Swiv Ègzanp Jéhova Èk Abésé Kò’w

1. Pouki nou sa di, imilité Jéhova sé on bagay ki byen èstòdinè?

SOUVAN, moun ki an lotowité ében ki ni gwo pozisyon, pa ka abésé kò yo. Anfen, an chay di yo ka kwè yo pli mèyè pasé lézòt. Mé katjilé asou sa: Magwé Jéhova sé Dyé Toupisan-an, i ni an chay imilité. (Sam 113:5-8) Wi, Jéhova ka moutwé imilité an tout sa’y ka fè. I pa ni pa menm on ti kwas vyé lògèy adan’y. Konsa, an atik sala nou kay diskité kat «4» diféwan mannyè Jéhova ka moutwé imilité, èk nou kay osi gadé mannyè Jézi ka swiv ègzanp Papa’y an sé kat «4» bagay sala. Enfòmasyon sala kay édé nou pou vansé pli pwé Jéhova, èvèk i kay ankouwajé nou pou twavay pli wèd pou nou sa swiv ègzanp li, èk abésé kò nou.

JÉHOVA VLÉ NOU SANTI KONFONTAB ÉPI’Y

2. Kisa Sam 62:8 ka di nou konsèné Jéhova? (Gadé pòtwé-a osi.)

² Lè’w wè moun ni lògèy, nòmalman yo pa ka twété moun byen paskè yo ka kwè, yo pli enpòtan pasé lézòt. Èk vyé atitid sala ka fè moun wèsté lwen yo. Mé Jéhova pa kon sa. I vlé nou santi konfòtab épi’y. Sé sa ki fè, i ka fè’y ézé pou nou palé épi’y an lapwiyè. Èvèk i ka envité nou, pou ouvè tjè nou èk di’y tout sa ki asou lidé nou. (Li Sam 62:8.) Wi, menm kon on bon papa, Jéhova vlé konnèt tout sa ki ka wivé nou. Konsa i toujou pawé pou kouté lapwiyè nou. Anfen, i ka apwésyé lapwiyè sèvant li si tèlman, i fè yo ékwi an chay an sé lapwiyè sala an Bib-la. (Jòch. 10:12-14; 1 Sm 1:10-18) Mé délè, nou pé twapé’y wèd pou pwédyé paskè nou ka kwè nou pa méwité lanmityé Jéhova, pou lapéti sé lèwè-a nou ja fè an lavi nou. Adan on sitiwasyon kon sa, kisa nou sa fè?

3. Ki bèl lison nou sa apwann konsèné Jéhova an pawabòl-la konsèné gason-an ki té pèd-la?

³ Menm si nou ka kwè nou pa méwité lanmityé Jéhova, sé pa pou nou janmen doubout pwédyé, paskè Jéhova toujou vlé nou palé épi’y an lapwiyè. Sa sé on bèl lison nou ka apwann an pawabòl-la Jézi té bay konsèné gason-an ki té pèd-la. Gason-an té fè an chay mové bagay an lavi’y. I té péché kont papa’y épi kont Bondyé. Èk i té tèlman hont, i té ka santi i pa té méwité lanmityé papa’y. Mé lè’y wépanti èk i viwé lakay papa’y, kisa papa-a fè? Jézi di, gason-an té on distans hòd kay-la toujou, lè papa-a wè’y ka vini. Èk papa-a té ni tèlman konpasyon épi lanmityé pou gason-an, i pa té sa èspéwé pou gason-an wivé. “I kouwi jwenn li, i anbwaséʼy, èk i boʼy.” (Louk 15:17-20) Jéhova ka fè menm kon papa sala. Lè’y wè nou ka pwédyé paskè nou antjèt, ében paskè nou twis pou lapéti péché nou fè, Jéhova ka ban nou tout antansyon’y, èk i pa ka tadé pou fè sa. (Lama. 3:19, 20) Wi, sé akwèdi Jéhova ka kouwi pou’y soulajé nou, èk pou’y moutwé nou mizi lanmityé épi konpasyon i ni pou nou. (Izay. 57:15) Mé ki mannyè Jéhova ka “kouwi” pou soulajé nou jòdi jou? Ében byen souvan i ka sèvi sé ansyen-an, on moun an fanmi nou, ében lòt moun ki enmen’y, pou konsolé nou èk pou ankouwajé nou. (Jémz 5:14, 15) Èk chonjé, Jéhova ka fè tout sa paskè i enmen nou an chay, èk i vlé nou ni on bon wilasyon épi’y.

