi diwèksyon hòd ògannizasyon-an, èk yo ni pou moutwé kouwaj sitou kon bout vyé sistèm Satan tou pwé. An plis di sa, népòt difikilté yo pé èspéyansé, yo ni pou ni konfyans-lan ki, Jéhova kay fòtifyé yo pou tjenbé fò. Anfen, nou ka vwéman apwésyé sé ansyen-an ki ka twavay wèd an sé kongwigasyon-an. Wi, nou ka kontiné ‘moutwé ki otan wèspé nou ni pou nonm kon sa’.—Filip. 2:29.