Lè’w Dous, Sa Ka Moutwé Ou Ni Fòs

1. Kisa an moun an plas twavay nou, ében an moun an lékòl nou pé mandé nou?

DÉLÈ on moun an lékòl ou ében on moun an plas twavay ou pé mandé’w on kwèsyon konsèné sa ou ka kwè adan. Ében lè sa fèt, ki mannyè ou ka santi? Ès ou ka santi pè? Wi, plizyè di nou ka santi pè délè. Mé lè on moun mandé’w on kwèsyon, sa kay édé’w konnèt sa ki asou lidé moun-lan èk sa’y ka kwè adan. Èvèk sa kay fè’y pli ézé pou patajé bon nouvèl-la épi moun sala. Délè on moun pé mandé nou an kwèsyon paski yo pa ka dakò épi sa nou ka kwè adan, ében yo vlé chikannen épi nou. Yonn an sé wézon-an yo ka fè sa, sé paski yo ja tann an chay mansonj konsèné sa nou ka kwè adan. (Twav. 28:22) Èk on lòt wézon sé sa, nou ka viv an “dènyé tan-an” lè moun kay “bwital”, i kay difisil pou yo dakò épi yonn a lòt, èk “yo pa kay ni pyès wèspé pou sa ki bon”. (2 Tim. 3:1, 3) Konsa, i pa ka sipwi nou lè moun vlé chikannen épi nou konsèné sa nou ka kwè adan.

2. Pouki nou vlé vini moun ki dous?

² Pitèt ou ka katjilé: ‘Ki mannyè mwen sa wèsté kam èk moutwé jantiyès lè on moun vlé chikannen épi mwen konsèné sa mwen ka kwè adan?’ Alò kisa ki sa édé’w? Ében lè’w sé on moun ki dous sa sa édé’w. Wi, on moun ki dous ka wèsté kam lè on moun pwovoké’y, ében lè’y pa konnèt wépons-lan pou kwèsyon-an moun-lan mandé’y. (Pwov. 16:32) Kanmenm, i pa toujou ézé pou vini on moun ki dous. Konsa an atik sala nou kay diskité sé kwèsyon sala: Ki mannyè ou sa vini on moun ki dous? Ki mannyè ou sa moutwé ou dous lè on moun vlé chikannen épi’w konsèné sa’w ka kwè adan? Èk si’w sé on pawan, ki mannyè ou sa édé manmay ou pou fè défans lafwa yo adan on mannyè ki dous?

MANNYÈ OU SA VINI ON MOUN KI DOUS

3. Pouki nou sa di moun ki dous fò, èk yo pa fèb? (2 Timòfi 2:24, 25)

³ Wi moun ki dous fò, yo pa fèb. Èk pou wézon sala nou bouzwen fòs pou wèsté kam lè nou ka aji épi sitiwasyon ki difisil. Dousè sé yon kawaktè an lisentèspwi Bondyé. (Gal. 5:22, 23) Délè an langaj Gwik yo té ka sèvi mo pawòl-la pou ‘dous’ pou dékwi on chouval sovay yo fè vini dous. Imajiné on chouval sovay ki vini dous. Wi chouval-la dous, mé i fò toujou. Alò menm kon chouval sovay-la, ki mannyè nou sa vini dous èk an menm di tan wèsté fò? Chonjé nou pa sa fè sa pa kò nou. Konsa nou ni pou pwédyé bay Jéhova, èk mandé’y pou lisentèspwi’y pou édé nou dévlopé bèl kawaktè sala. Anfen la ni on chay moun ki ja vini moun ki dous. Pou ègzanp an chay an sé fwè èk sè nou-an ja moutwé yo dous, lè moun éséyé pou chikannen épi yo. Èvèk sa ja édé an chay moun pou wèspèkté Témwen Jéhova. (Li 2 Timòfi 2:24, 25.) Konsa, ki mannyè ou sa vini on moun ki dous?

