Apwann Hòd Sa Nonm Fidèl Té Di Avan Yo Mò

1. Pou ki wézon Jéhova vlé nou apwann hòd sé fwè èk sè-a ki an laj?

ÈS nou tout pa ka dakò ki, nou bizwen èd pou nou sa fè bon disizyon? Absoliman. Ében, nou sa twapé bon konsèy hòd sé ansyen-an ében lòt fwè èk sè ki ni èspéyans. Mé, si sé moun sala otan pli vyé pasé nou, ès nou sa di konsèy yo pa bon? Mé non! Anfen Jéhova vlé nou apwann bon lésisyon hòd sé fwè èk sè sala. Ou wè, yo asou latè-a pou pli tan pasé nou, konsa yo ni èspéyans an lavi, èk yo ni lakonpwann èk lasajès.​—Jòb 12:12.

2. Kisa nou kay diskité an atik sala?

² An tan lontan, Jéhova té sèvi gwan moun ki té fidèl pou ankouwajé èk djidé pèp li. Annou konsidiwé twa an sé moun sala; Moziz, David, èk zapòt Jan. Yo té viv an diféwan lépòk èk sitiwasyon yo té diféwan. Mé avan yo mò, yo bay jenn moun bon konsèy. Yo chak palé asou mannyè-a i enpòtan pou obéyi Bondyé. Èk Jéhova pwèzèvé bon konsèy yo an Bib-la ban nou. Konsa, ki nou jenn ki nou an laj, nou tout sa twapé bennéfis lè nou konsidiwé bon konsèy yo. (Ronm 15:4; 2 Tim. 3:16) Bon. An atik sala nou kay konsidiwé sa sé nonm sala té di avan yo mò, èk ki lison nou sa apwann hòd sa yo di.

‘OU KAY VIV POU AN LONNG TAN’

3. Moziz té twavay wèd bay Jéhova. Ki diféwan bagay i té fè?

³ Moziz twavay wèd bay Jéhova diwan tout lavi’y. Pou ègzanp, i té wann sèvis kon on pwòfèt, on jij, on chèf, èk on ékwiven. Osi, i té djidé nasyon Izwayèl, lè’y yo té ka sòti anba èslavaj an péyi Éjip. Èk i té wè an pil an sé miwak-la Jéhova té fè-a. An plis di sa, Jéhova té jis sèvi’y pou ékwi sé pwèmyé senk (5) liv-la an Bib-la. Èk osi i té sèvi’y pou ékwi liv Jòb, Sam 90, èk pitèt Sam 91. San dout, Moziz té twapé an chay èspéyans hòd sé diféwan asaynman sala.

4. Ki moun Moziz té enkouwajé, èk pouki?

⁴ Moziz té viv pou yon san ven (120) lanné. Mé djòs avan i mò, i sanblé pèp Izwayèl pou fè yo chonjé sa Jéhova té fè ba yo. Pou ègzanp, plizyè lanné avan, adan di yo té wè sé miwak-la Jéhova té fè-a, èk mannyè i pini jan Éjip. (Ègz. 7:3, 4) Osi, yo té wè Jéhova fann lanmè wouj-la, èk yo té maché asou tè sèk. Èk apwé sa, yo wè Jéhova détwi Féro èk tout lawmé’y. (Ègz. 14:29-31) An plis di sa, lè yo té an savann sèk-la, Jéhova pwotéjé yo èk swen yo. (Dito. 8:3, 4) Èk alafen, nasyon Izwayèl té kay antwé tè pwonmèt-la. Konsa, avan Moziz mò, i té vlé ankouwajé yo.a

