Kisa Ou Ni Pou Fè Pou’w Twapé Lavi Étonnèl?

1. Pouki adan moun ka kwè i pa posib pou moun viv pou tout tan?

AN CHAY moun ka fè tout sa yo pé pou wèsté an bon santé. Pou ègzanp, yo ka pwan bon pokosyon épi sa yo manjé, èk yo ka toujou fè lézèksis. Mé yo sav, menm si yo fè sé bagay sala, sa pa kay anpéché yo vini vyé, ében mò. Anfen, lè yo chonjé sé difikilté-a ki ka vini épi vyéyès, yo pé kwè i enposib pou moun viv pou tout tan. Kanmenm, silon sa nou li an Jan 3:16 èk Jan 5:24, Jézi moutwé a klè, lézòm sa “ni lavi étonnèl.” Sa vlé di, i posib pou moun viv pou tout tan.

2. Kisa Jézi té di an Jan chapit 6 konsèné lavi étonnèl? (Jan 6:39, 40)

² Yon jou, Jézi fè on miwak ki té byen èstòdinè. I potjiwé pen épi pwéson, èk i swen plizyè mil moun épi’y.a Li denmen jou-a, sé moun-lan i té swen-an pwan kannòt èk yo alé jis vil Kapènéyòm pou gadé pou li. Mé lè yo jwenn Jézi, i di yo on bagay ki té pli èstòdinè pasé miwak pen-an i té fè-a. I di yo, i té kay wésisité moun ki té ja mò, èk yo té kay “ni lavi étonnèl.” (Li Jan 6:39, 40.) Sa Jézi té di sé moun-lan ka ban nou asiwans-lan ki, an chay moun ki ja mò kay wésisité. Katjilé asou kisa sa vlé di pou jan’w épi fanmi’w ki ja mò. I ka ba’w asiwans-lan ki, ou sa enjwi lavi pou tout tan épi moun ou enmen. Sa vwéman sé bon nouvèl. Mé, an chay moun ka twapé’y difisil pou konpwann sa Jézi té di apwé sa. Konsa, annou ègzanminé sa’y té di-a.

3. Kisa Jézi té di an Jan 6:51?

³ Pen-an Jézi té potjiwé-a, fè latilyé moun-lan an Kapènéyòm chonjé manna-a Jéhova té sèvi pou swen jan Izwayèl, lè yo té an savann sèk-la. Anfen, lévanjil-la té kwiyé manna-a, “pen-an ki té sòti an syèl-la.” (Sam 105:40; Jan 6:31) Sé moun-lan Jézi té ka palé épi-a té konnèt sa. Konsa, Jézi mansyonnen yonndé bagay yo té konnèt konsèné manna-a, pou enstwi yo on bagay ki té byen enpòtan. Wi, manna-a sété on miwak Jéhova té fè pou swen jan Izwayèl, èk magwé yo té manjé manna-a, yo tout té vini vyé èk yo té mò. (Jan 6:49) Mé Jézi di, sé li ki “bon pen-an ki sòti an syèl-la.” Èk i di ankò, i sé “pen-an Bondyé ka bay-la” èk, i sé “pen lavi.” (Jan 6:32, 33, 35) Jézi osi moutwé, la té ni on gwo diféwans ant li épi manna-a, lè’y té di: “Sé mwen ki pen lavi-a ki désann sòti an syèl-la. Si pyèsonn manjé pen sala, i kay viv pou tout tan.” (Li Jan 6:51.) Sa Jézi di-a distwé sé Jwif-la ki té ka kouté’y-la. Yo pa té sa konpwann ki mannyè Jézi té ka di, i sété pen-an ki sòti an syèl-la, èk pen sala té pli mèyè pasé manna-a Bondyé té bay ayèl yo-a. Konsa Jézi di yo: ‘Pen sala mwen kay bay-la sé laché mwen.’ Mé, kisa Jézi té vlé di pa sa? Ében i byen enpòtan pou nou konpwann kisa Jézi té ka di-a, paskè wépons-lan ka moutwé mannyè moun sa twapé lavi étonnèl. Konsa annou wè kisa Jézi té vlé di.

KISA “BON PEN-AN” ÉPI “LACHÈ MWEN” VLÉ DI?

