Sé Jenn Sésé-a​—Nou Ka Ankouwajé Zòt Pou Fè Éfò Pou Vini An Pli Mèyè Kwityen

1. Kisa on Kwityen ni pou fè si i vwéman vlé swiv ègzanp Jézi?

DÉLÈ nou ka sipwi, avan nou bat zyé nou, an ti manmay nou wè tou piti ja pwofité byen vit épi i ja vini gwan. Kanmenm, sa sé on bagay ki natiwèl pou yo pwofité san yo fè anyen. Mé ès sé konsa i yé pou on Kwityen ki vwéman vlé swiv ègzanp Jézi? Wépons-lan sé non. Nou ni pou fè anpil éfò. (1 Kòr. 13:11; Hib. 6:1) Nou ni pou fè éfò pou ni on bon wilasyon épi Jéhova. Osi, nou bizwen lisentèspwi pou édé nou kiltivé bon kawaktè ki ka plè’y, dévèlopé bon abilité, èk pou pwépawé pou aksèpté pli wèskonsabilité pli ta an lavi nou.​—Pwov. 1:5.

2. Kisa nou apwann an Jennésis 1:​27? Èk kisa nou kay diskité an atik sala?

² Jéhova kwéyé nonm èk fanm. (Li Jennésis 1:​27.) I byen ézé pou wè on nonm èk fanm fèt diféwan. Mé yo osi diféwan an lòt mannyè. Pou ègzanp, Jéhova fè nonm èk fanm pou ni diféwan wèskonsabilité. Épi yo toulédé bizwen ni kawaktè èk abilité ki kay édé yo pòté wèskonsabilité yo. (Jen. 2:​18) Épi an atik sala, nou kay konsidiwé sa on jenn sè sa fè pou vini on pli mèyè Kwityen, sa vlé di on Kwityen ki matwité.b Èk osi, kisa i sa fè pou pòté wèskonsabilité’y byen. Èk an lòt atik-la, nou kay konsidiwé kisa sé jenn fwè-a sa fè.

KILTIVÉ KAWAKTÈ KI KA PLÈ BONDYÉ

3-4. Ki koté sé jenn sésé-a sa twouvé bon ègzanp pou yo sa imité? (Gadé pòtwé-a osi.)

³ Bib-la mansyonnen an chay madanm wimakab ki té enmen Jéhova èk ki té sèvi’y épi tout tjè yo. (Gadé atik-la “Women in the Bible​—What Can We Learn From Them?” asou jw.org) Yo té ni bon kawaktè ki té ka plè Bondyé. Mé sé sè sala ki mansyonnen an Bib-la, sé pa sèl ègzanp-lan zòt ni! Zòt sa twouvé an kongwigasyon zòt, bon madanm Kwityen ki enmen Jéhova. Épi zòt sa éséyé pou imité ègzanp yo.

⁴ Zòt sé jenn sésé-a, pwan on ti tan èk katjilé: ‘Kilès sè ki sé on bon ègzanp mwen sa imité?’ Épi apwé ou fè sa, katjilé asou sé bon kawaktè yo-a èk asou mannyè ou sa imité sé bon kawaktè sala. Apwézan, annou diskité twa (3) kawaktè madanm Kwityen ki matwité sipozé ni.

5. Pou swiv ègzanp Jézi, pouki i enpòtan pou on madanm ni imilité?

⁵ Pou nou sa swiv ègzanp Jézi, nou bizwen imilité. Konsa, si on madanm abésé kò’y, i kay ni on bon wilasyon épi Jéhova èk épi lézòt. (Jémz 4:6) Pou ègzanp, on madanm ki enmen Jéhova kay abésé kò’y pou swiv diwèksyon-an Jéhova bay an 1 Kòrint 11:3. An lévanjil sala Jéhova ka èspliké ki moun i bay lotowité-a pou pwan douvan an kongwigasyon-an èk an fanmi-a.c

