Kontiné Konfyé Vil-la Ki Kay Wèsté Pou Tout Tan

1. Kisa Jézi di ki té kay wivé Jérouzalèm?

BON déotwa jou avan Jézi mò, i bay sé disip li-a an pwofèsi. Èvèk an pwofèsi sala i di yo ki, jou-a kay wivé lè “[yo] kay wè sòlda tout oliwon Jérouzalèm.” (Louk 21:20) Bon Jézi di sé disip li-a, lè yo wè sé sòlda sala owon Jérouzalèm, yo té ni pou kité Joudiya la menm. Èk sa Jézi di fèt vwé, lawmé Ronm té vini oliwon Jérouzalèm.​—Louk 21:21, 22.

2. Ki konsèy zapòt Pòl bay sé Kwityen-an ki té ka viv an Joudiya èk Jérouzalèm?

² Déotwa lanné avan lawmé Ronm té vin asanblé tout owon Jérouzalèm, zapòt Pòl té ékwi sé Kwityen-an ki té ka wèsté an Joudiya èk Jérouzalèm an lèt ki té ni an konmisyon ki té byen enpòtan. Èvèk lèt sala sé liv Hibrou. Èk an lèt sala zapòt Pòl bay sé fwè-a konsèy ki té kay pwépawé yo pou tan difisil-la ki té ka vini-an. Mé kisa ki té kay fèt? Ében Jérouzalèm té kay détwi. Alò, sèl mannyè-a sé Kwityen-an té sa chapé, sé si yo té pawé pou kité kay yo èk biznis yo dèyè. Konsa Pòl ékwi konsèné Jérouzalèm, i di: “Nou pa ni pyès vil asou latè-a ki la pou tout tan. Nou ka gadé pou vil-la ki ni pou vini-an.”​—Hib. 13:14.

3. Kisa ki “vil-la ki ni fondasyon-an ki kay doubout pou tout tan-an,” èk pouki nou ka konfyé’y?

³ Lè sé Kwityen-an té désidé pou kité Jérouzalèm èk Joudiya, an chay moun pitèt té ka wi yo, èk kwiyé yo kouyon, mé disizyon sala té sové lavi yo. Èk jòdi moun pitèt ka di nou kouyon paski nou pa ka mété konfyans nou an lajan, èk nou pa ka dépan asou lézòm pou wanjé pwoblenm latè-a. Alò, pouki nou ka fè disizyon sala? Ében sa sé paski nou sav touswit Wéyòm Bondyéa kay détwi vyé sistèm sala. Konsa nou ka konfyé Wéyòm Bondyé, sa sé “vil-la ki ni fondasyon-an ki kay doubout pou tout tan-an,” èk “vil-la ki ni pou vini-an.” (Hib. 11:10; Maf. 6:33) Bon. An atik sala nou kay diskité sé twa «3» pwen sala: (1) Mannyè konsèy Pòl té édé sé Kwityen-an pou kontiné konfyé Wéyòm Bondyé. (2) Mannyè Pòl pwépawé yo pou chapé distwiksyon Jérouzalèm. Èvèk (3) mannyè konsèy zapòt Pòl ka édé nou jòdi jou.

KONFYÉ JÉHOVA, PASKI I PA KAY JANMEN TOUNEN DO’Y ASOU’W

4. Pouki Jérouzalèm té si tèlman enpòtan pou sé Kwityen-an?

⁴ Jérouzalèm té byen enpòtan pou sé Kwityen-an. Chonjé sé la pwèmyé kongwigasyon-an té établi an lanné twant twa «33» an lépòk nou. Èk sé la sé fwè-a ki té asou pwensipal konmité-a té ka wèsté. An plis di sa, an chay Kwityen té ni kay yo, biznis yo, èk lòt pozèsyon an vil sala. Mé Jézi té di sé disip li-a, yo té kay ni pou kité ni Jérouzalèm ni Joudiya.​—Maf. 24:16.

5. Ki mannyè zapòt Pòl té pwépawé sé Kwityen-an pou sa ki té kay wivé Jérouzalèm?

⁵ Bon, pou pwépawé sé Kwityen-an pou sa ki té kay wivé Jérouzalèm, zapòt Pòl édé yo pou gadé Jérouzalèm mannyè-a Jéhova té ka gadé vil-la. Anfen Pòl édé yo wè, Jéhova pa té ka aksèpté sé bagay-la yo té abitwé épi-a ankò. Pou ègzanp, Jéhova pa té ka aksèpté sé pwèt-la, tanp-lan, èk sé sakwifis-la yo té ka ofè-a. (Hib. 8:13) Osi, pwèskè tout sé moun-lan an vil-la pa té aksèpté Jézi kon Mèsaya-a. Anfen, ni Jérouzalèm ni tanp-lan té kay détwi. Alò moun pa té ni pou alé Jérouzalèm pou adowé Jéhova ankò.​—Louk 13:34, 35.

