Yo Jété Dannyèl An Twou Lyon-an

An lòt wa Babilonn sété Darayòs, jan Médiya. Darayòs wéyalizé Dannyèl té pli kapab pasé lézòt. Kon sa, i mété Dannyèl an chaj sé nonm-lan ki té ni pli gwo pozisyon an péyi-a. Sé nonm sala té jalou Dannyèl èk yo té vlé tjwé’y. Kon yo té sav Dannyèl sété sèvant Jéhova èk i té ka pwédyé twa «3» fwa pa jou, yo ay di Darayòs: ‘Wa mwen, la dwé ni an lwa ki ka di, moun pa sipozé mandé pyès dyé anyen. Sé ou yonn yo sipozé mandé. Népòt moun ki dézobéyi lwa sala, yo ni pou jété yo an twou sé lyon-an.’ Darayòs té enmen tann sa. Alò i pasé lwa-a.

Kon sa Dannyèl tann yo pasé lwa nèf-la i alé lakay li. I ajounou douvan an finèt ki té ouvè èk i koumansé kwiyé asou Jéhova. Sé nonm-lan ki té jalou Dannyèl kouwi antwé koté’y-la èk yo jwenn li ka pwédyé. Alò yo kouwi ay di Darayòs: ‘Dannyèl ka dézobéyi’w. I la ka pwédyé twa «3» fwa pa jou.’ Bon, Darayòs té enmen Dannyèl èk i pa té vlé’y yo tjwé’y. Darayòs pasé tout jouné-a ka chaché an mannyè pou sové Dannyèl. Mé pa menm wa-a ki té sa chanjé an lwa i té ja pasé. Kon sa Darayòs té oblijé konmandé sé sèvant li-a pou jété Dannyèl an twou lyon-an.

Swè sala Darayòs té tèlman pè pou Dannyèl i pa té sa menm dòmi. Denmen maten, i kouwi bò twou lyon-an èk i kwiyé Dannyèl. I mandé’y: ‘Dannyèl! Ès Bondyé’w sové’w?’

Darayòs tann an vwa. Vwa-a sété vwa Dannyèl! Dannyèl andjélé: ‘Nanj Jéhova fèmé djòl sé lyon-an. Yo pa fè mwen anyen.’ Pa ti kontan Darayòs té kontan! Anfen i mandé yo pou tiwé Dannyèl an twou-a. Pa menm an ti kòché Dannyèl té ni. Apwé sa wa-a di: ‘Jété sé nonm-lan ki té akizé Dannyèl an twou lyon-an.’ Lè yo jété yo an twou-a, adan an ti moman sé lyon-an té ja manjé yo.

Èk mi sa Darayòs konmandé pèp li: ‘Sé pou tout moun pòté Dyé Dannyèl gwan wèspé. I anpéché sé lyon manjé Dannyèl.’

Ès ou ka kwiyé asou Jéhova toulé jou menm kon Dannyèl té ka fè?