4. Kisa nou sa apwann hòd mannyè-a Ayzak té wèsté dous?

⁴ La ni plizyè wakont an Bib-la ki ka moutwé i sé vwéman an bon bagay lè an moun wèsté dous. Pou ègzanp, annou konsidiwé wakont Ayzak. Ayzak té ka viv an tèwitwa sé Filistin-lan adan an plas yo ka kwiyé Gira. Kanmenm sé vwézinaj Ayzak-la té jalou’y, èk yo sèvi tè pou bouché sé pi-a sé sèvant papa’y-la té fouyé. Ayzak té sa goumen pou sé pi’y-la, mé pito i fè sa, i pwan fanmi’y èk i alé viv lòt koté èk i fouyé pi nèf. (Jen. 26:12-18) Mé sé Filistin-lan di dlo-a an sé pi nèf-la sété sa yo osi. Magwé sa, Ayzak kontiné pou tjenn lapé-a. (Jen. 26:19-25) Alò, kisa ki té édé Ayzak pou wèsté dous lè moun té ka pwovoké’y? Ében Ayzak té òbzòvé papa’y Abrahanm sété an nonm lapé, èk manman’y Sara té “janti épi byen dous”. Konsa san dout, bèl ègzanp pawan’y té vwéman édé’y pou wèsté dous.​—1 Pita 3:4-6; Jen. 21:22-34.

5. Ki mannyè ègzanp Maxence ka moutwé pawan sa enstwi ich yo wézon-an i bon pou wèsté dous?

⁵ Pawan, zòt sa ni konfyans-lan zòt sa enstwi ich zòt wézon-an i enpòtan pou wèsté dous. Pou ègzanp, Maxence sé an jenn fwè ki ni disèt (17) lanné. Magwé Maxence té ni pou aji épi moun ki té ni kòlè ni an lékòl ni an pwédikasyon-an, pawan’y édé’y apwann mannyè pou wèsté dous lè moun pwovoké’y. Èk kisa ki té wézilta-a? Pawan Maxence di: “Apwézan Maxence vini kopwann i byen ézé pou an moun vini faché lè an moun ka pwovoké’y, mé an moun ka moutwé i vwéman ni kouway èk kouwaj lè’y kontwolé kò’y èk lè’y wèsté kam.” Wi, Maxence ka moutwé i vwéman ni an chay fòs, paski i apwann mannyè pou wèsté dous lè moun ka pwovoké’y.

6. Ki mannyè lapwiyè sa édé nou pou wèsté dous?

⁶ Délè nou pé ni pou aji épi sitiwasyon ki difisil. Pou ègzanp, an moun pé di mansonj asou Jéhova, ében i pé pwan Bib-la sèvi widitjil. Alò lè sa fèt, kisa nou sa fè ki sa édé nou pou wèsté dous? Èben, nou sipozé mandé Jéhova pou lisentèspwi’y, èk pou lasajès pou édé nou wéponn moun-lan adan an mannyè ki dous. Èk kisa nou sa fè si nou pa té wéponn moun-lan adan mannyè-a nou té sipozé wéponn li? Ében nou sa pwédyé ankò konsèné sa, èk osi, nou sa katjilé asou mannyè-a nou sa fè pli mèyè lòt kou-a. Èk Jéhova kay wéponn lapwiyè nou. Wi, i kay ban nou lisentèspwi’y pou édé nou kontwolé kòlè nou, èk pou wèsté dous.

7. Si nou apwann sèten lévanjil pa tjè, ki mannyè sa sa édé nou pou wèsté dous ni an pawòl nou ni an aksyon nou? (Pwovèb 15:1, 18)

⁷ La ni plizyè vèwsé an Bib-la ki sa édé nou pou wèsté dous ni an pawòl nou ni an aksyon nou. Alò, si nou apwann sèten lévanjil pa tjè, lèspwi Bondyé sa fè nou chonjé sé vèwsé sala pou édé nou wèsté dous lè nou ka èspéyansé sitiwasyon ki difisil. (Jan 14:26) Pou ègzanp, la ni an bèl pwensip an liv Pwovèb ki sa édé nou pou wèsté dous. (Li Pwovèb 15:1, 18.) Wi, liv Pwovèb ka moutwé nou sé bennéfis-la nou kay èspéyansé lè nou wèsté dous.​—Pwov. 10:19; 17:27; 21:23; 25:15.