4. Kisa Jézi té di ki té distwé adan sé Jwif-la?

⁴ Lè Jézi di, i kay ‘bay lachè’y pou sé jan latè-a sa jwenn lavi étonnèl,’ sa lévé on gwo chikann anpanmi sé Jwif-la ki té ka kouté’y-la. Èk i sanm yo té kwè Jézi té kay ba yo lachè’y menm pou manjé, paski yo di: ‘Ki mannyè nonm sala sa ban nou lachè’y pou nou manjé?’ (Jan 6:52) Jézi di yo: “Si zòt pa manjé lachè Gason Lézòm-lan, èk bwè sanʼy, zòt pa kay ni lavi andidan kò zòt.” Lè yo tann sa, yo vini pli distwé ankò.​—Jan 6:53.

5. Pouki nou sa asiwé Jézi pa té ka ankouwajé moun pou bwè san’y?

⁵ Dépi an tan Nowa, Bondyé té koumandé lézòm pou pa manjé san. (Jen. 9:3, 4) Épi Jéhova té bay jan Izwayèl menm koumandman sala. Anfen, i té di yo pou ‘tjwé népòt moun ki té manjé san.’ (Livi. 7:27) Èk Jézi té enstwi sé Jwif-la pou obéyi tout sé lwa-a Bondyé té bay Moziz-la. (Maf. 5:17-19) Konsa, i pa té kay janmen ankouwajé yo pou manjé lachè’y èk bwè san’y. Sa’y té vlé fè, sé enstwi yo sa yo té ni pou fè pou yo sa jwenn “lavi étonnèl.” Èk i sèvi sé pawòl sala pou fè sa.​—Jan 6:54.

6. Ki mannyè nou sipozé gadé sa Jézi té di-a konsèné lachè’y épi san’y?

⁶ Konsa, ki pwen Jézi té ka fè? Ében i a klè, Jézi té ka sèvi yon ilistwasyon lè’y té ka palé épi sé moun-lan. Èk sa pa té pwèmyé fwa-a i té fè sa. Pou ègzanp, lè’y té ka palé épi ti madanm Sanmariya-a, i té di‘y: “Népòt moun ki bwè dlo-a mwen kay ba li-a pa kay janmen swèf ankò. Dlo-a mwen ka bay-la kay menm kon an sous andidanʼy ki ka kontiné voyé dlo mouté, èk dlo sala kay ba li lavi étonnèl.” (Jan 4:7, 14)b Ès ou kwè Jézi té ka di madanm-lan sèl sa’y té ni pou fè, sé bwè tak dlo ki sòti adan on sèten pi, èk i té kay twapé lavi étonnèl? Mé non! Ében an menm mannyè-a, Jézi pa té ka di sé moun-lan i té ka palé épi-a an Kapènéyòm, yo té kay sa viv pou tout tan si yo té manjé lachè’y èk bwè san’y.

ÈS SA JÉZI TÉ DI-A NI ANYEN POU FÈ ÉPI WIPA SENYÈ-A?

7. Kisa adan moun wilizyèz ka di konsèné sa Jézi té di an Jan 6:53?

⁷ Lè Jézi té ka sélébwé Wipa Senyè-a épi sé zapòt fidèl li-a, i té di yonndé bagay ki té pwèskè menm kon sa’y té di pli bonnè-a an Jan 6:53. Pou ègzanp, lè’y té bay sé zapòt-la pen-an, i té di yo pen-an ka wépwézanté kò’y. Èk lè’y té ba yo diven-an, i di yo diven-an ka wépwézanté san’y. (Maf. 26:26-28) Adan moun wilizyèz ka sèvi sa pou di, sa Jézi té di an Jan 6:53 sé yon modèl pou moutwé nou mannyè Wipa Senyè-a sipozé fèt. Konsa yo ka di, tout moun ki atandé Wipa Senyè-a sipozé manjé pen-an, èk bwè diven-an. Mé ès sa vwé? I byen enpòtan pou nou ègzanminé sa yo ka di-a pou nou wè si’y vwé opa, paskè Wipa Senyè-a sé on bagay ki byen spésyal pou nou. Èk chak lanné, milyon di moun owon latè-a ka vini ansanm épi nou pou sélébwé lokazyon spésyal sala. Konsa nou bizwen konnèt lavéwité-a asou sa. Mé kon nou kay apwann, la ni an chay diféwans ant sa Jézi té di an Wipa Senyè-a, èk sa’y té di an Jan 6:53.

8. Mansyonnen adan sé diféwans-lan la ni ant sa Jézi té di an Jan chapit 6, èk sa’y té di diwan Wipa senyè-a. (Gadé sé pòtwé-a osi.)

