Apiyé Asou Jéhova Menm Kon Sanmsin

1-2. Pouki i bon pou nou étidyé listwa Sanmsin?

LÈ’W TANN non-an Sanmsin, kisa ki ka vini an lidé’w? Ès ou ka katjilé konsèné Dilayla? Èben ès ou ka katjilé konsèné kouway li? Nou sav, Sanmsin té ni an chay kouway. Mé, i té fè on mové disizyon ki mennen’y an chay soufwans. Kanmenm, Jéhova pa té fiksé asou lèwè’y. Pito sa, i fiksé asou tout sa Sanmsin té fè pou sèvi’y. Sanmsin té on nonm ki té ka apiyé asou Jéhova. Èk Jéhova mété ègzanp fidèlité’y an Bib-la pou bennéfis nou.

² Jéhova té sèvi Sanmsin pou fè bagay ki té èstòdinè pou édé pèp li. Èk plizyè san lanné apwé Sanmsin mò, Jéhova sèvi zapòt Pòl pou mété non Sanmsin an Bib-la. Lè Pòl té ka mansyonnen non moun ki té ni an pil lafwa an Bondyé, i mansyonnen non Sanmsin. (Hib. 11:32-34) Alò, ègzanp Sanmsin sa ankouwajé nou paski i té ka toujou apiyé asou Jéhova jis lè i té ka aji épi sitiwasyon ki té difisil. Bon. An atik sala, nou kay diskité kisa nou sa apwann hòd ègzanp Sanmsin èk ki mannyè ègzanp li sa ankouwajé nou.

SANMSIN TÉ KONFYÉ JÉHOVA

3. Ki asaynman Jéhova té bay Sanmsin èk pouki?

³ Diwan tan-an Sanmsin té fèt, sété sé Filistin-lan ki té ka kondwi Izwayèl. Èk yo té ka pwan lavantaj asou yo. (Jij 13:1) Sé Filistin-lan té méchan an pil èk pèp Izwayèl té ka soufè anba lanmen yo. Konsa, Jéhova chwazi Sanmsin pou sové pèp li anba lanmen sé Filistin-lan. (Jij 13:5) Sa té byen difisil pou’y fè! Kanmenm, pou akonpli asaynman sala, Sanmsin té kay ni pou apiyé asou Jéhova.

4. Ki mannyè Jéhova édé Sanmsin pou chapé hòd sé Filistin-lan? (Jij 15:14-16)

⁴ Apwézan, annou konsidiwé yon ègzanp ki ka moutwé mannyè Sanmsin té konfyé Jéhova èk dépan asou’y pou sipòté’y. La té ni yon lokazyon lè lawmé Filistin alé Lihi pou tjenbé Sanmsin. Pitèt plas sala té adan vil Jouda. Sé nonm-lan an Jouda té tèlman pè, yo désidé pou bay sé Filistin-lan Sanmsin. Wi, sé jan Jouda, pèp Sanmsin menm, ki mawé’y byen fò épi dé (2) kòd nèf. Épi yo mennen’y bay sé Filistin-lan. (Jij 15:9-13) Kanmenm, ‘lèspwi Jéhova bay Sanmsin fòs-la’ pou pété sé kòd-la. Èvèk lè i chapé, ‘i jwenn on zo machwè on mal bouwik ki té tou fwé’. I pwan’y èk i ‘tjwé yon mil (1,000) nonm’ épi’y!​—Li Jij 15:14-16.

5. Pouki nou sa di Sanmsin té ka apiyé Jéhova?

⁵ Pouki Sanmsin té sèvi yon zo machwè on bouwik? Nou mandé kèstyon sala paskè moun pa té ka sèvi sa kon on fèman. Mé Sanmsin pa té ni pyès dout Jéhova té kay édé’y bat sé Filistin-lan épi népòt fèman i té ni. Wi, nonm fidèl sala, sèvi zo machwè yon bouwik pou fè divwa Jéhova paski sé sa ki té avélab. Èk i té ni siksé paski i té apiyé asou Jéhova.

6. Lè Jéhova mandé nou pou fè kéchòy, kisa i kay ban nou?

⁶ Jéhova kay ban nou kouway-la nou bouzwen pou fè népòt sa i di nou pou fè, menm si sa i mandé nou pou fè-a ka gadé enposib. Èk Bondyé sa édé nou adan on mannyè kisa étonnen nou! Alò, si nou mété konfyans nou an Jéhova, i kay édé nou pou fè volonté’y menm kon i té édé Sanmsin.​—Pwov. 16:3.

