Ki Mannyè Ou Sa Wèsté Fidèl Pou Jéhova Lè On Moun Maltwété’w?

1-2. Ki moun ki pé maltwété nou? Èspliké.

JÉZI té di sé disip li-a on pawabòl konsèné on vèv ki té ka toujou alé oti on jij pou twapé jistis paski on moun té ka maltwété’y. San dout, sé disip Jézi-a té sa vwéman konpwann mannyè vèv-la té ka santi paski an pil moun an tan sala té ka èspéyansé enjistis. (Louk 18:1-5) Nou osi sa konpwann mannyè-a i té santi paskè jòdi jou, nou tout ja èspéyansé enjistis adan yon mannyè èben on lòt.

² Bon. Jòdi jou an chay moun an latè-a pa ni natiwèl, yo vowas, èk yo kwè yon was pli bon pasé on lòt. (Éklé. 5:8) Alò, i pa ka sipwi nou si yo maltwété nou. Mé lè on fwè èben on sè maltwété nou, sa ka vwéman dézapwenté nou, paski sa sé dènyè bagay-la nou kwè on fwè èben on sè té kay fè nou. Kanmenm, sé fwè èk sè nou-a pa pawfé èk yo pa vlé maltwété nou. Mé sa ka fèt délè. Konsa, i bon pou nou gadé ègzanp Jézi èk mannyè i té wéyaji lè lèlmi’y té maltwété’y. Bon. Jézi té ni an chay pasyans, èk sa ka moutwé nou, nou ni pou ni pasyans osi. Konsa, si nou sa ni pasyans épi lèlmi nou ki ka maltwété nou, ès nou pa sipozé ni pli pasyans épi sé fwè èk sè nou-a? Bon. Ki mannyè ou kwè Jéhova ka santi lè on fwè ében on sè, ében népòt lòt moun maltwété nou? Ès ou kwè i mélé?

3. Ki mannyè nou sav Jéhova mélé épi nou lè lézòt maltwété nou?

³ Jéhova mélé épi nou an chay, èk i ka wè lè lézòt maltwété nou. Wi, “Bondyé Senyè-a enmen sa ki dwèt.” (Sam 37:28) Jézi ban nou asiwans-lan ki, Jéhova “kay édé [nou] èk i kay fè [sa] byen vit.” (Louk 18:7, 8) Wi, touswit, Jéhova kay tiwé tout soufwans; sa vlé di i kay tiwé tout sa ki ka fè nou soufè. Èk i pa kay janmen pèwmité nou pou èspéyansé enjistis janmen ankò.—Sam 72:1, 2.

4. Ki èd Jéhova ka ban nou apwézan?

⁴ Paditan nou ka èspéwé lè-a Jéhova kay tiwé tout soufwans, Jéhova pa kay kité nou san èd. Anfen, dépi apwézan, i ka édé nou lè lézòt maltwété nou. (2 Pita 3:13) Pou ègzanp, i ka ban nou konsèy an Bib-la pou enstwi nou kisa nou sa fè èk kisa pou nou pa fè, lè moun maltwété nou pou nou anpéché pli pwòblenm. Èk osi, i ka ban nou ègzanp gason’y pou nou sa imité.

PWAN PWOKOSYON POU PA KITÉ ENJISTIS ANNÉKÒZ OU POU FÈ ON BAGAY KI MOVÉ

5. (a) Ki mannyè enjistis sa afèkté nou? (b) Pouki pou nou pwan pwokosyon?

⁵ Nou sa ni lapenn, èben tjè nou pé fè nou mal annékòz di enjistis. (Éklé. 7:7) An tan pasé, sèvant fidèl Jéhova tèl kon Jòb èk Habakòk, té an lapenn akòz di enjistis. (Jòb 6:2, 3; Hab. 1:1-3) Alò i natiwèl pou santi kon sa. Mé, nou ni pou pwan pwokosyon pou nou pa fè sa ki pa bon annékòz di enjistis.

