David Épi Sòl

Apwé David tjwé Golayèf, Wa Sòl pwan’y èk i koumansé ka voyé’y an ladjè épi sé sòlda-a. Mé, Jéhova té épi David. Konsa, chak fwa yo té alé goumen épi sé lèlmi-an, sé David ki té ka tjwé pli moun. Lè Sòl wè sa, i mété David wèskonsab pou tout sé sòlda-a. Èvèk jan Izwayèl té kontan sa, paskè yo té enmen David, èk yo té ni an chay wèspé pou li. Lè’w wè David épi sé sòlda-a té ka witounen lakay yo apwé yo fini bat sé Filistin-lan an ladjè, sé madanm-lan an tout vil an Izwayèl té ka tèlman kontan, yo té ka bat tanbouwen, yo té ka dansé, èk yo té ka chanté on ti chanson ki té ka di: ‘Sòl tjwé plizyè mil moun, mé David tjwé plizyè, plizyè, plizyè mil moun!’ Sòl pa té kontan ti chanson sala pyès! Èk, i vini jalou David, paskè i di, sé moun-lan ka ba David pli lonnè pasé sa yo ka ba li Sòl. Dépi tan sala, i koumansé gadé pou lokazyon pou’y tjwé David.

Bon, David té ka jwé hap-la byen, konsa i té ka twavay bay Sòl kon yon mizisyen. Lè’w wè Sòl té an mové zimèy, David té ka jwé mizik ba li asou hap-la, èk sa té ka kalmé Sòl. Mé yon jou, David té ka jwé mizik bay Sòl kon lakoutim. Èk sibitman, Sòl voyé on pitjèt fè i té ni an lanmen’y dèyè David épi tout fòs li. Anfen, i éséyé pou tjwé David épi pitjèt fè-a dé «2» fwa. Mé, Jéhova té ka pwotéjé David, konsa pitjèt fè-a pa pwan’y. Apwé sa, Sòl éséyé pou tjwé David plizyè fwa. Finalman, David mawon èk i alé séwé an dézè-a.

Mé Sòl té détèminé pou tjwé David. Konsa i pwan twa mil «3,000» sòlda, èk i alé gadé pou’y. Yon jou, paditan i té ka gadé pou David, Sòl antwé andidan on kav pou fè bizwen’y. Èk Sòl pa té sav sa, mé David èk sé nonm-lan ki té épi’y-la té pli fon andidan menm kav-la. Lè yo wè Sòl, sé nonm-lan di David: ‘Jòdi-a sé jou-a pou’w tjwé Sòl.’ Lè sala, David lévé, i maché tou dousman, épi i koupé mòso an had Sòl. Sòl pa menm wéyalizé David té koupé had li. Mé, konsyans David koumansé bat li, paskè i té sav i pa té sipozé fè sa. Konsa, i di sé nonm-lan ki té épi’y-la: ‘Sé Jéhova ki annonté Sòl kon wa. Mwen pa sa janmen lévé lanmen mwen asou’y. Non, mwen pa sa janmen fè on mové bagay kon sa, paskè mwen ni wèspé pou Jéhova.’ Èvèk i pa kité sé nonm-lan fè Sòl anyen, nonpli. Apwé sa, Sòl sòti an kav-la, èk i alé fè zafè’y. Lè sala, David sòti an kav-la èk i kwiyé Sòl. I di’y: ‘Senyè mwen, wa-a.’ Lè Sòl tounen dèyè, David ajounou, èk i bésé tèt li jis atè. I di Sòl: ‘Ou wè sa? Sa sé mòso had ou ki an lanmen mwen. Lè mwen koupé’y, mwen té sa tjwé’w. Mé mwen pa fè’y.’ Ès ou kwè sa fè Sòl twété David pli mèyè?

Awa! Sòl pa chanjé. I kontiné ka gadé pou David pou’y tjwé’y. Bon, David té ni on nivé yo té ka kwiyé Abichay. Konsa yon swè, David pwan Abichay èk yo alé koté-a Sòl té ni kanp li. Lè yo wivé, yo jwenn Sòl épi tout sòlda’y an fon sonmèy. Jis sòlda-a ki té gad Sòl, ki té ka dòmi. Non sòlda sala sété Abna. Lè Abichay wè sa, i di David: ‘Jéhova ladjé lèlmi’w an lanmen’w, jòdi-a. Souplé, kité mwen bay Sòl yon sèl kout pitjèt fè. Mwen pa kay ni pou fè’y dé «2» fwa.’ Mé David di Abichay: ‘Mwen ka kité Sòl an lanmen Jéhova. Pa fè’y anyen. Annou pwan kawaf dlo-a èk pitjèt fè-a ki bò tèt li-a, èk annou alé fè chimen nou.’

Konsa, David pwan pitjèt fè-a épi kawaf dlo-a ki té tou pwé tèt Sòl, èk li épi Abichay maché mouté on montany ki té vizavi kanp Sòl. Lè yo wivé an tèt montany-lan, David kwiyé Abna, èk i di’y: ‘Abna, pouki ou pa té pwotéjé wa-a? Kawaf dlo-a èk pitjèt fè-a Sòl té ni-an, koté yo yé?’ Lè Sòl tann vwa David, i di’y: ‘Ou sové lavi mwen jòdi-a, paskè ou té sa tjwé mwen, mé ou pa fè’y. Mwen sav sé ou ki kay vini lòt wa-a an Izwayèl.’ Apwé sa, David alé fè zafè’y, èk Sòl witounen lakay li. Sòl té hayi David, mé sé pa tout moun an fanmi’y ki té hayi David.