Chonjé Pou Pwédyé Bay Lézòt

1. Ki mannyè nou sav lapwiyè nou vwéman enpòtan pou Jéhova?

WI, LAPWIYÈ sé an bèl kado. Bon, katjilé asou sa; Jéhova ha bay sé nanj-lan diféwan twavay pou fè. (Sam 91:11) I ha osi bay gason’y Jézi an chay gwo wèskonsabilité. (Maf. 28:18) Kanmenm, Jéhova pa bay pyèsonn twavay-la pou kouté lapwiyè nou. Wi, sa sé an bagay i menm ka fè. Anfen Bib-la ka di, Jéhova ‘menm ka tann lapwiyè tout kalité moun’.​—Sam 65:2.

2. Lè’y vini pou lapwiyè, ki bèl ègzanp zapòt Pòl kité ban nou?

² Bon, nou sa palé épi Jéhova konsèné népòt bagay ki enpòtan pou nou. Mé, i enpòtan pou nou osi pwédyé bay lézòt. Wi, zapòt Pòl té ka fè sa. I té ka pwédyé bay kongwigasyon-an an Èfésòs. Èk i di yo: “Mwen ka chonjé zòt an lapwiyè mwen.” (Èfés. 1:16) Pòl té ka osi pwédyé bay diféwan moun an kongwigasyon-an. Pou ègzanp i di Timòfi: “Mwen ka wimèsyé Bondyé pou ou Timòfi. Mwen ka toujou chonjéʼw an lapwiyè mwen lannwit kon lajouné.” (2 Tim. 1:3) Wi, sé vwé, Pòl té ni pwòblenm li menm pou pwédyé konsèné. (2 Kòr. 11:23; 12:7, 8) Mé i té ka toujou fè tan pou pwédyé bay lézòt.

3. Pouki délè nou ka obliyé pwédyé bay lézòt?

³ Bon, délè nou ka obliyé pou pwédyé bay lézòt. Mé pouki? Ében yon sésé, non’y sé Sabrinaa di nou yon wézon. I di: “Nou ni si tèlman bagay pou fè. Konsa i ézé pou fiksé sèlman asou zafè nou, èk pwédyé sèlman pou kò nou.” Ès sa ka wivé’w délè? Ében si sé sa, atik sala kay édé’w. Paski (1), nou kay wè poutji i enpòtan pou pwédyé bay lézòt èvèk (2), nou kay diskité diféwan mannyè nou sa fè sa.

POUTJI NOU SIPOZÉ PWÉDYÉ BAY LÉZÒT?

4-5. Ki mannyè lapwiyè nou sa “ni an pil pouvwa”? (Jémz 5:16)

⁴ Lè nou pwédyé bay lézòt lapwiyè nou sa “ni an pil pouvwa”. (Li Jémz 5:16.) Bon, lè nou pwédyé bay lézòt, ès sa sa vwéman chanjé sitiwasyon yo? Absoliman! Pou ègzanp, Jézi té sav zapòt Pita té kay inyowé’y, konsa i di Pita: “Mwen ja pwédyé baʼw, pou lafwaʼw pa tounen pou pa swiv mwen.” (Louk 22:32) Osi, zapòt Pòl té sav, lè moun pwédyé bay lézòt, sa ka fè an diféwans. Konsa, lè’y té an pwizon an Ronm, i ékwi Filémonn èk i di’y: “Mwen ni èspwa Bondyé kay wéponn lapwiyè zòt épi voyé mwen viwé bay zòt.” (Filém. 22) Èvèk sé sa ki té fèt vwé. Touswit apwé sa, yo ladjé Pòl hòd pwizon, èk i té sa ay pwéché ankò.

⁵ Bon, sa pa vlé di, lè nou pwédyé Bondyé oblijé fè sa nou ka pwédyé pou. Kanmenm lè nou pwédyé, Bondyé ka byen òbzòvé ki otan nou mélé épi sa nou ka pwédyé pou-a. Èk délè i ka chwazi pou wéponn lapwiyè nou. Bon, ès sa pa ka pousé nou pou kontiné pwédyé ofon tjè nou konsèné an sitiwasyon? Mé wi! Èk si nou fè sa, nou sa ni konfyans-lan ki, Jéhova kay fè sa ki nésésè.​—Sam 37:5; 2 Kòrint 1:11.

