Jéhova Té Bay Sanmsin Fòs Ki Té Èstòdinè

An chay jan Izwayèl koumansé adowé fo dyé ankò. Konsa, Jéhova kité sé Filistin-lan kontwolé péyi Izwayèl. Mé, la té ni moun anpami jan Izwayèl ki té enmen Jéhova. Yonn an sé moun sala, sété on nonm yo té ka kwiyé Manowa. Manowa sala épi madanm li pa té ni pyès ich. Mé yon jou, Jéhova voyé an nanj oti madanm Manowa. Nanj-lan di madanm-lan: ‘Ou kay fè on gason, èk gason sala kay délivwé jan Izwayèl anba lanmen sé Filistin-lan.’ Nanj-lan osi di’y, gason-an i té kay fè-a ‘té kay sèvi Jéhova kon yon Nazarayt, diwan tout lavi’y.’ Ès ou konnèt kisa ki yon Nazarayt? Ében, yon Nazarayt sété on moun anpanmi jan Izwayèl, ki té pawé pou fè sèten sakwifis, pou’y té sa sèvi Jéhova adan on mannyè spésyal. Bon, la té ni dé «2» mannyè pou vini on Nazarayt. Sé swé Jéhova chwazi moun-lan, ében moun-lan fè disizyon sala pou kò’y. Èk si on moun té fè disizyon-an pou vini on Nazarayt, i té sa désidé pou ki kantité tan i té vlé wann sèvis an mannyè spésyal sala. Mé, si sé Jéhova ki té chwazi moun-lan, moun sala té ni pou viv kon yon Nazarayt pou tout lavi yo. Osi, sé Nazarayt-la té ni pou fè sèten bagay lézòt moun pa té oblijé fè. Pou ègzanp, sé Nazarayt-la pa té sipozé koupé chivé yo.

Apwé on tan, madanm Manowa fè on tibway, èk yo kwiyé tibway-la Sanmsin. Lè Sanmsin vini pli gwan, Jéhova ba’y fòs ki té èstòdinè. Sanmsin té tèlman fò, i té sa tjwé on lyon épi dé «2» lanmen’y sèlman. Yon jou, Sanmsin tjwé twant «30» nonm anpanmi sé Filistin-lan pa kò’y. Ou sa asiwé, sé Filistin-lan té hayi Sanmsin an chay. Èk yo té ka toujou gadé pou on mannyè pou yo tjwé’y. Yon swè, Sanmsin té adan on vil yo té ka kwiyé Gaza, èk i antwé lakay on madanm pou’y pasé nwit-la. Mé Gaza sété on vil ki té an tèwitwa sé Filistin-lan. Konsa, lè sé Filistin-lan vini konnèt Sanmsin té an vil yo, yo asanblé bò bayè vil-la, épi yo wèsté la tout lannwit lonng. Yo té ka èspéyé pou jou ouvè, pou yo tjwé Sanmsin. Mé Sanmsin wèsté kouché koté i té yé-a lakay madanm-lan, jis bò koté mennwit kon sa. Lè sala i alé, i tjébé bayè vil-la, èk i annèk waché’y. Bayè-a sòti ansanm épi sé dé «2» poto-a ki té ka tjenbé’y-lan, èk bi bwa-a yo té ka sèvi pou fenmen’y. Sanmsin mété tout sa asou zépòl li, èvèk i pòté’y pou wivé jis an tèt on montany ki té tou pwé vil Hèbronn.

Bon, apwé sa, Sanmsin té byen épi on madanm yo té ka kwiyé Dilayla. Mé i sanm Dilayla sala té kontan lajan. Konsa sé Filistin-lan alé oti’y, èk yo di’y: ‘Nou vlé tjébé Sanmsin pou nou mété’y an pwizon. Si’w di nou kisa ki ka fè’y fò kon sa, nou kay ba’w plizyè mil pyès dajan pou péyiman’w.’ Ében, Dilayla té vlé lajan-an, konsa i dakò pou twayi Sanmsin. Bon, Sanmsin pa té vlé di Dilayla kisa ki té ka fè’y fò kon sa. Mé, Dilayla pa té ka ba’y pyès chans. Touléjou i té ka bay Sanmsin chalè pou fè’y di’y, ki mannyè i té fò kon sa. Lè Sanmsin pa té sa pwan chalè-a ankò, i di Dilayla: ‘Dépi mwen fèt, chivé mwen p’òkò janmen koupé, paskè mwen sé yon Nazarayt. Si yo annèk koupé chivé mwen, mwen kay pèd tout fòs mwen.’ Ès ou pa kwè, Sanmsin té fè on gwo lèwè, lè’y té di Dilayla sigwé sala?

Apwé Dilayla apwann sigwé-a, i kouwi kwiyé sé Filistin-lan, èk i di yo: ‘Zòt sa vini atjwèlman. Sanmsin ouvè tjè’y ban mwen. Mwen konnèt sigwé Sanmsin!’ Konsa sé Filistin-lan vini lakay li pou pòté lajan-an ba’y. Apwé sa, Dilayla fè Sanmsin pwan sonmèy asou tjwis li, èk paditan Sanmsin té ka dòmi, i fè on nonm koupé chivé-a. Apwé sa, Dilayla hélé: ‘Sanmsin, mi sé Filistin-lan!’ Lè sala, Sanmsin lévé an sonmèy-la, èk i té pawé pou bat sé Filistin-lan, kon lakoutim. Mé élas, i pa té ni pyès fòs. Konsa, sé Filistin-lan tjébé Sanmsin, yo kwévé toulédé zyé’y, èk yo mété’y an pwizon.

Tjèk tan apwé sa, plizyè mil Filistin té ansanm adan on tanp pou adowé fo dyé-a yo té ka kwiyé Dégonn. Jou sala yo té ka fè on gwo fèt bay fo dyé sala, èk yo té tèlman kontan, yo di: ‘Mennen Sanmsin vini, pou’y sa anmizé nou, paskè dyé nou ladjé’y an lanmen nou.’ Lè sala, yo alé pwan Sanmsin an pwizon, yo mété’y doubout ant dé «2» pilotwi kay-la koté yo té yé-a, èk yo pwan’y sèvi wizib. Bon, tout tan-an Sanmsin té an pwizon, chivé’y té ka pwofité kouman! Konsa, bò lè sala, chivé-a té ja vini lonng ankò, mé sé Filistin-lan pa té wéyalizé sa. Sanmsin tjébé dé «2» poto-a ki té ka sipòté kay-la, èk i pwédyé. I di: ‘Dyé Jéhova, souplé, ban mwen fòs yon fwa ankò, pou mwen sa pwan wivanj asou sé Filistin-lan pou yonn sé zyé mwen-an.’ Èvèk Sanmsin pousé dé «2» pilotwi-a épi tout fòs li. Lè sala, kay-la kwazé, épi tout moun ki té la mò. Èk wi, Sanmsin mò osi, mé kantité Filistin i tjwé jou sala, té pli pasé tout sé Filistin-lan i té tjwé diwan lavi’y.