Moutwé Apwésiasyon Pou Sé Moun-lan Jéhova Épi Jézi Ban Nou Kon “Kado”

1. Mansyonnen adan sé kado-a Jézi ja ban nou?

LA PA ni pyèsonn ki ja fè pli pou édé lézòm pasé Jézi Kwi. Pou ègzanp, lè’y té asou latè-a, byen souvan, Jézi té ka sèvi pouvwa-a i té ni-an pou fè miwak pou édé lézòt. (Louk 9:12-17) Mé pli gwo kado-a Jézi ban nou, sé lè’y bay lavi’y kon yon sakwifis pou sové nou. (Jan 15:13) Apwé i wésisité, Jézi kontiné ka édé nou. Menm kon’y té pwonmèt, i mandé Papa’y Jéhova, pou ban nou lisentèspwi-a pou enstwi nou èk pou konfòté nou. (Jan 14:16, 17, ftn.; 16:13) Osi, jòdi jou, Jézi ka sèvi sé mitin-lan pou kontiné ban nou sa nou bizwen pou nou sa enstwi moun konsèné lévanjil-la, èk fè disip.​—Maf. 28:18-20.

2. Silon Èfésòs 4:7, 8, Jézi bay “sé moun li-an kado.” Ki moun ki anpanmi kado-a Jézi ban nou-an?

² Annou konsidiwé on lòt kado Jézi ja ban nou. Zapòt Pòl té di, apwé Jézi alé an syèl, “i bay sé moun li-an kado.” (Li Èfésòs 4:7, 8.) Èvèk i èspliké, wézon-an Jézi bay sé kado sala, sé pou sipòté èk édé sé fwè èk sè-a an kongwigasyon-an. (Èfés. 1:22, 23; 4:11-13) Jòdi jou, anpanmi sé nonm-lan Jézi ban nou kon “kado” sé, sé sèvant ministiriyal-la, sé ansyen-an, èk sé ansyen-an pou sékyout-la.a Èk wi, sé fwè sala pa pawfé. Nou sav yo ka fè lèwè. (Jémz 3:2) Mé, Senyè nou Jézi Kwi, ka sèvi yo pou édé nou. Konsa yo sé on kado i ban nou.

3. Sèvi yon ilistwasyon pou moutwé mannyè nou tout sa sipòté twavay-la sé sèvant ministiriyal-la, sé ansyen-an, èk sé ansyen-an pou sékyout-la ka fè-a.

³ Jézi bay sé fwè fidèl sala twavay enpòtan-an pou fòtifyé sé fwè èk sè-a an kongwigasyon-an. Èk sa sé on gwo wèskonsabilité. (Èfés. 4:12) Mé, nou tout sa sipòté yo an twavay sala. Annou konsidiwé yon ilistwasyon ki ka moutwé sa. Lè nou ka bati on Lasal di Wéyòm, la ni fwè èk sè ki ka fè twavay konstwiksyon-an. Mé la ni lòt fwè èk sè ki ka sipòté sé twavayè-a. Pou ègzanp, yo pé mennen manjé, èk yo pé sèvi machin yo ében fè lòt bagay pou sipòté pwojé-a. An menm mannyè-a, pa pawòl nou èk aksyon nou, nou tout sa édé sé sèvant ministiriyal-la, sé ansyen-an, èk sé ansyen-an pou sékyout-la, pou fòtifyé sé fwè èk sè-a. Vwéman, Jézi ban nou on bèl “kado” an sé fwè fidèl sala. Konsa, annou konsidiwé sé bennéfis-la nou ka twapé an twavay wèd-la yo ka fè-a, èk mannyè nou sa moutwé yo épi Jézi, nou ka apwésyé yo.

