Ki Moun Sé Nanj-lan Yé? Èk Ki Twavay Yo Ka Fè?

Sé nanj-lan sé manm fanmi Jéhova an syèl. Bib-la ka kwiyé yo ‘gason Bondyé’. (Jòb 38:7) Jéhova vlé nou apwann konsèné fanmi’y ki an syèl. Mé, kisa Bib-la ka di nou konsèné sé nanj-lan? Ki mannyè yo ka enflouwansé lézòm? Èk, ès tout sé nanj-lan sé manm fanmi Bondyé?

1. Ki moun sé nanj-lan yé?

Jéhova té fè sé nanj-lan avan i té fè latè-a. Yo sé lèspwi menm kon Jéhova èk yo ka viv an syèl. Alò, menm kon nou pa sa wè Jéhova, nou pa sa wè sé nanj-lan. (Hibrou 1:14) La ni plizyè milyon nanj èk chak di yo diféwan. (Wévélasyon 5:11) Sam 103:20 di, sé nanj-lan ‘ka obéyi konmandman [Bondyé], èk yo ka fè tout sa Senyè-a di.’ An tan lontan, la té ni lè Jéhova té ka sèvi sé nanj-lan pou délivwé konmisyon’y bay lézòm. Èk délè, i té ka sèvi yo pou sipòté èk sové pèp li. Jòdi jou sé nanj-lan ka édé Kwityen pou jwenn moun ki vlé apwann konsèné Bondyé.

2. Ki moun ki Satan épi sé vyé lèspwi-a?

Adan sé nanj-lan pa té wèsté fidèl pou Jéhova. Pwèmyé nanj-lan ki wébèl kont Jéhova, sé “Satan ében Denmou-an, . . . [sé li] ki té ka kwennen sé moun latè-a.” (Wévélasyon 12:9) Satan té vlé kondwi lézòm, konsa i pousé Adanm épi Èv pou dézobéyi Jéhova. Pli ta, i jis pousé lòt nanj pou wébèl kont Jéhova. Bib-la ka kwiyé sé nanj-lan ki té swiv Satan, vyé lèspwi ében nanj Satan. Jéhova kouwi dèyè yo hòd syèl èk i voyé yo asou latè-a. Mé touswit i kay détwi yo.—Li Wévélasyon 12:9, 12.

3. Ki mannyè Satan épi sé vyé lèspwi-a ka éséyé kwennen nou?

Satan épi sé vyé lèspwi-a ka sèvi tjenbwa pou kwennen an chay moun. Tjenbwa sé yon mové pwatik, paski moun ka éséyé palé épi sé vyé lèspwi-a. Pou ègzanp, la ni moun ki ka alé oti gadè, oti moun ki ka li étwal, épi oti moun ki ka éséyé pou konnèt sa ki kay fèt denmen. Apa di sa, la ni moun ki ka gadé pou wimèd ki ni pou fè épi tjenbwa. Satan ka osi kwennen moun èk fè yo kwè yo sa palé épi moun ki ja mò. Mé Jéhova ka vèti nou. I di nou an Livitikòs 19:31: ‘Pwan pokosyon pou zòt pa alé oti sé gadè-a, épi sé pa pou zòt konsilté moun ki ka éséyé konnèt sa ki kay fèt denmen.’ Jéhova ka ban nou avètisman sala paski i vlé pwotéjé nou hòd Satan épi sé vyé lèspwi-a. Satan épi sé vyé lèspwi-a sé lèlmi Bondyé, épi yo vlé fè nou ditò.

ANNOU APWANN PLI

4. Sé nanj-lan ka édé moun apwann konsèné Jéhova

Sé nanj-lan pa ka alé oti moun pou pwéché ba yo. Pito sa, yo ka djidé sèvant Jéhova pou alé oti moun ki vlé apwann konsèné Jéhova. Annou li Wévélasyon 14:6, 7, èk apwé nou kay kozé asou sé kwèsyon sala:

• Pouki nou bizwen èd sé nanj-lan lè nou ka pwéché?

