Sèvi Kwéyasyon Pou Enstwi Ich Ou Konsèné Jéhova

1. Kisa pawan vlé bay ich yo?

PAWAN, nou sav zòt vlé édé ich zòt pou apwann konsèné Jéhova, èk pou enmenʼy. Mé pyèsonn pa sa wè Jéhova, konsa ki mannyè ou sa édé ich ou pou wè Jéhova kon an Moun ki wéyèl? Èk ki mannyè ou sa édé yo vansé pwéʼy?​—Jémz 4:8.

2. Kisa pawan sa fè pou enstwi ich yo konsèné Jéhova?

² An bon mannyè pawan sa édé ich yo vansé pwé Jéhova, sé lè yo étidyé Bib-la épi yo. (2 Tim. 3:14-17) Mé Bib-la ka moutwé, la ni lòt bagay pawan sa fè pou enstwi ich yo konsèné Jéhova. Pou ègzanp an liv Pwovèb, an papa ka ankouwajé gasonʼy pou chonjé bèl kawaktè Jéhova ki ka pawèt an kwéyasyon. (Pwov. 3:19-21) Konsa annou konsidiwé déotwa mannyè pawan sa sèvi kwéyasyon pou édé ich yo apwann konsèné Jéhova.

KI MANNYÈ OU SA SÈVI KWÉYASYON POU ENSTWI ICH OU?

3. Kisa pawan sa fè pou édé ich yo?

³ Bib-la di: “Dépi tan Bondyé fè latè-a, moun sa . . . konnèt . . . konsèné Bondyé asou sé bagay-la Bondyé ja fè-a.” (Ronm 1:20) Pawan, san dout ou kontan pasé tan épi ich ou. Ében ou sa sèvi sé lokazyon sala pou édé ich ou konpwann, nou sa apwann konsèné sé bèl kawaktè-a Jéhova ni-an, lè nou pwan tan pou obzòvé ‘sé bagay-la i fè-a.ʼ Bon, annou wè kisa pawan sa apwann an ègzanp Jézi.

4. Ki mannyè Jézi té sèvi kwéyasyon pou enstwi sé disip li-a? (Louk 12:24, 27-30)

⁴ Annou gadé mannyè Jézi té sèvi kwéyasyon pou enstwi. Asou yon lokazyon, i mandé sé disip li-a pou gadé sé mèl-la épi sé flè-a. (Li Louk 12:24, 27-30.) Jézi té sa sèvi népòt zannimo ében népòt plan kon yon ègzanp, mé pito, i sèvi an jibyé èk an flè sé disip li-a té konnèt byen. San dout sé disip-la té ka toujou wè sé mèl-la ka volé, èk sé flè-a ka fléwi an sé savann-lan. Ès ou sa imajiné mannyè Jézi té ka moutwé sé disip li-a sé bagay sala, konʼy té ka palé épi yo? Èk kisa Jézi fè apwé i moutwé yo sé ègzanp sala? I enstwi yo an lison ki byen enpòtan konsèné mannyè Papa yo an syèl donnan, èk janti. Lison-an sé sa: Jéhova kay fè asiwé sèvant fidèl li ni had pou mété asou yo èk sa yo bizwen pou manjé, menm konʼy ka fè bay sé mèl-la épi sé flè-a.

5. Ki mannyè pawan sa sèvi bagay an kwéyasyon pou enstwi ich yo konsèné Jéhova?

⁵ Pawan, ki mannyè ou sa imité Jézi konʼw ka enstwi ich ou? Ében pitèt ou sa palé épi yo konsèné an bagay an kwéyasyon ou enmen, tèl kon zannimo-a ében plan-an ou pli kontan. Èk lèʼw ka palé épi yo, fè asiwé ou di yo ki lison plan-an ében zannimo-a ka enstwi nou konsèné Jéhova. Pitèt ou sa mandé ich ou ki plan ében ki zannimo i menm pli kontan. Siʼw palé épi ich ou konsèné an bagay i enmen an kwéyasyon, pitèt i kay koutéʼw pli byen lèʼw sèvi bagay sala pou enstwiʼy konsèné Jéhova.

