Sé Jenn Fwè-a​—Nou Ka Ankouwajé Zòt Pou Fè Éfò Pou Vini An Pli Mèyè Kwityen

1.Kisa on fwè sa fè pou imité ègzanp Jézi?

ZAPÒT Pòl té di sé Kwityen-an an Kòrint: “Fwè épi sè, doubout katjilé kon manmay. . .Zòt sipozé katjilé kon gwan moun.” (1 Kòr. 14:20) Jòdi jou, tout fwè ki vlé imité ègzanp Jézi ni pou apliké konsèy sala. Ki mannyè yo sa fè sa? Pou fè sa, yo ni pou obéyi lwa Bondyé èk viv lavi yo an ling épi sé pwensip-la ki Bib-la. (Louk 2:​52) Mé mi an kwèsyon nou vlé konsidiwé: Pouki i tèl enpòtan pou sé jenn fwè-a fè éfò pou vini an pli mèyè Kwityen?

2-3. Pouki i enpòtan pou sé jenn fwè-a vini Kwityen ki matwité?

² San dout, zòt jenn fwè pitèt ja katjilé asou sé wèskonsabilité-a zòt sa ni an tan pou vini. Pitèt zòt vlé vini an piyonnè wéglé, an sèvant ministiriyal èben an ansyen. Èben pitèt zòt vlé mayé èk ni yonndé ich. Wi, an fwè ni an chay wèskonsabilité ki enpòtan an fanmi-a èk an kongwigasyon-an. (Èfés. 6:4; 1 Tim. 3:1) Kanmenm, pou pòté sé wèskonsabilité sala byen èk ni siksé, zòt ni pou vini Kwityen ki matwité.b

³ Mé kisa ki sa édé zò vini an pli mèyè Kwityen? Pou vini an pli mèyè Kwityen, la ni sèten abilité ki enpòtan zòt kay ni pou dévèlopé. Konsa, zòt jenn fwè, ki abilité zòt ni pou dévlopé? Kisa zòt ni pou fè apwézan pou pwépawé pou népòt wèskonsabilité zòt pé ni an tan pou vini? Èk kisa ki kay édé zòt ni siksé? Annou diskité sa apwézan.

SA OU SA FÈ POU VINI AN PLI MÈYÈ KWITYEN

4. Ki koté ou sa twouvé bon ègzanp pou ou sa imité? (Gadé pòtwé-a osi.)

⁴ Chwazi bon ègzanp pou ou imité. Ou sa twouvé an chay bon ègzanp an Bib-la pou ou imité. Sé nonm sala an Bib-la té enmen Bondyé. Èk yo té ka gadé apwé pèp Bondyé an diféwan mannyè èk yo té ni an chay bon kawaktè. Anplis di sa, ou sa twouvé bon ègzanp anpanmi sé fwè-a ki Kwityen ki matwité an fanmi’w èk an kongwigasyon-an. (Hib. 13:7) Èk plis toujou, ou ni bon ègzanp Jézi Kwi. (1 Pita 2:​21) Konsa, kon ou ka gadé sé ègzanp sala, katjilé asou sé bèl kawaktè-a sé nonm sala ni. (Hib. 12:​1, 2) Èk apwé, mèdité asou koumannyè ou kay imité yo èk sé bèl kawaktè yo-a.

5. Ki mannyè ou sa apwann mannyè pou wéfléchi, èk pouki sa enpòtan? (Sam 119:9)

⁵ Apwann mannyè pou wéfléchi èk pwotéjé katjil ou. (Prov. 3:​21) An nonm ki apwann mannyè pou wéfléchi ka katjilé byen avan i fè an disizyon. Konsa, zòt sé jenn fwè-a, fè éfò pou dévèlopé abilité sala. Mé pouki sa enpòtan? I enpòtan paski jòdi jou an chay jenn moun an latè-a ka fè disizyon pa dibonntèt yo èben silon imosyon yo, èk a kòz di sa, yo ka twapé mové wézilta. (Prov. 7:7; 29:11) Èk osi, télévizyon, pòtwé èk intannèt-la sa enflouwansé katjil ou èk aksyon’w. Konsa, ou ni pou pwotéjé katjil ou. Mé ki mannyè ou sa apwann mannyè pou wéfléchi? Pwèmyéman, ou ni pou apwann, an Bib-la, mannyè Jéhova ka katjilé èk ka santi konsèné diféwan bagay. Èk apwé, katjilé asou sé bennéfis-la ou kay twapé lè’w fè sa Bondyé di’w pou fè. Finalman, sèvi sé pwensip-la ou apwann-lan pou édé’w fè bon disizyon ki kay plè Jéhova. (Li Sam 119:9.) Wi, si ou apwann mannyè pou wéfléchi, sa kay vwéman édé’w vini an pli mèyè Kwityen. (Prov. 2:​11, 12; Hib. 5:​14) Apwézan annou konsidiwé mannyè abilité sala kay édé’w an sé dé sitiwasyon sala: (1) mannyè-a ou ka aji épi sé sésé-a, (2) lè’w ka fè disizyon konsèné lapawans ou.

