Ès Témwen Jéhova Ka Asosiyé Épi Moun Ki Pa An Wilizyon Yo Ankò?

Si on Témwen Jéhova doubout pwéché èk doubout atandé mitin, nou pa ka tjenn kò nou hòd li. Anfen, nou ka fè tout sa nou pé pou enkouwajé’y, èk édé’y fòtifyé lanmityé’y pou Jéhova.

Menm si on Témwen Jéhova fè on péché ki gwav, sa pa vlé di nou kay èskonminiké’y. Mé, si on Témwen Jéhova ka kontiné dézobéyi lwa Bondyé èk i pa wépanti; a lè sala, nou kay tjenn kò nou hòd li ében èskonminiké’y. An 1 Kòrint 5:13 Bib-la ka di a klè: “Tiwé mové lam-lan ki anpami zòt-la.”

Ében, si on nonm èskonminiké, mé madanm li èk zanfan’y sé Témwen Jéhova, kisa ki kay fèt? Sa vwé, mannyè-a fanmi-an té ka adowé Jéhova kay chanjé paski mawi-a pa on Témwen Jéhova ankò, mé, yo sé on fanmi toujou. Konsa, wilasyon yo kon on fanmi pa ka chanjé. Sa vlé di, mawi-a, madanm-lan, èk sé zanfan-an kay kontiné moutwé yonn a lòt lanmityé èk wèspé.

Menm si on Témwen Jéhova èskonminiké i sa atandé sé mitin nou-an. Èk si’y vlé, sé ansyen-an sa ba’y èd ki bazé asou Bib-la. Wi, sé ansyen-an vwéman vlé édé chak moun ki èskonminiké pou viwé adowé Jéhova ankò. Mé, ki mannyè on moun ki èskonminiké sa vini on Témwen Jéhova ankò? Ében, lè moun-lan doubout fè sa ki mové, i wépanti, èk i ka fè éfò pou swiv lwa Bondyé, i sa vini on Témwen Jéhova ankò.