Nou pa ni chèf légliz an ògannizasyon nou pou nou péyé. Pito sa, kon yo té ka fè lè kongwigasyon Kwityen-an koumansé an pwèmyé syèk-la, nou ka apwenté ansyen ki byen kwòlifyé “pou gadé apwé kongwigasyon Bondyé.” (Twavay 20:28) Sé ansyen sala ni an wilasyon ki fò épi Bondyé èk yo ka pwan douvan an kongwigasyon-an. Yo ka gadé apwé kongwigasyon-an “pa konmsi yo oblijé, mé épi djèwté an tjè yo; pa pou lajan, mé paski yo vlé fè’y.” (1 Pita 5:​1-3) Ki kalité twavay yo ka fè ban nou?

Yo ka otjipé nou èk yo ka gadé apwé nou. Sé ansyen-an ka sèvi Pawòl Bondyé pou djidé kongwigasyon-an èk pou pwotéjé’y. Paski yo sav Bondyé ja konfyé yo épi twavay enpòtan sala, yo pa ka donminé pèp Bondyé. Pito sa, asistans-lan yo ka bay-la bon pou nou èk sa ka ban nou lajwa. (2 Kòrint 1:24) Menm kon an bèwjé ka twavay byen wèd pou otjipé chak mouton’y, sé ansyen-an ka éséyé vini konnèt chak manm kongwigasyon-an.—Provèb 27:23.

Yo ka enstwi nou mannyè pou fè divwa Bondyé. Chak simenn, sé ansyen-an ka diwèkté sé mitin kongwigasyon-an pou fòtifyé lafwa nou. (Twavay 15:32) Sé nonm fidèl sala ka osi pwan douvan an twavay pwèchman-an, yo ka twavay épi nou èk yo ka moutwé nou tout diféwan mannyè pou pwéché.

Yo ka bay chak moun ankouwajman. Pou édé nou ni an bon wilasyon épi Bondyé, sé ansyen-an ka sèvi Bib-la pou ofè nou sipò èk konsolasyon. Pou fè sa yo ka vizité nou swé lakay nou ében an Kingdonm Hòl-la.—Jémz 5:​14, 15.

Apa di twavay yo an kongwigasyon-an, majòwité ansyen osi ni djòb yo épi wèskonsabilité fanmi yo ki ka pwan an chay tan épi antansyon. Paski sé fwè sala ka twavay otan wèd, yo méwité wèspé nou.—1 Tèsalonnika 5:​12, 13.

• Ki twavay ansyen ni an kongwigasyon-an?

• An ki diféwan mannyè sé ansyen-an ka moutwé nou yo konsèné épi nou?

Bib-la ka mansyonnen dé gwoup fwè ki ni wèskonsabilité-a pou gadé apwé kongwigasyon-an—“sivéyan épi sèvant ministiriyal.” (Filipay 1:1) Nòmalman, an chak kongwigasyon la ni plizyè sivéyan èk sèvant ministiriyal. Ki twavay sèvant ministiriyal ka fè pou bennéfis nou?

Yo ka asisté sé ansyen-an. Sé sèvant ministiriyal-la sé nonm ki ka kité pwensip Bib-la djidé yo. Yo ka twavay wèd an kongwigasyon-an èk nou sa dépan asou yo. La ni adan ki jenn toujou èk la ni lòt ki ja gwan. Yo ka fè twavay ki enpòtan, twavay ki ni pou fèt wégiliyèman an ògannizasyon-an èk lòt twavay ki nésésè an kongwigasyon-an. Sa ka fè’y posib pou sé ansyen-an fiksé asou wèskonsabilité-a yo ni pou enstwi kongwigasyon Bondyé èk pou gadé apwé’y.

Yo ka fè twavay ki nésésè an kongwigasyon-an. Adan sèvant ministiriyal ni pwivilaj-la pou byen wisivwè tout moun ki ka atandé sé mitin-lan. Lézòt pé twavay épi son-an, yo pé bay moun liv, èk yo pé gadé apwé lajan kongwigasyon-an. Yo pé osi bay manm kongwigasyon-an konmin pou pwéché. Yo osi ka bay asistans pou nétwayé èk wanjé Kingdonm Hòl-la. Sé ansyen-an pé mandé yo pou asisté moun ki ja gwan. Lè sèvant ministiriyal fe népòt twavay yo ni épi tout tjè yo, sa ka fè tout moun wèspèkté yo.—1 Timòfi 3:13.