6. Kisa nou sa apwann an ègzanp manman Christopher?

⁶ Ès pawan ni pou pwan an chay tan pou fè wichach konsèné on plan ében on zannimo, avan yo di ich yo kisa sé bagay sala ka enstwi nou konsèné Jéhova? Mé non, yo pa oblijé fè sa. Chonjé, Jézi pa té di an chay bagay konsèné mannyè sé jibyé-a ka manjé, ében mannyè sé flè-a ka pwofité. Èk vwéman, la ni lè ou kay ni pou bay ich ou pli détay asou an sijé. Mé délè ou sa annèk mandé yo an ti kwèstyon, ében di yo an ti bagay senp, pou édé yo jwenn pwen-an. Mi sé sa on fwè yo ka kwiyé Christopher di konsèné mannyè manmanʼy té ka enstwi yo. I di: “Manman nou té ka di nou ti bagay ki té senp pou édé nou apwésyé bagay an kwéyasyon ki té oliwon nou. Pou ègzanp, si nou té pwé an montany i té ka di: ‘Gadé mannyè montany-lan gwo épi bèl. Ès sa pa ka di nou Jéhova èstòdinè?ʼ Ében si nou té bò lanmè-a i té ka di: ‘Gadé mannyè sé lanm-lan ka fwapé fò. Ès sa pa ka di nou Jéhova ni an chay pouvwa?ʼ Sé ti kwèstyon senp sala té ka fè nou katjilé épi yo té ni an gwo éfé asou nou.”

7. Ki mannyè ou sa moutwé ich ou pou katjilé asou sa yo sa apwann konsèné Jéhova an kwéyasyon?

⁷ Kon ich ou ka vini pli gwan, ou sa moutwé yo mannyè pou katjilé asou diféwan bagay an kwéyasyon, èk pou apwann pli konsèné Jéhova an sé bagay sala. Pou ègzanp, ou sa mansyonnen yonn adan sé bagay-la Jéhova fè-a, èk mandé ich ou: “Kisa bagay sala ka enstwi nou konsèné Jéhova?” Pitèt ou kay byen sipwi èk kontan pou tann sa yo kay diʼw.​—Maf. 21:16.

KI LÈ OU SA SÈVI KWÉYASYON POU ENSTWI ICH OU?

8. Lè jan Izwayèl té ka maché épi ich yo, kisa yo té sa sèvi lokazyon-an pou fè?

⁸ Jéhova té koumandé sé pawan-an an Izwayèl pou enstwi ich yo koumandmanʼy lè yo ka maché “asou chimen-an.” (Dito. 11:19) La té ni chimen toupatou an bitasyon Izwayèl. Èk kon moun té ka maché asou sé chimen sala, yo té sa wè an chay diféwan zannimo, jibyé, èk flè. Konsa, lè jan Izwayèl té ka maché épi ich yo, pawan té sa sèvi lokazyon-an pou palé épi ich yo konsèné sé bagay-la Jéhova fè-a. Pawan, pitèt ou menm ni lokazyon kon sa pou sèvi kwéyasyon pou enstwi ich ou konsèné Jéhova. Annou konsidiwé mannyè déotwa pawan ja fè sa.

9. Kisa ou sa apwann an ègzanp Punitha épi Katya?

⁹ Punitha sé an manman ki ka wèsté andan an gwo vil an India. I di: “Lè nou ka alé an bitasyon pou vizité fanmi nou, nou ka sèvi òpòtyounité sala pou enstwi ich nou konsèné sé bèl bagay-la Jéhova fè-a. Mwen ka kwè ich mwen ka konpwann kwéyasyon pli byen lè yo an bitasyon pasé lè yo an vil.” Pawan, san dout ich ou pa kay janmen obliyé tan-an yo pasé épiʼw adan an bèl plas. Katya sé an sè ki sòti péyi Moldova, i di: “Lè mwen katjilé asou pititès mwen, sa mwen té enjwi pli sé tan-an mwen té ka pasé épi pawan mwen an bitasyon. Dépi mwen té tou piti pawan mwen moutwé mwen mannyè pou pwan tan pou obzòvé kwéyasyon, èk pou apwann konsèné Jéhova an sé bagay sala. Pou sa, mwen ka apwésyé pawan mwen an chay.”

10. Siʼy pa posib pou yo alé an bitasyon épi ich yo, kisa pawan sa fè? (Osi, gadé enfòmasyon-an anba sijé-a “Èd Pou Pawan.”)