6. Sé jenn sésé-a, kisa zòt sa apwann an ègzanp Ribèka?

⁶ Annou konsidiwé ègzanp Ribèka. Ribèka sété on madanm ki té savan, èk i té fè disizyon ki té méwité kouwaj. (Jen. 24:58; 27:​5-​17) Mé an menm lè-a, i té konnèt plas li; zòwèy li pa té pli ho pasé tèt li. I té konnèt kilè pou pwan aksyon èk ki aksyon pou pwan. Konsa, i té ni wèspé, i té ka abésé kò’y, èk i té toujou pawé pou swiv diwèksyon. (Jen. 24:17, 18, 65) Konsa, sé sésé-a, si zòt ni imilité menm kon Ribèka, épi zòt ka sipòté sé fwè-a Jéhova ja bay wèskonsabilité-a pou pwan douvan, zòt kay on bon ègzanp pou tout moun an fanmi zòt èk an kongwigasyon-an.

7. Koumannyè jenn sè sa imité ègzanp Èsta?

⁷ Tout Kwityen ki matwité bouzwen konnèt limit yo. Bib-la ka di an Pwovèb 11:2, ‘moun ki konnèt limit yo ni lasajès.’ Nou ni ègzanp Èsta, on sèvant Jéhova ki té fidèl èk ki té konnèt limit li. Èk paski i té konnèt limit li, i pa té pwan dwa ki pa té sa’y. Èsta té kouté konsèy-la gwan kouzen’y, Mòdikay, té ba’y-la èk i té swiv li. (Èsta 2:​10, 20, 22) Jenn sè, ou sa moutwé ou konnèt limit ou, si ou mandé lézòt pou bon konsèy èk apliké yo.​— Titòs 2:​3-5.

8. Ki mannyè 1 Timòfi 2:​9, 10, sa édé sésé fè bon chwa lè i vini pou abiman yo, èk mannyè yo ka penyen chivé yo?

⁸ Èsta té ‘bèl èk i té byen tayé’; èk i té ka véyé sa i té ka mété asou’y. I pa té ka abiyé pou moun enmen gadé’y èben pou moun ba’y atansyon. (Èsta 2:​7, 15) Mé kèstyon-an sé, ki mannyè zòt sé sésé-a sa twapé bennéfis an ègzanp Èsta? Lévanjil-la 1 Timòfi 2:​9, 10 sa édé nou. (Li’y. ) La, zapòt Pòl di sé madanm-lan ni pou abiyé adan on mannyè ki ka moutwé wèspé pou Bondyé. Sa vlé di, yo toujou ni pou abiyé adan on mannyè ki pwòp, épi wèspèktab. Épi yo ni pou moutwé konsidéwasyon pou mannyè abiman yo sa afèkté lézòt. Konsa, sé sésé nou-a ki ja vini Kwityen ki matwité, sé pa dé kontan zòt ka fè tjè nou kontan, pou mannyè-a zòt ka kontiné pou swiv konsèy-la pou abiyé adan on mannyè ki pwòp èk wèspèktab!

9. Kisa nou sa apwann an ègzanp Abigél?

⁹ Bon jijman sé on kawaktè tout sésé ki vlé vini on kwityen ki matwité bizwen ni. Mé kèstyon-an sé, kisa ki bon jijman? Èben, lè on moun ni bon jijman, i ni abilité-a pou di kisa ki dwèt èk kisa ki mové, èk i ka fè sa ki dwèt. Annou konsidiwé ègzanp Abigél. Mawi’y té fè on mové disizyon ki té kay mennen kalamité asou chak moun an fanmi’y. Mé madanm li, Abigél, té sèvi bon jijman èk i pwan aksyon la menm pou sové lavi yo tout. (1 Sm 25:14-​23, 32-​35) Bon jijman sa osi édé nou pou sav kilè pou nou palé èk kilè pou nou wèsté an silans. I kay édé nou pou pa fouyé né nou an zafè lézòt. Sitou lè nou pa ni dwa-a pou konnèt zafè moun-lan èben moun-lan pa ka santi konfòtab pou palé konsèné zafè’y.​—1 Tèsa. 4:​11.

DÉVÈLOPÉ BON ABILITÉ KI SA ÉDÉ’W AN LAVI’W TOULÉJOU

10-11. Lè’w apwann pou li èk ékwi byen, ki bennéfis la ni pou ou épi lézòt? (Gadé pòtwé-a osi.)

