Wèsté An Kay Bondyé Pou Tout Tan!

1. Ki mannyè Sam 15:1-5 sa édé nou?

AN ATIK-LA avan, nou té apwann ki, sé sèlman moun ki dèdiké lavi yo ba Jéhova èk ki ka kontiné vansé pwé’y, Jéhova ka envité an “Kay” li. Mé kisa nou ni pou fè pou wèsté an Kay Bondyé? Ében Sam 15:1-5 ka wéponn kèstyon sala. (Li’y)

2. Lè David té mansyonnen Kay Bondyé, kisa i pitèt té ka katjilé konsèné?

² Pwèmyé santans-lan an Sam kenz (15) ka di: “Bondyé Senyè, ki moun ki sa wèsté an Kay ou? Ki moun ki sa viv asou mòn-an ki sa ou yonn-an?” (Sam 15:1) Bon, lè David té mansyonnen “Kay” Bondyé, pitèt i té ka katjilé konsèné tabènak-la. Èk pou an ti tan tabènak-la té an Gibiyonn. Osi, lè David té di, “mòn-an ki sa ou yonn-an”, i pitèt té ka katjilé konsèné tant-lan ki té asou Mòn Zayonn an Jérouzalèm. Èk mòn sala sété an chay lyé hòd soud Gibiyonn. Èvèk sé la, David té fè an tant, èk i mété Bwèt Agwéman-an andidan’y pou jis lè yo bati tanp-lan.—2 Sm 6:17.

3. Pouki nou vlé byen konpwann Sam kenz (15)? (Gadé pòtwé-a osi.)

³ An chay jan Izwayèl pa té janmen wann sèvis an tabènak-la. Èk sé déotwa moun tousèl ki té ka antwé tant-lan koté yo té ka tjenn Bwèt Agwéman-an. Kanmenm, tout sèvant Jéhova ki fidèl sa wèsté an Kay li lè yo vini jan’y, èk lè yo kontiné vansé pwé’y. Anfen, sé sa nou tout vlé. Ès pa? Alò, an Sam chapit kenz (15) David ka di nou sa nou sipozé fè pou wèsté jan Jéhova. Konsa nou vlé byen konpwann Sam sala.

OBÉYI BONDYÉ AN TOUT BAGAY ÈK TOUJOU FÈ SA KI DWÈT

4. Ki mannyè nou sav Jéhova vlé nou fè plis pasé batizé? (Izaya 48:1)

⁴ Sam 15:2 ka di, an moun ki sé an jan Bondyé, “sé an moun ki ka obéyi Bondyé an tout bagay, èk ki toujou ka fè sa ki dwèt.” Èk sa sé an bagay nou vlé kontiné fè. Sé vwé, nou pyès pa pawfé. Mé Jéhova kay gadé nou kon ‘moun ki ka obéyi’y’ si nou fè tout sa nou pé pou swiv diwèksyon’y. Bon, lè nou dèdiké lavi nou bay Jéhova èk batizé, nou ka annèk koumansé maché épi Bondyé. Pou ègzanp, an tan Bib-la, paski an moun sété yon jan Izwayèl, sa pa té vlé di i té ka wèsté an Kay Bondyé. Anfen, adan sé jan Izwayèl-la pa té ka kwiyé asou Bondyé ‘an lavéwité èk an mannyè-a ki dwèt-la’. (Li Izaya 48:1.) Konsa si an jan Izwayèl té vwéman vlé vini an Kay Bondyé, i té ni pou apwann wèg Bondyé èk fè sa Bondyé té vlé’y fè. Èk an menm mannyè-a, si nou vlé ni an bon wilasyon épi Jéhova jòdi, nou ni pou fè plis pasé batizé èk pòté non-an Témwen Jéhova. Wi, nou ni pou “toujou fè sa ki dwèt.” Mé ki mannyè nou sa fè sa?

5. Kisa i vlé di pou obéyi Jéhova an tout bagay?

⁵ Pou “obéyi Bondyé an tout bagay” èk “toujou fè sa ki dwèt” vlé di plis pasé atandé sé mitin-lan an Sal Wéyòm-lan. (1 Sm 15:22) Sa vlé di, nou ni pou éséyé pou obéyi Bondyé an tout sa nou ka fè, jis lè nou pa kò nou. (Pwov. 3:6; Éklé. 12:13, 14) Osi, i enpòtan pou obéyi Jéhova jis an bagay ki pé pa sanm enpòtan. Wi, lè nou fè sé bagay sala, sa ka moutwé nou vwéman enmen Jéhova, èk sa ka fè Jéhova enmen nou plis toujou.​—Jan 14:23; 1 Jan 5:3.