MANNYÈ BON LAKONPWANN SA ÉDÉ’W WÈSTÉ DOUS

8. Kisa nou ni pou chonjé lè on moun ka kwèsyonnen nou konsèné sa nou ka kwè adan?

⁸ Lè on moun ni bon lakonpwann, sa sa édé’y pou kontwolé kò’y lè on moun vlé chikannen épi’y konsèné sa i ka kwè adan. (Pwov. 19:11) Pou ègzanp, on moun pé ni plizyè wézon poutji i mandé nou on kwèsyon. Konsa, avan nou wéponn, i bon pou nou toujou chonjé, nou pa konnèt sé wézon-an moun-lan ka mandé nou kwèsyon-an.​—Pwov. 16:23.

9. Ki mannyè Gidiyonn té moutwé bon lakonpwann èk wèsté dous lè’y té ka aji épi sé nonm-lan an lafanmi Ifréyim?

⁹ Konsidiwé mannyè-a Gidiyonn aji épi sé nonm-lan an lafanmi Ifréyim. Adan an mannyè byen faché, sé nonm-lan mandé Gidiyonn poutji i pa té kwiyé yo pli bonnè pou édé’y goumen kont sé lèlmi Izwayèl-la. Mé, poutji yo té faché kon sa? Pitèt yo té ni twòp lògèy. Kanmenm Gidiyonn moutwé bon lakonpwann èk lasajès. Alò, an ki mannyè i fè sa? Ében i wèspèkté mannyè-a yo té ka santi, èk i wéponn yo adan an mannyè ki té dous. Èk kisa ki té wézilta-a? Ében Bib-la di nou, ‘lè’y palé épi yo an mannyè sala, yo vini kam’.​—Jij 8:1-3.

10. Lè moun vlé konnèt poutji nou ka swiv pwensip Bib, kisa ki kay édé nou pou konnèt mannyè-a pou wéponn yo? (1 Pita 3:15)

¹⁰ Si an moun an lékòl nou ében an twavay nou mandé nou poutji nou ka swiv pwensip Bib, kisa nou kay fè? Ében, nou kay fè tout sa nou pé pou èspliké bay moun-lan wézon-an nou kwè i bon pou swiv wèg Bondyé. Mé an menm di tan, nou vlé toujou moutwé moun-lan wèspé. (Li 1 Pita 3:15, 16.) Alò, pito nou kwè moun-lan mandé kèstyon-an pou kwititjé nou, i kay bon pou nou gadé kèstyon-an kon an mannyè pou nou konnèt kisa ki enpòtan pou li. Èk népòt wézon i pé ni pou mandé kèstyon-an, nou vlé wéponn adan an mannyè ki dous èk janti. Èk sa pé annékòz moun-lan pou chanjé lopinyon’y. Konsa, menm si moun-lan pé sanm hadi ében i kwititjé nou, nou toujou vlé wéponn adan an mannyè ki janti èk dous.​—Ronm 12:17.

11-12. (a) Kisa i bon pou konsidiwé avan nou wéponn an kèstyon? (Gadé pòtwé-a osi.) (b) Bay an ègzanp pou moutwé mannyè an bon wépons sa édé an moun pou ni an bèl konmézasyon épi nou.

¹¹ Lè an moun mandé nou an kèstyon, pouki i enpòtan pou katjilé asou wézon-an moun-lan ka mandé nou kèstyon-an? Pou ègzanp, si an moun an plas twavay nou mandé nou poutji nou pa ka sélébwé jou nésans, i kay bon pou pwan tan pou mandé kò nou kèstyon tèl kon: Ès moun-lan kwè wilizyon nou pa ka pèwmité nou pou ni an bon tan? Ében ès i kwè nou kay afèkté bon wilasyon-an sé lézòt twavayè-a ni an plas twavay-la? Alò, si nou di moun-lan nou ka apwésyé mannyè-a i mélé épi sé lézòt twavayè-a, èk si nou asiwé’y nou osi vlé sipòté an bon wilasyon an plas twavay-la, nou pé ba’y lapé an lidé’y. Anfen, sa pé jis annékòz nou pou ni an bèl konmézasyon épi moun-lan asou sa Bib-la ka di konsèné jou nésans.