Yo sé bon ègzanp pou kongwigasyon-an. Yo ka chwazi sèvant ministiriyal pou bon kawaktè yo. Lè yo pwézanté ansayman an sé mitin-lan, yo ka fòtifyé lafwa nou. Lè yo ka pwan douvan an twavay pwèchman-an, sa ka fè nou vini pli zélé. Paski yo ka kowòpéwé épi sé ansyen-an, sa ka édé nou ni lajwa èk lilyon an kongwigasyon-an. (Èfésòs 4:16) Apwé an tan, yo osi pé kwòlifyé pou vini ansyen.

• Ki kalité nonm sèvant ministiriyal yé?

• Ki mannyè sèvant ministiriyal ka édé bagay maché byen an kongwigasyon-an?

Pòsyon Bibl-la ki té ékwi an Gwik ka mansyonnen Bannabas èk zapòt Pòl byen souvan. Sé nonm sala sété sivéyan ki té ka voyajé pou vizité sé kongwigasyon-an diwan pwèmyé syèk-la. Pou ki sa? Yo té byen konsèné épi fwè yo èk sè yo an sé kongwigasyon-an. Pòl di I té vlé “witounen èk vizité sé fwè-a” pou wè mannyè yo té yé. I té pawé pou voyajé plizyè san lyé (kilomèt) pou alé fòtifyé yo. (Twavay 15:36) Sé menm dézi sala sivéyan sékyout ni an tan jòdi.

Yo ka vini pou ankouwajé nou. Chak sivéyan sékyout ka vizité apipwé 20 kongwisgayon, èk yo ka fè yon simenn épi chak kongwigasyon, dé fwa pa lanné. Nou sa jwenn an chay bennéfis an èspéyans sé fwè sala èk an èspéyans madanm yo—si yo mayé. Yo ka éséyé fè konnésans épi jenn èk gwan, épi yo byen kontan pou alé épi nou an pwédikasyon-an èk asou létid Bib nou. Yo ka vizité manm kongwigasyon-an ansanm épi sé ansyen-an èk yo ka bay bon diskou an sé mitin-lan èvèk sé asanblé-a pou fòtifyé nou.—Twavay 15:35.

Yo entéwésé an tout moun. Sivéyan sékyout byen entéwésé an sé kongwigasyon-an. Yo vlé édé manm kongwigasyon-an ni an bon wilasyon épi Bondyé. Yo ka jwenn épi sé ansyen-an èk sé sèvant ministiriyal-la pou diskité pwogwé ki ja fèt an kongwigasyon-an. Yo osi ka bay yo konsèy ki sa édé yo fè twavay yo an kongwigasyon-an byen. Sivéyan sékyout ka édé sé piyonnè-a ni siksé an pwédikasyon-an. Osi yo kontan pou fè konnésans épi moun ki ka asosiyé tou fwé èk pou tann konsèné pwogwé spiwitwèl yo. Sé fwè sala ka ofè kò yo libman pou ‘twavay épi nou pou édé [nou].’ (2 Kòrint 8:23) Nou sipozé imité lafwa yo èvèk dévosyon yo pou Bondyé.—Hibrou 13:7.

• Pou ki wézon sivéyan sékyout ka vizité sé kongwigasyon-an?

• Ki mannyè vizit yo sa mennen’w bennéfis?

Lè an dézas fèt, Témwen Jehovah ka ògannizé asistans imédyètman pou édé fwè èk sè ki afèkté. Sé éfò sala ka moutwé mannyè nou enmen yonn a lòt. (Jan 13:​34, 35; 1 Jan 3:​17, 18) Ki mannyè nou ka bay sipò?

Nou ka bay lajan. An pwèmyé syèk-la, la té ni an gwo lafen an Joudiya, èk sé Kwityen-an an Antiyòk voyé lajan pou édé fwè èk sè an sé kongwigasyon-an. (Twavay 11:​27-30) An tan jòdi, lè nou tann fwè èk sè nou adan yon péyi ka èspéyansé sitiwasyon kwitik, nou ka fé kontwibisyon an kongwigasyon nou èk yo ka voyé lajan sala bay yo. Kon sa sé moun-an ki afèkté-a sa wisivwè asistans.—2 Kòrint 8:​13-15.

Nou ka pòté yo soukou. Sé ansyen-an ki an plas-la koté an dézas fèt ka éséyé fè kontak épi chak manm kongwigasyon-an pou sav koté yo yé èk pou fè asiwé yo sòv. Yo pé ògannizé an konmité pou bay manjé, dlo nèt, had, plas pou wèsté, èvèk twètman médikal. An chay Témwen ki ni ladwès ki nésésè ka volonté pou péyé pasay yo pou patisipé an twavay-la pou pòté soukou ében pou wanjé kay èk Kingdonm Hòl ki donmajé. Nou ja jwenn an pil èspéyans paski nou ni labitid twavay ansanm. Èspéyans sala épi lilyon-an nou ni-an ka édé nou mété bagay an plas vitman lè la ni dézas. Magwé nou ka lonjé lanmen bay “fwè èk sè nou an lafwa-a,” nou osi ka asisté lézòt moun an diféwan wilizyon.—Galécha 6:10.

