Sé Fwè Nou-an, Ès Ou Ka Twavay Pou Vini Yon Ansyen?

1-2. Ki twavay yon ansyen ka fè?

SI’W ka wann sèvis kon yon sèvant ministiriyal, san dout, ou ha twavay wèd pou dévlopé an chay an sé kawaktè-a ou kay bizwen pou vini yon ansyen. Alò, ès ou vlé vini yon ansyen pou’w sa édé kongwigasyon-an pli?​—1 Tim. 3:1.

² Bon. Ki twavay yon ansyen ka fè? Ében yon ansyen ka toujou pwéché épi kongwigasyon-an, i ka twavay wèd pou gadé apwé sé fwè èk sè-a an kongwigasyon-an èk enstwi yo. Anplis di sa, i ka fòtifyé lafwa sé fwè èk sè-a an Jéhova an sa’y ka di èk sa’y ka fè. Konsa nou ka wè pouki Bib-la ka di, sé ansyen-an sé “kado”.—Èfés. 4:8.

3. Kisa an fwè ni pou fè pou’y sa vini yon ansyen? (1 Timòfi 3:1-7; Titòs 1:5-9)

³ Bon. Si yon fwè vlé vini yon ansyen, kisa i ni pou fè? Ében sé pa annèk ladwès yon fwè ki ka kwalifyé’y pou vini yon ansyen. Sé vwé, an latè sala, byen souvan, pou an moun ba’w twavay, sèl sa i ka gadé pou sé ladwès ou. Mé pou vini yon ansyen diféwan. Èk sa sé paski, si’w vlé vini yon ansyen, ou ni pou fè pli pasé pwéché èben enstwi byen. Ou osi ni pou dévlopé sé kawaktè-a 1 Timòfi 3:1-7 èk Titòs 1:5-9 mansyonnen. (Li’y.) Alò an atik sala nou kay diskité adan sé kawaktè-a ki an sé lévanjil sala. Osi, nou kay diskité twa (3) bagay konsèné yon ansyen ki byen enpòtan: (1) mannyè i sa ni an bon wépitasyon, (2) mannyè i sa otjipé fanmi’y byen, èk (3) sa’y ni pou fè pou’y sa twapé an chay djèwté kon’y ka édé sé fwè èk sè-a an kongwigasyon-an.

NI AN BON WÉPITASYON

4. Kisa i vlé di pou ‘pa ni défo’?

⁴ Pou vini yon ansyen, an fwè ‘pa sipozé ni défo’ ében i sipozé “san fòt”. Alò kisa sa vlé di? Ében sa vlé di, sé fwè èk sè-a an kongwigasyon-an kay gadé’w adan an bon mannyè a kòz di bon kondwit ou. Èk pyèsonn pa kay sa lonjé dwèt yo asou’w pou lapéti mové kondwit. An plis di sa, “sé pou [ou] ni bon wépitasyon anpami sé moun-an ki pa [Témwen Jéhova]”. Sé vwé, moun ki pa ka sèvi Jéhova pé kwititjé sa ou ka kwè adan. Mé yo pa sipozé ni pyès wézon pou kwè ou pa onnèt, ében ou pa on bon moun. (Dann. 6:4, 5) Alò, mi on bon kwèsyon pou mandé kò’w: ‘Ès mwen ni an bon wépitasyon, ni épi sé fwè èk sè-a ni épi moun ki pa ka sèvi Jéhova?’

5. Ki mannyè ou sa moutwé ou sé an moun ki “enmen sa ki bon”?

⁵ Si ou sé an moun ki “enmen sa ki bon”, ou kay gadé pou bon kawaktè an lézòt, èk ou kay di yo ki otan ou ka apwésyé sé bon kawaktè yo-a. Osi, ou kay fè bon bay lézòt, èk ou kay jis fè pli pasé ou ni pou fè pou édé yo. (1 Tèsa. 2:8; Titòs 1:8) Bon, pouki i si tèlman enpòtan pou yon ansyen “enmen sa ki bon”? Ében sa sé paski kawaktè sala kay fè’y kontan pou sèvi tan’y pou gadé apwé sé fwè èk sè-a, èk pou pwépawé ansayman’y byen. (1 Pita 5:1-3) Èk magwé i ka fè an chay sakwifis pou édé sé fwè èk sè-a, djèwté-a i ka wisivwè otan pli pasé népòt sakwifis i ka fè.​—Twav. 20:35.

