Mannyè Nou Sa Pwédyé Pou Nou Vansé Pli Pwé Jéhova

1-2. (a) Kisa ki sa anpéché nou ouvè tjè nou ba Jéhova? (b) Kisa Jéhova vlé nou fè lè nou ka pwédyé?

ÈS DÉLÈ ou ka twouvé kò’w ka wépété menm bagay-la chak lè ou ka pwédyé? Èk ou pa ka vwéman di Jéhova sa ki an tjè’w? Si wépons ou sé ‘wi’, pa dékouwajé paski sé pa ou yonn. Nou tout anbawasé, èk délè nou pa ni tan pou di Jéhova tout sa ki an tjè nou. Ében nou pé twouvé’y wèd pou ouvè tjè nou ba Jéhova an lapwiyè paski nou ka santi nou pa bon asé pou apwoché’y.

² Bib-la ka enstwi nou, sa ki pli enpòtan pou Jéhova sé pa ki otan byen nou ka èspwèsé kò nou lè nou ka pwédyé. Mé i vlé nou vidé tjè nou ba li èk abésé kò nou douvan’y an lapwiyè. Wi, Jéhova ka tann lapwiyè moun ki ka abésé kò yo. (Sam 10:17) Èk paski i vwéman antéwésé an nou, i ka byen kouté lapwiyè nou.​—Sam 139:1-3.

3. Ki kwèsyon nou kay wéponn an atik sala?

³ Bon. An atik sala, nou kay konsidiwé wépons-lan pou sé kwèsyon sala: (1) Pouki nou pa sipozé janmen pè pou pwédyé ba Jéhova? (2) Ki mannyè nou sa pwédyé pou nou sa vansé pli pwé Jéhova? (3) Kisa nou sa apwann hòd lapwiyè sèvant Jéhova ki an Bib-la? (4) Lè nou ni tèt cho èk nou pa sav sa pou di Bondyé an lapwiyè, kisa nou sa fè?

PA JANMEN PÈ POU PWÉDYÉ

4. Kisa ki sa édé nou santi pli konfòtab pou apwoché Jéhova an lapwiyè? (Sam 119:145)

⁴ Lè nou ka vwéman kwè Jéhova sé on bon jan ki vlé nou ni siksé, sa ka édé nou pou santi pli konfòtab pou apwoché’y an lapwiyè èk di’y tout sa ki an tjè nou. Bon. Moun-lan ki ékwi Sam 119 té ka gadé Jéhova kon on bon jan lè i té ka pwédyé. Kanmenm, sa pa vlé di i pa té ni pwòblenm an lavi’y. Pou ègzanp, la té ni moun ki pa té kontan’y, èk yo té ka manti asou’y. (Sam 119:23, 69, 78) Osi, li menm té ka fè lèwè, èk sa té fè’y dékouwajé. (Sam 119:5) Mé magwé tout sa, i pa té pè pou ouvè tjè’y ba Jéhova.​—Li Sam 119:145.

5. Poutji nou pa sipozé kité vyé katjil anpéché nou pwédyé ba Jéhova? Ba yon ègzanp.

⁵ Jéhova ka envité sa ki ja fè mové lèwè pou apwoché’y an lapwiyè. (Izay. 55:6, 7) Alò, nou pa sipozé kité vyé katjil anpéché nou apwoché Jéhova an lapwiyè. Pou ègzanp, imajiné ou alé adan on lòt péyi. Èk paditan ou la, ou pèd. Ès ou pa té kay mandé jan plas-la pou di’w ki diwèksyon pou pwan? Èben ès ou kay di, ou twò hont pou mandé moun pou diwèksyon? Mé non, ou kay mandé pou diwèksyon kouman! An menm mannyè-a, si nou pèd chimen èk nou fè on péché, nou pa sipozé janmen hont, èben pè, pou kwiyé asou Jéhova an lapwiyè èk mandé’y pou èd.​—Sam 119:25, 176.