5. Avan Moziz mò, ki asiwans i bay nasyon Izwayèl an Ditonronnonmi 30:19, 20?

⁵ Kisa Moziz té di? (Li Ditonronnonmi 30:19, 20.) Wi, Moziz fè nasyon Izwayèl chonjé touswit yo té kay ni on bon lavi. Èk sa sété paski, Jéhova té kay benni yo èk yo té kay viv pou an lonng tan an péyi-a i té pwonmèt pou ba yo-a. Èvèk pa dé bèl péyi sala té bèl. Èk i té ka pwodwi an chay manjé. Anfen, mi sé kon sa Moziz té dékwi’y ba yo an Ditonronnonmi 6:10, 11: ‘Zòt kay wè vil zòt pa té bati ki gwo èk bèl, zòt kay wè kay ki plen tout kalité bon bagay zòt pa té twavay pou, èvèk zòt kay wè tou glo zòt pa té fouyé. Osi zòt kay wè jaden wézen, èk pyé òliv zòt pa té planté.’

6. Pouki Bondyé kité lòt nasyon pwan jan Izwayèl kon pwizonnyé?

⁶ Moziz té osi vèti nasyon Izwayèl. I di yo, si yo té vlé kontiné viv an bèl péyi sala, yo té kay ni pou obéyi koumand Jéhova. Konsa, Moziz ankouwajé yo pou ‘chwazi lavi’, ‘enmen Jéhova’, ‘kouté vwa’y, èk wèsté fidèl pou li’. Kanmenm, nasyon Izwayèl pa té obéyi Jéhova. Èvèk apwé an lè, Bondyé pèwmité jan Asiriya èk pli ta jan Babilonn, pou bat yo an ladjè èk mennen yo alé kon pwizonnyé.—2 Wa 17:6-8, 13, 14; 2 Kw. 36:15-17, 20.

7. Kisa nou sa apwann an sa Moziz té di nasyon Izwayèl? (Gadé pòtwé-a osi.)

⁷ Kisa ki lison-an pou nou? Èben lison-an sé sa: Si nou obéyi Jéhova nou sa viv pou tout tan. Ou wè, bagay-la sé sa, menm kon jan Izwayèl té byen pwé tè pwonmèt-la, nou osi byen pwé latè nèf-la Jéhova té pwonmèt nou-an. Konsa touswit latè-a kay vini on pawadi ankò. (Izay. 35:1; Louk 23:43) Dyab-la èk tout sé zélèv li-a pa kay la. (Wév. 20:2, 3) Osi, la pa kay ni fo wilizyon ankò pou enstwi moun mansonj konsèné Jéhova. (Wév. 17:16) An plis di sa, gouvèdman lézòm pa kay la pou maltwété moun ankò. (Wév. 19:19, 20) Èk Bondyé pa kay pèwmité pyèsonn pou annékòz pyès pwoblenm an pawadi-a. (Sam 37:10, 11) Wi, moun toupatou kay obéyi wèg Jéhova, èk annékòz di sa, moun kay enmen èk konfyé yonn a lòt, èk yo kay ni lilyon èk lapé. (Izay. 11:9) A! Pa dé bèl sa kay bèl, èk nou ka gadé pou tan sala! Bon. Si nou obéyi Jéhova nou kay sa viv an Pawadi pa pou an ti tan tousèl, mé pou tout tan.​—Sam 37:29; Jan 3:16.

8. Ki mannyè pwonmèt-la pou viv an pawadi-a pou tout tan té édé yon fwè ki ka wann sèvis kon yon misyonnè? (Joud 20, 21)

⁸ Wi, lavi pou tout tan an Pawadi sé yon bèl pwonmèt. Èk si nou kontiné mèdité asou’y, nou kay sa wèsté fidèl pou Jéhova. (Li Joud 20, 21.) Osi, sé pwonmèt sala ka ban nou fòs-la pou kontiné goumen kont sé fèblès nou-an. Pou ègzanp, yon fwè ki ka wann sèvis kon an misyonnè pou plizyè lanné an Afwik di, souvan i té ka goumen kont tantasyon pou fè an bagay ki ka déplè Jéhova. Konsa i di: “Mwen wéyalizé, si mwen vlé viv pou tout tan mwen ni pou obéyi Jéhova. Èk sa édé mwen pou kontiné goumen kont fèblès mwen, èk mwen té ka toujou vidé tjè mwen bay Jéhova konsèné’y. Wi, épi èd Jéhova mwen té sa ganyen a bout fèblès mwen.”