6. Silon Hibrou 6:10-12, kisa ki pli enpòtan pasé sé bon bagay-la nou té fè an tan pasé?

⁶ Jéhova ka vwéman apwésyé tout sa nou té fè ba li an tan pasé. Kanmenm, paski nou ja fè an chay bagay bay Jéhova an tan pasé, sa pa vlé di nou kay wèsté an Kay li. Anfen nou ka wè sa a klè an Hibrou 6:10-12. (Li’y. ) Chonjé, Jéhova pa ka obliyé sé bon bagay-la nou té fè ba li an tan pasé. Mé i vlé nou pou sèvi’y épi tout tjè nou “pou jis an bout-la.” Èk si nou fè sa, Jéhova kay wèsté jan nou pou tout tan.—Gal. 6:9.

PALÉ LAVÉWITÉ-A AN TJÈ’W

7. Kisa i vlé di pou palé lavéwité-a an tjè nou?

⁷ An moun ki vlé wèsté an Kay Bondyé ni pou ‘palé lavéwité-a an tjè’y.’ (Sam 15:2) Sa vlé di plis pasé pou pa manti, paski Jéhova vlé nou onnèt an tout sa nou ka di èk fè. (Hib. 13:18) Anfen, sa byen enpòtan, paski Pwovèb 3:32 di: ‘Jéhova détèsté moun ki malis. Mé i sé bon jan moun ki dwèt.’

8. Si nou ka palé lavéwité-a an tjè nou, kisa nou pa kay fè?

⁸ Moun ki ka ‘palé lavéwité-a an tjè yo’ pa malis. An moun ki malis ka obéyi Bondyé sèlman lè lézòt moun ka wè’y, mé lè’y pa kò’y i ka fè sa i vlé. (Izay. 29:13) I pé jis koumansé kwè i pa toujou bon pou swiv wèg Bondyé. (Jémz 1:5-8) Èk i pé koumansé dézobéyi Bondyé lè’y vini pou bagay i kwè ki pa twò enpòtan. An plis di sa, si’y ka sanm anyen mové pa ka wivé’y lè’y dézobéyi Bondyé, i pé jis koumansé fè bagay ki pli mové. Alò, magwé moun sala pé kwè i ka sèvi Bondyé, Bondyé pa ka aksèpté adowasyon’y. (Éklé. 8:11) Konsa, nou pa vlé vini moun ki malis. Nou vlé wèsté onnèt an tout bagay.

9. Kisa ki té fèt lè Jézi té jwenn épi Natannyèl, èk kisa nou apwann an sa? (Gadé pòtwé-a osi.)

⁹ I vwéman enpòtan pou an moun palé lavéwité an tjè’y. Èk nou ka wè sa a klè an sa ki té fèt lè Filip té envité jan’y Natannyèl pou vini jwenn Jézi. Mé magwé sa sété pwèmyé fwa-a Jézi té jwenn Natannyèl, Jézi di konsèné’y: “Mi an jan Izwayèl pi, la pa ni pyès wiz an li!” (Jan 1:47) Bon. Jézi té sav sé lézòt disip li-a té onnèt tou, mé Natannyèl té onnèt adan an mannyè spésyal. Sé vwé, menm kon nou Natannyèl pa té pawfé, mé kanmenm i pa té an ipokwit. Pito sa, i té onnèt an tout bagay. Wi, Jézi té enmen bèl kawaktè sala, èk i jis aplodi’y pou sa. Konsa, i té kay vwéman an gwan lonnè si Jézi té sa di menm bagay-la konsèné nou!

10. Pouki nou ni pou pwan pwokosyon épi pawòl nou? (Jémz 1:26)

¹⁰ Plizyè an sé bagay-la Sam kenz (15) mansyonnen ni pou fè épi mannyè nou ka twété lézòt moun. Pou ègzanp, Sam 15:3 ka di nou, an moun ki vlé wèsté an Kay Bondyé “pa ka malpalé lézòt moun. I pa ka fè janʼy movèzté, ni i pa ka di bagay ki pa vwé kont pwochenʼy.” Konsa, nou vlé pwan pwokosyon épi pawòl nou, paski si nou pa fè sa, nou sa vwéman blésé lézòt moun. Èk sa kay anpéché nou wèsté an Kay Bondyé.​—Li Jémz 1:26.

11. (a) Kisa i vlé di pou malpalé lézòt? (b) Kisa ki sa wivé an moun ki ka malpalé lézòt èk i pa vlé wépanti?