Nou ka ofè sipò èk konsolasyon. An tan dézas, sé moun-an ki afèkté-a bizwen konsolasyon. Diwan tan sala, nou ka jwenn fòs an Jehovah, “Bondyé tout konsolasyon.” (2 Kòrint 1:​3, 4) Nou kontan pou patajé pwonmèt Bib-la épi moun ki pa ni èspwa, èk nou ka bay yo asiwans ki touswit Wéyòm Bondyé kay mennen an bout pou tout sé difikilté-a ki ka annékòz penn épi soufwans.—Wévélasyon 21:4.

• Pou ki sa Témwen Jehovah sa pwan aksyon vitman an tan dézas?

• Ki mannyè nou sa sèvi Bib-la pou bay moun ki èspéyansé dézas konsolasyon?

Pa lontan avan Jézi mò, I té ni an konmézasyon épi kat an sé disip li-a—Pita, Jémz, Jan, èvèk Androu. Padan Jézi té ka pwédi sin-lan ki té kay moutwé I pwézan an dènyé tan-an, I mandé an kwèsyon ki enpòtan: “Kilès ki èslav-la ki fidèl èk ki ni lasajès ki mèt li apwenté anho sé donmèstik li-a, pou bay yo manjé yo a lè?” (Mafyou 24:​3, 45; Mak 13:​3, 4) “Mèt-la,” Jézi, té ka pwonmèt sé disip li-a I té kay apwenté moun pou bay tout swivan’y manjé spiwitwèl diwan dènyé tan-an. Ki moun èslav sala té kay yé?

I sé an ti gwoup Kwityen Bondyé chwazi pou alé an syèl. Èslav-la sé Pwensipal Konmité Témwen Jehovah. I ka bay tout adowatè Jehovah manjé spiwitwèl yo a lè. Nou ka dépan asou èslav fidèl sala pou kontiné ban nou “manjé nou a lè.”—Louk 12:42.

I ka mennajé kay Bondyé. (1 Timòfi 3:15) Jézi bay èslav-la gwo wèskonsabilité-a pou mennajé ògannizasyon Jehovah asou latè—pou gadé apwé pozèsyon’y, pou diwèkté twavay pwèchman-an, épi pou enstwi nou an sé kongwigasyon-an. Alò, pou potjiwé nou épi sa nou bizwen lè nou bizwen’y, “èslav-la ki fidèl èk ki ni lasajès” ka sèvi sé piblikasyon-an nou ka sèvi an pwédikasyon-an èk sé pwogwanm-lan ki pwézanté an sé mitin-lan épi sé asanblé-a pou ban nou manjé spiwitwèl.

Èslav-la fidèl pou lavéwité ki an Bib-la èvèk pou ansayman’y pou pwéché bon nouvèl-la. Osi I ni lasajès paski I ka sèvi bon jijman an mannyè I ka gadé apwé pozèsyon Jézi Kwi asou latè. (Twavay 10:42) Jehovah ka benni twavay èslav-la paski an chay moun ka vini Témwen èk nou ni manjé spiwitwèl an abondans.—Izaya 60:22; 65:13.

• Kilès Jézi apwenté pou nouwi sé disip li-a?

• An ki sans èslav-la fidèl èk I ni lasajès?

An pwèmyé syèk-la, an ti gwoup, “sé zapòt-la épi sé ansyen-an an Jérouzalèm,” sété pwensipal konmité-a. Yo té ka fè disizyon ki enpòtan bay tout Kwityen Bondyé chwazi pou alé an syèl. (Twavay 15:2) Lè gwoup sala té fè an disizyon, sé paski yo té diskité sa Lévanjil di èk yo té kité lèspwi Bondyé djidé yo. (Twavay 15:25) Menm bagay-la ka fèt an tan jòdi.