6. Pouki sé Kwityen-an té bizwen konsèy-la zapòt Pòl ba yo an Hibrou 13:5, 6?

⁶ Lè Pòl té ékwi sé Kwityen-an, an chay moun té ka wèsté an Jérouzalèm. Èk plizyè moun té enmen vizité vil sala. Anfen, yon ékwiven an Ronm diwan tan sala di: “An tout sé vil-la an sòlèy lévan-an, sété Jérouzalèm ki té pli bèl-la.” Konsa Jwif hòd plizyè péyi té ka alé Jérouzalèm twa «3» fwa pa lanné, pou òbzòvé sé diféwan fèsten-an, èk yo té ka dépansé an chay lajan la. Èk adan sé Kwityen-an té ka fè an chay lajan tou. Pitèt sa sé wézon-an Pòl di yo: “Pwan pokosyon pou pa enmen lajan twòp. Sé pou zòt kontanté èk sa zòt ni.” Èk i sèvi an lévanjil koté Jéhova bay asiwans-lan ki, “mwen pa kay janmen kité zòt, mwen pa kay janmen tounen do mwen anlè zòt.” (Li Hibrou 13:5, 6; Dito. 31:6; Sam 118:6) Bon, i té enpòtan pou sé Kwityen-an chonjé pwonmèt sala, paski pa twò lonng apwé yo wisivwè lèt sala, yo té kay ni pou kouwi kité kay yo, biznis yo, èk pwèskè tout bagay yo té ni. Wi, yo té kay ni pou koumansé an lavi nèf adan an lòt plas, èk sa pa té kay ézé pou fè.

7. Pouki nou ni pou apwann pou mété tout konfyans nou an Jéhova dépi apwézan?

⁷ Lison-an pou nou: Kisa ki kay fèt touswit? Ében gwan twibilasyon-an kay koumansé, èk vyé sistèm Satan kay détwi. (Maf. 24:21) Konsa, menm kon sé Kwityen-an an Jérouzalèm, nou ni pou wèsté fidèl apwézan, èk pwépawé pou tan sala. (Louk 21:34-36) Wi, diwan tan mové sala, nou pé pèd kay nou, èk tout pozèsyon nou. Alò a lè sala, nou kay ni pou ni konfyans-lan ki Jéhova pa kay janmen abandonnen nou. Konsa dépi apwézan, avan gwan twibilasyon-an koumansé, nou sa moutwé ki otan nou ka konfyé Jéhova. Bon. Nou sa mandé kò nou kèstyon tèl kon, ‘Ès sé disizyon-an mwen ka fè, èk sé plan-an mwen ka fè pou tan ki ka vini, ka moutwé mwen ka mété konfyans mwen an Jéhova èk pa an lajan?’ (1 Tim. 6:17) Wi ègzanp sé Kwityen-an an pwèmyé syèk-la, sa édé nou wèsté fidèl diwan gwan twibilasyon-an. Kanmenm chonjé, gwan twibilasyon-an kay pli difisil pasé népòt bagay Kwityen ha janmen èspéyansé. Alò ki mannyè nou kay sav sa pou fè lè gwan twibilasyon-an pété?

OBÉYI SÉ FWÈ-A KI KA BAN NOU DIWÈKSYON

8. Kisa Jézi té di sé disip li-a?

⁸ Bon, déotwa lanné apwé Pòl voyé lèt-la bay sé Kwityen Hibrou-a, yo wè lawmé Ronm-lan oliwon vil Jérouzalèm pou vwé. Lè sé Kwityen-an wè sa, yo té sav sa té lè-a pou kité Jérouzalèm èk Joudiya. (Maf. 24:3; Louk 21:20, 24) Kanmenm, ki koté yo té kay alé? Chonjé Jézi té di yo: “Sa ki an Joudiya ni pou kouwi mouté an sé montany-lan.” (Louk 21:21) Mé la té ni plizyè montany. Alò ki mannyè yo té kay sav ki moutany pou yo alé?