6. Si an fwè ka katjilé mannyè-a Jéhova ka katjilé, koumannyè sa kay édé’y moutwé sé sè-a wèspé?

⁶ An fwè ki apwann pou katjilé mannyè-a Jéhova ka katjilé kay toujou moutwé fanm wèspé. Annou konsidiwé yon mannyè fwè sa moutwé sé sésé-a wèspé. Jéhova fè nou épi dézi-a pou mayé. Konsa si an fwè vlé mayé, sa sé an bagay ki natiwèl. Mé si an fwè pa vlé mayé, i kay véyé mannyè-a i ka aji épi sé sè-a. Konsa, i pa kay fè anyen ki ka moutwé i entéwésé an sè-a. Sa vlé di, i pa kay di èben voyé pyès konmisyon ki kay fè sè-a kwè i entéwésé adan’y. (1 Tim. 5:​1, 2) Mé si an fwè ka sòti épi an sè, fwè-a sipozé fè asiwé la toujou ni an fwè èben an sè ki matwité épi yo. Èk i ka fè sa paski i vlé plè Jéhova èk i pa vlé sali non sè-a.​—1 Kòr. 6:​18

7. Lè an jenn fwè apwann mannyè pou wéfléchi, koumannyè sa kay édé’y fè bon disizyon lè’y vini pou lapawans li?

⁷ An jenn fwè ki ka apwann mannyè pou wéfléchi ka fè bon disizyon lè’y vini pou lapawans li. Wi, i ni pou fè bon chwa lè’y vini pou abiman’y, chivé’y èk bab li. Èk sa sé paski moun ki pa ka wèspèkté wèg Jéhova ka enflouwansé lamòd-la jòdi jou. Konsa, sé magazen-an plen had ki twò séwé èben had ki ka fè nonm sanm fanm. Alò, an jenn fwè ki vlé vini an pli mèyè Kwityen kay sèvi pwensip Bib èk imité sé bon ègzanp-la an kongwigasyon-an, lè i ka fè disizyon konsèné abiman’y. Konsa, i sa mandé kò’y sé kwèsyon sala: ‘Ès sé chwa-a mwen ka fè konsèné abiman mwen ka moutwé mwen ni katjil Jéhova? Ès abiman mwen ka moutwé mwen ni wèspé pou lézòt? Ès abiman mwen ka moutwé mwen sé an moun ki ka sèvi Bondyé?’ (1 Kòr. 10:31-​33; Titòs 2:6) Bon. An jenn fwè ki apwann mannyè pou wéfléchi, kay ni wèspé sé fwè èk sè-a, èk i kay osi ni favè papa’y ki an syèl.

8. Kisa an jenn fwè ni pou fè pou’y sa vini an moun lézòt sa konfyé?

⁸ Moutwé ou sé an moun lézòt sa konfyé. An jenn moun ki ka pwan sé wèskonsabilité’y-la byen sèwiyé, sé on moun lézòt sa konfyé. (Louk 16:10) Pou édé zòt sé fwè-a vini moun lézòt sa konfyé, annou konsidiwé bon ègzanp Jézi. Jézi ka toujou pwan sé wèskonsabilité-a i té ni-an byen sèwiyé, i pa ka fè bagay vaykivay. Anfen, Jézi té fè tout sa Jéhova té mandé’y pou fè menm si i té difisil délè. Pou ègzanp, lè Jéhova mandé’y pou bay lavi’y pou lézòm, Jézi té fè’y épi bon tjè paski i té enmen moun, èspwèsman sé disip li-a. (Jan 13:1) Konsa, sé pou zòt jenn fwè imité ègzanp Jézi èk twavay wèd pou fè népòt ansayman zòt wisouvwè. Èk si zò ni an bagay pou fè èk zòt pa sav kouman pou fè’y, zòt ni pou abésé kò zòt èk mandé sé fwè-a ki matwité pou èd. Anplis di sa, sé pou zòt fè tout sa zòt pé an népòt ansayman zòt ni. (Ronm 12:11) Wi, Kòlòsé 3:23 di: “Népòt bagay ou ka fè, sé pou ou fè’y épi an bon tjè, akwèdi sé sèvis senyè-a ou ka fè épi sé pa sèvis nonm sèlman”. Bon. Chonjé, zòt pa pawfé èk zòt kay toujou fè lèwè, konsa, abésé kò zòt èk pa pè pou di lè zò fè an lèwè.​—Prov. 11:2.