MANNYÈ NOU SA PWÉDYÉ POU NOU VANSÉ PLI PWÉ JÉHOVA

6-7. Kisa ki sa édé nou di Jéhova sa ki ofon tjè nou? Ba yon ègzanp. (Gadé nòt-la an bout paj-la osi.)

⁶ Lè nou di Jéhova sa ki ofon tjè nou èk mannyè nou ka santi, sa ka édé nou pou vini pli pwé’y. Alò kisa ki kay fè’y pli ézé pou nou di Jéhova tout sa ki ofon tjè nou?

⁷ Katjilé asou ki kalté moun Jéhova yé.a Lè nou katjilé asou sé bèl kawaktè-a Jéhova ni, i kay vini pli ézé pou nou di Jéhova tout sa ki an tjè nou. (Sam 145:8, 9, 18) Pou ègzanp, annou konsidiwé èspéyans sésé Kristine. Papa’y sété on nonm ki té vyolan. Kristine di: “Paski papa mwen té vyolan, i té difisil pou mwen kwè Jéhova sé on papa ki janti. Konsa, i pa té ézé pou mwen palé ba li. Osi mwen santi, lèwè mwen té kay annékòz Jéhova pou tounen do’y asou mwen paski mwen pa té bon asé.” Mé kilès an sé kawaktè Jéhova-a ou kwè ki édé’y? Mi sé sa Kristine menm di: “Mwen katjilé an chay asou lanmityé fidèl Jéhova, épi mwen sav Jéhova enmen mwen, èk i kay toujou édé mwen. Menm si mwen fè on lèwè, sa pa kay anpéché’y enmen mwen. Alò, apwézan, mwen ka santi alèz pou palé ba Jéhova konsèné népòt bagay, ki sé bagay ki ka ban mwen djèwté, ki sé bagay ki ka fè mwen twis.”

8-9. Kisa nou sa fè avan nou koumansé pwédyé èk pouki? Ba yon ègzanp.

⁸ Katjilé asou sa ou kay di. Avan ou koumansé pwédyé, pitèt ou sa katjilé asou diféwan bagay an lavi’w. Pou ègzanp: ‘Ki pwòblenm ou ka aji épi? Ès la ni pyèsonn ou ni pou pawdonnen? Ès la ni anyen ki chanjé an lavi’w? Ès ou bizwen èd Jéhova?’ (2 Wa 19:15-19) Bon. An plis di sa, nou sa swiv mannyè Jézi enstwi nou pou pwédyé, èk katjilé asou sa nou vlé di Jéhova konsèné non’y, wéyòm li, èk volonté’y.​—Maf. 6:9, 10.

⁹ Lè sè Aliska apwann mawi’y té ni kansè an sèvèl li, èk i pa té ni djè tan pou viv, i té twouvé’y wèd pou pwédyé. Sè Aliska di: “Mwen té twakasé si tèlman, m’a té menm sav sa pou di Jéhova an lapwiyè.” Mé kisa ki édé sè Aliska? Mi sé sa i di: “Avan mwen pwédyé, mwen ka katjilé asou sa mwen sa di Jéhova. Épi sa ka édé mwen pou pa palé konsèné kò mwen, èben maladi mawi mwen tousèl. Wi, lè mwen fè sa, mwen ka santi sèvèl mwen an wipo, èk mwen sa pwédyé ba Jéhova pli mèyè.”