4. Pouki moun pa té pè pou palé épi Jézi?

⁴ Jézi ka swiv ègzanp Jéhova. Menm kon Papa’y Jéhova, Jézi ni an chay imilité. Sé sa ki fè, lè’y té asou latè-a moun pa té pè pou palé épi’y. Èk yo pa té pè pou mandé’y kwèstyon nonpli. (Mak 4:10, 11) Konsa lè’y té mandé yo pou lopinyon yo asou on bagay, yo pa té ka tjébé dèyè pou di’y sa ki té asou lidé yo. (Maf. 16:13-16) An plis di sa, lè yo té fè on lèwè yo pa té ka twanblé épi lapèwèz paskè yo té sav Jézi té janti, i té ni mizéwikòd, èk i té ni pasyans. (Maf. 17:24-27) Anfen, Jézi té ka swiv ègzanp Papa’y tèlman byen, i édé sé moun-lan pou konnèt Jéhova pli mèyè. (Jan 14:9) Paskè lè yo gadé mannyè Jézi té ka twété moun, sa té ka édé yo pou konpwann, Jéhova ni imilité, èk i té pawé pou kouté yo. Konsa yo té sa wè on gwo diféwans ant Jéhova, épi sé mèt wilizyon-an ki té ka maltwété yo-a.

5. Lè nou ni imilité, pouki sa ka fè’y pli ézé pou moun palé épi nou?

⁵ Mannyè nou sa swiv ègzanp Jéhova. Lè nou ni imilité, nou ka moutwé lòt bèl mannyè tèl kon jantiyès épi pasyans, èk i ka pli ézé pou nou pawdonnen lézòt. Konsa, moun ka santi pli alèz pou palé épi nou. Mé si nou pa ni imilité nou pé dévlopé lòt vyé mannyè. Pou ègzanp, nou pé twapé kò nou ka jalou lézòt, nou pé fè akwèdi nou pli mèyè pasé lézòt, èk lè on moun fè nou an bagay, nou pé twapé’y wèd pou pawdonnen yo. Sé vyé mannyè sala ka fè moun wèsté lwen nou. (Kòl. 3:12-14) Bon, sé ansyen-an ni pou fè asiwé sé fwè èk sè-a ka santi konfòtab pou palé épi yo. Èk sa sé on bagay ki byen enpòtan. Mé pou sa fèt, sé ansyen-an ni pou pasé tan épi sé fwè èk sè-a. Konsa dépi i posib, i bon pou sé ansyen-an atandé mitin an “Hall-la” pito yo wèsté asou “zoom.” Èk i osi bon pou yo twavay épi sé fwè èk sè-a an minis-la. Konsa, sé fwè èk sè-a kay konnèt yo pli byen, èk yo pa kay santi pè pou palé épi sé ansyen-an lè yo bizwen fè sa.

JÉHOVA KA KONPWANN SITIWASYON NOU

6-7. Bay ègzanp ki ka moutwé, Jéhova ka konpwann sitiwasyon sèvant li.

