Sòlda-a Èk Tifi-a

La té ni an tifi ki té jan Izwayèl mé i té ka wèsté an péyi Siriya. Bon Siriya té byen lwen kay li. Kon sa ki mannyè i fè wivé la? Ében lawmé Siriya pwan’y an lanmen fanmi’y, èk apwézan i sé an sèvant lakay madanm chèf lawmé-a. Non chèf lawmé-a sété Némann. Tifi-a té ka adowé Jéhova menm si sé moun-nan owon’y pa té ka fè sa.

Némann té ni an vyé maladi an lapo’y èk i té ka toujou soufè. Sa té ka fè tifi-a lapenn tèlman, i té vlé édé’y. Alò tifi-a di madanm Némann: ‘Mwen konnèt an moun ki sa djéwi mawi’w. La ni an nonm an Izwayèl, i sé an pwofèt Jéhova, èk non’y sé Ilaycha. Nonm sala sa djéwi mawi’w.’

Madanm Némann ay di Némann sa tifi-a té di-a. Bon Némann té pawé pou fè népòt bagay pou’y djéwi. Kon sa i alé Izwayèl, lakay Ilaycha. Némann té kwè Ilaycha té kay wisivwè’y kon an moun ki enpòtan. Mé pito sa, Ilaycha voyé sèvant li wisivwè Némann. Ilaycha di sèvant-lan pou di’y: ‘Ay lavé kò’w sèt «7» fwa an Lawivyè Jouden-an èk ou kay djéwi.’

Sa sèvant-lan di Némann dézapwenté’y toubonnman. Némann di: ‘Mwen kwè pwofèt-la té kay vini, kwiyé asou Dyé’y èk pasé lanmen’y anlè mwen pou djéwi mwen. Pito sa i ka voyé di mwen, ay alé lavé kò mwen adan yon lawivyè an Izwayèl. Nou ni pli bèl lawivyè an Siriya. Pouki m’a sa alé la?’ Némann kité kay Ilaycha tou faché.

Sèvant Némann édé’y wéfléchi asou sa sèvant Ilaycha té di’y. Yo di Némann: ‘Ès ou pa té pawé pou fè népòt bagay pou’w djéwi? Ében sa pwofèt sala di’w fè byen senp. Poutji’w pa annèk fè sa’y di’w-la?’ Némann kouté yo. I alé an Lawivyè Jouden-an èk i plonjé sèt «7» fwa an dlo-a. Apwé sètyenm fwa-a, i té djéwi nèt. Pa dé kontan Némann té kontan. Kon sa i viwé lakay Ilaycha pou di’y mèsi. Némann di: ‘Apwézan mwen sav sé Jéhova ki vwéman Dyé.’ Di mwen, ki mannyè ou kwè tifi-a té santi lè’y wè Némann té djéwi?