Kisa Ki Ka Moutwé Nou Ka Viv An “Dènyé Tan-an”?
Mi Sa Bib-la Ka Di
Bib-la ka palé konsèné atitid moun èk diféwan bagay ki ka moutwé “tan-an kay bout.” (Mafyou 24:3) Bib-la ka kwiyé tan sala “dènyé tan-an”.—2 Timòfi 3:1; Dannyèl 8:19.
Pwofèsi Bib konsèné “dènyé tan-an”
Bib-la di, la kay ni an chay bagay ki kay fèt a menm lè-a, èk sa té kay moutwé nou ka viv an dènyé tan-an. (Louk 21:7) Mi yonndé ègzanp:
Ladjè oliwon latè-a. Jézi té di: “Nasyon kay goumen kont nasyon épi wéyòm kay ataké yonn a lòt.” (Mafyou 24:7) Osi, Wévélasyon 6:4 ka palé konsèné yon nonm ki asou yon chouval ki ka wépwézanté ladjè, èk i kay “fè ladjè lévé an latè-a”.
Lafen. Jézi té di: “La kay ni lafen.” (Mafyou 24:7) Liv Wévélasyon ka palé konsèné yon lòt nonm ki asou an lòt chouval, èk sa ka moutwé ki, la kay ni lafen an plizyè diféwan péyi oliwon latè-a.—Wévélasyon 6:5, 6.
Mové twanblanntè. Jézi té di la kay ni “twanblanntè adan an chay koté.” (Mafyou 24:7; Louk 21:11) Èk sé twanblanntè sala té kay annékòz pli soufwans èk lanmò pasé pyès lòt tan.
Maladi. Jézi di, la ka ni “tout sòt diféwan maladi.”—Louk 21:11.
Kwim. Magwé moun ja fè kwim pou plizyè syèk, Jézi di dènyé tan-an “kay ni tèlman movèzté”.—Mafyou 24:12.
Lézòm ka détwi latè-a. Wévélasyon 11:18 palé konsèné “[moun] ki ka détwi latè sala.” Èk yo té kay fè sa an plizyè diféwan mannyè. Pou ègzanp, an chay moun vyolan, yo ka fè bòbòl, èk yo ka donmajé latè-a.
Vyé atitid. An 2 Timòfi 3:1-4, Bib-la di moun “kay malonnèt, yo pa kay ni pyès wèspé pou Bondyé, . . . yo pa kay pawdonnen lézòt, yo kay malpalan, yo pa kay sa konpòté kò yo byen, yo kay bwital, yo pa kay ni pyès wèspé pou sa ki bon, yo kay twèt, yo kay fè ében di népòt bagay san katjilé, [èk] yo kay ni an chay lògèy.” Anfen sé vyé atitid sala kay si tèlman konmen, Bib-la di tan sala kay vwéman “difisil.”
Pwòblenm an fanmi-an. An 2 Timòfi 3:2, 3, Bib-la di an chay moun “pa kay ni pyès natiwèl” an fanmi-an èk manmay “pa kay kouté manman yo épi papa yo.”
Moun pa kay enmen Bondyé. Jézi té di: “Lanmityé an chay moun [kay] vini fèb.” (Mafyou 24:12) Wi, Jézi té ka di, an chay moun pa té kay enmen Bondyé. Osi, 2 Timòfi 3:4 di, an dènyé tan-an moun “kay enmen plézi latè-a pasé yo enmen Bondyé.”
Ipokwizi an wilizyon. An 2 Timòfi 3:5, Bib-la di moun té kay fè akwèdi yo ka swiv Bondyé, mé yo pa té kay swiv Pawòl li.
Pli lakonpwann asou pwofèsi Bib. Liv Dannyèl di an ‘tan bout-la,’ moun té kay konpwann lavéwité-a ki an Bib-la, èk sé pwofèsi-a pli mèyè.—Dannyèl 12:4.
Moun kay pwéché bon nouvèl-la oliwon latè-a. Jézi té di: “Moun kay pwéché Bon Nouvèl-la ki Bondyé kay kondwi adan an mannyè ki nèf.”—Mafyou 24:14.
Moun pa kay mélé épi sé bagay-la ki ka fèt-la, èk yo kay jis pwan sèvant Bondyé sèvi wizib. Jézi té di moun kay inyowé sé bagay-la ki ka moutwé bout-la pwé. (Mafyou 24:37-39) An plis di sa, 2 Pita 3:3, 4 di, adan moun pa kay pwan sé èvidans-lan sèwiyé èk yo kay di, “tout bagay menm mannyè-a toujou”.
Tout sé pwofèsi-a ka fèt vwé. Jézi di an dènyé tan-an tout sé pwofèsi-a té kay fèt a menm lè-a.—Mafyou 24:33.
Ès nou ka viv an “dènyé tan-an”?
Wi. Kondisyon latè-a èk enfòmasyon an Bib-la ka moutwé a klè dènyé tan-an koumansé an lanné mil nèf san katòz (1914). Wi, sa sé menm lanné-a Pwèmyé Gwo Ladjè-a koumansé. Pou pli enfòmasyon gadé vidiyo sala:
An lanné mil nèf san katòz (1914) Wéyòm Bondyé koumansé kondwi an syèl. Èk yonn an sé pwèmyé bagay-la i fè, sété pou jété Satan èk sé zèlèv li-a désann anlè latè-a. (Wévélasyon 12:7-12) Alò, Satan èk sé zèlèv li-a sa sèlman enflouwansé sé moun-lan ki asou latè-a. Konsa sé yo ki ka pousé lézòm pou moutwé vyé atitid, èk pou fè mové bagay ki ka fè dènyé tan-an si tèlman “difisil”.—2 Timòfi 3:1.
An chay moun an lapenn paski lavi si tèlman difisil. Èvèk yo ni tèt cho paski moun pa ka viv an lilyon épi yonn a lòt kon avan. Adan di yo jis pè moun kay tjwé yonn a lòt èk lézòm kay fini anyen.
Mé an menm di tan, la ni moun ki ni èspwa. Yo ni asiwans-lan ki, Wéyòm Bondyé kay tiwé sé pwòblenm-lan ki asou latè-a. (Dannyèl 2:44; Wévélasyon 21:3, 4) Wi, kon yo ka èspéwé Bondyé pou fè sa’y pwonmèt, sa Jézi di an Mafyou 24:13 ka konsolé yo: “Moun-an ki tjenbé fò pou jis an bout-la kay sové.”—Mayka 7:7.