⁶ Souvan, moun ki ni lògèy ka kwè yo konnèt pli mèyè pasé tout moun. Konsa pou yo, sa yo di sé sa. Mé magwé Jéhova sé Dyé Toupisan-an, èk i konnèt tout bagay, i pa kon sa pyès. Kon’y ni imilité, i ka dakò pou kouté sa lézòt ni pou di. Èk i pé jis pwan on lòt disizyon, magwé i té ja désidé pou fè on diféwan bagay. Annou gadé dé «2» ègzanp ki ka moutwé sa. Asou yon lokazyon, Miriyam épi Éronn koumansé bougonnen kont Moziz. Mé sa sété on bagay ki té byen sèwyé, paskè sé Jéhova ki té bay Moziz wèskonsabilité-a pou djidé pèp-la. Konsa, lè yo koumansé déwèspèkté Moziz, sé vwéman Jéhova yo té ka déwèspèkté. Èk Jéhova pa té plè épi yo pyès. Anfen Jéhova té byen faché épi yo, èk i bay Miriyam lad. Mé lè Éronn wè sa, i mandé Moziz pou édé Miriyam. Èk la menm, Moziz koumansé plédé épi Jéhova pou djéwi sésé’y. Kisa ou kwè Jéhova fè? Ében on moun ki ni lògèy té kay di, ‘Miriyam twapé sa i té méwité.’ Èk yo pa té kay chanjé disizyon yo. Mé Jéhova pa fè sa. Wi, Jéhova ni imilité, konsa i kouté Moziz èk i dakò pou djéwi Miriyam.​—Lim. 12:1-15.

⁷ Annou pwan on lòt ègzanp. Lè Wa Hèzikaya té malad, Jéhova voyé pwofèt Izaya pou di Hèzikaya, i pa té kay lévé anba maladi-a, i té kay mò. Lè Hèzikaya tann sa, i koumansé pléwé èk i plédé épi Jéhova pou édé’y. Kisa ou kwè Jéhova fè? Ében i kouté lapwiyè Hèzikaya, èk i pèwmité’y pou viv pou kenz «15» lanné ankò. (2 Wa 20:1, 5, 6) Wi, Jéhova ni an chay konpasyon pou nou, èk i ni imilité. Sé sa ki fè i toujou pawé pou kouté nou, èk délè i ka jis fè sa nou mandé’y pou fè.

8. Ki mannyè nou sav, Jézi ka konpwann sitiwasyon nou? (Mak 3:1-6)

⁸ Jézi ka swiv ègzanp Jéhova. Lè Jézi té asou latè-a, i té ka toujou gadé pou mannyè pou’y édé lézòt, dépi sa té posib. Pou ègzanp, i djéwi moun asou jou Sabaf-la, magwé sé mèt wilizyon-an té ka kwè sa sété on bagay moun pa té sipozé fè. Mé Jézi pa té ka aji épi moun adan on mannyè ki té twò wèd, paskè i té ni konpasyon èk i té ka éséyé pou konpwann sitiwasyon chak moun. (Li Mak 3:1-6.) Jòdi jou, Jézi ka fè menm bagay-la kon’y ka djidé sé kongwigasyon-an. Wi, i ka konpwann sitiwasyon nou, èk i ni konpasyon pou nou. Konsa lè on moun fè on péché ki gwav, Jézi ka pwan pasyans épi moun-lan èk i ka ba yo on chans pou yo chanjé.​—Wév. 2:2-5.