6. Kisa i vlé di pou ‘byen wisivwè moun lakay ou’? (Hibrou 13:2, 16; gadé pòtwé-a osi.)

⁶ Ou ka moutwé ou sé ‘on [moun] ki ka wisivwè moun lakay [ou]’ lè ou fè bon pa sèlman bay bon jan’w, mé osi bay moun ou pa pwé épi. (1 Pita 4:9) Anfen, yon liv yo ékwi konsèné Bib-la ka di: “On [moun] ki ka wisivwè moun lakay li, sé an moun ki toujou ni lapòt-la pou kay li èk tjè’y ouvè jis pou étwanjé.” Alò mandé kò’w, ‘Ès moun konnèt mwen kon yon moun ki ka byen wisivwè étwanjé ki ka vizité kongwigasyon mwen?’ (Li Hibrou 13:2, 16.) Wi, an moun ki ka wisivwè moun lakay li kontan pou sépawé sa i ni épi lézòt. Pou ègzanp, i ka sépawé sa i ni épi moun ki pòv, épi fwè ki ka vizité pou bay diskou, èk épi lézòt ki ka twavay wèd pou ankouwajé sé fwè èk sè-a, tèl kon ansyen-an pou sékyout-la.​—Jen. 18:2-8; Pwov. 3:27; Louk 14:13, 14; Twav. 16:15; Ronm 12:13.

7. Ki mannyè yon ansyen ka moutwé i pa “enmen lajan”?

⁷ Si ou sé an moun ki pa “enmen lajan” sa vlé di ou pa ka mété lajan èben pozèsyon pwèmyé an lavi’w. Ki ou wich ki ou pòv, sa ki pli enpòtan an lavi’w sé wilasyon’w épi Jéhova. (Maf. 6:33) Wi, ou ka moutwé ou pa enmen lajan lè ou sèvi tan’w, kouway ou, èk lòt bagay ou ni pou adowé Jéhova, pou otjipé fanmi’w, èk pou édé sé fwè èk sè-a an kongwigasyon-an. (Maf. 6:24; 1 Jan 2:15-17) Alò mandé kò’w: ‘Ès mwen ka gadé lajan kon yon sèvant, èben kon an mèt? Menm si mwen pa ni djè, ès mwen satisfè épi sa mwen ni? Ében ès mwen ka kouwi dèyè lajan èk ès mwen vlé pli pozèsyon?’—1 Tim. 6:6, 17-19.

8. An ki mannyè ou sa moutwé ou ‘ni kondwit pou kòʼw’?

⁸ Si ou sé an moun ki ‘ni kondwit pou kòʼw’ sa vlé di ou sé an moun ki wézonnab. Pou ègzanp, ou pa ka bwè èben manjé twòp. Had ou èk mannyè ou ka tjenn chivé’w ka moutwé ou ni wèspé pou Jéhova, èk ou ka fè bon chwa lè i vini pou anmizman èk wékwéyasyon. Osi, ou pa ka swiv vyé ègzanp moun ki pa ka sèvi Jéhova. (Louk 21:34; Jémz 4:4) Èk ou ka wèsté kam menm si moun pa ka twété’w byen. An plis di sa, ou ‘pa ka bwè twòp’ wonm. Èk menm si ou pa ka vini sou, moun pa konnèt ou kon an moun ki ka bwè twòp. Alò mandé kò’w: ‘Ès mwen ka viv lavi mwen adan an mannyè ki ka moutwé mwen ni kondwit pou kò mwen?’

9. (a) Kisa i vlé di pou “ni an lidé ki fò”? (b) Kisa èspwèsyon-an “ni wèspé anpami moun” vlé di?

