Yon Chèf Nèf Èk Dé «2» Madanm Ki Té Bwav

Jòchwa djidé pèp Jéhova pou plizyè lanné. Apwé sa, lè’y té yon san dis «110» lanné, i mò. Tout tan Jòchwa té vivan, jan Izwayèl té ka adowé Jéhova. Mé apwé Jòchwa mò, yo fè on mové bagay. Yo tounen do yo asou Jéhova, èk yo koumansé adowé fo dyé, menm kon sé moun-lan an péyi Kénann té ka fè. Konsa, Jéhova kité on wa hòd péyi Kénann manstipé asou yo. Non wa-a sété Jébinn. Èk sé pa dé mizè jan Izwayèl wè anba Wa Jébinn épi pèp li. Lè jan Izwayèl pa té sa pwan ankò, yo plédé épi Jéhova, èk yo mandé’y pou édé yo. Jéhova wéponn lapwiyè yo, èk i ba yo on chèf nèf pou djidé yo. Non chèf sala sété Barak.

Bon, Dèbra sété on madanm ki té ka wann sèvis kon yon pwòfèt. Èk Jéhova té ba’y on konmisyon bay Barak. Konsa Dèbra voyé kwiyé Barak, pou’y ba’y konmisyon Jéhova. I di Barak: ‘Pwan dis mil «10,000» nonm, èk alé fè ladjè épi lawmé Jébinn bò lawivyè Kichonn-lan. Sé la ou kay bat Sisèra, chèf lawmé Jébinn.’ Barak wéponn Dèbra, èk i di’y: ‘Sèl mannyè mwen kay alé, sé si’w alé épi mwen.’ Lè sala, Dèbra di’y: ‘Mwen kay alé épi’w. Mé tann sa, sé pa ou ki kay tjwé Sisèra. Jéhova ja di, sé on madanm ki kay tjwé’y.’

Konsa Barak pwan lawmé’y, épi i mouté Mòn Tébò pou pwépawé pou batay-la, èk Dèbra alé épi yo. Lè Sisèra tann sa, i sanblé tout kawòs ladjè’y épi sòlda’y, adan on fon ki té anba Mòn Tébò. Mé Dèbra di Barak: ‘Jòdi-a sé jou-a Jéhova kay ba’w laviktwa.’ Konsa, Barak pwan dis mil «10,000» nonm-lan ki té épi’y-la, èk yo kouwi désann mòn-lan pou yo alé goumen épi Sisèra èk gwo lawmé’y.

Lè sala, Jéhova fè dlo lawivyè Kichonn-lan désann gwo, èk sé kawòs-la Sisèra épi lawmé’y té ni-an pwi an labou-a. Barak épi lawmé’y bat lawmé Sisèra. Anfen, yo tjwé tout moun ki té an lawmé-a, antiwan Sisèra, paskè i chapé. I kité kawòs li, i pitjé kouwi a pyé, èk i antwé andidan tant on madanm yo té ka kwiyé Jéyèl. Ében Jéyèl byenvini Sisèra, èk i ba’y lèt pou’y bwè. Apwé i bwè lèt-la, Jéyèl pwan on lenn, épi i kouvè’y. Sisèra té tèlman las, sonmèy pòté’y alé. Paditan i té ka dòmi, Jéyèl pwan on mato, épi yonn sé pitjèt tant-lan. I maché tou dousman, i akoupi bò tèt Sisèra, èk i sèvi mato-a pou fouyé pitjèt tant-lan an tanp Sisèra. I bay pitjèt-la kout mato jistan pitjèt-la pèsé tèt Sisèra, èk i antwé an tè-a. Èvèk sé kon sa Sisèra mò.

Lè Barak wivé bò tant Jéyèl, Sisèra té ja mò lontan. Jéyèl sòti déwò, èk i di Barak: ‘Vini andidan. Mwen kay moutwé’w nonm-lan ou ka gadé pou-a.’ Lè Barak antwé andidan tant-lan, i wè Sisèra mò atè-a. Wi, Jéhova té édé jan Izwayèl pou bat sé lèlmi yo-a. Yo té tèlman kontan, Barak épi Dèbra fè on chanson, èk yo koumansé chanté chanson sala pou glowifyé Jéhova, paskè Jéhova té bay jan Izwayèl laviktwa. Èk pou kawant «40» lanné apwé sa, jan Izwayèl viv an lapé.