Bondyé ka sèvi gwoup sala pou fè divwa’y. Pwensipal Konmité-a sé an gwoup fwè anpami sé moun-an Bondyé chwazi pou alé an syèl. Yo ni an chay lanmityé pou Pawòl Bondyé èk yo abitwé fè disizyon konsèné mannyè ògannizasyon-an ka fonksyonnen ék konsèné labizwen spiwitwèl nou. Yo ka jwenn ansanm chak simenn pou konsidiwé labizwen tout fwè èk sè owon latè-a. Menm kon yo té ka fè an pwèmyé syèk-la, Pwensipal Konmité-a ka sèvi Bib-la pou bay diwèksyon swé pa lèt ében pa sivéyan ki ka voyajé. Sa ka édé pèp Bondyé ni lilyon an katjil èk an aksyon. (Twavay 16:​4, 5) Pwensipal Konmité-a wèskonsab pou pwépawasyon manjé spiwitwèl, yo ka ankouwajé tout moun pou bay twavay pwèchman-an pli gwan enpòtans, épi yo ka gadé apwé mannyè fwè ka jwenn apwenté pou yo sa wisivwè pli wèskonsabilité an ògannizasyon-an.

Yo toujou pawé pou swiv diwèksyon lèspwi Bondyé. Pwensipal Konmité-a ka dépan asou Jehovah, Sivwen Inivès-la, èvèk asou Jézi, Mèt kongwigasyon-an, pou diwèksyon. (1 Kòrint 11:3; Èfésòs 5:23) Manm gwoup sala pa ka konsidiwé kò yo kon mèt pèp Bondyé. Yo, ansanm épi tout lòt Kwityen Bondyé chwazi pou alé an syèl, “ka kontiné swiv Ti Mouton-an [Jézi] népòt koté I alé.” (Wévélasyon 14:4) Pwensipal Konmité-a ka apwésyé lapwiyè nou pou yo.

• Ki konpanni moun ki té manm pwensipal konmité-a an pwèmyé syèk-la?

• An tan jòdi, ki mannyè Pwensipal Konmité-a ka chaché pou diwèksyon Bondyé?

Bèfèl sé an mo pawòl Hibrou ki vlé di “Kay Bondyé.” (Jennésis 28:​17, 19, nòt ki anba paj-la) I sé an bon non pou sé lokasyon-an Témwen Jehovah ka sèvi owon latè-a koté yo ka diwèkté èk sipòté twavay pwèchman-an. La ni òfis bwanch an plizyè péyi mé Pwensipal Konmité-a ka twavay an pwensipal òfis-la an Nyou Yòk ki an Lanméwik. Sé an plas sala pwensipal konmité-a ka mennajé twavay-la ki ka fèt an sé òfis bwanch-lan. Yo ka kwiyé moun ki ka wann sèvis an sé plas sala fanmi Bèfèl. Menm kon lòt fanmi, yo ka viv èk twavay ansanm, yo ka manjé ansanm, èk yo ka étidyé Bib-la an lilyon.—Sam 133:1.

An plas spésyal koté moun ka volonté pou twavay ansanm kon an fanmi. An chak Bèfèl, la ni nonm épi fanm ki ka fè tout sa yo pé pou fè divwa Bondyé èk yo ka twavay an plen pou lapéti Wéyòm-lan. (Mafyou 6:33) Yo pyès pa ka wisivwè an salè, mé yo tout ka jwenn manjé, an plas pou dòmi épi an tizing lajan pou asisté yo épi dépans yo. Tout moun an Bèfèl ni ansayman yo, ki an òfis, ki an twizin, ki an sal-a-manjé. Adan ka twavay an lizin koté yo ka fè sé piblikasyon-an, koté yo ka nétwayé, koté yo ka fè lésiv, koté yo ka wanjé bagay, ében lòt koté.

An plas koté an chay twavay ka fèt pou sipòté twavay pwèchman-an. Pli gwo òbdjèktif sé moun-an ki ka twavay an Bèfèl sé pou édé tout moun vini konnèt lavéwité ki an Bib-la. Ti liv sala sé yon ègzanp. Pwensipal Konmité-a diwèkté sé moun-an ki ékwi ti liv sala. Yo sèvi konpyouta pou voyé ti liv-la bay gwoup twadiktè owon latè-a. An plizyè Bèfèl yo sèvi machin ki ka twavay byen vit pou enpwimé’y èk apwé sa yo voyé’y bay pli pasé 110,000 kongwigasyon. Twavay-la pou pwéché bon nouvèl-la sé twavay-la ki pli enpòtan an tan jòdi. Èk pou twavay sala fèt, fanmi Bèfèl owon latè-a ka bay sipò-a ki nésésè.—Mak 13:10.

• Ki konpanni moun ki ka wann sèvis an Bèfèl, èvèk ki awanjman yo fè pou yo?

• Ki twavay enpòtan moun ki an Bèfèl ka sipòté?

