Mannyè Sé Ansyen-an Sa Moutwé Lanmityé Épi Mizéwikòd Lè On Moun Fè On Péché Ki Gwav

1. Lè on fwè ében on sè fè on péché ki gwav, kisa ki pé fèt?

AN ATIK-LA avan sala, nou apwann sa zapòt Pòl té di sé ansyen-an an kongwigasyon-an an Kòrint pou fè, lè on fwè té fè on péché ki té gwav. Fwè-a pa té vlé wépanti pou péché-a i té fè-a, konsa zapòt Pòl di sé ansyen pou tiwé fwè-a an kongwigasyon-an. Kanmenm, on moun ki fè on péché ki gwav sa wépanti. Èk kon Ronm 2:4 ka moutwé, Jéhova vlé moun ki fè péché ki gwav wépanti. Èk i ka édé yo fè sa. Konsa, ki mannyè Jéhova ka sèvi sé ansyen-an pou édé fwè èk sè ki fé péché ki gwav pou wépanti?

2-3. Si’w vini konnèt on fwè ében on sè fè on péché ki gwav, kisa’w sipozé fè, èk pouki?

² Si sé ansyen-an pa konnèt on moun fè on péché ki gwav, yo pa sa édé moun sala. Konsa, si’w vini konnèt on fwè ében on sè fè on péché ki gwav, ou sipozé ankouwajé moun-lan pou alé oti sé ansyen, èk mandé yo pou èd.​—Izay. 1:18; Twav. 20:28; 1 Pita 5:2.

³ Mé si moun-lan pa vlé palé épi sé ansyen-an konsèné sa’y fè ki pa bon-an, ou ni wèskonsabilité pou édé moun-lan twapé èd-la i bizwen-an. Konsa, ou sipozé alé oti sé ansyen-an ou menm, èk di yo sa’w konnèt konsèné sitiwasyon-an. Lè’w fè sa, ou ka moutwé lanmityé pou moun-lan, paskè ou sav sé ansyen-an sa édé yo pou wanjé wilasyon yo épi Jéhova. Si fwè-a ében sè-a pa chanjé, èk yo kontiné fè sa ki pa bon, moun sala kay donmajé wilasyon’y épi Jéhova, èvèk aksyon’y pé annékòz lòt moun pou palé kont Jéhova épi ògannizasyon’y. Èk vwéman, délè i ka pwan an chay kouwaj pou alé oti sé ansyen-an, mé nou ka fè’y paskè nou enmen Jéhova, èk nou enmen fwè-a ében sè-a ki fè sa ki pa bon-an osi.​—Sam 27:14.

SA SÉ ANSYEN-AN KA FÈ POU ÉDÉ ON FWÈ ÉBEN ON SÈ KI FÈ ON PÉCHÉ KI GWAV

4. Lè sé ansyen-an ka palé épi on moun ki fè on péché ki gwav, kisa yo kay éséyé pou fè?

⁴ Si on fwè ében on sè fè on péché ki gwav, sé ansyen-an an kongwigasyon-an ka chwazi twa (3) ansyen ki ni imilité, pou alé palé épi moun-lan.a Èk magwé sé ansyen sala kay fè tout sa yo pé pou édé moun-lan wépanti, yo pa sa fòsé pyèsonn pou chanjé. (Dito. 30:19) Lè pwofèt Jéhova té alé palé épi Wa David konsèné péché gwav-la i té fè-a, David aksèpté èd-la èk i wépanti. Mé sé ansyen-an sav, sé pa tout moun ki kay fè menm kon Wa David. (2 Sm 12:13) La ni moun ki pé chwazi pou pa aksèpté kowijman Bondyé. (Jen. 4:6-8) Kanmenm, sé ansyen-an kay fè tout sa yo pé pou édé moun-lan wanjé wilasyon’y épi Jéhova. Mé, kisa sé ansyen-an ni pou chonjé lè yo ka palé épi on moun ki fè on péché ki gwav?

5. Ki atitid sé ansyen-an sipozé ni, lè yo ka palé épi on fwè ében on sè ki fè on péché ki gwav? (2 Timòfi 2:24-26) (Gadé pòtwé-a osi.)