9. Pouki sé Kwityen-an pitèt té ka katjilé ki montany yo sipozé kouwi alé? (Gadé map-la osi.)

⁹ La té ni plizyè montany sé Kwityen té sa kouwi alé: Pou ègzanp, la té ni sé montany Sanmariya-a, sé montany Galili-a, Mon Hèmonn, sé montany Lèbannonn-lan, èk la té ni montany lòt bò Lawivyè Jouden-an. (Gadé map-la.) Èk la té ni sèten vil adan sé moutany sala koté moun té kwè i té kay sòv pou alé wèsté. Pou ègzanp, la té ni Jwif ki té kwè vil Ganmla té sòv, paski plas-la i té yé té byen ho èk i té byen difisil pou wivé vil sala. Kanmenm sé sòlda Ronm-lan détwi vil sala, èk yo tjwé an chay an sé moun-lan.b

10-11. (a) An ki mannyè Jéhova pitèt té djidé sé Kwityen-an? (Hibrou 13:7, 17) (b) Lè sé Kwityen-an obéyi sé fwè-a ki té ka bay diwèksyon, ki bennéfis yo té twapé? (Gadé pòtwé-a osi.)

¹⁰ I ka sanm Jéhova té sèvi sé fwè-a ki té ka pwan douvan an kongwigasyon-an pou bay sé fwè èk sè-a diwèksyon. Yon nonm ki té ka étidyé listwa, non’y sé Eusebius, ékwi konsèné tan sala. I di: “Bondyé fè sé fwè-a ki té ka pwan douvan an kongwigasyon-an an Jérouzalèm konnèt ki, sé Kwityen-an té ni pou kité vil-la èk alé wèsté adan an plas yo ka kwiyé Pèla an vil Piriya.” Èvèk i ka sanm, Pèla sété an bon plas pou sé Kwityen-an alé, paski i pa té lwen Jérouzalèm, konsa i pa té difisil pou wivé la. Osi, majòwité sé moun-lan an Pèla pa té Jwif, konsa yo pa té ka goumen kont Ronm.​—Gadé map-la.

¹¹ Bon, sé Kwityen-an ki té alé an sé moutany-lan té swiv konsèy Pòl pou “obéyi sé moun-an ki ka kondwi [nou-an]” an kongwigasyon-an. (Li Hibrou 13:7, 17.) Wi, pèp Bondyé obéyi, èk sa sové lavi yo. Èk listwa ka moutwé a klè, Bondyé pa té abandonnen sé moun-lan ki té ka “èspéyé . . . vil-la ki ni fondasyon-an ki kay doubout pou tout tan-an.” Wi, sa sé Wéyòm Bondyé.​—Hib. 11:10.

12-13. Ki mannyè Jéhova ha djidé pèp li diwan tan ki difisil?

¹² Lison-an pou nou: Jéhova ka sèvi sé fwè-a ki ka pwan douvan pou bay pèp li diwèksyon. Èvèk la ni plizyè ègzanp an Bib-la ki ka moutwé Jéhova ha sèvi nonm fidèl pou djidé pèp li diwan tan ki difisil. (Dito. 31:23; Sam 77:20) Èk jòdi jou nou ha wè a klè Jéhova ka sèvi sé fwè-a ki ka pwan douvan pou djidé pèp li.

¹³ Pou ègzanp, lè COVID koumansé, ‘sé fwè-a ki ka pwan douvan’ bay sé kongwigasyon-an diwèksyon. Yo di sé ansyen-an ki mannyè pou tjenn sé mitin-lan, èk ki mannyè pou pwéché. Anfen, déotwa mwa apwé COVID koumansé, nou té ni an konvansyon an senk san «500» langaj. Èvèk sé fwè èk sè-a té sa wè pwogwanm-lan asou intannèt-la, asou télévizyon-an, ében yo té sa kouté’y asou radyo-a. Sa sété pwèmyé fwa-a nou té ni an konvansyon kon sa. Non, COVID pa té anpéché nou twapé manjé spiwitwèl. Èk wézilta di sa, nou tout twapé menm diwèksyon-an èk nou wèsté an lilyon. Alò, nou sa ni konfyans-lan ki, népòt difikilté nou pé èspéyansé an tan pou vini, Jéhova kay bay sé fwè-a ki ka pwan douvan lasajès-la pou fè bon disizyon. Konsa, pou pwépawé pou gwan twibilasyon-an èk pou fè bon disizyon diwan tan sala, nou ni pou konfyé Jéhova èk obéyi sé fwè-a ki ka pwan douvan. Mé ki lòt bagay nou ni pou fè?