Manm fanmi Bèfèl ka twavay adan an chay diféwan dipatman pou gadé apwé twavay pwèchman-an an yonn ében plizyè péyi. Adan ka twavay an twadiksyon, an dépo pou piblikasyon, koté yo ka enpwimé jounal èk koté yo ka bandé liv. Yo ka osi pwodwi piblikasyon òdiyo ében vidiyo, ében yo ka gadé apwé lòt bagay pou wijon-an.

An Konmité Bwanch ka mennajé aktivité-a. Pwensipal Konmité-a ka apwenté an Konmité Bwanch an chak bwanch. Twa ében pli ansyen ki byen kwòlifyé wèskonsab pou twavay-la ki ka pwan kou an òfis bwanch-lan. Konmité Bwanch-lan ka enfòmé Pwensipal Konmité-a konsèné pwogwé twavay-la an chak péyi anba wèskonsabilité konmité bwanch-lan. Yo osi ka di Pwensipal Konmité-a népòt pwòblenm ki pé lévé. Sé wapò sala ka édé Pwensipal Konmité-a désidé ki sijé pou diskité an sé piblikasyon-an, an sé mitin-lan épi an sé asanblé-a. Pwensipal Konmité-a ka voyé wépwézantatif pou vizité sé bwanch-lan wégiliyèman pou bay sé Konmité Bwanch-lan djid pou yo sa fè twavay yo byen. (Provèb 11:14) Pwensipal Konmité-a ka awanjé an pwogwanm spésyal koté wépwézantatif pwensipal òfis-la ka bay an diskou pou ankouwajé tout fwè èk sè ki ka viv an péyi ki asou kont bwanch-lan.

I ka sipòté sé kongwigasyon-an. An òfis bwanch-lan la ni fwè ki ni wèskonsabilité-a pou bay otowizasyon pou yo fè kongwigasyon nèf. Sé fwè-a ka osi diwèkté twavay sé piyonnè-a, sé misyonnè-a, èvèk sé sivéyan sékyout-la ki ka wann sèvis an pèyi ki asou kont bwanch-lan. Yo ka ògannizé asanblé épi asanblé wijonnal, konstwiksyon Kingdonm Hòl nèf, èk yo ka fè asiwé chak kongwigasyon wisivwè piblikasyon yo bizwen. Tout bagay yo ka fè adan bwanch-lan ka édé twavay pwèchman-an fèt annòd.—1 Kòrint 14:​33, 40.

• Ki mannyè sé Konmité Bwanch-lan ka asisté Pwensipal Konmité-a?

• Ki twavay yo ka fè adan an òfis bwanch?

Pou nou sa fè tout sa nou pé pou déklawé “bon nouvèl-la” bay “tout nasyon, fanmi, langaj èk pèp,” nou ka pwodwi piblikasyon an pli pasé 750 langaj. (Wévélasyon 14:6) Ki mannyè nou ka akonpli twavay difisil sala? Gwanmèsi moun owon latè-a ki ka ékwi sé piblikasyon nou-an èvèk gwanmèsi an gwoup twadiktè ki dévwé, twavay sala ka fèt. Yo tout sé Témwen Jehovah.

Yo ka pwépawé piblikasyon-an an Anglé avan. Pwensipal Konmité-a ka diwèkté twavay sé moun-an an Dipatman-an ki ka Ékwi. Twavay sala ka fèt an pwensipal òfis-la. Dipatman sala ka kowòdoné twavay moun ki ka ékwi sé piblikasyon-an. Sé moun sala ka twavay an pwensipal òfis-la èk an diféwan òfis bwanch. Paski sé ékwiven-an sé moun ki sòti diféwan péyi, sa ka pèwmité nou pou ékwi konsèné divès sijé an sé piblikasyon nou-an. An wézon di sa, sé piblikasyon nou-an ka anmennen moun owon latè-a ki sòti an tout kilti èk nasyon.

Yo ka voyé piblikasyon-an bay sé twadiktè-a. Apwé yo pwépawé èk apwouvé piblikasyon-an, yo ka sèvi Intannèt-la pou voyé’y bay sé twadiktè-a owon latè-a. Lè yo fini twadwi piblikasyon-an yo ka konpawé’y épi piblikasyon Anglé-a èvèk yo ka kowijé népòt fòt I pé ni. Yo ka fè tout sa ki posib pou chwazi “pawòl lavéwité ki aplon” pou twadiksyon yo sa bay menm sans èk piblikasyon Anglé-a.—Ékléziyastis 12:10.

