Apwann Pli Konsèné Jéhova An Sé Bagay-la I Ja Fè-a

1. Kisa ki édé Jòb apwann pli konsèné Jéhova?

SAN DOUT Jòb palé épi an chay diféwan moun diwan laviʼy. Mé anpami tout sé konvézasyon sala, yonn-lan ki té pli enpòtan sé konvézasyon-an i té ni épi Jéhova. Lè Jéhova té ka palé épi Jòb, i di Jòb pou gadé adan sé bèl bagay-la i ja fè-a. Sé bagay sala té kay édé Jòb wè lasajès-la Jéhova ni, èk yo té kay fòtifyé konfyans li ki, Jéhova sa potjiwé tout sa sèvant li bizwen. Pou ègzanp, Jéhova fè Jòb chonjé sé li ki ka potjiwé bay sé zannimo-a, konsa i sa potjiwé bay Jòb osi. (Jòb 38:39-41; 39:1, 5, 13-16) Lè Jòb ègzanminé adan sé bagay-la Jéhova fè-a, sa édéʼy apwann an chay bagay konsèné Jéhova.

2. Pouki adan di nou pé twouvéʼy difisil pou ègzanminé sé bagay-la Jéhova ja fè-a?

² Menm kon Jòb, si nou ègzanminé kwéyasyon, nou kay apwann pli konsèné Jéhova. Mé délè i pé difisil pou fè sa. Pou ègzanp, pou moun ki ka wèsté an gwo vil, sé pa touléjou yo ka wè adan sé bagay-la Jéhova ja fè-a. Èk menm si nou ka wèsté koté nou sa wè sé bagay-la Jéhova fè-a, pitèt nou ka twapé nou pa ni jè tan pou ègzanminé sé bagay sala. Konsa, annou diskité pouki i bon pou nou pwan tan èk fè éfò pou obzòvé kwéyasyon. Nou kay osi konsidiwé mannyè Jéhova épi Jézi ja sèvi kwéyason pou enstwi nou, èk sa nou sa fè pou apwann pli an kwéyasyon.

POUKI I BON POU NOU ÈGZANMINÉ KWÉYASYON?

3. Ki mannyè nou sav Jéhova té vlé Adanm enjwi kwéyasyonʼy?

³ Jéhova té vlé Adanm enjwi kwéyasyonʼy. Nou sav sa paski, lè Jéhova fè Adanm i météʼy andan an bèl jaden pou viv, èk i bay wèskonsabilité-a pou twavay jaden-an, otjipéʼy, èk agwandiʼy. (Jen. 2:8, 9, 15) Imajiné mannyè Adanm té èksité lèʼy wè sé gwenn-lan ka lévé èk sé flè-a ka fléwi! I sété an gwan lonnè pou Adanm otjipé jaden Édenn. Jéhova osi mandé Adanm pou bay sé diféwan-an zannimo-a non. (Jen. 2:19, 20) Jéhova té sa fè sa i menm, mé i bay Adanm wèskonsabilité sala paski i té vlé Adanm enjwi kwéyasyonʼy. Avan Adanm bay sé zannimo-a non yo, i pwan tan pou òbzòvé yo byen pouʼy wè kisa yo ka sanm, kisa yo kontan fè, èk lòt bagay konsa. San dout, sa sété an bagay Adanm té enjwi an chay. Èk sa édé Adanm pou konpwann lasajès-la Jéhova ni épi pou apwésyé mannyè Jéhova fè tout kwéyasyonʼy bèl.

4. (a) Ba yon wézon pouki nou sipozé ègzanminé kwéyasyon. (b) An tout sé bagay-la Jéhova ja fè-a, kisa ou pli kontan?

⁴ Yon wézon nou sipozé ègzanminé kwéyasyon, sé paski Jéhova vlé nou fè sa. An Izaya 40:26 Jéhova ka di nou: “Lévé [zyé zòt] anlè èk gadé syèl-la.” Apwé sa i ka mandé: “Ki moun ki fè tout sa?” Wépons-lan a klè. Sé Jéhova ki fè tout bagay ki an syèl. Èk sé li menm ki fè tout sa ki asou latè épi an lanmè-a. Èvèk nou sa apwann konsèné Jéhova an tout sé bagay sala. (Sam 104:24, 25) An plis di sa, katjilé mannyè-a Jéhova fè nou. I fè nou épi abilité-a pou enjwi sé bèl bagay-la i fè-a. Jéhova osi ban nou abilité-a pou wè, tann, touché, gouté, èk pwan lòdè diféwan bagay. Tout sa ka édé nou enjwi kwéyasyonʼy.