¹⁰ On madanm Kwityen ni pou dévèlopé bon abilité. Adan sé abilité-a on jenn fi ka apwann dépi i toupiti, kay kontiné bennéfyé’y pou tout lavi’y. Konsidiwé détwa ègzanp.

¹¹ Apwann mannyè pou li èk ékwi byen. La ni kilti koté yo kwè, i pa enpòtan pou on fanm apwann pou li èk ékwi. Kanmenm, nou sav i enpòtan pou tout Kwityen apwann pou li èk ékwi.d (1 Tim. 4:​13) Konsa, menm si i difisil, pa kité anyen anpéché’w pou apwann li èk ékwi byen. Ki bennéfis ki kay la pou ou? Èben, sé abilité sala kay édé’w pou jwenn twavay. I kay osi pli ézé pou ou étidyé Bib-la épi enstwi lézòt. Anplis di sa, ou kay vini pli pwé Jéhova lè’w ka li Pawòl li èk mèdité asou’y.​—Jòch. 1:8; 1 Tim. 4:​15

12. Kisa nou apwann an Pwovèb 31:26 ki sa édé nou konminiké byen?

¹² Apwann mannyè pou konminiké byen épi lézòt. I byen enpòtan pou Kwityen ni abilité-a pou konminiké byen. Épi a ling épi sa, disip Jémz té ban nou bon konsèy. I di an Jémz 1:​19 “Sé pou zòt toujou pawé pou kouté, èk pa pwésé palé”. (Jémz 1:​19) Lè’w ka kouté byen lè lézòt ka palé, sa kay édé’w mété kò‘w an soulyé yo èk konpwann mannyè yo ka santi-a. (1 Pita 3:8) Mé si ou pa konpwann sa moun-lan ka di’w-la, èben mannyè i ka santi-a, souplé mandé kèstyon ki apwopwiyab. Èk apwé, pwan an ti tan pou katjilé avan ou palé. (Pwov. 15:28) Ou sa mandé kò’w: ‘Èskè sa mwen kay di’y la vwé? Èskè i kay ankouwajé moun-lan? Èskè mwen kay di’y adan on mannyè ki wèspèktab èk ki ka moutwé jantiyès?’ Mi on bon bagay ou sa fè. Ou sa imité sé sésé-a ki ka kouté byen èk ki ka palé épi jantiyès. (Li Pwovèb 31:26.) Konsa, katjilé asou sa yo ka di èk mannyè-a yo ka di’y. Èk lè ou fè sa, i kay pli ézé pou ou vini bon jan épi lézòt èk pou ou ni lapé épi yo.

13. Ki mannyè sé jenn sésé-a sa apwann mennajé on kay? (Gadé pòtwé-a osi.)

¹³ Apwann mannyè pou mennajé on kay. I enpòtan pou zòt sé jenn sésé-a apwann mannyè pou mennajé on kay. La ni an chay plas koté sé madanm-lan ka fè pwèskè tout twavay kay-la. Alò, si zòt pa konnèt mannyè pou fè twavay sala byen, zòt sa mandé manman zòt pou moutwé zò, èben on lòt sésé an kongwigasyon-an ki konnèt mannyè pou fè twavay sala byen. Pou ègzanp, on sè, non’y sé Cindy, di: “Yon bon bagay manman mwen enstwi mwen, èk mwen ka chéwi’y an pil sé sa: si ou twavay wèd ou kay twapé lajwa. Anfen, paski mwen apwann mannyè pou nétwayé, tjwit manjé, koud èk byen sèvi lajan, mwen té sa otjipé kò mwen èk fè pli bay Jéhova. Manman mwen osi enstwi mwen mannyè pou mwen donnan. Épi a kòz di sa, mwen vini konnèt an chay fwè èk sè; épi mwen té sa imité bon ègzanp yo.” (Pwov. 31:15, 21, 22) Konsa, on madanm ki ka twavay wèd, ki donnan, èk ki ja apwann mannyè pou mennajé on kay, sé on bennédiksyon pou tout moun an fanmi’y èk an kongwigasyon-an.​—Pwov. 31:13, 17, 27; Twav. 16:15.