⁵ Sé ansyen sav, menm si on moun fè on péché ki gwav, moun sala ni valè an zyé Jéhova toujou. (Louk 15:4, 6) Konsa, lè yo ka palé épi moun-lan, yo ka twété’y épi lanmityé, jantiyès, èk wèspé. Èvèk yo pa ka fè akwèdi, sèl sa yo antéwésé adan sé pou mandé moun-lan kwèstyon pou konnèt sa ki té pwan kou. Pito sa, yo ka moutwé moun-lan tout sé bèl kawaktè Kwityen-an 2 Timòfi 2:24-26 (Li’y ) ka mansyonnen. Konsa, sé ansyen-an kay wèsté dous, èk yo kay twété moun-lan épi jantiyès, paskè yo vlé édé moun-lan fè sé chanjman-an ki nésésè, pou’y viwé jwenn favè Jéhova.

6. Ki mannyè sé ansyen kay pwépawé tjè yo avan yo alé palé épi on moun ki fè on péché ki gwav? (Ronm 2:4)

⁶ Sé ansyen-an ka pwépawé tjè yo. Yo ka chonjé, kon zapòt Pòl té di: “Wézon-an Bondyé otan bon pou nou-an, sé paski i vlé nou wépanti.” (Li Ronm 2:4.) Konsa, yo ka éséyé pou imité Jéhova, èk yo ka twété moun-lan adan an mannyè ki janti. (Izay. 11:3, 4; Maf. 18:18-20) Sé ansyen-an ni pou chonjé, yo sé bèwjé ki ka twavay anba Jézi. Konsa yo ni pou swiv diwèksyon Jézi, èk imité’y an mannyè-a yo ka twété sé fwè èk sè-a. Mé kisa’y vlé di, pou sé ansyen-an pwépawé tjè yo? Ében, avan sé twa (3) fwè-a alé palé épi moun-lan ki fè péché-a, yo kay pwédyé èk mandé Jéhova pou édé yo wè kisa yo sa fè, pou édé moun-lan wépanti. Yo kay fè wichach an sé piblikasyon nou-an, èk yo kay mandé Jéhova pou édé yo konpwann, moun-lan épi sitiwasyon-an i ka èspéyansé-a. Osi, sé ansyen-an kay katjilé asou kisa yo konnèt konsèné moun-lan, ki pitèt annékòz li pou tonbé an péché-a i fè-a.​—Pwov. 20:5.

7-8. Lè sé ansyen-an ka palé épi on moun ki fè on péché ki gwav, ki mannyè yo sa imité pasyans Jéhova?

⁷ Sé ansyen-an ka imité pasyans Jéhova. Yo ka chonjé mannyè Jéhova té twété moun ki té fè péché ki gwav an tan pasé. Pou ègzanp, lè Jéhova òbzòvé Kén té ni on mové atitid, i pwan tan pou wézonnen épi Kén. Épi pasyans, Jéhova di Kén, si’y chanjé èk fè sa ki bon, i té kay benni’y. I osi di Kén kisa ki té kay fèt, si’y pa té chanjé vyé atitid-la i té ni-an. (Jen. 4:6, 7) Èk lè Wa David té fè on péché ki té gwav, Jéhova voyé pwofèt Nafann pou kowijé’y. Pwofèt-la sèvi on bèl ilistwasyon pou wézonnen épi’y. Sa touché tjè David, èk i édé’y pou wépanti. (2 Sm 12:1-7) Èvèk nou pa sa obliyé pasyans-lan Jéhova moutwé pèp li, nasyon Izwayèl. Kantité fwa yo dézobéyi Jéhova! Mé Bib-la di nou, Jéhova ‘kontiné voyé’ sé pwofèt li-a ‘jou apwé jou san doubout’, pou édé yo wépanti. (Jér. 7:24, 25) Non, Jéhova pa té èspéyé jistan pèp li wépanti avan i édé yo. Pito sa, paditan yo té ka fè péché toujou, Jéhova té ka éséyé pou édé yo. I té ka ankouwajé yo pou fè chanjman èk wépanti.

⁸ Sé ansyen-an ka swiv ègzanp Jéhova lè yo ka éséyé pou édé fwè ében sè ki tonbé an péché ki gwav. Yo ka “pwan an chay pasyans” lè yo ka wézonnen épi sé fwè èk sè sala, menm kon Bib-la ka koumandé yo pou fè an 2 Timòfi 4:2. Konsa, sé ansyen-an toujou ni pou wèsté dous, èk moutwé pasyans lè yo ka édé moun-lan ki fè péché-a pou fè sa ki dwèt. Si sé ansyen-an lévé faché ében yo pèd pasyans, moun-lan pitèt pa kay kouté konsèy-la yo ka ba’y-la, ében moun-lan pé wifizé pou wépanti.