‘OU KAY NI SIKSÉ’

9. Ki difikilté David té èspéyansé an lavi’y?

⁹ David sété on bon wa, èk i té wèsté fidèl bay Jéhova. Èk osi, i sété an mizisyen, on powèt, on sòlda, èk on pwofèt. Mé kanmenm, i té èspéyansé an chay difikilté an lavi’y. Pou ègzanp, pou plizyè lanné i té ni pou kouwi pou lavi’y, paski Wa Sòl té vlé tjwè’y. Osi, apwé David vini wa, i té ni pou kouwi pou lavi’y ankò, paski gason’y Absolonm té vlé wiplasé’y kon wa. Mé magwé David té ni sé pwoblenm sala, èk i té jis fè péché gwav, i té wèsté fidèl bay Jéhova. Anfen, Jéhova menm di konsèné David: “David . . . sé yon nonm ki fè tjè mwen kontan an chay.” Konsa, i a klè nou sipozé kouté bon konsèy David!—Twav. 13:22; 1 Wa 15:5.

10. Pouki David té bay gason’y Sòlomonn konsèy avan i té vini wa?

¹⁰ Annou konsidiwé konsèy-la David té bay gason’y Sòlomonn. Chonjé Sòlomonn té kay vini wa lè David mò. Èvèk Jéhova té chwazi Sòlomonn pou bati an tanp, koté moun té sa adowé’y. (1 Kw. 22:5) Mé sa sété an chay twavay, èk Sòlomonn té kay bizwen èd Jéhova pou djidé nasyon-an. Alò, kisa David té kay di’y? Ében annou wè sa’y té di’y!

11. (a) Ki konsèy David té bay Sòlomonn an 1 Wa 2:2, 3? (b) Ki bennéfis Sòlomonn twapé lè’y obéyi konsèy David? (Gadé pòtwé-a osi.)

¹¹ Kisa David té di? (Li 1 Wa 2:2, 3.) Wi, David di gason’y si i obéyi Jéhova, i té kay ni siksé an tout sa i ka fè. Èk pou plizyè lanné Jéhova té ka benni Sòlomonn. (1 Kw. 29:23-25) Pou ègzanp, Sòlomonn bati on bèl tanp, èk i té ékwi détwa liv an Bib-la. Osi, adan sa’y té ékwi ka pawèt an lòt liv an Bib-la. An plis di sa, moun toupatou té konnèt li pou lasajès li èk wichès li. (1 Wa 4:34) Mé kon David té di, Sòlomonn té kay ni siksé sèlman si’y obéyi Jéhova. Malèwèzman, pli ta an lavi Sòlomonn i koumansé adowé lòt dyé. Èk Jéhova pa té plè épi sa Sòlomonn té ka fè. Konsa, Jéhova doubout bay Sòlomonn lasajès-la pou kondwi pèp li adan on mannyè ki jis èk janti.​—1 Wa 11:9, 10; 12:4.

12. Kisa nou sa apwann an sa David té di Sòlomonn?

¹² Kisa ki lison-an pou nou. Èben lison-an sé sa: Lè nou obéyi Jéhova, i kay benni nou, èk nou kay ni siksé. (Sam 1:1-3) Mé kwèsyon-an sé sa: Ès Jéhova kay ban nou wichès èk laglwa menm kon Sòlomonn? Mé non. Mé kanmenm, si nou obéyi Bondyé, i pwonmèt pou ban nou lasajès; lasajès ki kay édé nou fè bon disizyon. (Pwov. 2:6, 7; Jémz 1:5) Wi, sé pwensip-la i ban nou sa édé nou pou fè bon disizyon lè’y vini pou twavay nou, lékòl nou, lajan, èk sa nou ka fè pou anmizé kò nou. Anfen, si nou swiv konsèy li, nou kay pwotéjé wilasyon nou épi’y èk nou kay ni lavi pou tout tan. (Pwov. 2:10, 11) Osi, nou kay ni bon jan èk nou kay ni lakontantman an fanmi nou.

