Ki Mannyè Jéhova Vlé Kongwigasyon-an Twété Moun Ki Fè Péché Ki Gwav?

1. Kisa Jéhova vlé pou tout moun?

JÉHOVA bay lézòm abilité-a pou fè disizyon pou kò yo menm, èk toulé jou nou ka fè disizyon. Kanmenm, pli gwo disizyon-an nou sa fè sé pou dèdiké lavi nou bay Jéhova èk pou adowé’y ansanm épi sé fè èk sè nou-an. Anfen, Jéhova vlé tout moun fè sa, paski i enmen moun, èk i vlé sa ki bon pou yo. Wi, Jéhova vlé moun vin jan épi’y èk pou viv pou tout tan.​—Dito. 30:19, 20; Gal. 6:7, 8.

2. Kisa Jéhova vlé pou moun ki fè péché ki gwav, mé yo p’òkò wépanti? (1 Jan 2:1)

² Jéhova pa ka fosé pyèsonn pou adowé’y, mé Jéhova ka kité chak moun désidé kisa i kay fè. Mé, kisa sé ansyen-an kay ni pou fè si on fwè ében sè fè on péché ki gwav èk i pa wépanti? Ében yo kay ni pou tiwé’y an kongwigasyon-an. (1 Kòr. 5:13) Kanmenm menm si yo tiwé moun-lan an kongwigasyon-an, Jéhova vwéman vlé moun-lan wépanti èk ni on bon wilasyon épi’y ankò. Anfen yonn an sé pli gwo wézon-an Jéhova potjiwé wanson-an, sé pou pawdonnen moun ki wépanti hòd péché yo. (Li 1 Jan 2:1.) Wi, Papa nou Jéhova plen lanmityé èk i ka ankouwajé moun ki fè péché ki gwav pou wépanti.​—Zèk. 1:3; Ronm 2:4; Jémz 4:8.

3. Kisa nou kay diskité an atik sala?

³ Bon. Jéhova ka di nou a klè mannyè i ka santi konsèné péché èk moun ki fè péché ki gwav. Èk Jéhova vlé nou santi menm kon li. Alò an atik sala nou kay diskité sé twa bagay sala: (1) Sa zapòt Pòl té di kongwigasyon-an an Kòrint pou fè lè on fwè té fè on péché ki gwav. (2) Sa zapòt Pòl té di kongwigasyon-an pou fè lè nonm-lan wépanti. Èk (3) mannyè Jéhova ka santi konsèné moun ki fè péché ki gwav.

SA KONGWIGASYON-AN TÉ FÈ LÈ YON FWÈ TÉ FÈ YON PÉCHÉ KI GWAV

4. Kisa ki té fèt an kongwigasyon-an an Kòrint? (1 Kòrint 5:1, 2)

⁴ Li 1 Kòrint 5:1, 2. Wi diwan twazyenm voyaj Pòl, i tann konsèné on mové bagay ki té ka fèt an kongwigasyon nèf-la an Kòrint. Yon fwè an kongwigasyon-an té ka dòmi épi madanm papa’y. Sa té tèlman mové, “pa menm sé moun-an ki pa té ka kwè an [Bondyé] ki [té] ka fè sa”! Mé kongwigasyon-an té kwè fwè sala té sa wèsté an kongwigasyon-an, èk pitèt adan di yo té kwè yo té ka moutwé fwè-a mizéwikòd menm kon Jéhova. Mé si yo té kwè sa, yo té ka fè on gwo lèwè, paski Jéhova pa ka aksèpté mové kondwit anpami pèp li. San dout, moun ki pa té ka adowé Jéhova té sipwi pou tann on nonm an kongwigasyon-an té ka fè on bagay kon sa. Èk si nonm-lan té wèsté an kongwigasyon-an, sa té kay ankouwajé lòt moun an kongwigasyon-an pou fè menm kon li. Alò, kisa zapòt Pòl di kongwigasyon-an pou fè?