9. Ki mannyè nou sa apwann pou konpwann sitiwasyon lézòt? (Gadé sé pòtwé-a osi.)

⁹ Mannyè nou sa swiv ègzanp Jéhova. Kon nou ja wè, Jéhova sé on Dyé ki ka konpwann sitiwasyon nou. Konsa si nou vlé apwann mannyè pou konpwann sitiwasyon lézòt, nou ni pou swiv ègzanp Jéhova. (Jémz 3:17) Pou ègzanp, pawan ki ka swiv ègzanp Jéhova pa kay kité manmay yo fè sa yo vlé, mé an menm di tan-an yo pa kay mandé sé manmay-la pou fè bagay yo p’òkò sa fè. Sé konsa Jakòb té ka aji épi sé manmay li-a, kon nou ka wè an Jennésis 33:12-14. Wi, pawan ki ni imilité ka éséyé pou konpwann chak manmay yo, èk yo pa ka konpawé yonn épi lòt. Bon, sé ansyen-an ni pou moutwé yo ka konpwann sitiwasyon lézòt osi. Pou ègzanp, ansyen ki ni imilité ka sipòté tout disizyon sé ansyen-an pwan, dépi disizyon-an sé on bagay ki an ling épi pwensip Bib. (1 Tim. 3:2, 3) Èk nou tout sa éséyé pou konpwann lézòt, menm si nou pa ka wè on bagay menm mannyè-a yo ka gadé’y. (Ronm 14:1) Wi, chak moun an kongwigasyon-an ni pou fè éfò pou moutwé, nou sé moun ki “ni bon mannyè.”​—Filip. 4:5.

JÉHOVA NI PASYANS

10. Ki mannyè Jéhova moutwé i ni pasyans?

¹⁰ Pitèt ou ja òbzòvé, moun ki ni lògèy pa ka kontan pou èspéwé asou lézòt. Wi, yo pa ni pyès pasyans. Mé Jéhova pa kon sa. Anfen, la pa ni pyèsonn ki ni pli pasyans pasé Jéhova. Annou gadé dé «2» ègzanp ki ka moutwé mannyè Jéhova ni pasyans. An tan Nowa, Jéhova di i té kay èspéwé pou yon san ven lanné «120» avan i détwi sé moun méchan-an. (Jen. 6:3) Sa bay Nowa asé tan pou’y lévé ich li, èk pou’y fè gwo batiman-an ansanm épi fanmi’y. Tjèk tan apwé sa, lè Jéhova di Abrahanm i té kay détwi vil Sòdonm épi Gomòra, Abrahanm mandé Jéhova an chay kwèstyon konsèné sa. Mé Jéhova pwan pasyans, èk i kouté tout sa Abrahanm té ka mandé’y-la. On moun ki ni lògèy pa té kay fè sa. Pitèt yo té kay di Abrahanm, ‘Ou pa ni pyès dwa pou mandé mwen pyès kwèstyon.’ Mé kon Jéhova sé on Dyé ki ni an chay imilité i pwan pasyans, épi i kouté Abrahanm.​—Jen. 18:20-33.

11. Silon 2 Pita 3:9, pou ki wézon Jéhova ka pwan pasyans an tan nou jòdi?

¹¹ Jòdi jou osi, Jéhova ka pwan pasyans. I ja chwazi on jou pou’y détwi vyé sistenm sala, èk i ka èspéwé pou jou sala wivé. Mé, pou ki wézon Jéhova ka pwan pasyans kon sa? Sé paski, “I pa vlé pyèsonn péwi. I vlé tout moun wépanti péché yo.” (Li 2 Pita 3:9.) Bon, ès sé gaspiyé Jéhova ka gaspiyé tan’y, kon’y la ka pwan pasyans? Mé non! Pasyans Jéhova ja fè’y posib pou konmen milyon moun vini jan épi’y. Èk nou ni èspwa, plizyè mil moun ankò kay fè menm bagay-la. Kanmenm, Jéhova pa kay pwan pasyans pou tout tan. Paskè, magwé i enmen tout moun, i pa kay annèk kité yo fè sa yo vlé kon yo vlé. I kay détwi tout moun ki méchan lè jou-a wivé.​—Hab. 2:3.