6. Lè nou pwédyé bay lézòt, kisa ki ka fèt? (1 Pita 3:8)

⁶ Bon, lè nou pwédyé bay lézòt sa ka édé nou pou ni “tjè fèb” pou yo. (Li 1 Pita 3:8.) Wi, an moun ki ni tjè fèb pou lézòt, ka òbzòvé soufwans yo, èk i vlé fè an bagay pou édé yo. (Mak 1:40, 41) Anfen, yon ansyen, non’y sé Michael di: “Lè mwen pwédyé bay lézòt sa ka édé mwen pou konpwann pwòblenm yo pli mèyè, èk sa ka fè mwen enmen yo pli menm si yo pa konnèt sa.” Osi, yon lòt ansyen non’y sé Richard di: “Lè nou pwédyé bay an moun, sa ka pousé nou pou fè an bagay pou édé moun-lan. Èk lè nou fè an bagay pou édé moun-lan nou ka pwédyé bay-la, sé konmsi Jéhova ka sèvi nou pou wéponn lapwiyè nou menm pou moun-lan.”

7. Lè nou pwédyé bay lézòt, ki mannyè sa ka anpéché nou katjilé sèlman asou pwòblenm nou? (Filipay 2:3, 4) (Gadé sé pòtwé-a osi.)

⁷ Lè nou pwédyé bay lézòt, sa ka édé nou pou pa katjilé sèlman asou pwòblenm nou. (Li Filipay 2:3, 4.) Bon, nou chak ni pwòblenm nou, paski nou ka viv an latè Satan. (1 Jan 5:19; Wév. 12:12) Mé kanmenm, lè nou ka toujou pwédyé bay lézòt, sa ka fè nou chonjé sé fwè èk sè nou-an ka soufè menm kon nou. (1 Pita 5:9) Pou ègzanp yon piyonnè, non’y sé Katherine di: “Lè nou pwédyé bay lézòt, nou ka chonjé sé pa nou tousèl ki ni pwòblenm, lézòt ni pwòblenm tou. Èk sa ka anpéché nou katjilé sèlman asou pwòblenm nou.”

SÉ FWÈ ÈK SÈ-A BOUZWEN LAPWIYÈ NOU

8. Ki moun nou sa pwédyé bay?

⁸ Bon, ki moun nou sa pwédyé bay? Ében nou sa pwédyé bay moun tèl kon, sé fwè èk sè-a ki malad, sé jenn moun nou-an yo ka pwan sèvi wizib an lékòl, èben ki anba tantasyon pou fè sa ki pa bon. Osi, nou sa pwédyé bay sé fwè èk sè nou-an ki ka soufè paski yo an laj. Èvèk nou sa pwédyé bay fwè èk sè ki ka èspéyansé òpozisyon, swé hòd fanmi yo ében hòd sé gouvèdman-an. (Maf. 10:18, 36; Twav. 12:5) An plis di sa, la ni fwè èk sè ki té ni pou kouwi kité kay yo a kòz di vyolans èben dézas natiwèl. Bon, menm si nou pa konnèt sé fwè èk sè sala, nou sa pwédyé ba yo. Èk sa kay moutwé nou ka swiv konmand Jézi pou “enmen yonn a lòt”.​—Jan 13:34.

9. Pouki nou ni pou pwédyé bay sé fwè-a ki ka pwan douvan an ògannizasyon Jéhova, èk madanm yo?

⁹ Bon, nou sa osi pwédyé bay sé fwè-a ki ka pwan douvan an ògannizasyon Jéhova. Sa vlé di, nou sa pwédyé bay Pwensipal Konmité-a, sé Konmité Bwanch-lan, sé ansyen-an pou sé dépatman-an an sé òfis Bwanch-lan, sé ansyen-an pou sé sékyout-la, èk sé ansyen-an èk sé sèvant minisitriyal-la an sé kongwigasyon-an. Wi, an chay an sé fwè sala ka débat épi pwòblenm yo menm, mé yo ka twavay wèd pou édé lézòt. (2 Kòr. 12:15) Pou ègzanp, yon ansyen pou sékyout-la non’y sé Mak di: “I ka twakasé mwen an chay, paski mwen ka viv lwen pawan mwen ki an laj. Èk yo pa an bon santé pyès. Magwé sésé mwen èk mawi’y ka byen otjipé yo, mwen ka santi twis paski mwen pa la pou édé yo pli.” Alò, pitèt nou pa konnèt tout sé bagay-la ki ka bay sé fwè sala tèt cho, mé nou vlé chonjé pou pwédyé ba yo. (1 Tèsa. 5:12, 13) Èk nou vlé chonjé pou pwédyé bay madanm yo tou, paski yo ka sipòté mawi yo pou yo sa kontiné twavay wèd an sèvis Jéhova.

