Mwen pa té ka janmen alé pyès koté san fizi mwen

LAVI MWEN AN TAN PASÉ:

Mwen té fèt èk lévé adan an konmin ki pwé vil Ronm. Sé moun-lan an konmin sala té pòv èk yo té ka twavay wèd. Lavi pa té ézé pyès. Mwen pa té konnèt manman mwen, èk m’a té ni an bon wilasyon épi papa mwen. Mwen té ni pou apwann mannyè pou gadé pou kò mwen.

Lè mwen té dis (10) lanné, mwen té ja koumansé vòlè. Èk mwen mawon kay papa mwen pou pwèmyé fwa-a lè mwen té douzan (12). Plizyè fwa, papa mwen té ni pou vini pwan mwen an kòdgad pou mennen mwen viwé lakay nou. Mwen té ka vini faché vit, èk akòz di sa mwen té ka toujou babyé épi moun. An plis di sa, mwen té vyolan. Lè mwen té katòz (14) lanné mwen koumansé pwan dwòg. Osi, mwen désidé pou kité kay papa mwen pou bon. Mé mwen pa té ni pyès koté pou dòmi. Alò, mwen té ka ouvè motoka on moun èk dòmi adan’y jistan laba kasé. Apwé sa, mwen té ka gadé pou an sitenn pou mwen sa lavé kò mwen.

Mwen té an chèf vòlè. Mwen té ka vòlè tout bagay—ti bag moun kon yo ka maché an lawi, èk lé swè mwen té ka kasé kay moun. Mwen té ni an vyé non, tout moun té konnèt mwen kon on vòlè. Apwé an tan, mwen vini an manm adan on mové gang, èk nou té ka kasé bank. Paski mwen té tèlman vyolan èk mové, sé moun-lan an gang-lan té ni an chay wèspé pou mwen. Mwen pa té ka janmen alé pyès koté san fizi mwen. Anfen, mwen té ka dòmi épi fizi mwen anba zòwyé mwen. Mwen té ka viv an lavi ki té vyolan. Sèl sa mwen té ka fè sé pou pwan dwòg, vòlè, sèvi mo sal èk kouwi vyé lavi. Polis té ka toujou gadé pou mwen. Anfen, yo té awété mwen plizyè fwa, èk mwen té ka annèk antwé sòti lajòl.

MANNYÈ BIB-LA CHANJÉ LAVI MWEN:

Yon fwa, apwé mwen sòti lajòl, mwen alé wè tantant mwen. M’a té menm sav tantant mwen èk dé kouzen mwen té vini Témwen Jéhova. Alò, lè yo té ka alé mitin, yo mandé mwen pou alé épi yo. Paski mwen té vlé konnèt kisa yo té ka fè la, mwen désidé pou alé épi yo. Lè nou wivé an Sal Wéyòm-lan, mwen té vlé asiz bò lapòt-la paski mwen té vlé véyé ki moun ki té ka antwé èk ki moun ki té ka sòti. Èk mwen té ni fizi mwen épi mwen konm lakoutim.

Mitin sala vwéman chanjé lavi mwen. Mwen ka di sa paski sé Témwen-an twété mwen byen. Yo té janti, yo byenvini mwen èk yo jik soukwé lanmen mwen. Mwen té ka mandé kò mwen ‘ko mwen yé on’? Anfen jis jòdi-a, mwen ka chonjé sé bèl souwi-a asou fidji yo. Sa mwen wè an Sal Wéyòm-lan té si tèlman diféwan épi lavi-a mwen té konnèt.

Touswit apwé, sé Témwen-an koumansé étidyé Bib-la épi mwen. Pli mwen étidyé, sé pli mwen wéyalizé mwen té bizwen fè chanjman an lavi mwen. Yon lévanjil ki édé mwen sé Pwovèb 13:20. La i di: ‘Moun-lan ki ka maché épi moun ki ni lasajès kay ni lasajès. Mé moun-lan ki ka swiv moun ki sòt kay ni an chay pwoblenm.’ I té klè sa mwen té ni pou fè. Mwen té ni pou kité gang-lan. Pou di’w lavéwité-a, sa pa té ézé pyès mé épi èd Jéhova, mwen kité’y.

Osi, mwen chanjé lapawans mwen. Mwen doubout fimen sigawèt èk sèvi dwòg. An plis di sa, mwen koupé chivé mwen, mwen tiwé sé zanno-a mwen té ni an zòwèy mwen, èk mwen doubout sèvi mo sal. Sa sété pwèmyé fwa-a an lavi mwen, mwen té sa kontwolé kò mwen.

M’a té janmen an moun ki té kontan li èk étidyé, konsa, i pa té ézé pou mwen fiksé asou létid Bib mwen. Kanmenm, épi an pil éfò lanmityé mwen pou Jéhova vini pli fò. Èk an menm di tan, konsyans mwen koumansé bat mwen. M’a té kwè Jéhova té kay janmen pawdonnen mwen pou tout sé mové bagay-la mwen té fè-a. A lè sala, sa ki té vwéman soulajé mwen sé lè mwen li mannyè Jéhova pawdonnen Wa David apwé i fè péché ki té gwav.​—2 Sanmyèl 11:​1–12:​13.

On lòt bagay ki pa té ézé pou mwen sété pou pwéché kay an kay. (Mafyou 28:19, 20) Pa dé pè mwen té pè mwen té kay jwenn épi on moun mwen té fè an mové bagay an tan pasé! Mé piti an piti, mwen apwann mannyè pou pwéché san lapèwèz sala. Wi, mwen koumansé enjwi minis-la. Èk i té ban mwen tjè kontan pou édé lézòt apwann konsèné bon Papa nou Jéhova, ki toujou pawé pou pawdonnen.

MANNYÈ MWEN TWAPÉ BENNÉFIS:

Apwézan mwen ni an bon lavi èk mwen ni èspwa pou denmen. Wi, lavéwité-a ki an Bib-la vwéman sové lavi mwen! Mwen ka di sa paski sé moun-lan mwen té ka asosiyé épi-a avan, an lajòl ében yo mò. Bib-la ja édé mwen pou chanjé pèsonnalité mwen. Anfen, mwen apwann mannyè pou kontwolé kòlè mwen èk mwen apwann mannyè pou abésé kò mwen. Wi, mwen ka swiv pwensip Bib. A kòz di sa, wilasyon mwen épi fanmi mwen èk jan mwen vini pli mèyè. Osi, mwen mayé Carmen èk nou ni an bon wilasyon. Nou ka adowé Jéhova ansanm èk i ka ban nou lajwa pou édé lézòt apwann konsèné’y.

Apwézan, mwen sé an nonm ki onnèt. Délè, mwen ka twavay an bank mé sé pa pou vòlè, mwen ka alé la pou nétwayé.