SÉ SÈVANT MINISTIRIYAL-LA KA FÈ TWAVAY KI ENPÒTAN

4. An pwèmyé syèk-la, ki twavay sé sèvant ministiriyal-la té ka fè pou édé sé fwè èk sè-a an kongwigasyon-an?

⁴ An pwèmyé syèk-la, la té ni fwè ki té ka wann sèvis kon sèvant ministiriyal. (1 Tim. 3:8) An 1 Kòr. 12:28, lè zapòt Pòl té mansyonnen fwè ki té la “pou édé lézòt,” i sanm i té ka palé konsèné sé fwè-a ki té ka wann sèvis kon sèvant ministiriyal an kongwigasyon-an. Èk sé fwè sala té ka fè on bon twavay. Pou ègzanp, pitèt sé yo ki té ka ékwi sé lévanjil-la. Ében pitèt sé yo ki té ka achté sé bagay-la kongwigasyon-an té bizwen pou ékwi lévanjil-la. San dout, sé fwè sala té ka fè twavay ki té enpòtan an kongwigasyon-an, èvèk sa té ka fè’y posib pou sé ansyen-an fiksé pli asou wèskonsabilité-a yo ni, pou enstwi èk otjipé sé fwè èk sè-a.

5. Mansyonnen adan sé twavay enpòtan-an sé sèvant ministiriyal-la ka fè an kongwigasyon-an?

⁵ Jòdi jou, sé sèvant ministiriyal-la ka osi fè twavay ki byen enpòtan an kongwigasyon. (1 Pita 4:10) Pou ègzanp, sé ansyen-an pé mandé yo pou édé ògannizé tèwitwa-a, ében pou fè lòt bagay ki ni pou fè épi lajan kongwigasyon-an. Yo pé bay on sèvant ministiriyal wèskonsabilité-a pou fè asiwé kongwigasyon ni sé piblikasyon-an sé fwè èk sè-a bizwen. Èvèk yo pé osi mandé yo pou fè lòt bagay tèl kon, tjenn Lasal Wéyòm-lan annòd, èk twavay sé bagay-la nou ka sèvi pou òdiyo èk vidéyo an sé mitin-lan. Tout sé twavay sala ka fè’y posib pou nou enjwi sé mitin-lan. Twavay sé sèvant ministiriyal-la ka osi édé nou pou fè twavay pwèchman-an adan on mannyè ki byen ògannizé. (1 Kòr. 14:40) An plis di sa, adan sé sèvant ministiriyal-la ka bay sèten pa asou mitin-lan diwan simen-lan. Yo ka bay diskou piblik. Èk yon ansyen ki wèskonsab pou on gwoup sèvis, pé mandé on sèvant ministiriyal pou asisté’y. Osi, lè yon ansyen ka alé ankouwajé on sè ében on fwè, délè i ka mandé on sèvant ministiriyal pou alé épi’y.

6. Ba yonndé wézon pouki nou ka apwésyé bon twavay-la sé sèvant ministiriyal nou-an ka fè-a?

⁶ Ki mannyè sé fwè èk sè-a ka gadé twavay-la sé sèvant ministiriyal-la ka fè an kongwigasyon-an? Yon sè yo ka kwiyé Beberly,b hòd péyi Bolivia di: “Gwanmèsi sé sèvant ministiriyal-la, mwen ka enjwi sé mitin-lan an chay. Twavay-la yo ka fè-a ka fè’y posib pou mwen chanté, bay wépons mwen, kouté sé diskou-a, èk apwann bèl ti lison hòd sé vidéyo-a épi sé pòtwé-a ki an sé piblikasyon nou-an.” I di ankò, sé sèvant ministiriyal-la “ka fè asiwé moun ki atandé sé mitin-lan wèsté sòv an Sal Wéyòm-lan. Osi, yo ka édé moun ki pa sa atandé sé mitin-lan an Sal Wéyòm-lan, pou atandé’y asou intannèt-la. Apwé sé mitin-lan, yo ka pwan douvan pou nétwayé Sal-la, yo ka édé épi bagay ki ni pou fè épi lajan kongwigasyon-an, èvèk yo ka fè asiwé nou ni sé piblikasyon-an nou bizwen. Mwen ka apwésyé yo an chay.” Leslie sé on sè hòd péyi Columbia. Mawi’y sé yon ansyen, èk mi sé sa i di konsèné sé sèvant ministiriyal-la: “Mawi mwen ka dépan asou sé sèvant ministiriyal-la pou édé’y fè diféwan ansayman an kongwigasyon-an. Si yo pa té la, mawi mwen té kay pli anbawasé. Konsa, mwen ka apwésyé sé sèvant ministiriyal-la an chay. Yo byen zélé, èk yo toujou pawé pou édé lézòt.” Bon, ou menm, ki mannyè ou ka gadé twavay-la sé sèvant ministiriyal-la ka fè an kongwigasyon’w? San dout, ou ka apwésyé yo an chay.​—1 Tim. 3:13.