10. Pouki nou vlé pwan tan pou ouvè tjè nou ba Jéhova? (Gadé sé pòtwé-a osi.)

¹⁰ Pwan tan’w èk vwéman palé bay Bondyé. Sé vwé, lapwiyè ki kout sa mennen nou pwé Jéhova. Mé lè nou pwan tan èk ouvè tjè nou èk vwéman palé ba Jéhova an lapwiyè, nou kay vini pli pwé’y.b Mi sé sa Elijah, mawi Aliska di: “Plizyè fwa pou jounen-an, mwen ka pwédyé ba Jéhova. Épi mwen ja vini pli pwé’y paski mwen ka pwan tan pou ouvè tjè mwen ba’y. Ou wè, Jéhova ni pasyans. I pa kay janmen di, ‘Fè vit fini pwédyé.’ Konsa, mwen sa pwan tan mwen èk palé ba’y.” Bon. Mi on bagay ou sa fè: Désidé asou on lè èk on plas ou sa pwédyé koté anyen pa kay distwé’w. Èk diwé an lapwiyè’w. Ou sa jis di lapwiyè’w fò. Épi éséyé pou pwédyé mannyè sala byen souvan.

KATJILÉ ASOU LAPWIYÈ SÈVANT FIDÈL BONDYÉ KI AN BIB-LA

11. Pouki i bon pou nou katjilé asou lapwiyè sèvant Bondyé ki an Bib-la? (Gadé enfòmasyon-an anba sijé-a “Ès Ou Ka Konpwann Mannyè-a Yo Té Ka Santi?”)

¹¹ I enpòtan pou nou katjilé asou sé lapwiyè-a èk sé chanson-an ki an Bib-la. Pouki nou ka di sa? Paski lè nou wè mannyè sèvant Jéhova ouvè tjè yo ba’y an lapwiyè, sa sa pousé nou pou fè menm bagay-la. Osi, nou sa twapé diféwan èspwèsyon nou sa sèvi an lapwiyè nou. An plis di sa, nou pé òbzòvé adan lapwiyè koté ki sèvant Jéhova té ka di Jéhova ègzaktiman mannyè-a yo té ka santi, èk pitèt sa sé menm mannyè-a nou menm ka santi tou. Èk pitèt an sé lapwiyè sala, yo té ka mandé Bondyé pou sé menm bagay-la nou menm ka mandé pou-a.

12. Ki kèstyon nou sa mandé kò nou lè nou li èben kouté on lapwiyè ki an Bib-la?

¹² Lè ou li ében kouté an lapwiyè ki an Bib-la, mandé kò’w: ‘Ki moun ki di lapwiyè sala? Anba ki sitiwasyon i té yé? Pouki i di lapwiyè sala? Ès mwen sa konpwann katjil moun-an ki di lapwiyè-a? Ki lison mwen sa apwann hòd lapwiyè sala?’ Délè, ou pé bouzwen fè pli wichach pou’w sa wéponn sé kwèsyon sala. Mé i vo éfò-a pou fè sa. Bon. Apwézan, annou gadé kat «4» an sé lapwiyè sèvant Bondyé ki an Bib-la.

13. Kisa nou sa apwann hòd lapwiyè Hanna? (1 Sanmyèl 1:10, 11) (Gadé pòtwé-a osi.)

¹³ Li 1 Sanmyèl 1:10, 11. Lè Hanna di lapwiyè sala, i té ni dé «2» gwo pwòblenm an lavi’y. Yonn «1», Mawi té ni an lòt madanm ki té ka fè lavi Hanna mizéwab. Èk dé «2», i menm pa té sa fè ich. (1 Sm 1:4-7) Bon, ann di ou ni on pwòblenm ki ka fè lavi’w difisil. Kisa ou kwè ou sa apwann hòd lapwiyè Hanna? Ében, Hanna dévidé tjè’y ba Jéhova pou on lonng tan épi sa soulajé’y. (1 Sm 1:12, 18) Nou osi sa fè menm bagay-la, èk “ladjé tout twaka [nou] asou Jéhova.” (Sam 55:22 NWT) Di’y tout sa ki ka twakasé nou èk mannyè i ka afèkté nou. Épi lè nou fè sa, san dout, sa kay soulajé nou.​

14. (a) Ki lòt bagay nou sa apwann hòd ègzanp Hanna? (b) Pouki i bon pou mèdité asou sé lévanjil-la? (Gadé nòt-la.)