5. Kisa zapòt Pòl té di kongwigasyon-an pou fè épi nonm-lan, èk ki mannyè kongwigasyon-an té ni pou twété’y? (1 Kòrint 5:13) (Gadé pòtwé-a osi.)

⁵ Li 1 Kòrint 5:13. Wi, kon nou li an lévanjil-la, Jéhova pousé zapòt Pòl pou ékwi kongwigasyon-an an lèt pou di yo pou tiwé nonm-lan an kongwigasyon-an, paski i pa té wépanti. Mé ki mannyè kongwigasyon-an té sipozé twété’y? Ében Pòl di, yo pa té sipozé “ni anyen pou fè” épi nonm sala. Mé kisa konmand sala vlé di? Ében, Pòl èspliké, “sé pa pou [yo] menm manjé” épi nonm sala. (1 Kòr. 5:11) Bon. Pouki zapòt Pòl ba yo konsèy sala? Ében, katjilé asou ègzanp sala: Lè’w asiz pou manjé an wipa épi an moun, zòt ka pasé tan ansanm èk zòt ka tjenn bèl konmézasyon. Ès pa? Alò zapòt Pòl té ka di yo, yo pa té sipozé pasé tan ki pa nésésè épi nonm sala. Èk sa sé paski sa té kay pwotéjé kongwigasyon-an hòd mové enflouwans li. (1 Kòr. 5:5-7) Osi, sa pitèt té kay édé nonm-lan pou wéyalizé ki otan i té kasé tjè Jéhova. Èk pitèt sa té kay fè’y santi lapenn èk enkouwajé’y pou wépanti.

6. Kisa kongwigasyon-an té fè lè yo wisivwè lèt Pòl, èk kisa nonm-lan té fè?

⁶ Apwé zapòt Pòl voyé lèt li bay sé Kwityen-an an Kòrint, i koumansé katjilé kisa kongwigasyon-an té kay fè lè yo wisivwè lèt li. Mé apwé on tan Titòs mennen’y bon nouvèl. (2 Kòr. 7:6, 7) Wi, kongwigasyon-an té swiv diwèksyon Pòl, èk yo té tiwé nonm-lan ki té ka fè péché gwav-la an kongwigasyon-an. Osi, pa twò lonng apwé Pòl voyé lèt li nonm-lan wépanti, i chanjé mové kondwit li èk atitid li, èk i koumansé swiv wèg Bondyé. (2 Kòr. 7:8-11) Atjwèlman, kisa zapòt Pòl té kay di kongwigasyon-an pou fè kon nonm-lan wépanti?

KI MANNYÈ KONGWIGASYON-AN TÉ SIPOZÉ TWÉTÉ NONM-LAN KI WÉPANTI-A?

7. Kisa nonm-lan té fè a kòz di aksyon-an kongwigasyon-an té pwan-an? (2 Kòrint 2:5-8)

⁷ Li 2 Kòrint 2:5-8. Wi, Pòl di, ‘pinisyon-an kongwigasyon-an té bay nonm-lan té asé pou li.’ Sa vlé di, kowijman-an té édé nonm-lan pou wépanti. Konsa, kongwigasyon-an pa té ni pou kontiné kowijé’y.​—Hib. 12:11.

8. Kisa Pòl di sé ansyen-an pou fè?

⁸ Bon. Pòl di sé ansyen-an pou ‘pawdonnen épi konsolé’ fwè-a ki té péché-a, èk pou ‘moutwéʼy yo enmenʼy toujou’. Wi, Pòl té vlé sé fwè-a sèvi pawòl yo èk aksyon yo, pou moutwé fwè-a yo té vwéman pawdonnen’y èk yo té vwéman enmen’y. Wi, sa té kay moutwé fwè-a yo té vwéman kontan i té witounen an kongwigasyon-an.

