Djèhòyada Té Ni Kouwaj

Jèzibèl té ni an fi yo té ka kwiyé Atalaya. I té méchan menm kon manman’y. Atalaya té mayé épi wa Jouda. Èk lè mawi’y mò gason’y koumansé kondwi. Mé lè gason’y mò Atalaya fè kò’y kondwitè Jouda. Apwé sa, i éséyé tjwé tout moun ki té an ling pou kondwi ében ki té sa wiplasé’y kon kondwitè. I jis tjwé ich gason’y. Tout moun té pè Atalaya.

Chèf Pwèt Djèhòyada èk madanm li Jihòchiba té sav sa Atalaya té ka fè té mové toubonnman. Kon sa yo séwé yon ti ich Atalaya an tanp-lan èk sé la yo lévé’y. Non ti bébé-a sété Jèhowach. Sa Djèhòyada èk madanm li té fè té byen danjéwé.

Lè Jèhowach té sèt «7» lanné di laj, Djèhòyada voyé kwiyé tout sé chèf-la èk désandan Livay. Lè yo wivé i di yo: ‘Véyé sé lapòt tanp-lan, èk pa kité pyèsonn antwé.’ Apwé, Djèhòyada fè Jèhowach wa Jouda èk i mété an kouwann asou tèt li. Jan Jouda hélé: ‘Viv lé wa!’

Lè Wenn Atalaya tann dézòd-la sé moun-nan té ka fè, i kouwi an tanp-lan. Lè’y wivé èk i wè yo ja fin fè Jèhowach wa, i hélé: ‘Konplo! Konplo!’ Sé chèf-la tjenbé mové wenn-nan, yo mennen’y dèwò, èk yo tjwé’y. Mé Atalaya té ja ni an mové éfé asou pèp Jouda. Ki sa ki té kay fèt apwézan?

Djèhòyada édé nasyon-an fè yon agwéman épi Jéhova. Yo pwonmèt pou adowé Jéhova sèlman. Djèhòyada fè sé moun-nan détwi tanp Bal èk i fè yo kwazé sé idòl-la an miyèt. Apa di sa, i mété sé pwèt-la èk désandan Livay twavay an tanp-lan. Mannyè sala, sé moun-nan té kay sa adowé Jéhova an tanp-lan ankò. I osi mété gad an bayè tanp-lan. Lè sala moun ki pa té pwòp an zyé Jéhova pa té kay sa antwé. Apwé sa, Djèhòyada èk sé chèf-la mennen Jèhowach an kay wa-a èk yo mété’y asid asou chèz wa-a. Jan Jouda té byen kontan. Apwézan sé moun-nan té sa sèvi Jéhova paski Atalaya pa té la pou kontwolé yo ében fòsé yo pou adowé Bal. Ès ou wè mannyè kouwaj Djèhòyada té édé an pil moun?