7. Ki mannyè nou sa moutwé nou ka apwésyé sé sèvant ministiriyal-la? (Gadé pòtwé-a osi.)

⁷ Bib-la ka ankouwajé nou pou “toujou wimèsyé Bondyé.” (Kòl. 3:15) Konsa san dout, nou ka wimèsyé Jéhova pou sé sèvant ministiriyal-la. Mé, apa di wimèsyé Jéhova, i osi bon pou nou moutwé sé sèvant ministiriyal-la mannyè nou ka apwésyé yo. Pou ègzanp, mi sé kon sa yon ansyen hòd péyi Finland ka moutwé sé sèvant ministiriyal-la i ka apwésyé yo. Non fwè-a sé Krzysztof, èk i di: “Mwen ka ékwi on kat ében on ti tèks bay sé sèvant ministiriyal-la, èk mwen ka mété on ti lévanjil adan’y. Mwen ka di yo ègzaktiman kisa yo di ében fè, ki ankouwajé mwen. Ében mwen ka di yo pouki mwen ka apwésyé bon twavay-la yo ka fè-a an kongwigasyon-an.” Mi on lòt ègzanp. Pascal épi Jael sé on fwè èk sè ki ka wèsté an péyi New Caledonia. Fwè èk sè sala ka toujou pwédyé bay sé sèvant ministiriyal-la. Pascal di: “Nou ka toujou wimèsyé Jéhova pou sé sèvant ministiriyal-la ki an kongwigasyon nou, èk nou ka mandé’y pou kontiné édé yo èk sipòté yo.” Ou sa asiwé, Jéhova ka kouté lè nou ka pwédyé pou sé sèvant ministiriyal-la, i ka wéponn sé lapwiyè sala, èk akòz di sa, tout moun an kongwigasyon-an ka twapé bennéfis.​—2 Kòr. 1:11.

SÉ ANSYEN-AN “KA TWAVAY WÈD” ANPANMI NOU

8. Pou ki wézon zapòt Pòl té sa di, sé ansyen-an té ka “twavay wèd” an pwèmyé syèk-la? (1 Tèsalonnika 5:12, 13)

⁸ An pwèmyé syèk-la, sé ansyen-an té ka twavay wèd an sé kongwigasyon-an. (Li 1 Tèsalonnika 5:12, 13; 1 Tim. 5:17) Sé yo ki té ka pwan douvan an sé kongwigasyon-an. Sa vlé di, sé yo ki té ka kondwi sé mitin-lan, èk sé yo ki té ka fè disizyon lè’y vini pou zafè kongwigasyon-an. Osi, sé ansyen-an té ka bay sé fwè èk sè-a bon konsèy pou édé yo fòtifyé lafwa yo. (1 Tèsa. 2:11, 12; 2 Tim. 4:2) Èk san dout, sé ansyen-an té ka twavay wèd osi, pou otjipé fanmi yo èk pou fè asiwé, wilasyon yo menm épi Jéhova té fò.​—1 Tim. 3:2, 4; Titòs 1:6-9.