5. Silon Ronm 1:20, pouki i bon pou nou ègzanminé kwéyasyon?

⁵ Bib-la ka ban nou an lòt bon wézon pou ègzanminé kwéyasyon: Lè nou ègzanminé kwéyasyon sa ka édé nou konnèt Jéhova pli mèyè. (Li Ronm 1:20.) Pou ègzanp, lèʼw wè sé bagay-la Jéhova fè-a èk mannyè yo byen fèt, ès sa pa ka diʼw Jéhova ni an chay lasajès? Èk katjilé kantité diféwan bagay nou kontan manjé. Sé Jéhova ki fè yo tout. Ès sa pa ka diʼw Jéhova enmen nou an chay? Lè nou apwann konsèné Jéhova an sé bagay-la i fè-a, sa ka édé nou pou konnèt li pli mèyè épi pou vansé pli pwéʼy. Apwézan, annou konsidiwé déotwa mannyè Jéhova ja sèvi kwéyasyon pou enstwi nou lison ki byen enpòtan.

JÉHOVA KA SÈVI KWÉYASYON POU ENSTWI NOU KONSÈNÉʼY

6. Lè nou wè sé jibyé ka voyajé, kisa sa ka fè nou chonjé?

⁶ Jéhova ni an lè ki fiksé pou chak bagay fèt. La ni an kalité jibyé yo ka kwiyé stork an Annglé. Chak lanné, an bout mwa Févwiyé pou wivé an mitan mwa Mé, Jan Izwayèl té ka wè kalité jibyé sala ka volé alé an diwèksyon nòd péyi-a. Bondyé té di nasyon Izwayèl: “Stork-la konnèt ki lè pou voyajé.” (Jér. 8:7) Menm kon Jéhova ja fiksé lè-a pou sé jibyé sala voyajé, sé kon sa i ja fiksé lè-a pou pasé jijmanʼy asou lé méchan. Konsa jòdi, lè nou wè sé jibyé-a ka voyajé, sa ka fè nou chonjé nou sa ni konfyans ki, Jéhova ni an lè ki fiksé pou détwi latè méchan sala.​—Hab. 2:3.

7. Lè nou wè an jibyé ka volé byen ho san i bat zèl li twòp, kisa sa ka fè nou chonjé? (Izaya 40:31)

⁷ Jéhova ka bay sèvant li fòs. Jéhova té sèvi pwofèt Izaya pou di pèp li an bagay ki byen bèl. I pwonmèt, i té kay ba yo fòs pou yo ‘volé byen ho konmsi yo té ni zèl lèg,ʼ lè yo té fèb ében dékouwajé. (Li Izaya 40:31.) Lè lèg ka volé yo ka sèvi kouwan van-an. Konsa yo sa volé byen ho san yo bat zèl yo twòp. Èk jan Izwayèl té abitwé wè sé lèg-la volé. Mannyè sé lèg-la ka volé ka fè nou chonjé, Jéhova sa bay sèvant li fòs-la yo bizwen lè yo fèb ében dékouwajé, menm kon i ka bay sé lèg-la fòs-la yo bizwen pou volé byen ho. Konsa lè ou wè an gwo jibyé ka volé byen ho san i bat zèl li twòp chonjé, Jéhova sa baʼw fòs-la pou aji épi népòt difikilté ou pé èspéyansé.

8. (a) Lè Jòb ègzanminé sé bagay-la Jéhova fè-a, ki mannyè sa té édéʼy? (b) Lè nou ègzanminé sé bagay-la Jéhova fè-a, ki mannyè sa ka édé nou?

⁸ Jéhova méwité tout konfyans nou. Jéhova té édé Jòb pou ni pli konfyans an li. (Jòb 32:2; 40:6-8) Lèʼy té ka palé épi Jòb, Bondyé palé konsèné an chay an sé bagay-la i fè-a tèl kon, sé étwal-la, sé nwaj-la, èvèk zéklè. Bondyé osi palé konsèné sé zannimo-a. Pou ègzanp towo bèf mawon-an, èk chouval-la. (Jòb 38:32-35; 39:9, 19, 20) Tout sé bagay sala ka bay pwèv ki, Bondyé pa sèlman ni an chay pouvwa mé i osi ni an pil lanmityé épi lasajès. Konmézasyon sala épi Bondyé té édé Jòb pou konfyé Jéhova pli pasé avan. (Jòb 42:1-6) An menm mannyè-a, lè nou ègzanminé sé bagay-la Jéhova fè-a, sa ka fè nou chonjé Jéhova ni otan pli lasajès épi pouvwa pasé nou. Osi, i ka fè nou chonjé Jéhova sa mennen an bout pou tout difikilté nou ka èspéyansé, èk i vwéman vlé fè sa. Lè nou katjilé asou sé pwen sala, sa ka édé nou pou ni pli konfyans an Jéhova.

JÉZI TÉ SÈVI KWÉYASYON POU ENSTWI MOUN KONSÈNÉ PAPAʼY

9-10. Kisa sòlèy-la épi lapli-a ka enstwi nou konsèné Jéhova?