⁹ Si’w “ni an lidé ki fò”, sa vlé di ou ka toujou konsidiwé sa Bib-la ka di konsèné diféwan sitiwasyon. Osi ou ka pwan tan pou mèdité asou pwensip Bib, èk a kòz di sa, sa ka ba’w bon lakonpwann èk ou ka fè bon disizyon. An plis di sa, ou pa ka pwésé pou fè an disizyon si’w pa ni asé enfòmasyon. Pito sa, ou ka fè asiwé ou ni tout enfòmasyon-an ou bizwen avan ou fè an disizyon. (Pwov. 18:13) Èk a kòz di sa, ou ka fè disizyon ki ka plè Jéhova. Bon, si’w sé an moun ki “ni wèspé anpami moun,” sa vlé di ou pa an moun ki tjòk an blòk. Ou sé on moun ki byen ògannizé èk ou toujou a lè. Moun sa dépan asou’w, èk lè sé ansyen-an ba’w yon ansayman, ou ka fè tout sa’w pé pou swiv diwèksyon-an yo ba’w. Alò lè’w dévlopé tout sé kawaktè sala, ou kay ni on bon wépitasyon. Bon, apwézan, annou diskité sé kawaktè-a Bib-la di yon ansyen bizwen, pou’y sa vini an bon tèt fanmi.

OTJIPÉ FANMI’W BYEN

10. Ki mannyè on mawi sa swiv konsèy Bib pou “kondwi fanmi’y byen”?

¹⁰ Si’w mayé èk ou vlé vini yon ansyen, fanmi’w sipozé ni an bon wépitasyon. Alò ou sipozé “yon nonm ki ka kondwi [fanmi’w] byen”. Sa vlé di, ou ni pou otjipé fanmi’w épi lanmityé èk ou ni pou fè bon disizyon ba fanmi’w. Pou ègzanp, ou ni pou fè létid fanmi’w, ou ni pou fè asiwé fanmi’w ka atandé sé mitin-lan, èk ou ni pou twavay épi yo an minis-la èk édé yo enjwi’y. Bon, pouki i enpòtan pou ou fè sé bagay sala? Ében sa sé paski zapòt Pòl di an 1 Timòfi 3:5: “Si yon nonm pa konnèt ki mannyè pou kondwi fanmiʼy menm, ki mannyè i kay sa kondwi légliz Bondyé?”

11-12. Si an fwè vlé vini yon ansyen, pouki i enpòtan pou manmay li ni bon kondwit? (Gadé pòtwé-a osi.)

¹¹ Si’w sé yon papa, èk ou ni jenn manmay ki ka wèsté an kay ou, yo sipozé ka “[obéyiʼw] èk tout wèspé.” Kanmenm ou ni pou moutwé yo lanmityé kon’w ka enstwi yo èk entwennen yo. Sé vwé, ou vlé yo ni djèwté, ou vlé yo wi èk jwé menm kon tout manmay ka fè. Mé kanmenm, paski ou ka entwennen yo byen, yo kay obéyisan, yo kay moutwé moun wèspé, èk yo kay ni bon kondwit. Osi ou ni pou fè tout sa’w pé pou édé manmay ou dévlopé on bon wilasyon épi Jéhova, pou viv an ling épi pwensip Bib, èk pou fè pwogwé pou batizé.

¹² An plis di sa, “sé pou ich [ou] ka kwè an Jézi Kwi èk yo pa ni pou ni vyé wépitasyon ki yo dézobéyisan ében yo ka viv an vyé lavi.” Bon, si on fwè sé an sèvant ministiriyal, ében yon ansyen èk i ni an manmay ki fè an péché ki gwav, èk manmay sala té batizé èben i té ka fè pwogwé pou batenm, sé ansyen-an kay ni pou désidé si fwè sala kwalifyé pou kontiné wann sèvis kon yon sèvant ministiriyal èben kon yon ansyen. Alò, si yo vini konnèt fwè-a pa té entwennen èben kowijé ich li, a lè sala i pa kay kwalifyé pou kontiné wann sèvis kon yon sèvant ministiriyal èben kon yon ansyen.​—Gadé Gad-la li 15 Òktòb, 1996, paj 21, pawagwaf 6-7.

