Jéhova Pwotéjé Jéhòchafat

Jéhòchafat, wa Jouda, détwi tout sé lotèl-la èk sé idòl-la moun té ka sèvi pou adowé Bal. I té vlé sé moun-nan konnèt lwa Jéhova. Kon sa, i voyé adan sé pwens-lan èk adan désandan Livay, toupatou an Jouda pou enstwi sé moun-nan lwa Jéhova.

Sé nasyon-an ki té tou pwé Jouda, té pè ataké yo, paskè yo té sav Jéhova té épi pèp li. Yo té pè tèlman, yo jis mennen kado bay Wa Jéhòchafat. Mé apwé an tan, jan Mowab, désandan Amonn, èk moun ki sòti an wijon Sèyi, té vin bat ladjè kont jan Jouda. Jéhòchafat té sav i té kay bizwen sipò Jéhova. Alò i mandé tout sé nonm-lan, sé fanm-lan, èk sé manmay-la pou vini Jérouzalèm. Lè yo tout asanblé, i pwédyé douvan yo. I di: ‘Jéhova, nou pa sa genyen batay sala san ou. Tanpwi souplé, di nou sa pou fè.’

Jéhova wéponn lapwiyè Jéhòchafat. I di’y: ‘Zòt pa ni pou pè. Mwen kay édé zòt. Pwan pozisyon zòt, pa bwennen, èk gadé sa mwen kay fè pou sové zòt.’ Ki sa Jéhova fè pou sové yo?

Denmen bonmaten, Jéhòchafat chwazi adan sé moun-nan ki konnèt chanté, èk i mandé yo pou maché douvan lawmé-a. Yo kité Jérouzalèm èk maché jis tan yo wivé Tèkowa, plas-la koté ladjè-a té kay pwan kou.

Padan sé moun-nan té ka chanté byen fò pou glowifyé Jéhova, Jéhova té ka goumen bay pèp li. I twoublé jan Amonn èk jan Mowab si tèlman, yo koumansé ataké yonn a lòt. Pa yonn ki wété vivan, yo tout mò. Mé Jéhova pwotéjé jan Jouda, sé sòlda-a, èk sé pwèt-la. Tout sé moun-nan an sé péyi-a ki té tou pwé tann sa Jéhova té fè. Kon sa yo té sav Jéhova té ka pwotéjé pèp li toujou. Mé ki mannyè Jéhova ka sové pèp li? Ében, Jéhova ka fè sa an plizyè mannyè èk i pa bizwen pyèsonn édé’y fè sa.