13. Kisa ki té édé Carmen fè bon disizyon?

¹³ Carmen, ki ka wèsté an Mozambique té kwè, si’y twapé pli endikasyon, sa té kay fè lavi’y pli mèyè. Konsa i alé inivèsité pou apwann mannyè pou fè bèl kay. I di: “Mwen té enmen sa mwen té ka apwann. Mé, i té ka pwan twòp tan mwen, èk kouway mwen. Mwen té an lékòl dépi sétè é dimi lé bonmaten (7:30 a.m) pou jis sizè òswè (6:00 p.m). Konsa, i té difisil pou mwen atandé mitin, èk wilasyon mwen épi Jéhova vini fèb. Apwé an tan mwen wéyalizé mwen té ka éséyé sèvi dé mèt.” (Maf. 6:24) Konsa, sè Carmen pwédyé konsèné sitiwasyon’y, èk i té fè wichach an sé piblikasyon nou-an. I osi di: “Apwé mwen twapé bon konsèy hòd sé ansyen-an èk manman mwen, mwen désidé pou kité inivèsité èk koumansé wann sèvis an plen. Wi, mwen vwéman kwè mwen fè pli mèyè disizyon-an, èk pa dé kontan mwen kontan mwen fè sa.”

14. Kisa ni Moziz ni David té ankouwajé sèvant Jéhova pou fè?

¹⁴ Moziz èk David té enmen Jéhova, èk yo té sav i té byen enpòtan pou obéyi’y. Avan yo mò yo ankouwajé sé moun-lan yo té ka palé bay-la, pou swiv ègzanp yo èk wèsté fidèl pou Jéhova. Yo osi té vèti yo pou pa kité Jéhova paski yo té kay pèd favè’y èk bennédiksyon’y. Wi, konsèy sala byen valowab pou nou jòdi jou. Bon. Plizyè san lanné apwé, on lòt sèvant Jéhova té èspliké pouki i enpòtan pou nou wèsté fidèl pou Jéhova.

‘ANYEN PA KA FÈ MWEN PLI KONTAN’

15. Ki diféwan bagay zapòt Jan té wè diwan lavi’y?

¹⁵ Zapòt Jan sété an disip Jézi té enmen an chay. (Maf. 10:2; Jan 19:26) Jan pasé an chay tan épi Jézi ka pwéché, èk i té wè’y fè an chay miwak. I osi té wété fidèl bay Jézi. An plis di sa, i wè Jézi mò, èk i té wè Jézi apwé i té wésisité. Osi, paski i té viv pou an lonng tan i té wè kongwigasyon Kwityen-an pwofité. Èk i té wè ‘bon nouvèl-la simen tout oliwon latè-a.’—Kòl. 1:23.

16. Ki moun ki ja twapé bennéfis an sé lèt-la Jan té ékwi?

¹⁶ Lè Jan té an vyéyès li, i té ni pwivilaj-la pou ékwi plizyè liv an Bib-la. I té ékwi liv Wévélasyon, liv Jan, èk sé twa (3) lèt-la, Pwèmyé Jan, Dézyenm Jan, èk Twazyenm Jan. (Wév. 1:1) I té voyé twazyenm lèt li bay Gayòs, an Kwityen i té enmen an chay. (3 Jan 1) Èk menm kon Gayòs, la té ni plizyè lòt moun Jan té ka gadé kon ich li, èk sa Jan té ékwi té ankouwajé yo. Anfen, sa Jan ékwi ja ankouwajé tout disip Jézi, ni an tan pasé ni jòdi.