10-11. Ès Jéhova plè épi lapwiyè nou, menm si nou pa mansyonnen sé fwè èk sè nou-an pa non? Pouki nou ka di sa?

¹⁰ Kon nou ha diskité, byen souvan nou ka pwédyé bay tout sé fwè èk sè nou-an. Pou ègzanp, menm si nou pa ni an sèten fwè èben sè an lidé, nou pé mandé Jéhova pou édé sé fwè èk sè nou-an ki an pwizyon, èben pou soulajé sé fwè èk sè nou-an ki pèdi moun yo enmen an lanmò. Yon ansyen, non’y sé Donald di: “Nou ni an chay fwè èk sè ki ka débat épi an chay pwòblenm, konsa nou ka pwédyé ba yo tout.”

¹¹ Bon, ès i ka plè Jéhova lè nou pwédyé bay sé fwè èk sè nou-an kon sa? Absoliman! Menm si nou pa konnèt ègzaktiman kisa yo ka débat épi, i apwopwiyab pou nou pwédyé bay tout sé fwè èk sè nou-an. (Jan 17:20; Èfés. 6:18) Anfen, lè nou pwédyé kon sa, sa ka moutwé nou “enmen tout sé fwè èk sè-a ki ka kwè an Jézi”.​—1 Pita 2:17.

TWA BAGAY NOU SA FÈ LÈ NOU KA PWÉDYÉ BAY LÉZÒT

12. Lè nou pwan tan pou byen òbzòvé moun, ki mannyè sa kay édé nou pou pwédyé ba yo?

¹² Byen òbzòvé sé fwè èk sè-a. Bon, nou ha wè i bon pou pwédyé bay tout sé fwè èk sè nou-an. Mé i osi bon pou lonmen non sé fwè èk sè nou-an lè nou ka pwédyé. Pou ègzanp: ‘Ès la ni an moun an kongwigasyon’w ki byen malad? Ès la ni an jenn moun an kongwigasyon’w ki dékouwajé, paski moun an lékòl li ka ba’y chalè pou fè sa ki pa bon? Ès la ni an pawan ki ka lévé ich li an lavéwité-a pa kò’y?’ (Èfés. 6:4) Wi, lè nou byen òbzòvé sé fwè èk sè nou-an, nou kay ni pli lanmityé èk tjè fèb pou yo. Èk sa kay pousé nou pou pwédyé ba yo.b​—Ronm 12:15.

13. Kisa nou sa fè ki kay édé nou pwédyé bay sé fwè èk sè nou-an nou pa konnèt?

¹³ Lonmen non sèten fwè èk sè lè’w ka pwédyé. Wi, ou sa fè sa menm si ou pa konnèt yo. Pou ègzanp, katjilé asou sé fwè èk sè nou-an ki an pwizon an péyi tèl kon; Crimea, Eritrea, Russia, èk Singapore. Anfen, ou sa twapé non sé fwè èk sè sala asou jw.org.c Pou ègzanp, yon ansyen pou sékyout-la non’y sé Brian di: “Lè mwen ékwi non sé fwè èk sè-a ki an pwizon, èk mwen mansyonnen non yo pou mwen tann li, i ézé pou mwen chonjé pou lonmen non yo lè mwen ka pwédyé.”

14-15. Kisa nou sa fè ki kay édé nou pou mansyonnen bagay anpatikilé lè nou ka pwédyé?

¹⁴ Mansyonnen bagay anpatikilé lè’w ka pwédyé. Michael nou té palé konsèné pli bonnè-a di: “Lè mwen li wakont konsèné sé fwè èk sè mwen-an ki an pwizon asou jw.org, mwen ka imajiné mannyè mwen té kay santi si mwen té an sitiwasyon yo. Wi, si mwen té an pwizon, mwen té kay ni tèt cho konsèné madanm mwen, èk mwen té kay vlé fè asiwé i té ni tout sa i té bizwen. Konsa, sa ka édé mwen pou mansyonnen an bagay anpatikilé lè mwen ka pwédyé bay sé fwè èk sè-a ki mayé ki an pwizon.”​—Hib. 13:3.