7. Ki ègzanp ki ka moutwé i enpòtan pou gadé pou diwèksyon Jéhova?

⁷ An pil sé fwè èk sè nou-a ki ka édé bati sé plas adowasyon nou-a ja moutwé yo ka konfyé Jéhova. An tan pasé, sé fwè-a ki té bizwen on plas adowasyon té ni wèskonsabilité-a pou fè plan pou èk bati plas adowasyon sala. Mé apwézan, pli èk pli moun ka batizé, konsa nou bouzwen pli plas pou adowé Jéhova. Alò ògannizasyon-an té bizwen fè chanjman. Konsa, sé fwè-a ki ka pwan douvan an bwanch-lan pou achté pwopiyétè èk wanjé yo, chaché diwèksyon Jéhova épi éséyé pou fè bagay on diféwan mannyè. Robert, on fwè ki twavay asou diféwan pwojé oliwon latè-a di: “An koumansman-an, i pa té ézé pou nou sèvi on mannyè ki nèf pou fè bagay, paski pou konmen lanné nou té ja abitwé ka fè bagay adan on diféwan mannyè. Mé sé fwè-a té pawé pou fè chanjman. Èk i a klè, Jéhova benni yo èk twavay yo.” Sa sé yonn an sé mannyè-a Jéhova ka djidé pèp li pou akonpli divwa’y. Alò tanzantan, nou tout ni pou mandé kò nou, ‘Ès mwen ka gadé pou diwèksyon Jéhova? Èk ès mwen pawé pou fè chanjman pou sèvi’y an pli mèyè mannyè-a ki posib?’

SANMSIN TÉ AKSÈPTÉ ÈD JÉHOVA

8. Kisa Sanmsin té fè lè’y té byen swèf?

⁸ Ou pé chonjé lòt bagay Sanmsin té fè ki té èstòdinè. Pou ègzanp, i tjwé yon lyon èk i déchiwé’y an dé (2) moso san pyès fèman. Épi pli ta, i tjwé twant (30) nonm Filistin pa kò’y tousèl an vil Achkilonn. (Jij 14:5, 6, 19) Wi, Sanmsin té sav i pa té kay sa janmen fè sé bagay sala san èd Jéhova. Anfen, i té ka toujou gadé pou èd Jéhova. Pou ègzanp, apwé Sanmsin té fini tjwé yon mil (1,000) nonm Filistin, i té si tèlman swèf, mé la pa té ni pyès glo pou’y bwè. Konsa, ki sa i té fè? Èben pito i dépan asou kò’y pou jwenn glo, i mandé Jéhova pou èd.​—Jij 15:18.

9. Ki mannyè Jéhova wéponn lapwiyè Sanmsin? (Jij 15:19)

⁹ Jéhova fè on miwak pou wéponn lapwiyè Sanmsin pou èd. I fè glo sòti adan on tou. Lè Sanmsin bwè glo sala ‘sa wéfwéchi’y èk kouway li viwé.’ (Li Jij 15:19) Bon. I ka sanm sous glo sala té la lè pwòfèt Sanmyèl té ka ékwi liv Jij. Konsa, lè sé jan Izwayèlayt-la té wè sous glo sala, sa pitèt fè yo chonjé yo té sa dépan asou Jéhova pou èd.

10. (a) Pou nou wèsté fidèl ba Jéhova, kisa nou bizwen fè? (b) Ki èd Jéhova ka ban nou? (Gadé pòtwé-a osi.)

¹⁰ Ki nou ni talan, ki nou ja fè an chay bagay an sèvis Jéhova, nou ni pou dépan asou Jéhova pou èd. Nou sav, sèl mannyè nou kay sa fè sa Jéhova mandé nou pou fè, sé si nou dépan asou’y pou èd. Konsa, nou ni pou ni imilité èk pa dépan asou kò nou. Chonjé, Sanmsin té twapé kouway-la i té bizwen-an lè i bwè glo-a Jéhova té potjiwé-a. Konsa, menm kon Sanmsin, nou bouzwen aksèpté èd Jéhova pou nou sa wèsté fidèl pou li.​—Maf. 11:28.

11. (a) Kisa ki édé Aleksey aji épi mové pèsikasyon? (b) Ki mannyè nou sa moutwé nou ka dépan asou Jéhova pou èd?