¹⁴ Détwa lanné apwé Sanmyèl fèt, Hanna mennen’y bay Ilay, pli ho chèf pwèt-la. (1 Sm 1:24-28) Épi an lapwiyè, Hanna di Jéhova, i ka wimèsyé’y paski i ja wè mannyè Jéhova ka pwotèkté èk pwan ka sé sèvant fidèl li-a.c (1 Sm 2:1, 8, 9) Bon, sa pa vlé di Hanna pa té ni pwòblenm an lavi ankò. Mé pito Hanna fiksé asou pwòblenm li, i fiksé asou mannyè Jéhova té ja benni’y. Alò, kisa ki lison-an pou nou? Lison sé sa, nou sa tjébé fò anba pwoblenm ki difisil lè nou fiksé asou mannyè Jéhova ja sipòté nou èk ka kontiné fè sa.

15. Lè nou ka èspéyansé enjistis, kisa nou sa apwann an lapwiyè Jérémaya? (Jérémaya 12:1)

¹⁵ Li Jérémaya 12:1. Jérémaya té ka santi dékouwajé lè i wè mannyè adan moun té ka gadé akonmsi yo té ni on bon lavi, magwé yo té ka fè bagay ki té mové. An lòt bagay ki té dékouwajé’y ankò, sété mannyè-a adan sé Izwalayt-la té ka pwan’y sèvi wizib. (Jér. 20:7, 8) Bon. Nou sa konpwann mannyè-a Jérémaya té ka santi paski pitèt on moun ja pwan nou sèvi wizib, èben nou ja wè moun ki ka fè mové bagay viv lavi yo akonmsi yo pa ni pyès pwòblenm. Kanmenm, magwé Jérémaya té faché, i pa té janmen akizé Jéhova pou di’y i pa jis. Anfen, konfyans li an jistis Jéhova vini pli fò lè i wè mannyè Jéhova kowijé pèp li. (Jér. 32:19) Nou osi sa ouvè tjè nou ba Jéhova épi di’y mannyè-a enjistis ka afèkté nou. Mé an menm di tan-an, nou ni konfyans-lan ki, lè Jéhova pawé, i kay mennen jistis.

16. Kisa nou sa fè lè nou santi dékouwajé? Ba yon ègzanp? (Sam 42:1-4) (Gadé sé pòtwé-a osi.)

¹⁶ Li Sam 42:1-4. An Livayt ékwi chanson sala paski i pa té sa alé an tanp-la pou adowé Jéhova. Épi an chanson sala, i té ka di ègzaktiman kouman i té ka santi. Pitèt nou ka santi menm kon Livayt sala paski nou malad, ében nou an pwizon pou lapéti lafwa nou èk nou pa sa alé an Kingdonm Hòl-la. Délè nou pé santi byen, èk an lòt lè nou pé santi dékouwajé. Mé népòt mannyè nou ka santi, i kay bon pou nou palé ba Jéhova an lapwiyè. Wi, lè nou pwédyé ba Jéhova sa kay édé nou pou wè sitiwasyon nou andan an diféwan mannyè. Pou ègzanp, lè nou gadé Livayt-la, menm si sitiwasyon’y pa té chanjé a lè-a, i wéyalizé i té kay ni lòt òpòtyounité pou glowifyé Jéhova. (Sam 42:5) Èk i osi té ka katjilé mannyè Jéhova té ka otjipé’y. (Sam 42:8) Konsa, lè nou vidé tjè nou ba Jéhova an lapwiyè, sa kay édé nou pou konpwann wézon-an nou ka santi dékouwajé. Nou osi kay twapé lapé an tjè nou, èk jwenn fòs-la pou nou sa tjébé fò.

17. (a) Kisa nou sa apwann an lapwiyè Jonna? (Jonna 2:1, 2) (b) Ki mannyè adan sé èspwèsyon-an an liv Samz sa édé nou lè nou ni pou aji épi difikilté? (Gadé nòt-la.)

