Jéhova Pwan Pasyans Épi Jonna

La té ni an vil an Asiriya yo té ka kwiyé Ninivè. Sé moun-nan an vil sala té mové toubonnman. Kon sa Jéhova voyé pwofèt Jonna Ninivè pou vèti sé moun-nan. I té vlé yo chanjé mannyè yo. Mé pito Jonna alé Ninivè i alé adan an lòt diwèksyon. Anfen i batjé an bato ki té ka alé Tachich.

Padan bato-a té an wout yon mové tan lévé, èk sé matlo-a té byen pè. Kon sa yo koumansé kwiyé asou sé dyé yo-a. Yo mandé: ‘Poutji sa ka fèt?’ Alafen Jonna di yo: ‘Sé fòt mwen. Jéhova voyé mwen fè an bagay èk pito mwen ay fè’y, mwen fè chimen kochi. Jété mwen an lanmè-a èk mové tan-an kay doubout.’ Sé matlo-a pa té vlé jété Jonna an lanmè-a mé i fòsé yo fè’y. Lè yo jété Jonna an lanmè-a, mové tan-an doubout.

Jonna kwè i té kay mò. Kon’y té ka désann pli fon an dlo-a i té ka pwédyé. Alò Jéhova voyé yon gwo pwéson ki valé Jonna. Magwé pwéson-an valé’y, i pa té mò. Padan’y té an andidan pwéson-an Jonna pwédyé. I di: ‘Jéhova, mwen pwonmèt n’ay toujou obéyi’w.’ Jéhova pwotéjé Jonna an bouden pwéson-an pou twa «3» jou. Apwé sa, Jéhova fè pwéson-an vonmi Jonna atè.

Bon pas Jéhova té sové Jonna, ès i té ni pou alé Ninivè toujou? Wi. Anfen, yon fwa ankò, Jéhova di Jonna pou alé la. Èk kou sala, i obéyi. Jonna alé Ninivè èk i di sé mové moun-nan: ‘An kawant «40» jou, Bondyé kay détwi Ninivè.’ Apwé sa, an bagay èstòdinè wivé. Ki sa ki té fèt? Jan Ninivè kouté èk yo chanjé mannyè yo. Wa Ninivè di pèp li: ‘Kwiyé asou Bondyé èk wépanti’w. Pitèt i pa kay détwi nou.’ Lè Jéhova wè sé moun-nan wépanti, i chanjé lidé’y èk i pa détwi Ninivè.

Lè Jonna wè Bondyé pa détwi vil-la, i té byen faché. Bon tann sa: Jéhova té ni konpasyon asou Jonna èk i té pwan pasyans épi’y. Mé Jonna menm pa té ni pyès konpasyon pou jan Ninivè. Pito sa, i alé dèwò vil-la anba an kalité pyé kalbas ki ka kouwi. I asid la épi bouch li byen lonng ka pwan lonbwaj. Apwé sa pyé-a mò èk sa fè Jonna byen faché. Kon sa Jéhova di Jonna: ‘Ou mélé pli épi pyé-a pasé ou mélé épi jan Ninivè. Mwen té ni konpasyon pou yo, èk sé pou wézon sala yo pa mò.’ Ki sa Jéhova té vlé Jonna konpwann? Jéhova té vlé’y konpwann, jan Ninivè té twòp pli enpòtan pasé népòt pyé bwa.