9. Pouki i pitèt té difisil pou adan sé fwè-a an kongwigasyon-an pawdonnen fwè-a ki wépanti?

⁹ Bon. I pitèt té wèd pou adan sé fwè-a an kongwigasyon-an moutwé fwè-a ki wépanti jantiyès lè i witounen an kongwigasyon-an. Pouki nou ka di sa? Ében, pitèt adan di yo té faché toujou paski fwè-a mennen an chay wipwòch asou kongwigasyon-an. Osi, pitèt aksyon’y té afèkté adan sé fwè èk sè-a. Èk osi, sé fwè èk sè-a an kongwigasyon-an té twavay byen wèd pou obéyi konmand Bondyé. Alò, adan di yo pitèt té santi sé ansyen-an pa té sipozé kité’y witounen an kongwigasyon-an. (Gadé Louk 15:28-30.) Kanmenm, i té byen enpòtan pou sé fwè-a an kongwigasyon-an moutwé fwè-a ki wépanti-a lanmityé. Poutji nou ka di sa?

10-11. Kisa ki té sa fèt si sé ansyen-an pa té kité fwè-a viwé an kongwigasyon-an?

¹⁰ Bon. Ki mannyè fwè-a té kay santi si sé ansyen-an pa té kité’y viwé an kongwigasyon-an apwé i wépanti? Èk ki mannyè i té kay santi si kongwigasyon-an pa té moutwé’y lanmityé lè’y witounen? Èben fwè-a té kay vini dékouwajé an chay èk i té kay “adan an chay lapenn.” Osi, pitèt i té kay kwè i pa té sa janmen vini an manm an kongwigasyon-an ankò. Èk pitèt i té kay jis kwè Jéhova pa té kay janmen pawdonnen’y, alò i pa té ka fè sans pou chanjé.

¹¹ Bon. Si sé fwè èk sè-a pa té pawdonnen fwè-a ki té wépanti, ki lòt bagay ki té sa fèt? Ében sa té sa donmajé wilasyon yo épi Jéhova. Pouki nou ka di sa? Sa sé paski yo pa té kay swiv ègzanp Jéhova an mannyè-a i ka pawdonnen moun ki wépanti. Pito sa, yo té kay swiv ègzanp Satan, moun-lan ki ni tjè wèd-la èk ki pa ka moutwé mizèwikòd. Anfen, Satan té kay sèvi yo kon an zouti pou anpéché nonm-lan kontiné sèvi Jéhova.​—2 Kòr. 2:10, 11; Èfés. 4:27.

12. Ki mannyè kongwigasyon-an té sa swiv ègzanp Jéhova?

¹² Bon. Ki mannyè kongwigasyon-an an Kòrint té sa swiv ègzanp Jéhova pito yo swiv ègzanp Satan? Ében yo té sa fè sa lè yo twété moun ki wépanti menm kon Jéhova. Pou ègzanp, Wa David di: ‘Jéhova bon èk i pawé pou pawdonnen.’ (Sam 86:5) Osi, pwòfèt Mayka di: ‘Kilès dyé ki kon ou, Bondyé, ki ka pawdonnen lèwè èk ki pa ka menm fiksé asou péché?’ (Mayk. 7:18) Èk pwòfèt Izaya di: ‘Sé pou moun-nan ki méchan-an kité chimen-an i ka swiv-la. Èk sé pou moun-nan ki ka fè sa ki mové-a tiwé sé vyé katjil-la ki an lidé’y-la. Sé pou’y viwé jwenn Jéhova, Bondyé nou, ki kay ni mizèwikòd asou’y èk ki kay pawdonnen’y konplètman.’​—Izay. 55:7.

13. Pouki i té bon pou kité nonm-lan ki wépanti-a witounen an kongwigasyon-an ankò? (Gadé bwèt-la “Ki Mizi Tan Ki Pasé Avan Yo Aksèpté Nonm-lan An Kongwigasyon-an Ankò?”)

