Jonatann Té Bwav Èk I Té Fidèl

Jonatann sété pwèmyé gason Wa Sòl, èk i sété on sòlda ki té byen bwav. David té di, Jonatann té ni pli vitès pasé on lèg, èk i té pli fò pasé on lyon. Yon jou, Jonatann wè ven «20» sòlda ki té sòti an kanp sé Filistin-lan asou on ti mòn. Èk i di sèvant-lan ki té épi’y-la: ‘Sèl mannyè nou kay ataké yo, sé si Jéhova ban nou on sin. Konsa, si yo di nou pou mouté, nou kay pwan sa kon on sin pou nou ataké yo.’ Lè sala, sé sòlda Filistin-lan hélé: ‘Mouté. Vini pou nou goumen!’ Konsa Jonatann épi sèvant li mouté ti mòn-lan pou alé goumen épi yo. Èk yo dé-a tjwé tout sé sòlda-a ki té la.

Bon chonjé, Jonatann sété pwèmyé gason Sòl, èk Sòl sété wa. Konsa apwé Sòl mò, sé Jonatann ki té sipozé vini wa. Mé sa pa té kay fèt, paskè Jéhova té chwazi David pou vini wa apwé Sòl. Magwé Jonatann té konnèt sa, i pa té jalou. Anfen, li épi David té bon jan, èk yo pwonmèt pou pwotéjé èk édé yonn a lòt. Jonatann jis bay David kanmizòl li, sab li, sanng li, épi bannza’y, pou moutwé’y mizi bon jan i té bon jan épi’y.

Lè David té ka kouwi pou lavi’y pou lapéti Sòl, Jonatann alé wè David pou ankouwajé’y. I di David: ‘Tjébé fò, èk pwan tjè. Jéhova ja chwazi’w pou vini wa. Jis papa mwen ki konnèt sa.’ Ès ou pa té kay kontan pou ni on bon jan kon sa?

Jonatann mété lavi’y anwis plizyè fwa pou’y édé David. Osi, i palé épi papa’y. I di’y: ‘Si’w tjwé David sa sé on péché ou kay fè, paski David p’òkò fè’w anyen.’ Mé Sòl pa kouté Jonatann. Anfen, pito i kouté, i vini byen faché épi Jonatann. Déotwa lanné apwé sa, Sòl épi Jonatann mò ansanm adan on ladjè.

Mé David pa janmen obliyé bon jan’y Jonatann. Apwé Jonatann mò, David gadé pou on gason’y yo té ka kwiyé Mèfibochèf, èk i di gason-an: ‘Mwen kay otjipé’w pou lèwèstan lavi’w, paskè papa’w sété bon jan mwen. Ou kay viv épi mwen lakay wa-a, èk sé asou tab mwen ou kay manjé.’