¹⁵ Wi, si nou éséyé imajiné mannyè lavi yé an pwizon, sa kay édé nou katjilé asou lòt bagay nou sa pwédyé pou. Pou ègzanp, nou sa pwédyé bay sé gad-la, pou yo moutwé sé fwè èk sè nou-an jantiyès. Èk nou sa osi pwédyé bay sé moun-lan ki an lotowité pou yo bay sé fwè èk sè nou-an libèté pou adowé Bondyé. (1 Tim. 2:1, 2) An plis di sa, nou sa pwédyé pou kongwigasyon-an twapé ankouwajman hòd bèl ègzanp sé fwè èk sè-a ki an pwizon. Ében pou moun ki pa Témwen Jéhova òbzòvé bon kondwit yo, èk kouté bon nouvèl-la. (1 Pita 2:12) Èvèk nou sa fè menm bagay-la lè nou ka pwédyé bay sé fwè èk sè-a ki ka èspéyansé lòt difikilté. Wi, lè nou (1) byen òbzòvé sé fwè èk sè nou-an, (2) lonmen non yo an lapwiyè nou, èk (3) mansyonnen bagay anpatikilé an lapwiyè nou, nou ka moutwé nou “ni pli lanmityé toujou pou yonn a lòt”.​—1 Tèsa. 3:12.

SÉ POU NOU WÉZONNAB LÈ’Y VINI POU MANNYÈ NOU KWÈ BONDYÉ KAY WÉPONN LAPWIYÈ NOU

16. Ki mannyè nou sa moutwé nou wézonnab lè nou ka pwédyé bay lézòt? (Mafyou 6:8)

¹⁶ Kon nou ha wè, lè nou pwédyé bay an fwè èben sè, nou pé jis édé chanjé sitiwasyon’y. Kanmenm sé pou nou wézonnab an mannyè-a nou kwè Jéhova kay wéponn lapwiyè nou. Osi nou ni pou chonjé, lè nou ka pwédyé, nou pa ka di Bondyé an bagay i p’òkò konnèt. Èk nou pa sa di’y mannyè pou wéponn lapwiyè nou. Anfen, Jéhova ha konnèt sa nou bizwen jis avan nou menm konnèt sa nou bizwen. (Li Mafyou 6:8.) Alò, ès i ka fè syans pou pwédyé bay lézòt? Absoliman! Paski apa di sé wézon-an nou ha diskité an atik sala, lè nou pwédyé bay lézòt nou ka moutwé ki otan nou mélé épi yo. Wi, sé lanmityé ki ka pousé nou pou pwédyé bay lézòt. Èk sé pa dé kontan Jéhova ka kontan, lè’y wè nou ka moutwé lanmityé menm kon li.

17-18. Poutji i bon pou pwédyé bay yonn a lòt? Bay yon ègzanp.

¹⁷ Bon. Menm si nou pwédyé bay an fwè èben sè èk sitiwasyon’y pa chanjé, lapwiyè nou ka moutwé nou enmen sé fwè èk sè nou-an. Èk Jéhova ka òbzòvé sa. Pou ègzanp, imajiné an fanmi ki ni an jenn gason èk tifi, mé ti gason-an malad. Alò, tifi-a ka plédé épi papa’y: “Papa, souplé, fè an bagay pou édé fwè mwen paski i byen malad.” Bon. Papa-a ja konnèt sitiwasyon-an. I enmen gason’y èk i ha ka édé’y. Kanmenm, i ka vwéman touché tjè papa-a pou wè mannyè fi’y enmen fwè’y, èk mannyè-a i ka plédé épi papa’y pou édé fwè’y.

¹⁸ An menm mannyè-a, Jéhova ka ankouwajé nou pou moutwé nou mélé épi yonn a lòt èk pou pwédyé bay yonn a lòt. Èk lè nou fè sa nou ka moutwé nou mélé pa sèlman épi kò nou, mé nou vwéman enmen sé fwè èk sè nou-an. Èvèk Jéhova ka òbzòvé sa. (2 Tèsa. 1:3; Hib. 6:10) Alò, kon nou ha diskité an atik sala, délè lè nou pwédyé, sa sa édé chanjé sitiwasyon sé fwè èk sè nou-an. Konsa ,annou toujou chonjé pou pwédyé bay sé fwè èk sè nou-an.