6. Si nou pwan wivanj, kisa sa sa annékòz? Ba yon ègzanp. (Gadé pòtwé-a osi.)

⁶ Lè on moun maltwété nou, èben on moun nou kontan, nou pé vlé pwan wivanj asou moun sala. Mé si nou fè sa, sa sa annékòz pli pwòblenm. Pou ègzanp, annou konsidiwé Absalonm, gason wa David. I té faché si tèlman lè Amnonn, fwè koté papa’y, té anvyolé sésé yo, Téma. Épi pou lapéti sa, Absalonm tjwé’y. Bon. Nou sa konpwann wézon-an Absalonm té si tèlman faché paski sa Amnonn té fè té mové toubonnman. Èk a ling épi Lwa Moziz-la, i té sipozé mò pou sa i té fè-a. (Livi. 20:17) Mé sé pa Absalonm ki té ni dwa-a pou tjwé’y.​—2 Sm 13:20-23, 28, 29.

7. Kisa ki té pwèskè wivé on sèvant Jéhova an tan pasé?

⁷ Lè moun fè on bagay ki pa bon èk i ka sanm yo pa kay twapé pinisyon pou sa yo fè-a, nou pé koumansé katjilé, ‘La pa ni pyès bennéfis lè’w fè sa ki bon’. Anfen, yon sèvant Jéhova an tan pasé té katjilé menm bagay-la. Ou wè, i té ka wè sé méchan-an té ka maltwété bon moun, épi an menm di tan ka enjwi lavi yo. Konsa, mi sé sa i di: ‘Wi sa sé sé méchan-an ki toujou ni’y ézé.’ (Sam 73:12) Enjistis-la Samis-la té ka wè-a, té distwé’y tèlman, i té ka katjilé, ‘I pa té vo’y pou sèvi Jéhova’. Anfen i di: ‘Lè mwen té éséyé konpwann li, sa té ka twakasé mwen.’ (Sam 73:14, 16) Wi, sa twakasé’y tèlman, mi sé sa i di ki pwèskè wivé’y: ‘Mé mwen menm, mwen té pwèskè kité bon chimen-an. Pyé mwen té pwèskè glisé.’ (Sam 73:2) Anfen, on bagay pwèskè kon sa té wivé yon fwè nou. Nou kay kwiyé’y Alberto.

8. Ki mannyè enjistis té afèkté fwè Alberto?

⁸ Fwè Alberto té ka sèvi kon on ansyen an kongwigasyon-an. Mé lè adan sé fwè-a té akizé’y èk di i té ka vòlè lajan kongwigasyon-an, i pèd pwivilaj li. Èk i pèd wèspé an chay an sé fwè èk sè-a an kongwigasyon-an. Fwè Albèrto di: “ Mwen té faché èk dézapwenté.” Alò, i kité mannyè-a i té ka santi-a afèkté wilasyon’y épi Jéhova. Épi i jis doubout atandé mitin pou senk (5) lanné. Konsa, èspéyans sala ka moutwé nou kisa ki pé wivé nou si nou pa kontwolé imosyon nou lè nou èspéyansé enjistis.

IMITÉ MANNYÈ JÉZI TÉ AJI ÉPI ENJISTIS

9. Ki enjistis Jézi té ni pou aji épi? (Gadé pòtwé-a osi.)

⁹ Jézi établi on bon ègzanp asou mannyè-a nou sa aji épi enjistis. Ou wè, an chay moun, èk sé fanmi’y-la osi, té ka maltwété’y. Sé fanmi Jézi-a, ki pa té ka kwè an li, di: “I ja pèd tèt li.” Sé titja lwa sé Jwif-la di: “Sé chèf denmou-an ki ba li pouvwa sala pou i sa tiwé vyé lèspwi an moun.” Sé sòlda Ronm-la té ka motjé’y, yo té ka ba li koul baton asou tèt li, épi yo té kwaché asou’y. Finalman, yo tjwé’y. (Mak 3:21, 22; 14:55; 15:16-20, 35-37) Magwé Jézi té soufè anba tout sé enjistis sala, i pa té janmen kité sé bagay sala fè’y fè bagay ki pa bon. I pa té janmen pwan wivanj. Konsa, kisa nou sa apwann an ègzanp li?