¹³ Pou sé fwè-a an kongwigasyon Kòrint swiv ègzanp Jéhova, yo té ni pou moutwé nonm-lan yo enmen’y. Èk osi yo té ni pou moutwé’y sé pa dé kontan yo té kontan i té witounen an kongwigasyon-an. Anfen zapòt Pòl di si yo té pawdonnen nonm-lan ki wépanti-a, yo té kay moutwé yo té “obéyisan an tout bagay.” (2 Kòr. 2:9) Sé vwé, sé sèlman déotwa mwa ki té pasé dépi yo té tiwé nonm-lan an kongwigasyon-an, mé kowijman-an fè’y wépanti. Konsa sé ansyen-an pa té ni pou fè kòlonng avan yo aksèpté’y an kongwigasyon-an ankò.

KI MANNYÈ NOU SA MOUTWÉ JISTIS ÈK MIZÉWIKÒD MENM KON JÉHOVA?

14-15. Ki lison nou sa apwann an sa ki té fèt an kongwigasyon-an an Kòrint? (2 Pita 3:9) (Gadé pòtwé-a osi.)

¹⁴ Jéhova mété wakont-lan konsèné sa ki té fèt an kongwigasyon-an an Kòrint an Bib-la, “pou enstwi nou.” (Ronm 15:4) An wakont sala nou ka apwann ki, Jéhova pa ka kité moun ki fè péché ki gwav èk ki pa vlé wépanti an kongwigasyon-an. Mé adan moun pé kwè paski Jéhova plen mizéwikòd, i kay kité moun ki pa vlé wépanti an kongwigasyon-an, mé sa pa vwé. Èk chonjé, magwé Jéhova plen mizéwikòd, i pa ka aksèpté movèzté. Èk wèg li konsèné sa ki bon èk sa ki mové pa ka chanjé. (Joud 4) Anfen, si Jéhova kité moun ki pa vlé wépanti an kongwigasyon-an, sa pa kay moutwé mizéwikòd, paski sa kay afèkté kongwigasyon-an.​—Pwov. 13:20; 1 Kòr. 15:33.

¹⁵ Kanmenm, Jéhova pa vlé pyèsonn péwi, i vlé moun viv. Alò lè moun chanjé katjil yo èk aksyon yo èk yo vlé sèvi Jéhova, i ka moutwé sé moun sala mizéwikòd. (Izik. 33:11; li 2 Pita 3:9.) Èk sa sé wézon-an, lè nonm-lan an Kòrint wépanti èk i chanjé mannyè’y, Jéhova diwèkté kongwigasyon-an pou pawdonnen’y èk pou aksèpté’y an kongwigasyon-an ankò.

16. Lè ou wè mannyè Jéhova diwèkté kongwigasyon-an pou twété nonm-lan, ki mannyè sa ka fè’w santi konsèné Jéhova?

¹⁶ Ègzanp-lan nou konsidiwé an kongwigasyon Kòrint-la ka moutwé Jéhova plen lanmityé, i dwèt, èk i jis. (Sam 33:5) Wi, lè nou mèdité asou bèl kawaktè Jéhova, sa ka pousé nou pou glowifyé’y pli. Nou ka apwésyé mizèwikòd li, paski nou tout sé péchè èk nou tout bizwen pawdonnasyon’y. Nou osi ka apwésyé ki, Jéhova potjiwé wanson-an pou’y sa pawdonnen péché nou. Wi, i ka vwéman soulajé nou pou konnèt ki, Jéhova enmen pèp li èk sé sèlman sa ki bon i vlé pou yo!

17. Kisa nou kay diskité an sé lòt atik-la?

¹⁷ Ében an sé lòt atik-la, nou kay diskité sé dé (2) kwèsyon sala: Jòdi jou si an moun fè an péché ki gwav, ki mannyè sé ansyen-an an kongwigasyon-an sa imité lanmityé Jéhova èk édé moun-lan pou wépanti? Èvèk kisa sé fwè èk sè-a an kongwigasyon-an sipozé fè lè sé ansyen-an désidé pou tiwé an moun an kongwigasyon-an ében pou aksèpté an moun an kongwigasyon-an ankò?