DÉVÈLOPÉ BON ABILITÉ KI SA ÉDÉ’W AN LAVI’W TOULÉJOU

9.Pouki on jenn fwè ni pou dévèlopé bon abilité?

⁹ Pou ou sa vini an pli mèyè Kwityen, ou ni pou dévèlopé bon abilité ki sa édé’w an lavi’w touléjou. Poutji? Ou wè, sé abilité sala kay édé’w pou aksèpté diféwan wèskonsabilité an kongwigasyon-an. Osi, yo sa édé’w twapé an twavay pou otjipé kò’w èk fanmi’w. Anplis di sa, sé abilité sala kay édé’w ni bon wilasyon épi lézòt. Atjwèlman, annou konsidiwé déotwa abilité ki enpòtan.

10-11. Si on jenn fwè apwann pou li èk ékwi byen, ki mannyè sa kay édé’y èk ki mannyè sa kay édé kongwigasyon-an? (Sam 1:​1-3) (Gadé pòtwé-a osi.)

¹⁰ Apwann mannyè pou li èk ékwi byen. Bib-la di pou an nonm ni siksé èk tjè kontan, i ni pou li pawòl Bondyé èk mèdité asou’y touléjou. (Li Sam 1:​1-3.) Pouki sa enpòtan? Sa enpòtan paski lè i li Bib-la touléjou, i kay konnèt katjil Jéhova. Osi, i kay apwann mannyè pou apliké sé lévanjil-la an lavi’y. (Prov. 1:​3, 4) Pou byen di’w, kongwigasyon-an bizwen fwè ki ka fè sa. Poutji?

¹¹ Paski sé fwè-a ki ka fè sa, kay sa enstwi èk bay konsèy hòd Bib-la ki sa fòtifyé lafwa tout sa ki an kongwigasyon-an. (Titòs 1:9) Vwéman, si ou sa li èk ékwi byen, ou kay sa pwépawé diskou ki kay fòtifyé lafwa sé fwè èk sè-a. Èk osi, ou kay sa bay wépons pou sé kwèsyon-an an sé mitin-lan ki sa édé yo èk ankouwajé yo. Anplis di sa, ou sa ékwi ti pwen ou twapé an létid pèwsonnèl ou, an sé mitin-lan, an asanmblé épi konvansyon. Wi, sé ti pwen sala sa vwéman édé’w bati lafwa’w èk sa vwéman édé’w ankouwajé sé fwè èk sè-a.

12. Ki éfò ou ni pou fè si ou vlé konminiké byen épi lézòt?

¹² Apwann mannyè pou konminiké byen épi lézòt. An fwè ni pou apwann mannyè pou konminiké byen. Wi, an nonm ki ka konminiké byen ni pou kouté lézòt èk i ni pou éséyé konpwann yo osi. (Prov. 20:5) Anfen, i ka éséyé konnèt ki sa ki asou lidé yo èk ki mannyè yo ka santi. Mé i pa sa fè sa, si i pa pasé tan épi moun. Pou ègzanp, si ou ka toujou sèvi pòtab ou pou konminiké épi moun, i kay pli difisil pou ou konminiké épi yo fas a fas. Konsa, kisa ou sa fè? Èben ou ni pou fè éfò-a pou palé épi moun fas a fas.​—2 Jan 12.