¹¹ Annou konsidiwé ègzanp yon fwè nou ki sòti Wisi; non’y sé Aleksey. I té ni pou aji épi mové pèsikasyon. Mé kisa ki édé’y tjébé fò anba sé pèsikasyon sala? Li èk madanm li té ni labitid-la pou li Bib-la èk fè létid fanmi yo wèglé. I di: “Mwen ka fè sa mwen pé pou mwen kontiné létid pèsonnèl mwen èk pou li Bib-la touléjou. Konsa, toulé bonmaten, mwen épi madanm mwen ka diskité tèks-la pou jounen-an èk nou ka pwédyé ansanm.” Kisa nou sa apwann an ègzanp yo? Pito nou dépan asou kò nou menm, nou ni pou dépan asou Jéhova. Mé ki mannyè nou kay sa fè sa? Nou kay sa fè sa, lè nou fè sé bagay sala wéglé: étidyé Bib-la, pwédyé, atandé mitin èk pwéché. Èk lè nou fè sa, nou kay fòtifyé lafwa nou. Èk pli lafwa nou fò, sé pli nou kay apiyé asou Jéhova. Épi Jéhova kay ban nou èd-la nou bizwen-an pou kontiné sèvi’y. I té fòtifyé Sanmsin, épi nou asiwé i kay fòtifyé nou tou!

SANMSIN PA TÉ DOUBOUT FÈ DIVWA JÉHOVA

12. (a) Ki mové disizyon Sanmsin té fè? (b) Ki òpòtyounité Sanmsin pèd paski i té mayé Dilayla?

¹² Menm kon nou, Sanmsin pa té pawfé. Alò, délè i fè mové disizyon. Anfen, la té ni on disizyon i fè ki mennen mové wézilta. Apwé Sanmsin té on jij pou tjèk tan, ‘i vini enmen on fanm yo ka kwiyé Dilayla, ki sòti an Fon Sorèk.’ (Jij 16:4) Mé avan sa, Sanmsin té pou mayé on fanm Filistin. Épi sé Jéhova ki té diwèkté’y pou fè disizyon sala paski sa té kay bay yo n òpòtyounité pou goumen kont sé Filistin-lan. Bon. Pli ta, Sanmsin wèsté adan on kay on fanm vyé lavi an Gaza, vil sé Filistin-lan. Asou lokazyon sala, Bondyé bay Sanmsin kouway-la pou tiwé dé (2) lapòt bayè vil-la èk chayé yo alé. Konsa, vil-la té ni mwens pwotèksyon. (Jij 14:1-4; 16:1-3) Kanmenm, i ka sanm Dilayla sété on Jwif. Alò, wilasyon Sanmsin épi’y pa té kay ba’y yon òpòtyounité pou goumen kont sé Filistin-lan.

13. Kisa Dilayla té fè Sanmsin?

¹³ Magwé Dilayla sété madanm Sanmsin, sa pa té anpéché’y aksèpté an chay lajan an lanmen sé Filistin-lan pou’y twayi Sanmsin. Nou pé mandé, ‘Ès lanmityé Sanmsin pou Dilayla té vèglé’y, konsa i pa té sa wè sa Dilayla té ni plan pou fè?’ Nou pa asiwé. Mé sa nou sav sé sa; Dilayla kontiné anbété Sanmsin, ka di’y ‘Koumannyè ou otan fò konsa? Koté ou pwan tout kouway sala? Si ou enmen mwen, ou kay di mwen sigwé’w.’ Alafen, lè Sanmsin pa té sa pwan’y ankò, i di Dilayla sigwé’y. Malèwèzman, lèwè sala té annékòz Sanmsin pou pèd kouway èstòdinè-a Jéhova té bay-la. Èk an plis di sa, i osi donmajé wilasyon’y épi Jéhova pou on ti mouman.​—Jij 16:16-20.

14. Kisa Sanmsin té èspéyansé paski i té ka konfyé Dilayla?

¹⁴ Sanmsin té ka konfyé Dilayla andji i konfyé Jéhova èk a kòz di sa i èspéyansé an chay soufwans. Pou ègzanp, lè sé Filistin-lan tjébé’y, yo tiwé zyé’y. Yo mété’y an pwizon Gaza, menm plas-la koté i té waché sé bayè-a. Sé moun-lan fè’y vini yon èslav pou péyé pou sa i té fè yo. Épi yo mété’y pou pilé gwenn. Apwé sa, sé Filistin-lan mennen Sanmsin pou yonn an sé sélébwasyon yo-a. La, yo ofè on gwo sakwifis bay dyé yo, Dégonn, paski yo té kwè sété li ki té édé yo tjébé Sanmsin. Yo té mennen Sanmsin an fèt-la pou’y té sa ba yo anmizman, épi pou yo pwan’y sèvi wizib.—Jij 16:21-25.