¹² Nou sa fè menm bagay-la lè moun mandé nou lòt kwèsyon, ében lè yo lévé tòpik ki difisil. Pou ègzanp, si an moun an lékòl ou di Témwen Jéhova sipozé chanjé enstwiksyon yo konsèné sèks ant nonm èk nonm èk ant fanm èk fanm, ou pé mandé kò’w kèstyon tèl kon: Ès i ka di sa paski i pa ka byen konpwann sa Témwen Jéhova ka vwéman enstwi asou tòpik sala? Ében ès sé paski i ni an jan èben an manm fanmi’y ki ka viv kalité lavi sala, èk i kwè nou hayi moun ki ka viv konsa? Alò nou pé ni pou asiwé moun-lan nou mélé épi tout moun, èk nou ka wèspèkté ki, chak moun ni dwa-a pou chwazi pou kò’y kalité lavi-a i vlé viv.b (1 Pita 2:17) Anfen, sa pé ban nou òpòtyounité-a pou di moun-lan sa Bib-la ka di asou sijé-a, èk osi, sé bennéfis-la nou ka èspéyansé lè nou viv an ling épi pwensip Bib.

13. Kisa ki kay édé nou pou konnèt mannyè-a pou wéponn moun ki mandé nou kwèsyon konsèné sa nou ka kwè adan?

¹³ Lè on moun pa ka dakò épi sa nou ka di yo, sé pa pou nou twò pwésé pou kwè nou konnèt sa moun-lan ka kwè adan. (Titòs 3:2) Pou ègzanp, si an moun ki ka alé lékòl épi’w di: ‘I pa ka fè sans pou kwè an Bondyé.’ Ès ou kay di moun-lan ka kwè an évolousyon, èk i konnèt konsèné évolousyon? Ében, chonjé, pitèt moun-lan ka annèk wépété sa’y tann moun di. Konsa, pito ou chikannen épi’y, ou sa éséyé pou twapé on ti chans pou ba’y on piblikasyon ében pou kité’y épi on kwèsyon pou’y sa katjilé asou. Osi, pitèt ou sa moutwé’y, ében voyé’y on link pou enfòmasyon konsèné kwéyasyon asou wèbsayt nou jw.org. Èvèk pitèt pli ta moun-lan kay vlé diskité yon atik ében on vidiyo épi’w. Wi, lè nou moutwé moun wèspé, sa kay édé yo pou vlé konnèt pli an sa Bib-la ka enstwi.

14. Ki mannyè Niall té sèvi wèbsayt nou pou édé an tibway an klas li wè sé mansonj-la i tann konsèné Témwen Jéhova pa vwé?

¹⁴ Yon jennès, non’y sé Niall sèvi wèbsayt nou pou édé on tibway an klas li wè, sa adan moun ka di konsèné Témwen Jéhova sé mansonj. Niall di: “On tibway an klas mwen té ka toujou di mwen, mwen pa ka kwè an siyans paski mwen ka kwè an Bib-la, èk Bib-la plen listwa èk mansonj.” Alò, lè tibway-la pa bay Niall an chans pou èspliké sa’y ka kwè adan, Niall di’y konsèné sèksyon-an asou wèbsayt nou ki ni tit-la, “Ès Siyans Ka Dakò Épi Bib-la?”. Pli ta Niall wéyalizé tibway-la té alé asou wèbsayt-la, èk i té vlé diskité mannyè-a lavi koumansé épi Niall. Wi, ou osi sa ni bèl èspéyans kon sa.

FÈ PWÉPAWASYON KON AN FANMI

15. Ki mannyè pawan sa édé ich yo pou bay an wépons ki dous, lè manmay an lékòl kwèsyonnen sa yo ka kwè adan?

¹⁵ Pawan sa enstwi ich yo mannyè pou bay an wépons ki dous lè moun kwèsyonnen sa yo ka kwè adan. (Jémz 3:13) Adan pawan ka sèvi létid fanmi yo pou édé ich yo fè sa. Pou ègzanp, yo pé pwatiké épi ich yo diféwan kwèsyon èk diféwan tòpik manmay an lékòl pé lévé. Èk yo sa édé ich yo apwann pa sèlman mannyè pou bay an bon wépons, mé osi mannyè yo sa wéponn adan an mannyè ki dous.​—Gadé bwèt-la: “Pwatiké Épi Ich Ou Pou Édé Yo”.