Konpyouta ka édé yo fè twavay-la pli vit. Konpyouta pa sa wiplasé ékwiven èk twadiktè. Kanmenm, twavay yo ka fèt pli vit lè yo sèvi diksyonnè èk lòt pwogwanm asou konpyouta pou édé yo fè wichach. Témwen Jehovah dévlopé an sistèm ilèktronnik, (MEPS) Multilanguage Electronic Publishing System. Sistèm sala ka fè’y posib pou mété tèks èk pòtwé ansanm an piblikasyon-an an plizyè san langaj. Apwé sa fèt piblikasyon-an pawé pou yo enpwiméʼy.

Pouki nou ka fè tout éfò sala, jis pou langaj byen pé moun ka palé? Paski divwa Jehovah sé pou “tout kalité moun sové èk jwenn nòlaj aplon konsèné lavéwité-a.”—1 Timòfi 2:​3, 4.

• Ki mannyè nou ka ékwi sé piblikasyon nou-an?

• Pou ki sa nou ka pwodwi sé piblikasyon nou-an adan otan diféwan langaj?

Toulé lanné ògannizasyon nou ka pibliyé èk ka bay moun plizyè milyon Bib èvèk lòt piblikasyon san nou fè yo péyé anyen pou yo. Nou ka bati èvèk wanjé Kingdonm Hòl èk òfis bwanch. Nou ka sipòté plizyè mil manm fanmi Bèfèl èk misyonnè, épi nou ka bay asistans an tan dézas. Alò, ou pé mandé, ‘Ki koté lajan-an ka sòti pou fé tout sa?’

Nou pa ka anmasé tayf, fè moun péyé pou sèvis wilizyèz, ében anmasé latjèt. Magwé I ka kouté nou an chay lajan pou sipòté twavay pwèchman nou, nou pa ka mandé moun pou lajan. Anho yon syèk ki pasé, dézyenm édisyon jounal Watchtower di, nou sav nou ni Jehovah kon sipò nou épi nou “pa kay janmen mandé moun ében solisité yo pou ban nou lajan pou twavay-la fèt,” èk nou pʼòkò janmen fè sa!—Mafyou 10:8.

Nou ka sèvi kontwibisyon volontè pou sipòté twavay nou. An chay moun ka apwésyé twavay-la nou ka fè pou enstwi moun sa ki an Bib-la èk yo ka kontwibwé pou sipòté twavay sala. Sé Témwen-an menm byen kontan pou bay tan yo, kouway yo, lajan yo, èvèk népòt lòt bagay yo ni pou fè divwa Bondyé an tout latè-a. (1 Kwonnikèl 29:⁠9) An tout Kingdonm Hòl èk koté nou ka tjenn asanblé nou, la ni bwèt pou moun ki vlé kontwibwé. Ében moun sa sèvi wèbsayt nou, jw.org pou kontwibwé. Jennéwalman, majòwité moun ki ka kontwibwé sé moun ki pa ni an chay lajan, menm kon vèv maléwèz-la Jézi té palé tèlman byen konsèné-a.Vèv-la té mété kat sou an bwèt twézò-a ki té an tanp-lan. (Louk 21:​1-4) Alò, népòt moun sa “mété an bagay asou koté” wégiliyèman pou kontwibwé “silon sa I ja désidé an tjèʼy.”—1 Kòrint 16:2; 2 Kòrint 9:7.

Nou asiwé Jehovah kay kontiné motivé moun ki vlé ‘onnowé’y épi bagay valowab yo’ pou sipòté twavay Wéyòm-lan. Kon sa, divwa Jehovah sa fèt.—Provèb 3:9.

• Ki mannyè ògannizasyon nou diféwan lézòt wilizyon?

• Ki mannyè nou ka sèvi sé kontiwibisyon volontè-a moun ka bay-la?

An Kingdonm Hòl nou, lésisyon-an nou ka fiksé asou sé Wéyòm Bondyé. Sa sé pwensipal sijé-a an Bib-la èk sé asou sa Jézi té fiksé lè’y té ka pwéché.—Louk 8:1.

Yo sé plas koté nou ka adowé Jehovah. Sé an sé plas sala yo ka ògannizé nou pou pwéché bon nouvèl Wéyòm-lan. (Mafyou 24:14) Kingdonm Hòl pa toujou menm gwòsè èk yo pa ka toujou sèvi menm plan-an pou fè yo. Kanmenm yo tout fèt adan an mannyè ki senp èk an chay di yo ni pli pasé yon kongwigasyon ka asanblé la. An sé lanné-a ki fin pasé-a, nou ja bati plizyè mil Kingdonm Hòl nèf (apipwé senk chak jou) paski pli an pli moun ka vini Témwen Jehovah.—Mafyou 19:26.