9-10. Ki mannyè sé ansyen-an sa édé on moun ki fè on péché ki gwav pou konpwann kisa ki afébli wilasyon’y épi Jéhova, èk ki annékòz li pou tonbé an péché?

⁹ Sé ansyen-an kay éséyé pou konpwann kisa moun-lan té ka èspéyansé an lavi’y, an tan-an avan i tonbé an péché-a. Pou ègzanp, kisa ki afébli wilasyon moun-lan épi Jéhova? Ès moun-lan té doubout fè létid pèsonnèl li? Ès i té doubout alé an minis-la? Èk lè’y vini pou lapwiyè, ès sé tanzantan moun-lan té ka pwédyé? Ès i té ka goumen kont vyé dézi? Épi ki kalité moun i té ka pasé tan épi? Kisa i té ka fè pou anmizé kò’y? Ès sé bagay sala té afèkté katjil li èk dézi’y? Ès moun-lan ka konpwann mannyè péché-a i fè-a ka afèkté Papa’y, Jéhova?

¹⁰ Wi, sé ansyen-an sa mandé moun-lan kwèstyon pou fè’y katjilé asou sé bagay-la ki afébli wilasyon’y épi Jéhova, èk ki annékòz li pou tonbé an péché. Mé, sé ansyen-an ni pou fè sa épi jantiyès, lanmityé, èk wèspé. Èvèk yo pa sipozé mandé moun-lan kwèstyon ki kay fè’y santi hont, ében mandé’y pou ba yo enfòmasyon yo pa bizwen konnèt. (Prov. 20:5) Sé ansyen-an sa osi sèvi bèl ti ilistwasyon pou édé moun-lan wézonnen asou sa’y fè-a, menm kon pwofèt Nafann té sèvi on bèl ilistwasyon pou édé Wa David. Èk i bon pou chonjé, moun-lan pé koumansé santi lapenn pou péché-a i fè-a, dépi pwèmyé fwa-a sé ansyen-an palé épi’y. Anfen, moun-lan pé jis wépanti la menm.

11. Ki mannyè Jézi twété moun ki té ka fè péché?

¹¹ Sé ansyen-an ka éséyé pou imité Jézi. Jézi té ka sèvi bon kwèstyon pou édé moun katjilé. Pou ègzanp, i té mandé Sòl: “Sòl, Sòl, pouki ou ka pèsikité mwen?” Èvèk kwèstyon sala té édé Sòl pou konpwann, sa’y té ka fè-a pa té bon. (Twav. 9:3-6) Osi, konsèné fanm-lan “yo ka kwiyé Jèzibèl-la,” Jézi di: “Mwen ba li tan pouʼy té sa tounen hòd péchéʼy.”​—Wév. 2:20, 21.

12-13. Kisa sé ansyen-an ka fè pou bay on moun ki fè on péché ki gwav tan pou’y wépanti? (Gadé pòtwé-a osi.)

¹² Bon, magwé la ni moun ki ka wépanti dépi pwèmyé fwa-a sé ansyen-an palé épi yo, la ni lézòt ki pé bizwen pli tan. Kanmenm, sé ansyen-an ka imité ègzanp Jézi. Konsa yo pa ka pwésé pou di, on moun pa kay janmen wépanti si i pa wépanti pwèmyé fwa-a yo palé épi’y. Pito sa, yo ka fè awanjman pou palé épi moun-lan pli pasé yon fwa, pou bay tan-an i bizwen-an. Èk pitèt apwé pwèmyé fwa-a yo palé épi’y, moun-lan kay koumansé katjilé byen sèwyé konsèné sa sé ansyen-an di’y. I pé moutwé imilité, èk apwoché Jéhova an lapwiyè pou mandé’y pawdonnasyon. (Sam 32:5; 38:18) Konsa, lè sé ansyen-an palé épi moun sala ankò, i pé ni on diféwan atitid.