9. Sé ansyen-an ni an chay wèskonsabilité an kongwigasyon-an. Mansyonnen déotwa?

⁹ Jòdi jou osi, sé ansyen-an ni an chay wèskonsabilité. Pou ègzanp, yo toujou ka pwéché bon nouvèl-la. (2 Tim. 4:5) Yo ka ògannizé tèwitwa kongwigasyon-an. Èk kon yo byen zélé an twavay pwèchman-an, yo ka ban nou bon ègzanp pou nou swiv an minis nou. Osi, yo ka moutwé nou mannyè pou pwéché èk enstwi Bon Nouvèl-la pli byen. Bon délè, sé ansyen-an ni pou wann sèvis kon jij an kongwigasyon-an. Mé lè yo ni pou fè sa, yo ka aji épi mizéwikòd èk yo ka moutwé yo pa ni pwéféwans pou pyèsonn. Èk lè’w wè on fwè ében on sè fè on péché ki gwav, sé ansyen-an ka fè tout sa yo pé, pou édé moun sala wanjé wilasyon’y épi Jéhova. A menm di tan-an, yo ka pwan bon pokosyon pou fè asiwé yo tjenn kongwigasyon-an nèt an zyé Jéhova. (1 Kòr. 5:12, 13; Gal. 6:1) Mé pli gwo wèskonsabilité-a sé ansyen-an ni sé sa, yo sé bèwjé. (1 Pita 5:1-3) Wi, sé ansyen-an ni wèskonsabilité-a pou otjipé twipo Bondyé. Konsa, yo ka pwan tan pou pwépawé bèl diskou ki bazé asou Bib-la pou yo ban nou. Yo ka fè gwo éfò pou konnèt tout moun an kongwigasyon-an. Èk yo ka fè tan pou alé lakay sé fwè èk sè-a pou palé épi yo, èk ankouwajé yo. Bon apa di tout sa, la ni ansyen ki ka patisipé an twavay-la pou bati ében pou wanjé Lasal Wéyòm. La ni ansyen ki ka twavay pou ògannizé sé konvansyon-an. Èvèk la ni ansyen ki asou Konmité-a Pou Konminiké Épi Lopital-la, ében asou Gwoup Ki Ka Vizité Lé Malad, apa di sé lòt wèskonsabilité-a yo ni. Lavéwité-a sé sa, sé pa dé twavay sé ansyen-an ka twavay pou édé nou!

10. Pou ki wézon nou ka apwésyé sé ansyen-an?

¹⁰ Jéhova té ja di i té kay ban nou bèwjé ki té kay otjipé nou byen, èvèk nou pa té kay ‘pè ében ni pyès fwiyè ankò.’ (Jér. 23:4) On sè an péyi Finland té èspéyansé sa, lè manman’y té byen malad. Non sè-a sé Johanna, èk i di: “Magwé i pa alèz pou mwen palé épi lòt moun konsèné sa mwen ka santi, lè mwen té pawé pou palé konsèné sé bagay-la ki té ka twakasé mwen, yon ansyen moutwé mwen an chay pasyans èk i kouté mwen. M’a té konnèt ansyen sala byen, mé i pwédyé épi mwen, èk i fè mwen chonjé, Jéhova enmen mwen an chay. M’a ka chonjé tout sa i di mwen jou sala, mé n’a chonjé mwen santi mwen té sòv, èk m’a té pè ankò. Mwen asiwé sé Jéhova ki voyé ansyen sala pou édé mwen, a lè-a mwen té bizwen èd.” Konsa, ki mannyè sé ansyen-an an kongwigasyon-an ja édé’w?

11. Kisa nou sa fè pou moutwé sé ansyen-an nou ka vwéman apwésyé yo? (Gadé pòtwé-a osi.)

¹¹ Jéhova vlé nou moutwé sé ansyen-an lanmityé épi apwésiasyon, “pou lapéti twavay-la yo ka fè-a” an kongwigasyon-an. (1 Tèsa. 5:12, 13) Henrietta sé on sè ki ka wèsté an péyi Finland. Èk mi sé sa i di an ling épi sa: “Pou sé ansyen-an, i sé on plézi pou yo édé nou, èk yo ka fè’y épi tout tjè yo. Mé sa pa vlé di, yo ni pli tan épi fòs pasé lézòt, èk i pa vlé di yo menm pa ka èspéyansé pwòblènm an lavi yo. Konsa, délè mwen ka wè on ansyen èk mwen ka di’y: ‘Mwen annèk vlé’w konnèt, ou sé on bon ansyen toubonnman!’” Èvèk Sera, yon sè an péyi Türkiyec di: “Sé ansyen-an bouzwen ankouwajman pou yo sa kontiné fè twavay-la yo ka fè-a. Konsa, nou sa ékwi yo on ti kat, nou sa envité yo lakay nou pou manjé on ti wipa épi nou, ében nou sa twavay épi yo an minis-la.” Ès la ni yon ansyen ou ka apwésyé an chay, paskè i ka twavay wèd pou édé èk sipòté sé fwè èk sè-a? Katjilé asou kisa’w sa fè, pou moutwé ansyen sala mannyè ou ka vwéman apwésyé’y.​—1 Kòr. 16:18.