15. Ki mannyè Sanmsin moutwé i té ka kontiné apiyé asou Jéhova? (Jij 16:28-30) (Gadé pòtwé-a ki asou kouvèti-a.)

¹⁵ Sanmsin té fè on gwo lèwè. Mé i pa ladjé, i kontiné sèvi Jéhova. I gadé pou yon òpòtyounité pou’y akonpli twavay-la Jéhova té ba’y pou fè kont sé Filistin-lan. (Li Jij 16:28-30.) Konsa Sanmsin plédé épi Jéhova. I di’y: “Kité mwen pwan wivanj asou sé Filistin-lan.” Épi Dyé vwé-a wéponn lapwiyè Sanmsin. Èk yon fwa ankò, i viwé ba’y kouway èstòdinè-a. Épi kisa ki wézilta-a? Kou sala, Sanmsin tjwé twòp pli Filistin pasé i té tjwé diwan lavi’y.

16. Ki lison nou sa apwann hòd lèwè-a Sanmsin té fè-a?

¹⁶ Magwé Sanmsin té soufè pou lèwè’y, i pa té janmen doubout éséyé fè divwa Jéhova. Alò, menm si nou fè on lèwè èk nou bizwen kowijman, èben nou pèd on pwivilaj, sé pou nou pa janmen doubout sèvi Jéhova. Bon. Chonjé, Jéhova toujou pawé pou pawdonnen nou. (Sam 103:8-10) Konsa, menm si nou fè on lèwè, Jéhova kay ban nou fòs-la nou bizwen pou fè divwa’y menm kon i té fè bay Sanmsin.

17-18. Ki ankouwajman ou twapé an ègzanp fwè Michael? (Gadé pòtwé-a osi.)

¹⁷ Annou konsidiwé ègzanp yon fwè; non’y sé Michael. I té byen anbawasé lè i vini pou sèvis li bay Jéhova. I té on sèvant ministiryal èk on piyonnè wèglé. Malèwèzman, i fè on lèwè ki annékòz li pou pèd sé pwivilaj-la i té ka enjwi an kongwigasyon-an. Michael di: “Avan sa, bagay té bon! Épi apwézan, sé konmsi m’a sa fè anyen an sèvis Jéhova.” I kontiné ka di: “Mwen sav Jéhova pa té kay janmen abandonnen mwen. Mé mwen té ka katjilé, ‘Ès wilasyon mwen épi’y kay janmen viwé kon’y té yé avan? Èben ès mwen té kay wann sèvis an plen an kongwigasyon-an ankò?’”

¹⁸ Mé Michael té ditèminé pou pa ladjé. I di: “Mwen twavay wèd pou vini pli pwé Jéhova. Mwen té ka fè étid mwen, mèdité, épi pwédyé bay Jéhova.” Apwé on tan, fwè Michael viwé jwenn sé pwivilaj li-a ankò. Èk apwézan, i ka wann sèvis kon yon ansyen èk on piyonnè wèglé. Fwè-a di: “Enkouwajman èk sipò mwen wisouvwè, èspwèsman hòd sé ansyen-an, édé mwen wéyalizé Jéhova enmen mwen toujou. Konsa, yon fwa ankò, mon sa wann sèvis an kongwigasyon-an épi on konsyans ki nèt. Èspéyans sala édé mwen wè, Jéhova kay pawdonnen népòt moun ki vwéman wépanti.” Alò fwè èk sè, si nou fè on lèwè èk nou chanjé mannyè nou èk kontiné dépan asou Jéhova, nou sa ni asiwans-lan ki i kay sèvi nou èk i kay benni nou.​—Sam 86:5; Pwov. 28:13.

19. Koumannyè ègzanp Sanmsin ja fòtifyé’w?

¹⁹ An atik sala, nou té wè détwa bagay ki té fèt an lavi Sanmsin. Sanmsin pa té pawfé. Jis apwé i fè on lèwè èk di Dilayla sigwé’y, i pa té doubout éséyé pou plè Jéhova. Épi Jéhova kontiné sèvi’y adan on mannyè ki té èstòdinè. Osi, Jéhova kontiné gadé’y kon on nonm ki ni an pil lafwa. Épi an Hibrou chapit 11, i mété non’y anpanmi on gwoup moun ki té fidèl pou li. Alò, sa ka ankouwajé nou pou wè nou ka sèvi Papa nou ki an syèl, ki enmen nou an chay, ki pawé pou ban nou fòs èspwèsman lè nou fèb. Konsa, menm kon Sanmsin annou sipliyé Jéhova èk di’y: ‘Tanpwi souplé chonjé mwen. Bondyé mwen, souplé, ban mwen fòs.’​—Jij 16:28.