¹¹ Lévanjil-la an Sam kenz (15), mansyonnen moun ki ka malpalé lézòt moun. Alò, kisa i vlé di pou malpalé an moun? Ében byen souvan, sa vlé di pou di an mansonj asou an moun ki sa donmajé bon wépitasyon moun-lan. Moun ki ka malpalé lézòt, èk yo pa vlé wépanti pa sa wèsté kon an Témwen Jéhova. Sé ansyen-an kay tiwé yo an kongwigasyon-an.—Jér. 17:10.

12-13. An ki diféwan sitiwasyon i byen ézé pou malpalé lézòt? (Gadé pòtwé-a osi.)

¹² Sam 15:3 ka di nou ki, moun ki ka wèsté an Kay Jéhova, ‘pa ka fè jan yo movèzté, èk yo pa ka di bagay ki pa vwé kont pwochen yo’. Mé an ki mannyè nou sa di bagay ki pa vwé kont pwochen nou?

¹³ Ében yon mannyè nou sa fè sa, san nou pa menm wéyalizé, sé lè nou simen bagay négatif konsèné yo. Pou ègzanp, katjilé asou sé twa (3) sitiwasyon sala. (1) yon sésé doubout wann sèvis kon yon piyonnè, (2) an fwè èk sè ki mayé pa ka wann sèvis an Bèfèl ankò, èk (3) an fwè pa ka wann sèvis kon yon ansyen ében kon an sèvant ministiriyal ankò. Konsa, ès i kay bon pou di moun yo pèd pwivilaj yo paski yo fè an bagay ki pa bon? Non! Sa pa kay bon pyès. Anfen, la pé ni plizyè bon wézon pou sé chanjman sala nou pa konnèt. Alò, annou toujou chonjé, si nou vlé wèsté an Kay Jéhova, nou ‘pa kay fè jan nou movèzté, èk nou pa kay di bagay ki pa vwé kont pwochen nou.’

ONNOWÉ SÉ MOUN-LAN KI KA WÈSPÈKTÉ JÉHOVA

14. Ki mannyè on moun ki ka wèsté an Kay Jéhova ka moutwé i pa sa sipòté “sé moun-an Bondyé widjèkté-a”?

¹⁴ Sam 15:4 ka di nou ki, moun-lan ki ka wèsté an Kay Jéhova “pa sa sipòté sé moun-an Bondyé widjèkté-a”. Mé ki mannyè nou sa konnèt si Bondyé widjèkté on moun? Bon. Sé pa nou ki ka désidé si Bondyé widjèkté an moun opa. Poutji nou ka di sa? Ében sa sé paski nou pa pawfé. Èk silon lopinyon nou èk pwéféwans nou, pitèt la ni moun nou kontan paski i ézé pou twavay épi yo. Mé pitèt la ni moun nou pa kontan paski yo ka kontwayé nou, ében paski i pa ézé pou twavay épi yo. Alò, nou ni pou pwan bon pwokosyon pou widjèkté sèlman sé moun-lan Jéhova “widjèkté”. (1 Kòr. 5:11) Sa vlé di, moun ki ka fè bagay Jéhova hayi. Pou ègzanp, nou pa vlé sipòté moun ki ka péché èk pa vlé wépanti; moun ki ka déwèspèkté sa nou ka kwè adan; ében moun ki ka éséyé afébli ében détwi lafwa nou an Jéhova.—Pwov. 13:20.

15. An ki mannyè nou sa onnowé “sé moun-an ki ka wèspèkté [Jéhova]”?

¹⁵ Sam 15:4 ka osi di nou ki, nou ni pou “onnowé sé moun-an ki ka wèspèkté [Jéhova]”. Konsa nou ni pou gadé pou diféwan mannyè pou moutwé moun ki jan Bondyé jantiyès èk wèspé. (Ronm 12:10) Pou ègzanp, Samz 15:4 mansyonnen yon mannyè nou sa fè sa. I di: On moun ki ka wèsté an Kay Bondyé “ka toujou fè sa i pwonmèt pou fè, i pa mélé sa i pé koutéʼy.” Ou wè, lè nou kasé pwonmèt nou, nou ka blésé tjè lézòt moun. (Maf. 5:37) Konsa i ka plè Jéhova lè on mawi èk madanm tjenn pwonmèt-la yo fè yonn a lòt lè yo mayé. Osi, i ka plè Jéhova lè pawan éséyé tjenn sé pwonmèt-la yo fè ich yo. Wi, paski nou enmen Jéhova èk pwochen nou, nou kay fè tout sa nou pé pou tjenn pwonmèt nou.