¹⁰ Bon, siʼy pa posib pouʼw alé an bitasyon épi ich ou, kisaʼw sa fè? Amol sé an lòt pawan ki ka wèsté an India. I di: “Koté mwen ka wèsté, pawan ni pou twavay pou an chay nèditan, èk i byen chè pou alé an bitasyon. Mé menm si sé lèʼw adan an balkon, ében adan an plas ki ni pyé bwa ou sa sèvi lokazyon-an pou obzòvé kwéyasyon èk pou palé konsèné kawaktè Jéhova.” Wi, siʼw byen gadé, ou kay wè an chay bagay an kwéyasyon tou pwé kay ou. (Sam 104:24) Pitèt ou kay wè an chay jibyé, ti bèt, diféwan plan, èk lòt bagay kon sa. Ou sa sèvi tout sé bagay sala pou enstwi ich ou konsèné Jéhova. Karina ki sòti péyi Germany, di: “Manman mwen enmen flè. Konsa lè mwen té an jenn fi èk mwen té ka maché épiʼy, i té ka toujou moutwé mwen bèl flè.” Pawan, an lòt bagay ou sa fè sé pou sèvi sé vidiyo-a èk sé piblikasyon nou-an konsèné kwéyasyon pou enstwi ich ou. Wi, népòt koté ou ka wèsté ou sa édé ich ou pou obzòvé sé bagay-la Bondyé fè-a. Apwézan, annou konsidiwé déotwa bèl kawaktè Jéhova ou sa moutwé ich ou.

‘MOUN SA KONNÈT KONSÈNÉ BONDYÉʼ

11. Kisa pawan sa fè pou édé ich yo konpwann lanmityé Jéhova?

¹¹ Pou édé ich ou konpwann lanmityé Jéhova, ou sa moutwé yo mannyè an chay zannimo ka pwan ka piti yo. (Maf. 23:37) Osi, ou sa moutwé yo tout sé diféwan bèl bagay-la nou ka enjwi an kwéyasyon. An paragraf-la avan nou té mansyonnen Karina. I di: “Lè nou té ka maché, manman mwen té ka ankouwajé mwen pou doubout, èk pwan an ti tan pou obzòvé mannyè chak flè spésyal, èk mannyè bèlté sé flè-a ka moutwé nou, Jéhova ni an chay lanmityé. Jis jòdi mwen ka pwan tan pou gadé diféwan flè. Mwen ka wè mannyè koulè yo diféwan, èk mannyè yo fèt diféwan. Yo ka toujou fè mwen chonjé, Jéhova ni an chay lanmityé pou nou.”

12. Kisa pawan sa fè pou édé ich yo konpwann lasajès Jéhova? (Sam 139:14) (Gadé pòtwé-a osi.)

¹² Édé ich ou konpwann lasajès Jéhova. San dout, Jéhova ni otan pli lasajès pasé lézòm. (Ronm 11:33) Pou ègzanp, ou sa édé ich ou konpwann mannyè dlo ki tounen nwaj ka sòti an yon plas pou alé andan an lòt byen ézé. (Jòb 38:36, 37) Osi, ou sa édé yo konpwann mannyè èstòdinè-a Jéhova fè kò nou. (Li Sam 139:14.) Annou konsidiwé mannyè an papa yo ka kwiyé Vladimir té ka fè sa. I di: “Yon jou ti gason nou-an tonbé asou bisiklèt li èk i blésé kòʼy. Déotwa jou apwé, blésé-a djéwi. Mwen épi madanm mwen sèvi sa pou édé gason nou konpwann, Jéhova fè nou adan an mannyè spésyal. Konsa si nou blésé, kò nou ni abilité-a pou djéwi kòʼy. Nou osi diʼy, lézòm pa sa fè anyen ki ni abilité sala. Pou ègzanp, an motoka ki donmajé andan an aksidan, pa sa wanjé kòʼy. Èspéwéyans sala édé gason nou konpwann lasajès Jéhova.”

13. Kisa pawan sa fè pou édé ich yo konpwann pouvwa Jéhova? (Izaya 40:26)

¹³ Jéhova ka envité nou pou lévé zyé nou anlè, gadé syèl-la, èk katjilé asou mannyè pouvwaʼy ki èstòdinè ka tjenn tout sé étwal-la an plas yo. (Li Izaya 40:26.) Konsa pawan, ou sa fè menm bagay-la. Ou sa ankouwajé ich ou pou gadé syèl-la èk katjilé asou sa yo ka wè. An sè yo ka kwiyé Ting-ting hòd péyi Taiwan ka chonjé an bagay ki té fèt lèʼy té an ti manmay. I di: “Yon fwa, manman mwen mennen mwen an plas ki pa té ni klèté vil. Konsa lé swè nou té sa wè an chay étwal. Diwan tan sala, manmay an klas mwen té ka ban mwen chalè pou fè mwen dézobéyi Jéhova. Èk sa té ka fè mwen kwè, pitèt mwen pa té kay sa wèsté fidèl. Mé manman mwen ankouwajé mwen pou katjilé asou pouvwa-a Jéhova sèvi pou fè tout sé étwal-la. Èvèk i di mwen pou chonjé, Jéhova sa sèvi menm pouvwa sala pou édé mwen doubout fò anba népòt tès. Apwé mwen obzòvé kwéyasyon a lè sala, mwen té vlé konnèt Jéhova pli mèyè èk mwen fòtifyé détèminasyon mwen pou sèviʼy.”