16-17. Lè pawan ka toujou pwatiké épi manmay yo, ki mannyè sa kay édé manmay yo?

¹⁶ Lè pawan ka toujou pwatiké épi manmay yo, sa pa kay sèlman édé manmay yo pou byen èspliké sa yo ka kwè adan bay lézòt, mé i kay osi édé yo pou ni konfyans-lan ki, sa yo ka kwè adan sé lavéwité-a. Asou jw.org la ni plizyè atik anba sèksyon-an “Kwèsyon Jenn Moun Ka Mandé”, èvèk sèksyon sala ni aktivité pou jennès osi.c Sèksyon-an la pou édé jenn moun ni asiwans-lan ki, sa yo ka kwè adan sé lavéwité-a, èk osi i sa édé yo pou bay on wépons ki sòti ofon tjè yo. Wi, lè an fanmi étidyé sé diféwan sijé sala, sé manmay-la kay apwann mannyè pou fè défans lafwa yo adan on mannyè ki dous èk janti.

¹⁷ An jenn nonm non’y sé Matthew di paski fanmi’y té ka toujou pwatiké épi’y, sa té édé’y. Lè yo té ka fè létid fanmi yo, Matthew épi pawan’y té ka fè wichach asou sijé ki pé lévé an klas li. Mi sa’y di: “Nou ka imajiné sé diféwan kwèsyon-an èk sé diféwan tòpik-la ki pé lévé, èk nou ka pwatiké ki mannyè nou té kay wéponn silon wichach-la nou té fè-a. Anfen, paski mwen konnèt wézon-an pou sa mwen ka kwè adan-an mwen ni an chay konfyans. Konsa mwen ka twapé’y pli ézé pou mwen wèsté dous lè mwen ni pou èspliké sa mwen ka kwè adan-an.”

18. Silon Kòlòsé 4:6, pouki i si tèlman enpòtan pou palé adan an mannyè ki dous?

¹⁸ Kanmenm, menm si nou èspliké bagay adan an mannyè ki klè, sé pa tout moun ki kay aksèpté sa nou ka di. Mé si nou palé adan an mannyè ki dous, sa sa édé adan moun pou kouté. (Li Kòlòsé 4:6.) Bon. Nou sa konpawé mannyè-a nou ka palé épi an moun konsèné sa nou ka kwè adan, épi mannyè-a nou sa voyé an bol bay yon moun. Si nou voyé bol-la épi twòp fòs nou sa blésé moun-an, èk i pé jis vlé doubout jwé épi nou. Mé si nou voyé bol-la adan an mannyè ki dous, sa kay fè’y pli ézé pou moun-an pawé bol-la èk i kay vlé kontiné jwé. Ében an menm mannyè-a, si nou palé épi moun adan an mannyè ki dous, sa kay fè’y pli ézé pou yo kouté sa nou ka di èk pou kontiné konmézasyon-an. Kanmenm, si an moun annèk vlé chikannen épi nou, ében kwititjé sa nou ka kwè adan, nou pa oblijé kontiné diskasyon-an. (Pwov. 26:4) Mé pwan tjè, sé pa tout moun ki kon sa. Anfen, plizyè moun kay kouté’w.

19. Pouki nou ni pou wèsté dous lè nou ka fè défans lafwa nou?

¹⁹ Vwéman, lè nou fè tout sa nou pé pou vini dous, sa sa édé nou on chay. Konsa annou pwédyé bay Jéhova pou ban nou fòs-la pou wèsté dous lè on moun ka kwèsyonnen nou ében kwititjé nou konsèné sa nou ka kwè adan. Chonjé lè nou wèsté dous, sa sa anpéché dézagwéman. Èk osi lè wépons nou dous èk wèspèktab, sa sa chanjé lidé moun-lan konsèné Témwen Jéhova èk lavéwité-a ki an Bib-la. Alò lè nou ka fè défans lafwa nou, ‘sé pou nou toujou pawé pou bay an wépons adan on mannyè ki janti èk wèspèktab’. (1 Pita 3:15, 16 ) Wi, lè’w sé on moun ki dous, ou ka vwéman moutwé ou sé on moun ki fò!