12. Pou ki wézon nou sa di, Jézi ka imité pasyans Jéhova?

¹² Jézi ka swiv ègzanp Jéhova. Pou plizyè mil lanné, Jézi ka imité pasyans Papa’y. Katjilé asou sa: Jézi ka wè mannyè Satan ka simen mansonj asou Jéhova, èk asou sèvant fidèl li. (Jen. 3:4, 5; Jòb 1:11; Wév. 12:10) Èvèk i ka wè mizi soufè moun ka soufè. Konsa, ès ou sa imajiné mannyè Jézi vlé “détwi twavay Denmou-an”! (1 Jan 3:8) Mé, i ka èspéwé jistan Jéhova di’y lè-a pou’y détwi Satan épi vyé latè’y-la. Kisa ki ka édé Jézi pou pwan pasyans jistan lè sala wivé? Ében yon wézon i ka fè sa sé paskè i ni imilité. I sav sé sèlman Jéhova ki ni dwa-a pou désidé lè-a pou détwi vyé latè sala. Konsa, i dakò pou kité tout bagay an lanmen Jéhova.​—Twav. 1:7.

13. Pouki Jézi té ni pasyans épi sé zapòt li-a, èk ki mannyè i moutwé sa?

¹³ Lè Jézi té asou latè-a, i té ka pwan pasyans épi sé zapòt li-a. Pou ègzanp, sé zapòt-la té ka toujou chikannen konsèné kilès anpanmi yo ki té pli enpòtan. Mé pito Jézi vini las épi yo, i kontiné pwan pasyans. (Louk 9:46; 22:24-27) Pouki? Sé paskè, i té ni konfyans ki, yo té kay apwann pou imité’y èk moutwé imilité. Wi, i té ni èspwa yo té kay chanjé. Bon, ès ou ja twapé kò’w ka fè menm lèwè-a plizyè fwa? Ében san dout, sé pa dé kontan ou kontan pou konnèt, Wa nou Jézi Kwi ni an chay imilité, èk i ni an chay pasyans.

14. Kisa ki kay édé nou pou ni pli pasyans?

¹⁴ Mannyè nou sa swiv ègzanp Jéhova. Si nou vlé imité Jéhova pli byen, èk moutwé pli pasyans, nou ni pou apwann mannyè pou “katjilé” menm kon Jézi. (1 Kòr. 2:16) Kisa ki kay édé nou pou fè sa? Ében yonn an sé pli mèyè mannyè-a nou sa fè sa, sé lè nou li ében kouté sé wakont-lan ki an Bib-la konsèné lavi Jézi. Èk paditan nou ka li ében kouté yo, nou ni pou pwan tan pou katjilé asou sa Jézi té fè, èk wézon-an pouki i té fè sèten bagay. Osi, nou ni pou mandé Jéhova pou édé nou ni imilité épi pasyans, menm kon Jézi. Konsa, si nou apwann pou katjilé menm kon Jézi, nou kay sa imité Jéhova èk nou kay ni pli pasyans épi kò nou èk, épi lézòt.​—Maf. 18:26-30, 35.

JÉHOVA KA CHÉWI MOUN KI NI IMILITÉ

15. Bay déotwa ègzanp ki ka moutwé, Jéhova ka chéwi moun ki ni imilité?

¹⁵ Li Sam 138:6. Katjilé asou sa: Jéhova sé Pli Ho-a an tout inivès-la. Mé magwé sa, i ka chéwi moun ki ni imilité. La ni an chay moun Jéhova bay lonnè ki spésyal, magwé lézòt té ka gadé yo kon moun ki pa té vo anyen. Èk pitèt nou pa ka chonjé yo tout, mé non yo ékwi an Bib-la. Pou ègzanp, Jéhova fè Moziz ékwi non on madanm yo té ka kwiyé Dèbra. Madanm sala té ka twavay lakay Ayzak, èk lakay Jakòb pou otjipé manmay yo. Èk i fè twavay sala diwan yon san venn senk «125» lanné! Menm si nou pa konnèt an chay bagay konsèné Dèbra sala, Jéhova fè Moziz ékwi on ti détay ki ka moutwé, mannyè fanmi Ayzak épi fanmi Jakòb té enmen Dèbra. (Jen. 24:59; 35:8, ftn.) Plizyè san lanné apwé sa, Jéhova chwazi on jenn ti bèwjé yo té ka kwiyé David, pou vini wa an Izwayèl. (2 Sm 22:1, 36) Èk on ti mouman apwé Jézi fèt, Jéhova voyé on nanj pou di on ti gwoup bèwjé, Mèsaya-a té fini fèt an vil Bèfléyenm. Sa sété on bèl lonnè toubonnman, paskè sé yo pwèmyé Jéhova fè konnèt enfòmasyon sala. (Louk 2:8-11) Bon, lè Jozèf épi Mari mennen Jézi an tanp-lan pou pwèmyé fwa-a, Jéhova bay dé «2» gwan moun, bèl pwivilaj-la pou wè Gason’y-lan ki té kay vini Mèsaya-a. Non sé gwan moun sala sété Siméyon épi Anna. (Louk 2:25-30, 36-38) Konsa i a klè, kon lévanjil-la ka moutwé, ‘magwé Jéhova ka wété byen ho an syèl-la, i ka pwan tan pou gadé moun ki ni imilité,’ èk i ka apwésyé yo!