¹³ Wi, sé ansyen-an ka moutwé moun-lan konpasyon épi jantiyès, paskè yo vwéman vlé édé’y wépanti. Èk yo ni èspwa, moun-lan kay fè sé chanjman-an ki nésésè èk wépanti. Konsa, yo ka pwédyé èk yo ka mandé Jéhova pou benni éfò yo ka fè pou édé moun-lan.​—2 Tim. 2:25, 26.

14. Lè on moun wépanti, ki moun ki sipozé twapé tout lonnè-a pou sa, èk pouki?

¹⁴ Si moun-lan ki fè péché-a wépanti, sa sé on bagay ki ka pòté an chay lajwa. (Louk 15:7, 10) Èk wi, sé ansyen-an ka twavay wèd, èk yo ka fè tout sa yo pé pou édé moun-lan wépanti. Mé chonjé, zapòt Pòl té di, sé “Bondyé [ki] sa ba yo an chans pou wépanti.” (2 Tim. 2:25) Konsa, lé yon péchè wépanti, sé Jéhova ki sipozé twapé tout lonnè-a pou sa, pa sé ansyen-an. Èk vwéman, sé sèlman Jéhova ki sa édé on moun pou chanjé katjil li èk atitid li. Zapòt Pòl té mansyonnen sé bèl bagay-la ki ka fèt lè on moun wépanti. Pou ègzanp, moun-lan sa vini konpwann lavéwité-a pli mèyè, i kay koumansé katjilé kon Jéhova ankò, èk i “kay tiwé kò’y anba zatwap Denmou-an”.​—2 Tim. 2:26.

15. Lè on moun ki fè on péché ki gwav wépanti, ki mannyè sé ansyen-an sa kontiné édé moun-lan?

¹⁵ Lè on moun ki fè on péché ki gwav wépanti, sé ansyen-an kay kontiné ankouwajé moun-lan èk édé’y pou fòtifyé lafwa’y. Wi, yo kay kontiné édé’y pou tjébé fo anba tantasyon, èk pou fè sa ki dwèt an zyé Jéhova. (Hib. 12:12, 13) Osi, sé ansyen-an pa sipozé di pyèsonn konsèné sa moun-lan té fè-a. Mé, ki enfòmasyon sé ansyen-an pé ni pou bay kongwigasyon-an konsèné sitiwasyon-an?

‘PALÉ WÈD BA YO DOUVAN TOUT LÉZÒT’

16. Kisa zapòt Pòl té vlé di, lè’y di Timòfi pou palé wèd bay sé moun-lan ki ka pwatiké péché-a, “douvan tout lézòt”? (1 Timòfi 5:20 NWT)

¹⁶ Li 1 Timòfi 5:20 NWT. Zapòt Pòl sété yon ansyen, èk sa sé diwèksyon-an i té bay Timòfi, lè’y vini pou mannyè-a Timòfi té sipozé aji épi moun an kongwigasyon-an ki té ka “pwatiké péché.” Timòfi menm sété yon ansyen. Mé kisa zapòt Pòl té vlé di, lè’y di Timòfi pou palé wèd bay sé moun sala douvan “tout lézòt”? Ében, la ni sitiwasyon koté on moun fè on péché ki gwav, mé sé annèk yonndé moun ki konnèt sa. Pitèt sé moun sala té wè moun-lan fè péché-a, ében pitèt moun-lan ki fè péché-a di yo sa i té fè. Konsa, silon sa Zapòt Pòl di Timòfi, adan on sitiwasyon kon sa, sé ansyen-an kay ni pou fè sé moun sala konnèt ki, yo aji épi sitiwasyon-an, èk yo kowijé moun-lan. Mé wonnman, sé ansyen-an ni pou pwan bon pokosyon pou yo pa wévélé anyen konsèné moun-lan ki fè péché-a, ében konsèné sitiwasyon-an.

17. Si on moun fè on péché ki gwav, èk pwèskè tout moun an kongwigasyon-an konnèt, ében kay konnèt sa moun-lan fè-a, kisa sé ansyen-an kay anonsé, èk pouki?