13. Ki lòt bagay an jenn nonm sa apwann? (1 Timòfi 5:8) (Gadé pòtwé-a osi.)

¹³ Apwann mannyè pou sipòté kò’w. An fwè ki matwité ni pou sipòté kò’y èk fanmi’y. (Li 1 Timòfi 5:8.) Adan sèten péyi an nonm ka apwann léta papa’y èben léta lòt moun an fanmi’y. Osi, adan lòt péyi an jenn nonm sa apwann an léta padan i an lékòl sèkondè. Kanmenm, i toujou bon pou apwann an léta ki kay édé’w twapé an twavay. (Twav. 18:​2, 3; 20:34; Èfés. 4:​28) Èk mi an bagay pou’w chonjé. Lè ou ka twavay, twavay wèd èk fè asiwé ou toujou fini sa ou koumansé. Si ou fè sa, lézòt kay vwéman wè bon twavay ou èk kay di bon bagay konsèné’w. Konsa, sa kay édé’w twapé an twavay èk tjenn li. Bon. Ou wè, sé kawaktè-a èk sé abilité-a nou té diskité-a, vwéman enpòtan pou an fwè, paski sa kay édé’y pwan ka lòt wèskonsabilité an tan ki ka vini. Konsa, annou konsidiwé kisa adan sé wèskonsabilité sala yé.

PWÉPAWÉ APWÉZAN POU’W SA AKSÈPTÉ PLI WÈSKONSABILITÉ PLI TA AN LAVI

14. Kisa an jenn fwè sa fè pou’y sa pwépawé pou wann sèvis an plen?

¹⁴ Ou sa wann sèvis an plen. An chay fwè ki matwité koumansé wann sèvis an plen lè yo té jenn. Lè an jenn fwè ka wann sèvis kon an piyonnè, sa ka édé’y pou aji épi moun ki ni diféwan kawaktè. Èk sèvis sala ka osi édé an jenn fwè pou sèvi lajan’y byen èk pou pa bobansé lajan’y. (Filip. 4:​11-​13) Si’w ka twouvé’y wèd pou koumansé piyonnè wéglé, ou sa fè sa an chay fwè ja fè. An chay fwè koumansé piyonnè òkzilè èk sa édé yo pou koumansé piyonnè wéglé pli ta an lavi. Apwé sé fwè-a piyonnè pou an tan, sa ka ba yo an chay òpòtyounité pou fè pli bay Jéhova. Pou ègzanp, yo pé wisouvwè an envitasyon pou wann sèvis kon an sèvant konstwiksyonc èben pou wann sèvis an Bèfèl.

15-16. Kisa an jenn fwè ni pou fè si’y vlé wann sèvis kon an sèvant ministiriyal èben an ansyen?

¹⁵ Ou sa vini an sèvant ministiriyal èben an ansyen. Tout fwè sipozé ni dézi-a pou kwalifyé pou yo sa wann sèvis kon yon ansyen an kongwigasyon-an. Bib-la ka di, lè sé fwè-a ka fè fòs kò yo pou wann sèvis kon an ansyen, “sa sé an bon bagay.” (1 Tim. 3:1) Kanmenm, avan an fwè sa wann sèvis kon an ansyen, i ni pou kwalifyé kon an sèvant ministiriyal. Sèvant ministiriyal ka édé sé ansyen-an pou pwan ka sé fwè èk sè-a an kongwigasyon-an. Ni sé ansyen-an ni sé sèvant ministiriyal-la ka moutwé imilité lè yo ka édé sé fwè èk sè-a. Èk yo ka byen zélé lè yo ka pwéché bon nouvèl-la. Bon! Sé jenn fwè-a sa kwalifyé pou wann sèvis kon sèvant ministiriyal lè yo ant disèt (17) èk diznèf (19) lanné di laj. Èk an sèvant ministiriyal ki byen kwalifyé sa vini an ansyen lè i ven (20) lanné di laj.

¹⁶ Bib-la ka di nou, pou an fwè wann sèvis kon an sèvant ministiriyal èben an ansyen, i ni pou kwalifyé. Sé kalifikasyon sala bazé asou lanmityé pou Jéhova, fanmi èk sé fwè èk sè-a. (1 Tim. 3:​1-​13; Titòs 1:​6-9; 1 Pita 5:​2, 3) Konsa, kisa an jenn fwè ni pou fè si’y vlé wann sèvis kon an ministiriyal sèvant èben an ansyen? I ni pou débwiyé pou konpwann sé kalifikasyon-an. I ni pou mandé Jéhova pou édé’y fè sa i ni pou fè pou’y sa kwalifyé. Èk osi, i ni pou mandé Jéhova pou édé’y dévèlopé sé kawaktè-a i bizwen-an.d

