LISON 8

Ilistwasyon Ki Ka Édé Moun Konpwann Pwen-an

Mafyou 13:34, 35

WÉZIMÉ: Pou édé’w enstwi pli byen, sèvi ilistwasyon ki senp, ki sa touché tjè sé moun-lan ki ka kouté’w, èk ki sa édé’w pou enstwi sé pwen-an ki enpòtan.

MANNYÈ POU FÈ’Y:

Chwazi ilistwasyon ki senp. Menm kon Jézi, ou sa sèvi ti bagay pou èspliké gwo bagay. Osi, ou sa sèvi bagay ki senp pou èspliké bagay ki difisil. Pa konpliké ilistwasyon’w épi bagay ki pa nésésè. Fè asiwé ki, sé détay-la ou ka sèvi an ilistwasyon’w vwéman ni an konnèksyon épi lison-an ou ka enstwi. Ou pa vlé konfizé moun épi twòp enfòmasyon.

Ni bon òbzòvasyon. Òbzòvé moun èk bagay ki oliwon’w. Étidyé sé piblikasyon nou-an. Kouté moun ki ka enstwi byen. Noté èk sové sé ilistwasyon-an ki an sé piblikasyon nou-an èk sa moun ki ka enstwi byen ka sèvi, pou’w sa sèvi yo pli ta. Sa kay édé’w enstwi pli byen.
Tjenn sé moun-lan ki ka kouté’w an lidé’w. Chwazi ilistwasyon ki ni pou fè épi bagay moun konnèt, bagay moun ka fè, èk bagay moun entéwésé adan. Pwan pwokosyon pou pa sèvi ilistwasyon ki pé anbawasé moun èben fè yo santi hont.
Enstwi pwen ki enpòtan. Sèvi ilistwasyon pou enstwi gwo pwen, pa tout ti détay. Fè asiwé ki, sé moun-lan ki ka kouté’w-la kay chonjé pwen ilistwasyon-an, èk pa ilistwasyon-an sèlman.