Yo Pa Adowé Èstati-a

Tjèk tan apwé Wa Nèbyoukadnéza té ni wèv-la ko’y té wè an èstati, i fè yon gwo bidim èstati an lò. I plasé’y an koté yo ka kwiyé Doura. Apwé sa, i voyé kwiyé Chadrak, Michak, Abèdnigo èk lòt moun ki té ni gwo pozisyon an péyi-a. Lè yo wivé Nèbyoukadnéza mandé yo pou asanblé douvan èstati-a. I di yo: ‘Kon sa zòt tann son sé twonpèt-la, sé hap-la, èk sé kòn-lan, zòt ni pou ajounou douvan èstati-a! Népòt moun ki pa ajounou, n’a fè yo jété yo an founo difé-a.’ Ès Chadrak, Michak èk Abèdnigo té kay adowé èstati-a, ében ès yo té kay adowé Jéhova sèlman?

Apwé sa wa-a bay lòd pou yo jwé mizik-la. Tout moun ajounou pou adowé èstati-a antiwan Chadrak, Michak èk Abèdnigo. Lè adan sé nonm-lan wè sa, yo ay di wa-a: ‘Sé twa «3» Jwif-la wifizé adowé èstati-a.’ Nèbyoukadnéza voyé kwiyé yo èk i di yo: ‘N’a bay zòt an lòt chans pou adowé èstati-a. Si zòt pa adowé’y n’a jété zòt an founo difé-a. La pa ni pyès dyé ki kay sa sové zòt.’ Yo wéponn: ‘Wa mwen, nou pa bizwen an lòt chans. Dyé nou sa sové nou. Mé menm si i pa sové nou, nou pa kay adowé èstati-a.’

Sa fè Nèbyoukadnéza faché toubonnman. Alò i di sé sèvant li-a: ‘Fè difé-a an founo-a sèt «7» fwa pli cho pasé i ka yé!’ Apwé sa i di sé sòlda’y-la: ‘Mawé sé nonm sala, èk ladjé yo an difé-a!’ Founo-a té si tèlman cho tan sé sòlda-a wivé bò’y yo mò la menm. Sé twa «3» Jwif-la tonbé an difé-a. Mé lè Nèbyoukadnéza gadé andidan founo-a, andji i wè twa «3» nonm, i wè kat «4» nonm ka maché andidan’y. I vin byen pè. Kon sa i mandé sé ofisyé’y-la: ‘Pa twa «3» nonm nou jété an difé-a? Mé n’a wè yo kat «4», èk yonn an yo ka sanm an nanj!’

Nèbyoukadnéza alé pli pwé founo-a èk i di byen fò: ‘Zòt ki ka sèvi Dyé-a Ki Pli Ho-a, sòti an founo difé-a!’ Tout moun té sipwi pou wè Chadrak, Michak èk Abèdnigo maché sòti an founo-a. Difé-a pa té fè yo anyen. Lapo yo, chivé yo èk had yo pa té bwilé. Yo pa té menm ni lòdè difé asou yo.

Lè Nèbyoukadnéza wè sa, i di: ‘Bondyé Chadrak, Michak èk Abèdnigo ni an pil pouvwa. I voyé nanj li sové yo. La pa ni pyès dyé kon dyé yo.’

Sé twa «3» jenn Jwif sala té fè lidé yo pou wèsté fidèl pou Jéhova. Ès ou menm ja fè lidé’w pou wèsté fidèl pou Jéhova an népòt sitiwasyon?