10. Ki mannyè Jézi aji épi enjistis? (1 Pita 2:21-23)

¹⁰ Li 1 Pita 2:21-23.a Wi, Jézi kité ban nou on bon ègzanp pou nou swiv lè nou ka aji épi enjistis. I té sav lè i té ni pou palé èk lè i té ni pou wèsté an silans. (Maf. 26:62-64) Délè, lè moun té ka di mansonj asou’y, i té désidé pou pa di anyen. (Maf. 11:19) Mé lè i té désidé pou palé, i pa té ensilté èben mennasé sé sa ki té ka pèsikité’y-la. Jézi té ka kontwolé kò’y, paski “i mété kòʼy an lanmen Bondyé, ki toujou ka jijé dwèt.” Alò, Jézi té sav Jéhova té ka wè tout sa yo té ka fè’y. Èk i té ni konfyans ki, Jéhova, pli gwo jij-la, kay fè asiwé moun twapé jistis a lè.

11. Ki mannyè nou sa imité Jézi an pawòl nou? (Gadé sé pòtwé-a osi.)

¹¹ Lè on moun maltwété nou, nou sa imité ègzanp Jézi èvèk kontwolé kò nou èk pawòl nou. Délè, nou pé chwazi pou pa di anyen, si bagay-la ki té fèt-la pa té si tèlman gwav. Èben délè, nou pé chwazi pou pa di anyen, paski si nou di on bagay sa pé annékòz pli pwòblenm. (Éklé. 3:7; Jémz 1:19, 20) Bon. Délè, nou pé ni pou di on bagay pou fè défans on moun lè nou wè on lòt moun ka maltwété’y. Èk osi, lè i vini pou sa nou ka kwè adan, nou pé ni pou palé èk fè défans lavéwité-a. (Twav. 6:1, 2) Alò, si nou désidé pou palé, nou ni pou fè sa tou kam èk épi wèspé.​—1 Pita 3:15.b

12. Pouki nou sa mété tout bagay an lanmen Bondyé?

¹² Nou osi sa imité Jézi lè nou mété kò nou an lanmen Bondyé “ki toujou ka jijé dwèt.” Konsa, lè moun mal jijé èben mal twété nou, nou asiwé Jéhova sav sa ki té fèt. Èk paski nou sav Jéhova kay wanjé tout mal tèt èk mové twètman nou ka èspéyansé, sa ka édé nou pou andiwé anba mové twètman. Alò, lè nou kité tout bagay an lanmen Jéhova, sa ka édé nou pou pa wèsté faché èben tjenbé moun asou tjè. Anfen si nou pa kontwolé kò nou, sé imosyon sala sa annékòz nou pou fè on mové bagay, pèd lajwa nou èk donmajé wilasyon nou épi Jéhova.​—Sam 37:8.

13. Kisa ki sa édé nou pou tjébé fò lè moun mal twété nou?

¹³ Nou pa pawfé kon Jézi, mé nou sa éséyé pou swiv ègzanp li. Délè nou ka fè èben di on bagay, èk pli ta nou ka wigwété’y. (Jémz 3:2) Osi, mannyè moun mal twété nou sa annékòz nou pou ni penn èk santi dékonpòté pou an chay tan. Si sa sé sitiwasyon’w, pwan tjè paski Jéhova ka wè tout sa ki ka wivé’w. Jézi osi “ka konpwann byen mannyè” ou ka santi paski li menm té ni pou aji épi enjistis. (Hib. 4: 15, 16) Apa di ègzanp Jézi, nou ni konsèy an Bib-la ki sa édé nou lè lézòt moun ka maltwété nou. Annou konsidiwé dé (2) adan sé bon konsèy sala an liv Ronm.

“SÉ PA POU OU MENM PWAN WIVANJ”

14. Ki mannyè nou sa swiv konsèy-la zapòt Pòl ban nou an Ronm 12:19?

¹⁴ Li Ronm 12:19. Konsa, lè moun maltwété nou, nou sipozé swiv konsèy zapòt Pòl èk kité Bondyé pwan wivanj ban nou. Sé li ki kay désidé kilè èk ki mannyè i kay mennen jistis. Anfen, annou gadé ègzanp yon fwè, non’y sé John. I té ni pou èspéyé asou Jéhova apwé on fwè té mal twété’y. Fwè-a di: “Mwen té ni pou bésé kòlè mwen pou mwen pa fè on bagay ki pa té bon. Épi sa pa té ézé pou fè. Mé konsèy zapòt Pòl an Ronm 12:19, édé mwen pou éspéwé asou Jéhova épi pasyans.”