17. Kisa ki sa édé an jenn fwè vini an bon mawi èk tèt fanmi? (Gadé pòtwé-a osi.)

¹⁷ Ou sa vini on mawi èk tèt fanmi. Jézi di adan fwè ki matwité kay chwazi pou pa mayé. (Maf. 19:12) Kanmenm, si an fwè chwazi pou mayé, i kay ni pou pwan pli wèskonsabilité kon an mawi èk tèt fanmi. (1 Kòr. 11:3) Jéhova vlé mawi enmen èk otjipé madanm yo. Anplis di sa, Jéhova vlé mawi ni an bon wilasyon épi madanm yo èk i osi vlé yo édé madanm yo ni an bon wilasyon épi’y. (Èfés. 5:​28, 29) Si ou désidé pou mayé, kisa ki sa édé’w fè sa? Chonjé, nou ja diskité bagay tèl kon: mannyè pou wéfléchi, mannyè pou moutwé fanm wèspé, èk mannyè pou vini an moun lézòt sa konfyé. Wi, sé kawaktè èk abilité sala kay édé’w vini an bon mawi èk tèt fanmi.

18. Kisa ki sa édé an jenn fwè vini an bon papa?

¹⁸ Ou sa vini on papa. Apwé ou mayé, ou pé vini an papa. Kisa an jenn fwè sa apwann hòd Jéhova si i vlé vini an bon papa? La ni an chay lison ou sa apwann. (Èfés. 6:4) Pou ègzanp, Jéhova di gason’y Jézi, i enmen’y èk i plè épi’y. (Maf. 3:​17) Konsa, si an jenn fwè vlé vini an bon papa menm kon Jéhova, i ni pou toujou di ich li i enmen yo. Osi, i ni pou konplimanté yo souvan pou sé bon bagay-la yo ka fè. Mi an lòt bagay i ni pou tjenn an lidé. Papa ki ka imité ègzanp Jéhova kay édé ich yo vini Kwityen ki matwité. Konsa, ou sa pwépawé pou vini an bon papa apwézan. Ki mannyè ou sa fè sa? Èben, ou sa fè sa lè’w moutwé fanmi’w èk sé fwè èk sè-a an kongwigasyon’w lanmityé. Di yo ou enmen yo èk ou ka apwésyé yo. Èk fè tout sa ou pé pou édé yo. (Jan 15:9) San dout, ou kay vini an moun ki ni an chay valè an zyé Jéhova, fanmi’w èk sé fwè èk sè-a an kongwigasyon’w. Èk an tan pou vini, sa kay édé’w vini an bon mawi èk papa.

I PÉ DIFISIL MÉ OU SA FÈ’Y

19-20. Kisa ki kay édé sé jenn fwè-a vini pli mèyè Kwityen? (Gadé pòtwé-a ki asou kouvèti-a.)

¹⁹ Zòt sé jenn fwè-a, chonjé, latè-a pa té fèt an yon jou. Konsa, zòt pa kay vini an pli mèyè Kwityen an yon jou. Mé pa vin dékouwajé, nou sav ou sa ni siksé. Alò, kisa ki sa édé’w? Sé pou ou chwazi bon ègzanp pou ou imité, apwann pou wéfléchi, moutwé ou sé an moun lézòt sa konfyé, dévèlopé bon abilité èk pwépawé apwézan pou népòt wèskonsabilité ou pé ni an tan pou vini.

²⁰ Pitèt ou pé di sé bagay sala twò wèd pou fè. Mé pa ladjé, paski ou ni tout sé fwè èk sè-a an kongwigasyon’w pou édé’w. Èk pli enpòtan toujou, Jéhova di ‘i kay épi’w èk i kay édé’w’. (Izay. 41:10, 13) Ès sa pa an bèl asiwans Jéhova ban’w? Absoliman! Èk mi an lòt bagay pou’w chonjé, lè’w vini an fwè ki matwité, ou kay twapé anpil bennédiksyon. Wi, lavi’w kay ni lakontanman. Finalman, zòt sé jenn fwè-a, nou vlé zòt sav nou enmen zòt an chay! Sé pou Jéhova benni zòt kon zòt ka fè éfò pou vini an pli mèyè Kwityen!​—Prov. 22:4.