¹⁷ Li Jonna 2:1, 2. Pwofèt Jonna di lapwiyè sa la paditan i té an bouden gwo pwéson-an. Jonna té dézobéyi Jéhova, mé i té ni konfyans ki Bondyé té kay tann li. Jonna sèvi an chay an sé èspwèsyon-an ki an Samz-lan.d I sanm Jonna té byen okouwan épi yo. Épi kon Jonna té ka wéfléchi asou sé èspwèsyon sala, sa ba li asiwans ki Jéhova té kay édé’y. Nou osi sa éséyé pou tjenn andan sé lévanjil-la an lidé nou lè nou ka pwédyé. Paski lè tan difisil vini asou nou, nou kay sa sèvi yo pou konfòté nou.

KONTINÉ VANSÉ PLI PWÉ JÉHOVA AN LAPWIYÈ

18-19. Si nou pa sav sa pou di Jéhova lè nou ka pwédyé, ki asiwans Ronm 8:26, 27 ka ban nou? Ba yon ègzanp.

¹⁸ Li Ronm 8:26, 27. Délè tèt nou si tèlman cho, nou pa menm sav kisa pou di Jéhova lè nou ka pwédyé. Bon. Alè sala lèspwi Bondyé kay plédé ban nou. Mé kisa sa vlé di? Sa vlé di, lè nou ka pwédyé èk nou pa sav ègzaktiman sa pou di Jéhova an lapwiyè ében ki mo pawòl pou sèvi, Jéhova sa sèvi sèten èspwèsyon an lapwiyè ki an Bib-la, kon bagay nou té vlé di’y an lapwiyè nou. Épi i kay wéponn lapwiyè nou.

¹⁹ Bon. Annou konsidiwé èspéyans sésé Yelena ki ka wèsté an péyi Wisi. I té ni an chay tèt cho lè polis té awété’y paski i té ka pwédyé èk li Bib-la. Sitiwasyon sala té fè’y difisil pou’y pwédyé. Mé kisa ki édé’y? Mi sé sa i di: “Mwen chonjé, lè mwen ni an chay tèt cho, èk mwen pa sav sa pou di Jéhova an lapwiyè, Jéhova sa sèvi sèten èspwèsyon an sé lapwiyè-a ki an Bib-la, kon bagay mwen té vlé di’y an lapwiyè mwen. Èk i kay wéponn lapwiyè mwen. Épi mwen sa di’w, sa konfòté mwen an pil diwan tan difisil sala.”

20. Lè nou ni tèt cho, ki mannyè nou sa pwépawé tjè nou èk lidé nou pou pwédyé?

²⁰ Lè nou ni tèt cho, délè lidé nou ka dwivé toupatou lè nou ka pwédyé. Konsa, pou édé pwépawé tjè nou èk lidé nou, nou sa li èben kouté sé Samz-la. Osi, nou sa ékwi sa nou vlé di Jéhova an lapwiyè menm kon wa David té fè. (Sam 18, 34, 142; ti ékwiti-a avan chapit-la.) Bon. La pa ni pyès lwa ki ka di nou ki mannyè nou sipozé pwépawé kò nou pou pwédyé. (Sam 141:2) Alò, fè sa ki ka twavay pou ou.

21. Pouki nou pa bizwen pè pou ouvè tjè nou an lapwiyè?

²¹ I ka konfòté nou pou sav Jéhova ka konpwann mannyè nou ka santi avan nou menm di’y anyen. (Sam 139:4) Kanmenm, i vlé nou di’y mannyè nou ka santi èk ki otan nou ka konfyé’y. Alò pa pè pou pwédyé bay Papa nou ki an syèl paski i vlé tann nou. Ou sa gadé mannyè sèvant Jéhova té ouvè tjè yo ba li an lapwiyè, èvèk ou menm sa ouvè tjè’w ba li an menm mannyè-a. Di’y sa ki ka ba’w tjè kontan èk di’y sa ki ka twakasé’w. Èk kon on bon jan, Jéhova kay toujou la pou sipòté’w!