16. Ki mannyè Jézi moutwé i ka chéwi moun ki ni imilité menm kon Papa’y ka fè?

¹⁶ Jézi ka swiv ègzanp Jéhova. Menm kon Jéhova, Jézi ka chéwi moun ki ni imilité. Pou ègzanp, i té ka enstwi moun “òdinè ki pa té ni pyès endikasyon,” konsèné Wéyòm-lan. (Twav. 4:13; Maf. 11:25) Osi, i té ka djéwi moun ki té malad, èk i té ka moutwé yo lanmityé épi wèspé. (Louk 5:13) Swè-a avan i mò, Jézi lavé pyé sé zapòt-la, magwé sa sété on twavay yo té ka bay on sèvant pou fè. (Jan 13:5) Èk avan i viwé an syèl, i mandé sé disip li-a pou enstwi moun konsèné Wéyòm-lan, pou yo sa twapé lavi étonnèl. Sa sé on bèl lonnè Jézi bay sé disip-la, èk anfen nou tout.​—Maf. 28:19, 20.

17. Ki mannyè nou sa swiv ègzanp Jéhova, èk moutwé lanmityé épi wèspé pou lézòt? (Gadé pòtwé-a osi.)

¹⁷ Mannyè nou sa swiv ègzanp Jéhova. Lè nou ka fè twavay pwèchman-an, nou ka swiv ègzanp Jéhova lè nou ka moutwé lanmityé épi wèspé pou tout moun. Ki mannyè nou ka fè sa? Ében, nou ka bay tout moun chans-lan pou kouté Bon Nouvèl-la, menm si yo ni diféwan kilti, yo sòti an diféwan was, èk menm si yo ni endikasyon ében gwo pozisyon opa. Osi, nou ka swiv ègzanp Jéhova an mannyè-a nou ka twété sé fwè èk sè-a. Paskè, menm si nou ni on pwivilaj, ében lòt wèskonsabilité an ògannizasyon-an, nou ka kontiné moutwé lanmityé épi wèspé pou tout sé fwè èk sè-a. (Filip. 2:3) Lè Jéhova wè, nou ka abésé kò nou èk nou ka moutwé lézòt lonnè, lanmityé, épi wèspé, sé pa dé kontan i ka kontan.​—Ronm 12:10; Zèf. 3:12.

18. Pouki ou vlé swiv ègzanp Jéhova èk moutwé imilité?

¹⁸ Si nou kontiné fè éfò pou imité lanmityé-a épi imilité-a Papa nou ki an syèl-la ni, moun kay santi pli alèz pou palé épi nou, nou kay sa konpwann sitiwasyon lézòt pli mèyè, èk nou kay ni pli pasyans. Osi, nou kay sa wèspèkté èk onnowé lézòt, menm kon Jéhova ka fè. Konsa annou kontiné fè tout sa nou pé pou swiv ègzanp Jéhova èk moutwé imilité. Si nou fè sa, nou kay ni pli valè ankò an zyé’y!​—Izay. 43:4.