ÉDÉ SÉ FWÈ ÈK SÈ-A AN KONGWIGASYON-AN

13. Ki mannyè ou sa moutwé ou sé an moun ki wézonnab, èk ou pa ni tèt di?

¹³ Sé fwè-a ki ni sé bèl kawaktè-a Bib-la mansyonnen sé an bennédiksyon pou kongwigasyon-an. An fwè ki “janti” ében wézonnab ka tjenn lapé épi lézòt, èk ka édé lézòt tjenn lapé épi yonn a lòt. Osi i ka kouté lézòt èk i ka éséyé konpwann mannyè yo ka santi èk katjilé. Pou ègzanp, imajiné ou sé yon ansyen, èk ou adan an mitin épi sé lézòt ansyen-an. Si yo fè yon disizyon ki pa ka kasé pwensip Bib ében wèg Bondyé, ès ou té kay sipòté disizyon sala menm si ou pa dakò épi’y? Bon èspwèsyon-an “i pa sipozé kwè’y” ében ni tèt di vlé di, ou pa kay pousé moun pou fè bagay mannyè ou vlé’y, paski ou ka apwésyé lopinyon lézòt. (Jen. 13:8, 9; Pwov. 15:22) Osi, ou pa kay “on kankannèz” ében “ka faché vit”. Sa vlé di, ou pa kay déwèspèkté lézòt, èk ou pa kay babyé épi yo. Pito sa ou kay palé dous ba yo, èk ou kay twété yo épi jantiyès. An plis di sa, paski ou sé an fwè ki “ni lapé,” ou kay twavay wèd pou fè lapé épi lézòt, menm si i pa ézé. (Jémz 3:17, 18) Èk lè’w palé bay moun adan an mannyè ki janti, ou kay édé jis moun ki ka kwititjé sa’w ka kwè adan vini kam.​—Jij 8:1-3; Pwov. 20:3; 25:15; Maf. 5:23, 24.

14. (a) Kisa èspwèsyon-an i pa sipozé “yon nonm ki vini kwè an Jézi tou fwé” vlé di? (b) Kisa èspwèsyon-an “sé pou’y viv on lavi . . . pou Bondyé yonn” vlé di?

¹⁴ Yon fwè ki kwalifyé pou vini yon ansyen pa sipozé “yon nonm ki vini kwè an Jézi tou fwé”. Sé vwé ou pa ni pou batizé pou an chay lanné avan ou vini yon ansyen, kanmenm ou bizwen tan pou fòtifyé wilasyon’w épi Jéhova èk pou apwann mannyè pou sèvi Bib-la byen pou ou sa fè bon disizyon. Alò pito ou vini faché paski ou p’òkò yon ansyen, ou kay abésé kò’w menm kon Jézi, èk ou kay ni on bon atitid kon’w ka èspéyé asou Jéhova pou ba’w pli ansayman. (Maf. 20:23; Filip. 2:5-8) Osi, ou ni pou “viv on lavi . . . pou Bondyé yonn”. Sa vlé di ou ka wèsté fidèl pou Jéhova lè’w ka viv lavi’w an mannyè-a Jéhova vlé. An plis di sa, ou ka toujou swiv diwèksyon ògannizasyon Jéhova.​—1 Tim. 4:15.

15. Si’w vlé vini yon ansyen, ès ou sipozé ka bay diskou ki èstòdinè? Pouki ou ka di sa?

¹⁵ Bib-la ka di yon ansyen sipozé “sa enstwi”. Bon, ès sa vlé di, ou sipozé yon fwè ki ka bay diskou èstòdinè? Mé non. Èk sa sé paski sé pa tout ansyen ki ka bay diskou ki èstòdinè. Kanmenm lè sé ansyen-an ka twavay an minis-la, èk lè yo ka vizité sé fwè èk sè-a, yo sipozé sa sèvi Bib-la byen pou enstwi èk pou ankouwajé. (1 Timòfi 3:2; konpawé 1 Kòrint 12:28, 29 èk Èfésòs 4:11.) Kanmenm magwé ou pa oblijé bay diskou ki èstòdinè, ou ni pou kontiné twavay pou vini an pli mèyè titja. Alò, kisa ou sa fè pou’w sa enstwi pli mèyè?