Yo ka sèvi kontwibisyon moun bay pou bati Kingdonm Hòl. Òfis bwanch-lan ka wisivwè sé kontwibisyon sala èk yo ka bay sé kongwigasyon-an lajan-an yo bizwen pou yo bati an Kingdonm Hòl ében pou yo wanjé Kingdonm Hòl-la yo ja ni.

Tout kalité moun ka volonté pou bati Kingdonm Hòl. Adan an chay péyi, yo ja ògannizé Gwoup Pou Bati Kingdonm Hòl. Sé gwoup sala ni sèvant pou konstwiksyon adan yo èk lòt volontè. Yo ka alé an diféwan kongwigasyon adan an péyi pou édé sé fwè-a bati Kingdonm Hòl yo. Yo ka jis alé an plas ki lwen pou asisté sé kongwigasyon-an fè twavay sala. Adan lòt péyi, yo ja apwenté Témwen Jehovah ki ni ladwès an konstwiksyon pou mennajé twavay-la pou bati èk wanjé Kingdonm Hòl adan an sèten wijon. Magwé an chay volontè ni èspéyans an konstwiksyon, an chak pwojé, majowité sé volontè-a sé fwè èk sè an kongwigasyon-an koté yo ka bati Kingdonm Hòl-la. Sé lèspwi Jehovah épi gwo éfò pèp li ki ka fè tout sa posib.—Sam 127:1; Kòlòsé 3:23.

• Pou ki sa nou ka kwiyé sé plas-la koté nou ka adowé Jehovah Kingdonm Hòl?

• Ki mannyè I posib pou nou bati Kingdonm Hòl owon latè-a?

Tout Kingdonm Hòl Témwen Jehovah ka pòté non sen Bondyé. Kon sa, nou ka konsidiwé’y an pwivilaj pou nou tjenn yo nèt, pwézantab, èk an bon kondisyon. Twavay sala sé an pa ki enpòtan an adowasyon nou. Tout moun sa patisipé.

Ofè pou nétwayé apwé mitin. Apwé chak mitin, fwè épi sè byen kontan pou fè an ti nétwayé pou tjenn Kingdonm Hòl-la pwòp. Yon fwa pa simenn, nou ka byen nétwayé hòl-la. Yon ansyen ében an sèvant ministiriyal ka ògannizé twavay-la. Byen souvan, I ka sèvi an lis ki ka moutwé tout twavay-la ki sipozé fèt. Si’y nésésè, moun ka balyé, yo ka pasé mòp ében yo ka vakyoum, yo ka tiwé lapousyè, yo ka wanjé sé chèz-la, èk yo ka nétwayé sé pwévit-la. Yo ka lavé sé finèt-la èk sé miwè-a, yo ka jété zòdi, èk yo ka nétwayé ni andidan ni an dèwò Kingdonm Hòl-la. Yo ka osi nétwayé lakou-a. Omwens yon fwa pa lanné, yo ka chwazi yon jou pou nétwayé Kingdonm Hòl-la konplètman. Lè nou fè manmay nou patisipé an twavay sala, nou ka moutwé yo mannyè pou wèspèkté plas-la koté nou ka adowé Jehovah.—Ékléziyastis 5:1.

Bay an lanmen pou wanjé népòt sa ki nésésè. Toulé lanné, yo ka byen ègzanminé Kingdonm Hòl-la, ni andidan ni an dèwò. An wézon di sa, twavay ka fèt wégiliyèman pou wanjé hòl-la èvèk pou tjenn li an bon kondisyon. Sa ka anpéché gwo dépans pli ta. (2 Kwonnikèl 24:13; 34:10) An Kingdonm Hòl ki nèt èk ki an bon kondisyon ka glowifyé Jehovah. Lè nou patisipé an twavay sala, nou ka moutwé nou enmen Jehovah èvèk plas-la koté nou ka adowé’y-la. (Sam 122:⁠1) Osi, sa ka bay an bon témwenyaj an konmin-an.—2 Kòrint 6:⁠3.

• Pou ki sa nou pa sipozé néglijé plas-la koté nou ka adowé Bondyé?

• Ki awanjman nou ni pou tjenn Kingdonm Hòl-la nèt?

Ès ou té kay vlé fè wichach pou vini konnèt sa ki an Bib-la pli mèyè? Ès ou té kay avoudwé jwenn pli enfòmasyon konsèné an vèwsé, an moun, an plas, ében an bagay ki mansyonnen an Bib-la? Ében ès ou ja mandé kò’w si Pawòl Bondyé sa édé’w épi an pwòblenm ou ni? Ében vizité laybri-a ki an Kingdonm Hòl-la.

