Kat «4» Tibway Ki Obéyi Jéhova

Nèbyoukadnéza pwan sé pwens-lan èk moun ki té enpòtan an Jouda èk i mennen yo Babilonn. I mété yo asou kont Achpènaz, yonn an sé ofisyé’y-la. Nèbyoukadnéza di Achpènaz pou chwazi sé tibway-la ki té pli entélijan èk an pli bon santé anpami yo. Yo té kay étwennen sé tibway sala pou twa «3» lanné. Sa té kay pwépawé yo pou tjenbé gwo pozisyon an Babilonn. Sé tibway-la té ni pou apwann li, ékwi, èk palé langaj Babilonn. Apa di sa, yo té ni pou manjé menm kalité manjé-a wa-a èk sé ofisyé’y-la té ka manjé. Kat «4» anpami sé tibway sala sété Dannyèl, Hannanaya, Michayèl, èk Azaraya. Mé Achpènaz ba yo non yo té ka kwiyé moun an Babilonn. I kwiyé yo: Bèltichaza, Chadrak, Michak, èk Abèdnigo. Ès tout sa yo té kay apwann té kay fè yo doubout sèvi Jéhova?

Sé tibway sala té fè lidé yo pou obéyi Jéhova. Yo té sav yo pa té sipozé manjé manjé wa-a. Pouki? Paski silon lwa Jéhova, yo pa té ni pou manjé adan sé manjé sala. Kon sa yo di Achpènaz: ‘Tanpwi souplé, pa fè nou manjé manjé wa-a.’ Achpènaz wéponn yo: ‘Si zòt pa manjé, èk wa-a wè zòt ka gadé malad, i kay fin tjwé mwen!’

Lè sala, an bagay vin an lidé Dannyèl. I di gadyenn-lan: ‘Tanpwi souplé, ban nou lédjim èk dlo tousèl pou dis «10» jou. Apwé sa, konpawé nou épi sé tibway-la ki ka manjé manjé wa-a.’ Gadyenn-lan dakò pou fè sa yo mandé.

Apwé dis «10» jou-a, Dannyèl èk sé twa «3» jan’y-lan té gadé an pli bon santé pasé tout sé lòt tibway-la. Jéhova té byen kontan yo té obéyi’y. I jis bay Dannyèl lasajès pou konpwann vizyon èk wèv.

Apwé twa «3» lanné-a pasé, Achpènaz mennen sé tibway-la douvan Nèbyoukadnéza. Wa-a palé épi yo, èk i twapé Dannyèl, Hannanaya, Michayèl, èk Azaraya té ni bon lakopwann èk yo té twòp pli entélijan pasé tout sé lòt tibway-la. Alò i chwazi yo kat-la pou twavay ba li. Èk byen souvan, sé yo wa-a té ka mandé konsèy, lè’y té ni pou fè disizyon asou bagay enpòtan. Jéhova té fè yo ni pli lasajès pasé tout sé majisyen-an èk tout sé nonm-lan ki té ka bay wa-a konsèy.

Magwé Dannyèl, Hannanaya, Michayèl, èk Azaraya té adan an lòt péyi, yo pa té obliyé yo sété sèvant Jéhova. Bon ou menm, ès ou kay toujou chonjé Jéhova menm si manman’w èk papa’w pa la épi’y?