¹⁷ Bon, la ni lòt sitiwasyon koté, on moun fè on péché ki gwav, èk pwèskè tout moun an kongwigasyon-an konnèt, ében kay konnèt sa moun-lan fè-a. An sitiwasyon kon sa, sé ‘lézòt-la’ zapòt Pòl té ka palé konsèné-a, sé tout kongwigasyon-an. Konsa, yon ansyen kay li on ti anonsman senp, pou fè kongwigasyon-an konnèt, tèl fwè, ében tèl sè twapé kowijman. Mé pou ki wézon i nésésè pou fè anonsman sala? Ében, zapòt Pòl ban nou wépons-lan pou kwèstyon sala lè’y di: “Sa kay sèvi kon an ègzanp pou sé lézòt-la.” ​—1 Timòfi 5:20

18. Si on fwè ében on sè ki p’òkò ni 18 lanné fè on péché ki gwav, kisa sé ansyen-an kay fè? (Gadé pòtwé-a osi.)

¹⁸ Bon, sa kont lè on fwè ében on sè ki p’òkò dizwit (18) lanné di laj fè on péché ki gwav? Kisa sé ansyen-an kay fè adan on sitiwasyon kon sa? Ében, sé ansyen-an an kongwigasyon kay fè awanjman pou dé (2) ansyen alé palé épi jenn moun-lan ki fè péché-a. Èvèk yo kay palé épi jenn moun-lan douvan pawan’y.b Sé dé (2) ansyen-an kay mandé sé pawan-an kisa yo ja fè, pou édé jenn moun-lan fè sé chanjman-an ki nésésè èk wépanti. Si jenn moun-lan ka kouté konsèy pawan’y, èk i ka fè chanjman an atitid li, sé dé (2) ansyen-an pé désidé ki i pa nésésè pou twa (3) ansyen palé épi jenn moun-lan èk pawan’y. Èk sa sé paskè vwéman, an zyé Bondyé, sé pawan ki ni wèskonsabilité-a pou otjipé èk kowijé ich yo. (Dito. 6:6, 7; Prov. 6:20; 22:6; Èfés. 6:2-4) Mé, sé ansyen-an kay kontiné palé épi sé pawan-an tanzantan, pou fè asiwé yo ka kontiné bay jenn moun-lan èd-la i bizwen-an. Kanmenm, si jenn moun-lan pa vlé chanjé, èk i ka kontiné fè sa ki pa bon, kisa sé ansyen-an kay fè? Adan on sitiwasyon kon sa, twa (3) ansyen kay palé épi jenn moun-lan, an pwézans pawan’y.

“JÉHOVA “BON ÈK I NI KONPASYON”

19. Lè sé ansyen-an ka palé épi on moun ki fè on péché ki gwav, ki mannyè yo sa imité Jéhova?

¹⁹ Sé ansyen-an ni wèskonsabilité-a pou tjenn kongwigasyon-an nèt, èk pou pwotéjé sé fwè èk sè hòd mové enflouwans. Konsa, sé ansyen-an ki kay palé épi moun-lan ki fè péché gwav-la, ni on gwo wèskonsabilité douvan Jéhova. (1 Kòr. 5:7) Osi, sé ansyen-an vlé moun-lan ki fè péché gwav-la wépanti. Konsa, yo ka fè tout sa yo pé pou édé moun-lan, èk yo pa ka janmen pèd èspwa ki, moun-lan kay fè sé chanjman-an ki nésésè èk wépanti. Pou ki wézon yo ka fè sa? Sé paski, yo ka éséyé pou imité Jéhova. Èk lévanjil-la ka di nou, Jéhova “bon, èk i ni konpasyon.” (Jémz 5:11) On lòt ansyen ki té ka imité Jéhova sété zapòt Jan. I té ka twété sé fwè èk sè-a épi lanmityé èk konpasyon, menm kon Jéhova. Èk mi sé sa i di pou moutwé lanmityé-a i té ni pou sè fwè èk sè-a: “Sé manmay mwen-an mwen kontan an chay-la, mwen Jan ka ékwi sa bay zòt, kon sa zòt pé pa péché. Mé si an moun péché, la ni yonn ki ka plédé épi Papa-a ban nou, épi sa sé Jézi Kwi, ki ka fè tout bagay dwèt-la.”​—1 Jan 2:1.

20. Kisa nou kay diskité an dènyé atik-la?

²⁰ Malèwèzman, la ni sitiwasyon koté, on Kwityen fè péché ki gwav, èk moun-lan pa vlé wépanti. Mé on moun ki pa vlé wépanti pa sa kontiné kon on manm an kongwigasyon-an. Èk sa sé on bagay ki byen sèwyé. Konsa, ki mannyè sé ansyen-an kay aji épi on sitiwasyon kon sa? Nou kay diskité sa an dènyé atik-la.