SÉ ANSYEN-AN POU SÉKYOUT-LA KA FÒTIFYÉ NOU

12. Ki lòt awanjman Jézi té mété an plas an pwèmyé syèk-la, pou fòtifyé sé fwè èk sè-a? (1 Tèsalonnika 2:7, 8)

¹² An pwèmyé syèk-la, la té ni on lòt awanjman an plas, pou fòtifyé sé fwè èk sè-a. Anba diwèksyon Jézi, sé ansyen-an an Jérouzalèm té voyé zapòt Pòl, Bannabas, épi lòt ansyen pou alé vizité sé diféwan kongwigasyon-an. Sé fwè sala té ka fè menm bagay-la sé ansyen-an pou sékyout-la ka fè jòdi jou. (Twav. 11:22) Pou ki wézon Jézi té fè sa? Pou menm wézon-an i té apwenté sé sèvant ministiriyal-la, épi sé ansyen-an. I té ka sèvi yo pou fòtifyé sé fwè èk sè-a an sé diféwan kongwigasyon-an. (Twav. 15:40, 41) Èk sé fwè sala té ka fè an chay sakwifis pou yo té sa fè twavay sala. Délè, yo té ka jis mété lavi yo anwis pou yo té sa enstwi èk ankouwajé sé fwè èk sè-a.​—Li 1 Tèsalonnika 2:7, 8.

13. Sé ansyen-an pou sékyout-la ni an chay wèskonsabilité. Mansyonnen yonndé?

¹³ Sé ansyen-an pou sékyout-la ni pou voyajé an chay. Adan di yo ka voyajé plizyè san lyé, pou vizité sé diféwan kongwigasyon-an. Chak simenn, on ansyen pou sékyout-la ka bay plizyè diskou, i ka alé lakay sé fwè èk sè-a pou ankouwajé yo, i ka ni on mitin épi sé piyonnè-a, èk i ka ni on lòt mitin épi sé ansyen-an. Èvèk lè’y ka vizité on kongwigasyon, sé li ki ka kondwi sé mitin-lan nou ka ni avan nou alé pwéché. Bon apa di sa, sé ansyen-an pou sékyout-la ni pou pwépawé sé diskou-a yo ni pou bay-la, èk yo ka ògannizé sé asanmblé-a épi sé konvansyon-an. Osi, sé ansyen pou sékyout-la ki ka enstwi an lékòl-la pou sé piyonnè-a, èk sé yo ki ka ògannizé mitin spésyal-la pou tout sé piyonnè-a ki an sékyout-la. Èk, lè òfis bwanch-la ni on bagay ki bizwen fèt la menm, délè yo ka mandé ansyen-an pou sékyout-la pou fè’y. San dout ou kay dakò, sé ansyen-an pou sékyout-la ni an chay wèskonsabilité.

14. Pou ki wézon nou ka apwésyé sé ansyen-an pou sékyout-la?

¹⁴ Wi, sé ansyen-an pou sékyout-la ka fè on bon twavay. Mé ki bennéfis sé fwè èk sè-a ka twapé an sa? Konsèné sé ansyen-an pou sékyout-la, mi sé sa yon fwè an péyi Türkiye di: “Chak fwa sé fwè sala vizité kongwigasyon-an, sa ka motivé mwen pou fè pli pou édé sé fwè èk sè mwen-an. Mwen ja palé épi plizyè diféwan ansyen pou sékyout-la, èk yo pa janmen fè mwen santi akwèdi yo pa té ni tan pou palé épi mwen.” Annou pwan ègzanp Joanna osi. Sa sé menm sè-a nou té mansyonnen-an an pawagwaf 10. Yon jou, sè sala té ka twavay épi yon ansyen pou sékyout-la, mé yo pa jwenn pyèsonn lakay yo. “Wonnman,” sè-a di, “mwen kay toujou chonjé jou sala. Mwen té byen twis paskè dé (2) sésé mwen té alé wèsté on lòt plas, èk mwen té ka mantjé yo toubonnman. Mé, ansyen-an pou sékyout-la ankouwajé mwen an chay. I édé mwen pou konpwann, lè nou ka sèvi Jéhova, délè nou pé twouvé kò nou lwen fanmi nou épi jan nou. Mé nou kay toujou ni an chay lokasyon pou wè yonn a lòt, èk pou pasé bèl tan ansanm an pawadi-a.” Menm kon Johanna, an chay di nou ni lanmityé pou sé ansyen-an pou sékyout-la, èk nou ka apwésyé yo pou tout sa yo ka fè pou édé nou.​—Twav. 20:37–21:1.