16. An ki lòt mannyè nou sa onnowé jan Jéhova?

¹⁶ An lòt mannyè nou sa onnowé jan Bondyé, sé lè nou twété yo kon kanmawad nou, èk nou donnan épi yo. (Ronm 12:13) Wi, lè nou pasé tan épi sé fwè èk sè nou-an apa di an sé mitin-lan ében an minis-la, nou ka vansé pli pwé yo èk pli pwé Jéhova tou. Osi lè nou byen vini yo lakay nou, èk nou twété yo kon kanmawad nou, nou ka imité kawaktè Jéhova.

PWAN PWOKOSYON POU PA ENMEN LAJAN

17. Poutji Sam kenz (15) ka palé konsèné lajan?

¹⁷ Tann sa Sam 15:5 ka di konsèné an moun ki ka wèsté an Kay Bondyé. I di: “Lè i pwété an moun lajan, i pa ka mandéʼy lantéwé asouʼy. I pa ka aksèpté lajan an séwan pou manti kont moun ki inosan.” (Sam 15:5) Alò, poutji Sam sala ka palé konsèné lajan? Ében sa sé paski, si nou enmen lajan, lajan sa vini pli enpòtan pou nou pasé moun, èk jis pasé Jéhova. (1 Tim. 6:10) An tan Bib-la, adan fwè té ka pwan lavantaj asou adan sé fwè-a ki té pòv. Pou ègzanp, lè yo té pwété yo lajan, yo té ka fè yo péyé viwé pli pasé yo té pwété yo. Osi, la té ni jij ki té ka aksèpté lajan an séwan, èk yo té ka mal jijé moun ki té inosan. Wi, Jéhova vwéman hayi lè moun fè bagay kon sa.—Izik. 22:12.

18. Ki kwèsyon nou sa mandé kò nou pou konnèt si nou enmen lajan? (Hibrou 13:5)

¹⁸ I bon pou nou ègzanminé atitid nou konsèné lajan. Mé ki mannyè nou sa fè sa? Ében nou sa mandé kò nou kèstyon tèl kon: ‘Ès mwen ka toujou katjilé konsèné lajan èk sa mwen sa achté épi’y? Si mwen dwé an moun lajan, ès mwen ka pwan an chay tan pou péyé moun-lan lajan-an déviwé, paski mwen kwè i pa bizwen’y? Lè mwen ni lajan, ès mwen ka santi mwen pli mèyè pasé lézòt moun? Ében ès i wèd pou mwen donnan épi lézòt? Si adan sé fwè èk sè-a ni an chay lajan, ès mwen ka kwè yo enmen lajan pli pasé yo enmen Jéhova? Ès mwen vlé vini jan sèlman épi fwè èk sè ki wich?’ Wi, i enpòtan pou nou mandé kò nou sé kèstyon sala, paski nou tout wisivwè an bèl envitasyon pou wèsté an Kay Bondyé. Kanmenm, sèl mannyè-a nou sa wèsté an Kay Bondyé, sé si nou fè asiwé nou pa enmen lajan. Èk si nou fè sa, Jéhova pa kay janmen kité nou!​—Li Hibrou 13:5.

JÉHOVA ENMEN JAN’Y

19. Poutji Jéhova vlé nou fè tout sa ki ékwi an Sam kenz (15)?

¹⁹ An dènyé santans-lan an Sam kenz (15) Jéhova pwonmèt nou: “Népòt moun ki fè sé bagay sala pa kay janmen tonbé.” (Sam 15:5) An vèwsé sala, David ka èspliké poutji Jéhova vlé nou fè tout sa ki ékwi an Sam kenz (15). Èk wézon-an sé sa; Jéhova vlé nou ni tjè kontan. Alò, lè nou fè sa Bondyé ka mandé nou pou fè, nou kay ni an pli mèyè lavi, èk i kay pwotéjé nou.—Izay. 48:17.

20. Kisa moun ki wèsté an Kay Jéhova sa èspéyé?

²⁰ Tout moun ki wété an Kay Jéhova sa èspéyé an bèl lavi an tan pou vini. Pou ègzanp, sé annonté-a kay viv an syèl koté Jézi ja “pwépawé an plas bay [yo].” (Jan 14:2) Osi, jan Bondyé ki ni èspwa-a pou viv asou latè-a, ka èspéyé sé pwonmèt-la ki ékwi an Wévélasyon 21:3. Wi, i sé an gwan lonnè ki Jéhova ka envité nou pou wèsté an Kay li pou tout tan!