• Ki mannyè ou ka santi pou konnèt sé nanj-lan sa édé’w pou jwenn moun ki vlé apwann konsèné Jéhova?

5. Widjèkté tjenbwa

Satan épi sé vyé lèspwi-a sé lèlmi Jéhova. Yo sé lèlmi nou osi. Annou li Louk 9:38-42, èk apwé nou kay kozé asou kwèsyon sala:

• Kisa sé vyé lèspwi-a ka fè?

Pa kité sé vyé lèspwi-a enflouwansé lavi nou. Annou li Ditonronnonmi 18:10-12, èk apwé nou kay kozé asou sé kwèsyon sala:

• An ki diféwan mannyè sé vyé lèspwi-a ka éséyé enflouwansé nou èk palé épi nou? Ki diféwan pwatik tjenbwa moun ka fè an konmin ou?

• Ès ou kwè i wézonnab ki, Jéhova di nou pa ni anyen pou fè épi tjenbwa?

Annou gadé VIDIYO-A, èk apwé nou kay kozé asou sé kwèsyon sala:

VIDIYO: “Goumen Kont Denmou-an” (5:02)

• Ès ou kwè ti bwaslé-a Palesa té mété asou lanmen ti manmay li-a sété an bon bagay? Pouki ou di sa?

• Kisa Palesa té ni pou fè, pou pwotéjé kò’y hòd sé vyé lèspwi-a?

Kwityen ki vwé té toujou ni pou goumen kont sé vyé lèspwi-a. Annou li Twavay 19:19 èk 1 Kòrint 10:21, èk apwé nou kay kozé asou kwèsyon sala:

• Pouki i enpòtan pou’w détwi népòt bagay ou ni ki ni pou fè épi tjenbwa?

6. Ou sa ganyen batay-la kont Satan épi sé vyé lèspwi-a

Satan ka kondwi sé vyé lèspwi-a. Mé chèf sé nanj-lan ki fidèl, sé Michèl. Michèl sé an lòt non pou Jézi. Ki mizi pouvwa Michèl ni? Annou li Wévélasyon 12:7-9, èk apwé nou kay kozé asou sé kwèsyon sala:

• Ki moun ki ni pli pouvwa, Michèl épi sé nanj li-a? Ében Satan épi sé vyé lèspwi-a?

• Ès ou kwè disip Jézi bizwen pè Satan épi sé vyé lèspwi-a?

Ou sa ganyen batay-la kont Satan épi sé vyé lèspwi-a. Annou li Jémz 4:7, èk apwé nou kay kozé asou kwèsyon sala:

• Kisa ou sa fè pou pwotéjé kò’w hòd Satan épi sé vyé lèspwi-a?

CHONJÉ SÉ PWEN SALA

Sé nanj-lan ki fidèl ka édé nou. Satan épi sé vyé lèspwi-a sé lèlmi Jéhova, épi yo ka sèvi tjenbwa pou kwennen moun.

Annou Wivizé Sa Nou Ja Apwann

• Ki mannyè nanj Jéhova ka édé moun pou apwann konsèné’y?

• Ki moun ki Satan épi sé vyé lèspwi-a?

• Pouki ou pa vlé ni anyen pou fè épi tjenbwa?

LÒT ENFÒMASYON OU SA GADÉ

Apwann pouki nou konnèt Jézi sé Michèl, chèf sé nanj-lan.

“Ki Moun Ki Michèl Chèf Sé Nanj-lan?” (yon atik asou jw.org)

Apwann pouki nou konnèt Denmou-an wéyal.

“Ès Denmou-an Wéyal?” (yon atik asou jw.org)

Apwann mannyè an madanm ganyen batay-la kont sé vyé lèspwi-a.

“I Koumansé Ni Djèwté An Lavi’y” (Gad-la, li 1 Jwiyèt, 1993)

Apwann mannyè Satan ka sèvi tjenbwa pou kwennen moun.

“Lavéwité-a Konsèné Madjik, Gajé, Èk Tjenbwa” (The Road to Everlasting Life, pa 5)