14. Kisa ou apwann an èspéyans Crystal? Èk kisa ou ni pou toujou chonjé?

¹⁴ Apwann mannyè pou sipòté kò’w. Tout Kwityen ki matwité sipozé apwann mannyè pou sipòté kò yo èk pou kontanté épi sa yo ni. Sa sé on bagay ki byen enpòtan. (Filip. 4:​11) Pou ègzanp, on sésé yo ka kwiyé Crystal di: “Lè mwen té ka atandé gwan lékòl, pawan mwen ankouwajé mwen pou chwazi sé klas-la ki té kay édé mwen dévèlopé bon ladwès mwen té sa sèvi pli ta an lavi mwen. Yonn an sé klas-la papa mwen ankouwajé mwen pou pwan, sété klas-la ki té ka enstwi mannyè pou mennajé lajan adan on konpanni. Èk sa édé mwen an pil!” Alò, sé jenn sésé-a, i pa asé pou apwann pou fè lajan tousèl. Mé zòt osi ni pou apwann pou pa bobansé èk sèvi lajan zòt byen. Mété on ti lavi asou koté lè ou sa. (Pwov. 31:16, 18) Èk pa obliyé pou toujou kontanté épi sa zòt ni; èk pa mété kò zòt an dèt ki pa nésésè. Vwéman, sa kay édé zòt pou fè plis bay Jéhova.​—1 Tim. 6:8.

PWÉPAWÉ APWÉZAN POU’W SA AKSÈPTÉ PLI WÈSKONSABILITÉ PLI TA AN LAVI

15-16. Pouki nou sa di sésé ki pa mayé ni anpil valè? (Mak 10:29, 30)

¹⁵ Lè ou dévlopé bon kawaktè ki ka plè Jéhova, èk ou dévlopé bon abilité, sa kay édé’w épi sé chwa-a ou kay fè an lavi’w an tan pou vini. Annou konsidiwé yonndé bagay ou pé chwazi pou fè.

¹⁶ Ou pé désidé pou pa mayé apwézan. Adan madanm ka désidé pou pa mayé menm si kilti yo ka ankouwajé yo pou mayé. Épi a ling épi sa Jézi di an Mafyou 19:12, adan p’òkò mayé pou diféwan wézon. (Maf. 19:10-​12) Sé sésé nou-a, menm si zòt p’òkò mayé, an zyé Jéhova èk Jézi, zòt ni anpil valè. Anfen, tout oliwon latè-a, sé sésé-a ki pa mayé sé on bon ègzanp an kongwigasyon-an. Èk paski yo ni an chay lanmityé èk vwéman mélé épi lézòt, yo ja vini sésé, tantant, manman èk gwan manman pou an chay moun an kongwigasyon-an.​—Li Mak 10:29, 30; 1 Tim. 5:2.

17. Ki mannyè an jenn sésé sa pwépawé pou wann sèvis an plen?

¹⁷ Ou sa wann sèvis an plen. Sam 68:11 ka di: “Sé madanm-lan ki ka pwéché bon nouvèl-la sé an gwan lawmé.” Wi, sé sésé nou-a ni on gwan pa an twavay pwèchman-an oliwon latè-a. Mé kèstyon-an sé sa, ‘Ès ou sa fè plan apwézan pou wann sèvis an plen?’ Pitèt ou sa wann sèvis kon on piyonnè. Pitèt ou sa volonté pou twavay konstwiksyon? Èben pitèt ou sa wann sèvis an Bèfèl. Népòt sa ou vlé fè, toujou mennen’y bay Jéhova an lapwiyè. Épi ou sa palé épi lézòt ki ja ka fè sa ou vlé fè-a, èk ou sa mandé yo kisa ou ni pou fè pou kwalifyé. Épi apwé sa, ou sa désidé kisa ou ni pou fè pou akonpli plan’w. Konsa, si ou wann sèvis an plen, i kay fè’y posib pou ou fè an chay bon bagay an sèvis Jéhova.