15. Pouki i pli mèyè pou éspéwé asou Jéhova pou wanjé on pwòblenm?

¹⁵ Ki bennéfis nou sa twapé lè nou éspéwé asou Jéhova pou wanjé pwòblenm nou? Èben, nou pa kay ni an chay tèt cho èk dézapwètman. Bon. Jéhova ja ofè pou édé nou. I di nou pou éspéwé asou’y èk i pwonmèt pou wanjé enjistis-la. Alò, si nou kwè pwonmèt-la Jéhova fè-a, lè i di: “Mwen kay péyé yo déviwé”; nou pa kay kontiné wèsté faché. Èk sa sé paski nou sav Jéhova kay fè sa ki dwèt. Anfen, sé sa ki té édé John, fwè-a nou té mansyonnen an paragraf katòz (14). Fwè-a di: “Si mwen èspéyé asou Jéhova pou wanjé pwòblenm mwen, wézilta-a kay twòp pli mèyè pasé si sé mwen ki té éséyé pou wanjé’y pa kò mwen menm.”

“SI OU FÈ SA KI BON OU KAY VINI PLI FÒ PASÉ [MOVÈSTÉ-A]”

16-17. Ki mannyè lapwiyè sa édé nou pou vini ‘pli fò pasé movèsté’? (Ronm 12:21)

¹⁶ Li Ronm 12:21. Wi, Zapòt Pòl ankouwajé sé Kwityen-an pou “fè sa ki bon” èk yo kay vini “pli fò pasé” movèsté-a. Osi, lè Jézi té ka pwéché anlè Mòn-an, i di sé disip li-a: “Enmen lèlmiʼw épi pwédyé bay sé moun-an ki ka maltwétéʼw-la.” (Maf. 5:44) Mé ès Jézi té swiv konsèy-li menm? Asiwéman! Pou ègzanp, Jézi té soufè enjistis èk yo té maltwété’y byen mové. Lè sé sòlda Ronm-lan klouwé dé lanmen’y èk dé pyé asou poto soufwans-lan, sa pa té anyen ki té ézé. Wi, nou pa sa imajiné soufwans-lan Jézi té ni pou andiwé anba.

¹⁷ Mé kisa i fè? I pa té tjébé yo asou tjè’y èk i wèsté fidèl pou Jéhova menm si i té ka soufè enjistis. Épi pito i mandé Jéhova pou pini sé sòlda-a, i pwédyé ba yo. I di: “Papa, pawdonnen yo, paski yo pa sav ki sa yo ka fè-a.” (Louk 23:34) Alò, menm kon Jézi, nou sa pwédyé bay Jéhova èk mandé’y pou édé sé moun-lan ki té ka maltwété nou-a. Èk si nou fè sa, sa kay édé nou pou pa tjébé moun asou tjè nou, pou pa santi twò faché èk pou chanjé mannyè nou ka santi konsèné yo.

18. Ki mannyè lapwiyè té édé Alberto èk John pou aji épi enjistis?

¹⁸ Lapwiyè té édé fwè Alberto èk fwè John, nou té mansyonnen pli bonnè-a an atik sala. Albèrto di: “Mwen pwédyé bay sé fwè-a ki té maltwété-a. Plizyè fwa mwen mandé Jéhova pou édé mwen mété enjistis sala dèyè mwen.” Apwézan, Alberto ni tjè kontan épi i ka sèvi Jéhova ankò épi fidèlité. Bon. Mi sé sa fwè John té ni pou di: “Plizyè fwa mwen pwédyé bay Jéhova pou édé fwè-a ki té maltwété mwen-an. Épi pou édé mwen pawdonnen’ y. Wi, Jéhova édé mwen pou pa wèsté faché kont fwè mwen èk pou doubout jijé’y. Épi sé lapwiyè sala osi ban mwen lapé an lidé mwen.”

19. Ki sa nou ni pou fè paditan nou ka viv an vyé sistenm sala? (1 Pita 3:8, 9)

¹⁹ Paditan nou ka viv an vyé sistenm sala, nou pa sav ki kalité enjistis èben maltwètman nou pé jwenn. Mé népòt sa nou pé ni pou aji épi, sé pou nou chonjé, pou toujou pwédyé bay Jéhova épi mandé’y pou èd, imité sa Jézi té fè lè moun té maltwété’y, èk kontiné swiv sé konsèy-la ki an Bib-la. Si nou fè tout sé bagay sala, nou asiwé Jéhova kay benni nou.​—Li 1 Pita 3:8, 9.