MOUTWÉ SÉ FWÈ ÈK SÈ-A LANMITYÉ ÈK TOUJOU WISIVWÈ YO LAKAY NOU

14. Silon Hibrou 13:1-3, kisa sé Kwityen-an té ni pou fè avan distwiksyon Jérouzalèm?

¹⁴ Lè gwan twibilasyon-an koumansé, nou kay ni pou moutwé yonn a lòt lanmityé plis pasé avan. Diwan tan sala, nou kay ni pou fè menm kon sé Kwityen-an ki té ka wèsté an Jérouzalèm èk Joudiya. Sé vwé, yo té ka toujou moutwé yonn a lòt lanmityé. (Hib. 10:32-34) Mé an sé lanné-a avan distwiksyon Jérouzalèm, yo té ni pou moutwé yonn a lòt lanmityé èk “wisivwè [yo] lakay [yo]” jis plis pasé avan. (Li Hibrou 13:1-3.) Èvèk diwan gwan twibilasyon-an, nou osi kay ni pou fè menm bagay-la.

15. Pouki sé Kwityen Hibrou-a té ni pou moutwé yonn a lòt lanmityé èk jantiyès apwé yo kouwi kité vil-la?

¹⁵ Bon. Sé lawmé Ronm-lan té vin oliwon Jérouzalèm, mé sibitman yo kité vil-la. Èk a kòz di sa, sé Kwityen-an té sa kouwi kité vil-la, mé yo pa té sa pwan an chay bagay. (Maf. 24:17, 18) Konsa yo té ni pou édé yonn a lòt épi manjé, had, èk lòt bagay. Èk lè yo wivé vil Pèl-la, yo té ni pou édé yonn a lòt twapé twavay èk an plas pou wèsté. Konsa lè yo té ka sipòté yonn a lòt, èk yo té ka sépawé sa yo té ni, yo té ka moutwé yonn a lòt lanmityé èk jantiyès.​—Titòs 3:14.

16. Ki mannyè nou sa moutwé an fwè èben an sè ki bizwen èd lanmityé? (Gadé pòtwé-a osi.)

¹⁶ Lison-an pou nou: Lanmityé ka pousé nou pou édé sé fwè èk sè nou-an lè yo bizwen èd. Pou ègzanp, dézas èk ladjè ha fè adan fwè nou kouwi kité kay yo èk péyi yo. Mé sé fwè èk sè-a ka ba yo sa yo bizwen, an plas pou yo wèsté, èvèk yo ka édé yo èk ankouwajé yo pou kontiné sèvi Jéhova. Anfen, an sésé ki té ni pou kité kay li a kòz di ladjè-a an Ukraine di: “Nou ha wè mannyè-a Jéhova ja sèvi sé fwè-a pou édé nou èk pou otjipé nou. Yo byen vini nou èk yo édé nou lè nou té an Ukraine, an Hungary, èk apwézan kon nou an Almani.” Wi, lè nou moutwé sé fwè èk sè nou-an jantiyès, èk nou wisivwè yo lakay nou, nou ka twavay ansanm épi Jéhova.​—Pwov. 19:17; 2 Kòr. 1:3, 4.

17. Pouki i si tèlman enpòtan pou nou moutwé yonn a lòt lanmityé èk jantiyès apwézan?

¹⁷ San dout, diwan gwan twibilasyon-an, nou kay ni pou édé yonn a lòt jis plis pasé nou ka fè apwézan. (Hab. 3:16-18) Mé Jéhova ka moutwé nou mannyè pou moutwé yonn a lòt lanmityé èk jantiyès apwézan, paski diwan gwan twibilasyon-an nou kay bizwen sé kawaktè sala.

KISA KI KAY FÈT TOUSWIT?

18. Ki mannyè nou sa swiv ègzanp sé Kwityen-an ki té kouwi kité Jérouzalèm?

¹⁸ Bon. Sé Kwityen-an ki té obéyi diwèksyon-an, chapé lè Jérouzalèm té détwi. Èvèk magwé yo té ni pou kité tout bagay dèyè, Jéhova té byen otjipé yo. Kisa nou sa apwann hòd ègzanp yo? Èben nou pa konnèt tout bagay ki kay fèt an tan pou vini, mé népòt sa ki kay fèt, Jézi ha di nou pou pawé pou obéyi. (Louk 12:40) Nou sa osi swiv konsèy-la zapòt Pòl té bay sé Kwityen Hibrou-a an lèt li. Èk nou vlé chonjé pwonmèt-la Jéhova ha bay chak di nou ki, i pa kay janmen kité nou èben tounen do’y asou nou. (Hib. 13:5, 6) Konsa, annou kontiné konfyé Wéyòm Bondyé, vil-la ki kay wèsté pou tout tan. Èvèk si nou fè sa, nou kay enjwi an bèl lavi pou tout tan.​—Maf. 25:34.