⁹ Jézi té ni bèl pwivilaj-la pou twavay épi Papaʼy èk édéʼy fè tout sé bagay-la ki an syèl-la épi asou latè-a. Anfen silon Pwovèb 8:30, lè Jéhova té ka fè inivès-la, Jézi té ‘bòʼy kon yon moun ki ka twavay byen.ʼ Konsa Jézi konnèt an chay konsèné sé bagay-la Jéhova fè-a. Èvèk pli ta, lèʼy té asou latè-a, Jézi sèvi sèten bagay an kwéyasyon pou enstwi sé disip li-a bèl lison konsèné Papaʼy. Annou konsidiwé déotwa an sé lison sala.

¹⁰ Jéhova ka moutwé tout moun lanmityé. An diskou-a i té bay asou montany-lan, Jézi palé épi sé disip li-a konsèné dé (2) bagay an chay moun pa ka bay jè enpòtans. Sa sé, sòlèy-la épi lapli-a. Nou bizwen toulédé sé bagay sala pou nou viv. Èk Jéhova té sa désidé pou pa bay lé méchan sòlèy épi lapli. Mé pito sa, i ka fè lapli tonbé èk sòlèy lévé pou tout moun, ni sa ki bon, ni sa ki mové. Èvèk Jéhova byen kontan pou moutwé lanmityé pou tout moun an mannyè sala. (Maf. 5:43-45) Jézi té sèvi sa pou enstwi sé disip li-a ki, Jéhova vlé nou moutwé lanmityé pou tout moun. Konsa népòt lè nou wè mannyè sòlèy-la bèl lèʼy ka kouché, ében mannyè an bèl gwen lapli ka fè plas-la fwé, nou sa katjilé asou lanmityé-a Jéhova ka moutwé pou tout moun. Èvèk ègzanp Jéhova sa ankouwajé nou pou moutwé kalité lanmityé sala èk pwéché bay tout moun.

11. Lè nou gadé sé jibyé-a, ki mannyè sa ka ankouwajé nou?

¹¹ Jéhova ka ban nou sa nou bizwen pou viv. An menm diskou-a Jézi té bay asou montany-lan, i té osi di: “Gadé sé jibyé-a ki an lézè-a. Yo pa ka planté ni yo pa ka wékòlté épi mété sé gwenn-an la pou apwé, mé Papaʼw Bondyé ka ba yo manjé.” Pitèt sé moun-lan Jézi té ka palé bay té sa wè sé jibyé-a ka volé an lézè-a lèʼy di yo: “Ou ni twòp pli valè pasé sé jibyé sala.” (Maf. 6:26) Mi an bèl mannyè Jézi sèvi pou ban nou asiwans-lan, Jéhova kay toujou ban nou sa nou bizwen. (Maf. 6:31, 32) Jis jòdi bèl lison sala ka ankouwajé sèvant fidèl Jéhova. Pou ègzanp, an jenn sè ki ka wann sèvis kon an piyonnè an péyi Spain té dékouwajé paski, i pa té sa jwenn an bon plas pouʼy té sa wèsté. Mé lèʼy wè sé jibyé-a ka manjé gwenn èk fwi, sa édéʼy pou vini kam. Sè-a di: “Sé jibyé-a ka fè mwen chonjé Jéhova ka pwan ka yo, èk i kay pwan ka mwen osi.” Touswit apwé sa, sè-a twapé an bon plas pouʼy wèsté.

12. Silon Mafyou 10:29-31, kisa ti jibyé-a yo ka kwiyé sparrow ka enstwi nou konsèné Jéhova?

¹² Chak di nou ni an chay valè an zyé Jéhova. Avan Jézi té voyé sé zapòt li-a pou alé pwéché, i té édé yo pou yo pa pè moun ki ka opozé yo. (Li Mafyou 10:29-31.) Jézi té sèvi ègzanp ti jibyé-a yo ka kwiyé sparrow an Annglé. Ti jibyé sala té toupatou an péyi Izwayèl, èk lè Jézi té asou latè-a yo pa té ni jè valè. Mé Jézi di sé disip li-a: “Pa menm yonn an sé ti jibyé sala ki ka tonbé atè si Papaʼw Bondyé pa vlé sa fèt.” Èk i di yo: “Ou ni pli valè pasé an chay jibyé!” Jézi bay sé disip li-a asiwans-lan ki, chak di yo té ni an chay valè an zyé Jéhova. Konsa yo pa té ni pyès wézon pou pè moun ki ka opozé yo. San dout, lè sé disip-la té ka pwéché an sé diféwan plas-la èk yo wè sé ti jibyé sala, yo té kay chonjé sa Jézi té di yo. Konsa, chak fwa ou menm wè an ti jibyé, chonjé, ou ni an chay valè an zyé Jéhova. Wi, ‘ou ni twòp pli valè pasé an chay jibyé.ʼ Èpi gwanmèsi èd Jéhova ou sa aji épi òpozisyon san pyès pèwèz.​—Sam 118:6.

