Jéhova Palé Épi Sanmyèl

Chèf Pwèt Ilay té ni dé «2» gason ki té ka wann sèvis an Tabènak-la. Non yonn sété Hòfni, èk non lòt-la sété Finiyas. Mé, sé dé «2» gason sala té anyenditou, èk yo té mové. Yo té ka kouwi vyé lavi, yo té ka maltwété jan Izwayèl, èk yo pa té ni pyès wèspé Jéhova. Lè’w wè jan Izwayèl té ka mennen zannimo an Tabènak-la kon sakwifis, délè avan sé moun-lan té sa pwézanté sakwifis-la douvan Jéhova, Hòfni épi Finiyas, té ka chwazi sé pli mèyè mòso vyann-lan pou kò yo. Èk Ilay té ka tann konsèné tout sé mové bagay-la sé gason’y-lan té ka fè-a, mé i pa janmen fè anyen pou kowijé yo. Ès ou kwè, Jéhova té kay kité sé bagay sala kontiné kon sa?

Bon, Sanmyèl té otan pli jenn pasé Hòfni èk Finiyas, mé i pa swiv mové ègzanp yo. Konsa Jéhova té byen plè épi Sanmyèl. Yon swè, paditan Sanmyèl té ka dòmi, i tann an vwa kwiyé non’y. Lidé’y di’y sé Ilay ki té ka kwiyé’y. Konsa i lévé, èpi i kouwi alé oti Ilay. I di Ilay: ‘Mi mwen!’ Mé Ilay di’y: ‘Mwen pa té kwiyé’w. Viwé kouché.’ Sanmyèl viwé an kabann li. Mé i tann vwa-a on dézyenm kou. Konsa i viwé oti Ilay, èk i di’y: ‘Mi mwen, ou kwiyé mwen.’ Mé Ilay di’y: ‘M’a kwiyé’w, ich mwen. Viwé kouché.’ Mé Sanmyèl tann vwa-a on twazyenm kou. Konsa i viwé oti Ilay ankò. Èk sé a lè sala Ilay wéyalizé, sé Jéhova ki té ka kwiyé Sanmyèl. Konsa i di Sanmyèl: ‘Viwé kouché. Èk si’w tann vwa-a ankò, wéponn èk di: ‘Palé Jéhova, paskè sèvant ou ka kouté’w.’

Konsa Sanmyèl viwé kouché. Apwé sa i tann, ‘Sanmyèl! Sanmyèl!’ I wéponn: ‘Palé Jéhova, paskè sèvant ou ka kouté’w.’ Lè sala Jéhova di’y: ‘Di Ilay, mwen kay pini ni li ni fanmi’y, paskè i konnèt sé gason’y-lan ka fè sa ki pa bon an Tabènak mwen, mé i pa ka fè anyen pou sa.’ Lè jou ouvè, Sanmyèl ouvè lapòt Tabènak-la kon lakoutim. Mé, i té pè pou di Ilay sa Jéhova té di. Kanmenm, Ilay kwiyé’y èk i mandé’y: ‘Gason mwen, kisa Jéhova di’w? Di mwen tout bagay.’ Konsa Sanmyèl di Ilay tout sa Jéhova té di.

Tout tan-an Sanmyèl té ka gwandi, Jéhova té la épi’y. Èvèk tout jan Izwayèl té konnèt, Jéhova té chwazi Sanmyèl pou wann sèvis kon yon pwofèt èk on jij.