15. (a) An ling épi 3 Jan 5-8, ki mannyè nou sa moutwé apwésiasyon pou ansyen-an pou sékyout-la? (Gadé pòtwé-a osi.) (b) Pouki i bon pou nou moutwé apwésiasyon pou madanm ansyen-an pou sékyout-la, èk ki mannyè nou sa fè sa? (Osi, gadé enfòmasyon-an anba sijé-a: “Chonjé Madanm Yo.”)

¹⁵ Zapòt Jan té ankouwajé Gaius pou byen wisouvwè sé fwè-a ki té ka vini pou ankouwajé kongwigasyon-an. Èk i di’y pou “voyé yo alé asou lawout yo, adan an mannyè ki kay plè Bondyé.” (Li 3 Jan 5-8.) Jòdi jou, nou sa fè menm bagay-la épi ansyen-an pou sékyout-la. Pou ègzanp, nou sa envité li épi madanm li pou manjé on ti wipa épi nou. Èk, nou sa éséyé pou twavay an minis-la diwan simenn-lan i ka vizité kongwigasyon-an. Osi, nou sa fè menm kon sè Lèslie. Nou té mansyonnen sè sala an pawagwaf 6. Mi sé kon sa i ka moutwé apwésiasyon’y pou ansyen-an pou sékyout-la. I di: “Mwen ka mandé Jéhova pou ba yo sa yo bizwen.” Èk i di ankò, “mwen épi mawi mwen ka ékwi lèt ba yo pou di yo, mannyè yo ka édé nou lè yo vizité kongwigasyon-an.” Mé, i bon pou nou chonjé, sé ansyen-an pou sékyout-la sé moun menm kon nou. Délè yo ka tonbé malad, yo ka ni tèt cho, èk yo pé jis santi dékouwajé. Konsa, ou pa janmen sav. Lè’w di yo on ti mò pawòl pou ankouwajé yo, ében ou ba yo on ti kado, pitèt sé mannyè sala Jéhova ka wéponn lapwiyè yo.​—Pwov. 12:25.

NOU BIZWEN SÉ NONM-LAN JÉHOVA ÉPI JÉZI BAN NOU KON “KADO”

16. An ling épi Pwovèb 3:27, ki kwèstyon sé fwè nou-an sa mandé kò yo?

¹⁶ Oliwon latè-a, nou bizwen pli fwè pou wann sèvis kon “kado” pou pèp Bondyé. Konsa, si’w sé on fwè, ès ou sa fè pli an kongwigasyon-an? (Li Pwovèb 3:27.) Ès ou pawé pou twavay pou’w sa kwalifyé kon yon sèvant ministiriyal? Èk si’w ja ka wann sèvis kon yon sèvant ministiriyal, ès ou pawé pou twavay pli pou’w sa vini yon ansyen?d Ès ou sa fè chanjman an lavi’w pou’w sa atandé Lékòl-la Pou Pwoklanmatè Wéyòm-lan? Entwennman-an ou kay wisouvwè an lékòl sala kay édé’w an chay, èk Jézi kay sa sèvi’w pou fè pli an ògannizasyon-an. Si’w ka kwè ou pa sa fè sé bagay sala, palé épi Jéhova konsèné sa an lapwiyè. Èk mandé’y pou ba’w lisentèspwi’y pou’w sa fè népòt ansayman yo ba’w pou fè.​—Louk 11:13; Twav. 20:28.

17. Wa nou Jézi Kwi, ban nou nonm kon “kado.” Kisa sa ka moutwé?

¹⁷ Wi, Jézi ban nou fwè kon “kado.” Èk sa sé pwèv ki, sé li ki ka djidé nou diwan sé dènyé jou sala. (Maf. 28:20) Jézi plen lanmityé, i donnan, i konnèt sa nou bizwen èk i ka ban nou fwè pou édé nou. Ès ou pa kontan pou ni on moun kon sa pou Wa’w? Ében, gadé pou lokasyon pou’w sa moutwé sé fwè sala mizi apwésyé ou ka apwésyé yo. Èk pa janmen doubout wimèsyé Jéhova, paskè sé Li ki ka ban nou “tout bon kado, èk tout bon bagay ki pa ni défo.”​—Jémz 1:17.