18. Ki diféwan kèstyon on sésé ni pou mandé kò’y pou’y fè asiwé i chwazi on bon mawi? (Gadé pòtwé-a osi.)

¹⁸ Ou pé désidé pou mayé. Sé kawaktè-a èk sé abilité-a nou ja diskité-a, kay édé’w vini on bon madanm. Kanmenm, si ou désidé pou mayé, ou sipozé chwazi moun-lan ou vlé mayé-a byen, paski sa sé yonn an sé disizyon-an ki pli enpòtan ou sa janmen fè. Chonjé, lè ou mayé, ou kay vini anba lotowité mawi’w. (Ronm 7:2; Èfés. 5:​23, 33) Konsa, i kay bon pou mandé kò’w: ‘Ès moun-lan mwen vlé mayé-a sé on Kwityen ki matwité? Ès i ka mété Jéhova pwèmyé an lavi’y? Ès i ka fè bon disizyon? Si i fè on lèwè, ès i ka di i ni tò? Ès i ni wèspé pou fanm? Ès i kay sa édé mwen pou tjenn wilasyon mwen épi Jéhova fò? Ès i sa otjipé mwen byen? Ès i sa potjiwé ban mwen? Ès i kay on bon jan pou mwen? Ès i ni abilité-a ki nésésè pou fè wèskonsabilité’y byen? Ki asaynman i ni an kongwigasyon-an? Épi ki mannyè i ka pwan ka sé wèskonsabilité sa-a?’ (Louk 16:10; 1 Tim. 5:8) Kanmenm, si ou vlé jwenn on fwè ki kay fè on bon mawi, ou menm kay ni pou pawé pou vini on bon madanm.

19. Pouki on madanm sa kontan Bib-la ka kwiyé’y on ‘moun ki ka édé mawi’y’?

¹⁹ Jéhova sé moun-lan ki pli ho-a. Èk byen souvan Bib-la ka dékwi Jéhova kon yonn-lan ki ka ‘édé’ moun. (Sam 54:4; Hib. 13:6) An menm mannyè-a, Bib-la ka osi di, on bon madanm sé on ‘moun ki ka édé [mawi’y]’. Èk wèskonsabilité sala sé vwéman on lonnè. Èk on madanm sa kontan pou ni lonnè sala. (Jen. 2:​18) Alò, on bon madanm, ka vwéman sipòté mawi’y. Èk paski i enmen Jéhova, i ka fè tout sa i pé pou fè lézòt wè bon kawaktè mawi’y. (Pwov. 31:11, 12; 1 Tim. 3:​11) Konsa, zòt sé jenn sésé-a, zòt sa pwépawé kò zòt dépi apwézan pou vini on bon madanm, lè zòt fòtifyé lanmityé zòt pou Jéhova, épi édé lézòt an kay zòt èk an kongwigasyon-an.

20. Kisa on bon manman sa fè bay fanmi’y?

²⁰ Ou pé désidé pou vini on manman. Apwé ou mayé, ou épi mawi’w pé désidé pou fè ich. (Sam 127:3) Konsa, i kay bon pou ou katjilé kisa ou bizwen pou vini on bon manman. Sé kawaktè-a èk sé abilité-a nou ja diskité an atik sala, kay édé’w si ou désidé pou mayé èk vini on manman. Anfen, lè ou sé on bon manman, èk ou ka moutwé lanmityé, jantiyès èk pasyans, ou kay édé fanmi’w ni lakontanman; èk manmay ou kay santi ki yo sòv èk pawan yo enmen yo.​—Pwov. 24:3.

21. Ki mannyè ou ka santi konsèné sé jenn sè nou-a? Èk pouki ou ka santi kon sa? (Gadé pòtwé-a ki asou kouvèti-a.)

²¹ Tout sé jenn sè nou-a, nou enmen zòt an chay pou sa zòt ka fè pou Jéhova èk pou sé fwè èk sè-a. (Hib. 6:​10) Zòt ka twavay wèd pou kiltivé bon kawaktè ki ka plè Bondyé. Zòt ka twavay wèd pou dévèlopé bon abilité ki kay édé zòt touléjou an lavi zòt, èk ki kay mennen lézòt bennéfis tou. Èk zòt ka twavay wèd pou pwépawé apwézan pou aksèpté pli wèskonsabilité pli ta an lavi zòt. Alò, nou vlé di zòt tout, sé jenn sè nou-a, ògannizasyon Jéhova ka vwéman chéwi zòt!