KI MANNYÈ NOU SA APWANN PLI KONSÈNÉ BONDYÉ AN KWÉYASYON?

13. Kisa nou sa fè pou apwann pli konsèné Jéhova an kwéyasyon?

¹³ La ni an chay lòt bagay nou sa apwann konsèné Jéhova an kwéyasyon. Ki mannyè nou sa fè sa? Ében pwèmyéman, nou ni pou pwan tan pou obzòvé sé bagay-la Jéhova fè-a. Èk apwé, nou ni pou katjilé asou kisa sé bagay sala ka enstwi nou konsèné Jéhova. Mé i pa toujou ézé pou nou fè sa. Pou ègzanp, Geraldine sé an sè ki sòti péyi Cameron, èk i di: “Mwen lévé adan an vil, konsa mwen wéyalizé mwen ni pou fè an pli gwo éfò pou obzòvé kwéyasyon.” Èvèk yon ansyen yo ka kwiyé Alfonso di: “Mwen apwann, mwen ni pou pwan tan pa kò mwen pou obzòvé sé bagay-la Jéhova fè-a, èk pou mèdité asou kisa sé bagay sala ka enstwi mwen konsènéʼy.”

14. Kisa David apwann lèʼy mèdité asou sé bagay-la Jéhova fè-a?

¹⁴ David té ka pwan an chay tan pou katjilé asou sé bagay-la Jéhova fè-a. I di Jéhova: “Lè mwen gadé syèl-la ou ja fè-a, lalin-an èk sé étwal-la ou ja mété an plas yo-a, mwen di, “Ki sa lézòm yé kon sa, pouʼw ni yo an lidéʼw?”” (Sam 8:3, 4) Paditan David té ka gadé syèl-la lé swè, i pa té annèk wè mannyè tout sé étwal-la bèl. Pli pasé sa, i té ka mèdité asou kisa sé étwal-la ka enstwiʼy konsèné Jéhova. Èvèk i apwann Jéhova ni an chay pouvwa épi lasajès. Osi, la té ni lè David té ka katjilé asou mannyè-a i té dévlopé kon an ti bébé an bouden manmanʼy. Lèʼy mèdité asou sé bagay èstòdinè sala, sa édéʼy pou ni pli apwésiyasyon pou lasajès Jéhova.​—Sam 139:14-17.

15. Ba yonndé ègzanp pou moutwé mannyè sé bagay-la Jéhova ja fè-a ja édéʼw pou konnèt kawaktèʼy pli byen. (Sam 148:7-10)

¹⁵ Menm kon David ou pa ni pou alé twò lwen pou wè an bagay an kwéyasyon ou sa mèdité asou. Siʼw gadé oliwonʼy ou kay wè an chay bagay ki ka enstwiʼw konsèné kawaktè Jéhova. Pou ègzanp, lèʼw santi chalè sòlèy-la, katjilé asou pouvwa-a Jéhova ni paski sé li ki fè sòlèy-la. (Jér. 31:35) Lèʼw wè an jibyé ka fè nich li, katjilé asou lasajès-la Jéhova ni. Lèʼw wè an ti chyen ka éséyé tjébé latjéʼy sa ka fèʼw wi, èk i sa fèʼw chonjé Jéhova ni tjè kontan èk i vléʼw ni tjè kontan osi. Èvèk lèʼw wè an manman ka jwé épi ti bébéʼy ou sa di Jéhova mèsi pou lanmityéʼy. Vwéman, nou ni an chay òpòtyounité pou apwann pli konsèné Jéhova, paski tout kwéyasyonʼy ka glowifyéʼy​—ki yo gwo ki yo piti, ki yo lwen ében yo pwé.​—Li Sam 148:7-10.

16. Kisa nou tout sipozé fè wégiliyèman?

¹⁶ Dyé nou Jéhova sé an Dyé ki san pawèy. I plen lasajès épi lanmityé. Osi i ni an pil pouvwa èk tout sa i fè byen bèl. Nou sa apwann pli konsèné sé bèl kawaktè sala èk an chay lézòt, si nou pwan tan pou ègzanminé sé bagay-la Jéhova fè-a ki oliwon nou. Konsa nou tout sipozé fè tan wégiliyèman pou enjwi kwéyasyon, èk pou mèdité asou ki sa sé bagay sala ka enstwi nou konsèné Jéhova. Si nou fè sa, nou kay vansé pli pwé Kwéyatè nou, Jéhova. (Jémz 4:8) An lòt atik-la nou kay konsidiwé mannyè pawan sa sèvi kwéyasyon pou édé ich yo vansé pwé Jéhova.