I ni bon zouti pou édé nou fè wichach. Tout piblikasyon Témwen Jehovah wasiné an Bib-la. Pitèt ou pa ni tout sé piblikasyon-an nou ja pibliyé an langaj ou. Mé laybri-a an Kingdonm Hòl-la ni majowité sé piblikasyon nèf-la. Pitèt I osi ni plizyè diféwan Bib, an bon diksyonnè, èk lòt bagay pou fè wichach. Ou sa sèvi laybri-a avan èk apwé mitin. Si la ni an konpyouta, I pitèt ni Watchtower Library asou’y. Sa sé an pwogwanm ilèktronnik ki ni an chay sé piblikasyon nou-an èk I ézé pou sèvi’y pou fè wichach asou an sijé, an pawòl, ében an vèwsé.

I ka édé étidyan ki an mitin Lavi Nou èk Ministè Nou. Ou pitèt sa sèvi laybri-a an Kingdonm Hòl-la pou pwépawé ansayman ou ni. Sivéyan-an pou mitin Lavi Nou èk Ministè Nou wèskonsab pou laybri-a. I ni wèskonsabilité-a pou fè asiwé laybri-a ni sé nouvo piblikasyon-an épi yo byen awanjé. Li ében moun-an ki ka étidyé épi’w sa moutwé’w mannyè pou fè wichach. Kanmenm, pyèsonn pa sipozé kité Kingdonm Hòl-la épi sé liv-la. Èk, asiwé, nou vlé manyen sé liv-la épi pwokosyon èk nou pa sipozé matjé asou yo.

Pou jwenn “nòlaj konsèné Bondyé,” Bib-la di nou sipozé chaché pou li “menm kon wichès ki séwé.” (Provèb 2:​1-5) Laybri-a an Kingdonm Hòl-la sa édé’w koumansé chaché pou nòlaj sala.

• Ki bon zouti pou fè wichach ou sa jwenn an laybri-a an Kingdonm Hòl-la?

• Ki moun ki sa édé’w apwann sèvi laybri sala pli mèyè?

Jézi Kwi di sé disip li-a: “Sé pou limyèʼw kléwé pou tout moun wè sé bon twavay-la ou ka fè-a, épi yo kay glowifyé Papa’w ki an syèl.” (Mafyou 5:16) An wézon di sa, an tan jòdi, nou ka sèvi teknòloji tèl kon Intannèt-la. Wèbsayt ofisyal Témwen Jehovah sé jw.org. Sa sé koté ou sa jwenn enfòmasyon konsèné sa nou kwè èk aktivité nou. Ki sa sayt sala ni asou’y?

Wépons Bib-la pou kwèsyon moun ka mandé souvan. Ou sa twapé wépons pou plizyè kwèsyon enpòtan moun ja mandé. Pa ègzanp, ou sa jwenn sé trak-la Ès Soufwans Kay Janmen Bout? èk Ès Lé Mò Sa Vwéman Viv Ankò? asou wèbsayt nou an pli pasé 600 langaj. Ou sa osi twapé New World Translation an pli pasé 130 langaj; plizyè liv pou édé’w étidyé Bib-la, tèl kon What Does the Bible Really Teach? épi sé nouvo atik-la an sé jounal-la, The Watchtower èk Awake! Ou sa li ében kouté sé piblikasyon sala asou Intannèt-la. Osi ou sa mété yo asou konpyouta’w an MP3, PDF, ében EPUB. Si ou jwenn an moun ki entéwésé an Bib-la, ou sa jis enpwimé déotwa paj an piblikasyon nou an langaj moun-an! Ou sa osi jwenn vidiyo an plizyè langaj sin. I kay fè’w plézi pou kouté pasaj Bib ki vivan, dranma Bib, èk bèl mizik.

Enfòmasyon ki vwé konsèné Témwen Jehovah. Asou sayt sala, la osi ni nouvèl èk ti vidiyo konsèné twavay nou owon latè-a, sitiwasyon ki ka afèkté Témwen Jehovah, èk mannyè nou ka bay sipò an tan dézas. Ou sa twapé annonsman konsèné asanblé wijonnal ki ka apwoché èk adwès épi limowo téléfòn sé òfis bwanch nou-an.

An sé mannyè sala, nou ka fè limyè lavéwité-a kléwé an sé plas-la ki pli lwen an latè-a. Moun toupatou, jis an Anntatika, ka jwenn bennéfis. Nou ka pwédyé pou “pawòl Jehovah kontiné pousé douvan épi vitès” an tout latè-a, pou glowifyé Bondyé.—2 Tèsalonnika 3:1.

• Ki mannyè jw.org ka édé pli moun apwann lavéwité-a ki an Bib-la?

• Ki sa ou té kay avoudwé ègzanminé asou wèbsayt nou?