17. Silon 3 Jan 4, kisa ki ka ba moun tjè kontan?

¹⁷ Kisa zapòt Jan té ékwi? (Li 3 Jan 4.) An twazyenm lèt Jan i di, lè i wè sé fwè’y èk sè’y-la ka obéyi Bondyé, sa ka ba’y tjè kontan. Mé lè Jan té ékwi lèt sala, adan moun té ka ékwi mansonj èk té ka annékòz pwòblenm an kongwigasyon-an. Kanmenm, sé lézòt fwè èk sè-a té ka ‘swiv lavéwité-a’ èk “konmandman Bondyé”. (2 Jan 4, 6) Wi, sé Kwityen fidèl sala té ka bay ni Jan ni Jéhova tjè kontan.​—Pwov. 27:11.

18. Kisa nou sa apwann an sa zapòt Jan té ékwi?

¹⁸ Kisa ki lison-an pou nou? Ében lison-an sé sa: Lè nou wèsté fidèl pou Jéhova nou kay ni tjè kontan èk nou kay bay lézòt tjè kontan osi. (1 Jan 5:3) Pou ègzanp, nou ni tjè kontan paski nou ka fè tjè Jéhova kontan. Osi, pa dé kontan Jéhova ka kontan lè nou widjèkté tantasyon èk obéyi konmandman’y. (Pwov. 23:15) Èk sé pa sa tousèl, jis sé nanj-lan an syèl ka wéjwi lè nou obéyi Jéhova. (Louk 15:10) An plis di sa, pa dé kontan nou ka kontan lè nou wè sé fwè èk sè nou-a wèsté fidèl pou Jéhova magwé pèsikasyon èk tantasyon-an pou fè sa ki mové. (2 Tèsa. 1:4) Wi, èk lè Jéhova détwi latè Satan, nou kay ni tjè kontan paski nou té wèsté fidèl pou li.

19. Kisa sésé Rachel di konsèné sakwifis-la i ka fè pou enstwi lézòt? (Gadé pòtwé-a osi.)

¹⁹ Lè nou enstwi lézòt konsèné Jéhova, nou ka twapé an chay djèwté. Yon sésé non’y sé Rachel, ki ka wèsté an Dominican Republic di, i sé an lonnè pou enstwi moun konsèné Bondyé. Èk i ja édé plizyè moun pou koumansé adowé Jéhova. I di: “I tèlman difisil pou dékwi lajwa-a mwen ka santi lè mwen gadé sé moun-lan mwen ka enstwi-a pwofité an lanmityé yo pou Jéhova, konfyé’y pli, èk fè chanjman an lavi yo pou plè’y. Konsa, djèwté-a mwen ni-an vo pli pasé népòt sakwifis ében népòt éfò mwen fè pou enstwi yo.”

TWAPÉ BENNÉFIS AN SA SÉ NONM FIDÈL-LA TÉ DI AVAN YO MÒ

20. Kisa nou ni an konmen épi Moziz, David, èk zapòt Jan?

²⁰ Moziz, David, èk Jan té ka viv an chay san lanné ki pasé. Èk mannyè-a yo té ka viv diféwan hòd mannyè-a nou ka viv jòdi jou. Mé kanmenm, nou ni an chay diféwan bagay an konmen épi yo. Pou ègzanp, menm kon yo nou ka adowé Dyé vwé-a. Osi, nou ka pwédyé bay Jéhova, èk nou ka dépan asou’y pou èd èk konsèy. An plis di sa, menm kon sé nonm fidèl sala, nou ni konfyans-lan ki Jéhova ka benni tout moun ki ka obéyi’y.

21. Ki mannyè Jéhova kay benni nou si nou swiv konsèy Moziz, David, èk Jan?

²¹ Wi, annou tout swiv konsèy sé nonm fidèl sala, èk obéyi koumandman Jéhova. Si nou fè sa, nou kay vwéman ni siksé an tout sa nou ka fè. Nou kay ‘viv pou an lonng tan’, wi, pou tout tan! (Dito. 30:20) Èk nou kay ni tjè kontan paski nou ka plè Papa nou Jéhova. Asiwéman, Jéhova kay benni nou èk ban nou twòp pli pasé nou sa janmen imajiné.​—Èfés. 3:20.