14. Ki mannyè pawan sa sèvi kwéyasyon pou édé ich yo wè Jéhova sé an Dyé ki ni tjè kontan?

¹⁴ Sé bagay-la Jéhova fè-a ka moutwé i sé an Dyé ki ni tjè kontan, èvèk i vlé nou ni tjè kontan osi. Siyantis ja obzòvé, pwèskè tout zannimo ka jwé, jis jibyé épi pwéson. (Jòb 40:20) Ès ou janmen wè ich ou ka wi kon yo ka gadé zannimo ka jwé? Pitèt yo ja wè an ti chat ka jwé épi an bòl, ében ti chyen ka jwé épi yonn a lòt. Konsa lòt kou-a ou wè ich ou ka wi kon yo ka gadé zannimo jwé, sèvi lokazyon-an pou fè yo chonjé, nou ka sèvi an Dyé ki ni tjè kontan.​—1 Tim. 1:11.

ENJWI KWÉYASYON JÉHOVA ÉPI FANMIʼW

15. Kisa pawan sa fè pou édé ich yo palé épi yo konsèné sa ki ofon tjè yo? (Pwovèb 20:5) (Gadé pòtwé-a osi.)

¹⁵ Délè pawan pé twouvéʼy difisil pou ich yo palé épi yo konsèné pwoblenm yo ka èspéyansé. Si sa sé sitiwasyonʼw, kisa ou sa fè pou fèʼy pli ézé pou ich ou palé épiʼw ofon tjè yo? (Li Pwovèb 20:5.) La ni pawan ki twouvé i pli ézé pou ich yo palé épi yo, lè yo ka enjwi nati ansanm. Pouki? Yon wézon sé paski a lè sala, la ni mwens bagay ki sa distwé sé pawan-an épi sé ich-la. Masahiko, an papa ki ka wèsté an Taiwan bay an lòt wézon, lèʼy di: “Lè nou ka pasé tan épi ich nou an nati, tèl kon lè nou ka maché asou an montany ében bò lanmè-a, byen souvan sé manmay-la ka santi pli konfòtab. Konsa nou ka twapé i pli ézé pou palé épi yo, èk konnèt sa ki asou lidé yo.” Osi, pli bonnè-a nou té mansyonnen Katya. Mi sé sa i di: “Apwé lékòl manman mwen té ka mennen mwen andan an bèl plas ki ni an chay pyé bwa. Plas sala té ka fè mwen santi kam, konsa i té ka fèʼy pli ézé pou mwen di manman mwen sa ki té fèt an lékòl, ében sa ki té ka twakasé lidé mwen.”

16. Lè fanmi ka enjwi kwéyasyon Jéhova épi yonn a lòt, ki òpòtyounité sa ka ba yo?

¹⁶ Lè an fanmi ka enjwi kwéyasyon Jéhova épi yonn a lòt, sa sé an bon ti anmizman pou yo, èk i ka édé yo pou dévlopé pli lanmityé pou yonn a lòt. Bib-la di la ni ‘an lè pou wi, èk an lè pou dansé.ʼ (Éklé. 3:1, 4, ftn.) Jéhova fè an chay plas asou latè-a koté nou sa fè sé bagay-la nou enmen fè-a. La ni otan fanmi ki kontan pasé tan ansanm an sé plas sala. Pou ègzanp an bitasyon, an sé montany-lan, ében bò lanmè-a. Èvèk la ni manmay ki enmen kouwi èk jwé déwò, gadé diféwan zannimo, èk benyen an lawivyè-a ében lanmè-a. Vwéman nou ni an chay òpòtyounité pou enjwi nati épi tout sé bagay-la Jéhova fè-a.

17. Pouki pawan sipozé édé ich yo enjwi kwéyasyon Jéhova dépi apwézan?

¹⁷ An latè nèf-la, pawan épi ich kay enjwi kwéyasyon Jéhova andan an mannyè yo p‘òkò janmen enjwiʼy. A lè sala nou pa kay ni pyès wézon pou pè sé zannimo-a, èk yo pa kay pè nou non plis. (Izay. 11:6-9) Osi, nou kay ni an chay tan pou enjwi kwéyasyon Jéhova. (Sam 22:26) Mé pawan, pa èspéwé jistan pawadi-a wivé pouʼw édé ich ou enjwi kwéyasyon. Siʼw sèvi kwéyasyon pou enstwi ich ou konsèné Jéhova dépi apwézan, san dout yo kay dakò épi sa wa David té di. An Sam 104:24 i di Jéhova: “Ou ja fè tèlman gwan twavay.”​—Sam 86:8.