16. Kisa ou sa fè pou’w sa enstwi pli mèyè? (Gadé pòtwé-a osi.)

¹⁶ Pou’w sa enstwi pli mèyè, ou “sipozé tjenbé konmisyon lavéwité-a konsèné Jézi Kwi byen fò.” Si ou vlé vini an pli mèyè titja, lè ou ka bay sé fwè èk sè-a konsèy èben ou ka enstwi an kongwigasyon-an, ou ni pou fè asiwé tout sa ou ka di an ling épi Pawòl Bondyé. Konsa, pou fè sa, ou ni pou étidyé Bib-la èk sé piblikasyon nou-an byen. (Pwov. 15:28; 16:23; Titòs 1:9) Alò, padan ou ka étidyé, gadé byen pou wè mannyè sé piblikasyon nou-an ka èspliké sé vèwsé-a ki an Bib-la, pou’w sa byen apliké yo. Èk lè ou ka enstwi, ou kay éséyé pou touché tjè moun. Sa vlé di ou kay enstwi adan an mannyè pou édé moun enmen Jéhova pli, èk pou ankouwajé yo pou fè sa yo ka apwann. Osi ou kay sa enstwi pli mèyè si ou mandé ansyen ki ni èspéyans pou èd, èk ou mété an pwatik sé sijèsyon-an yo ba’w. (1 Tim. 5:17) An plis di sa, sé ansyen-an ni pou “ankouwajé” sé fwè èk sè-a. Délè, yo pé ni pou ba yo konsèy, ében yo pé ni pou jis ‘kowijé’ yo. Mé yo kay toujou fè sa adan an mannyè ki janti. Alò si ou moutwé lanmityé èk jantiyès, èk ou bazé enstwiksyon’w asou Pawòl Bondyé, ou kay vini an pli mèyè titja paski ou ka swiv ègzanp Pli Gwo Titja-a, Jézi.​—Maf. 11:28-30; 2 Tim. 2:24.

KONTINÉ TWAVAY POU VINI YON ANSYEN

17. (a) Kisa ki kay édé sèvant ministiriyal pou kontiné twavay pou vini yon ansyen? (b) Kisa sé ansyen-an ni pou tjenn an lidé lè yo ka diskité si yon fwè sa vini yon ansyen? (Gadé bwèt-la: “Moutwé Ou Sé An Moun Ki Wézonnab Lè’w Ka Diskité Si An Fwè Sa Vini Yon Ansyen.”)

¹⁷ Bon. Adan sèvant ministiriyal pé santi yo pa kay sa janmen vini yon ansyen paski la ni si tèlman kawaktè yo ni pou twavay asou. Mé chonjé, Jéhova èk ògannizasyon’y sav ou pa pawfé. (1 Pita 2:21) Èk osi, ou pa ni pou dépan asou kò’w, paski sé lisentèspwi Jéhova ki kay édé’w pou dévlopé sé kawaktè sala. (Filip. 2:13) Alò, ès la ni on sèten kawaktè ou vlé twavay asou? Ében pwédyé bay Jéhova konsèné’y. Osi fè wichach asou kawaktè sala, èk mandé yonn an sé ansyen-an pou sijèsyon asou mannyè ou sa fè pli mèyè.

18. Kisa nou ka ankouwajé tout sèvant ministiriyal pou fè?

¹⁸ Bon. Ki nou sé ansyen opa, nou tout ni pou kontiné dévlopé sé kawaktè-a nou diskité an atik sala. (Filip. 3:16) Alò, ès ou sé yon sèvant ministiriyal? Ében si sé sa, nou ka ankouwajé’w pou kontiné fè pwogwé! Wi, kontiné fè tout sa’w pé pou vini yon ansyen. Osi, mandé Jéhova pou entwennen’w pou ou sa sèvi’y èk édé an kongwigasyon-an pli. (Izay. 64:8) Èk nou ka mandé Jéhova pou benni tout sa ou ka fè pou kwalifyé pou wann sèvis kon yon ansyen.