⁸ Annou konsidiwé dé (2) diféwans ant sé dé lokazyon sala. Pwèmyéman, an Jan 6:53-56 Jézi té ka palé épi on gwan latilyé moun an vil Galili. Sa té fèt an lanné 32 an lépòk nou, apipwé yon lanné avan Jézi établi Wipa Senyè-a an Jérouzalèm. Dézyenman, sé moun-lan Jézi té ka palé épi-a té pli konsèné épi manjé, pasé yo té antéwésé pou apwann mannyè pou yo vansé pli pwé Bondyé. (Jan 6:26) Anfen, lè Jézi té di on bagay yo twouvé wèd pou konpwann, an chay di yo pa pèdi pyès tan pou tounen do asou’y. Jis adan sé disip-la ki té doubout swiv Jézi pou lapéti sa’y té di-a. (Jan 6:14, 36, 42, 60, 64, 66) Bon, annou gadé sa ki té fèt lè Jézi établi Wipa Senyè-a apipwé yon lanné apwé sa, an lanné 33 an lépòk nou. Asou lokazyon sala, sé wonz (11) zapòt fidèl Jézi-a pa té byen konpwann tout sa’y té ka enstwi-a, mé pito yo fè menm kon sé moun-lan an Galili, yo wèsté épi Jézi. Wi, yo té asiwé Jézi sété Gason Bondyé ki sòti an syèl. (Maf. 16:16) Épi Jézi félicité yo pou sa. I di yo: “Zòt wèsté épi mwen an tout twaka mwen.” (Louk 22:28) Konsa, sé dé (2) diféwans sala ka moutwé a klè, sa Jézi té di an Jan chapit 6 pa té on modèl pou moutwé nou kisa ki sipozé fèt diwan Wipa Senyè-a. Mé la ni pli diféwans ankò ant sé dé (2) lokazyon sala.

SA PAWÒL JÉZI NI POU FÈ ÉPI’W

9. Ki gwoup moun ki ni pa an agwéman-an Jézi palé konsèné-a, diwan Wipa Senyè-a?

⁹ Diwan Wipa Senyè-a, Jézi bay sé zapòt li-a pen san lèlven pou manjé, èk i di yo pen-an ka wépwézanté kò’y. Apwé sa, i ba yo diven-an èk i di yo, diven-an ka wépwézanté san’y. San-an ki té “kay kachté agwéman-an Bondyé fè-a.” (Mak 14:22-25; Louk 22:20; 1 Kòr. 11:24) Bib-la ka kwiyé agwéman sala, ‘agwéman nèf-la.’ Mé sa Jézi di konsèné agwéman sala sé on bagay ki byen enpòtan, paskè sé pa tout moun ki an agwéman-an. Sé sèlman Jéhova épi sé moun-lan ki kay an syèl pou kondwi an Wéyòm-lan, ki an agwéman nèf-la. (Hib. 8:6, 10; 9:15) Èk sé zapòt-la pa té fini konpwann tout bagay konsèné agwéman sala. Mé touswit apwé sa, Bondyé té kay sèvi lisentèspwi’y pou annonté yo, èk sé kon sa yo té kay vini pa an agwéman nèf-la.​—Jan 14:2, 3.

10. Diwan Wipa Senyè-a, asou ki gwoup moun Jézi té ka fiksé, èk ès sa sé menm bagay-la i té fè an Galili? (Gadé pòtwé-a osi.)

¹⁰ Bon, i enpòtan pou chonjé, diwan Wipa Senyè-a Jézi té ka fiksé asou ti gwoup moun-lan ki kay an syèl pou kondwi épi’y an Wéyòm-lan. Pwèmyé moun ki té kay vini pa an ti gwoup sala sé, sé zapòt fidèl li-a ki té épi’y swè sala. (Louk 12:32) Sé yo Jézi té mandé pou manjé pen-an èk bwè diven-an. Pli ta, lòt moun té kay vini pa an gwoup-la, èk yo menm té kay ni pou manjé pen-an èk bwè diven-an chak fwa yo òbzòvé Wipa Senyè-a. Wi, sa Jézi di asou lokazyon sala, sé pa menm bagay-la i té di an Galili, paskè sa’y té di diwan Wipa Senyè-a té ni pou fè épi on ti gwoup moun. Mé sa’y té di an Galili-a té ni pou fè épi an chay moun.

11. Kisa Jézi té di an Galili ki ka moutwé, i pa té ka palé konsèné on ti gwoup moun?

¹¹ Lè Jézi té an Galili an lanné 32 an lépòk nou, pwèskè tout sé moun-lan i té ka palé épi-a té sèlman vlé’y ba yo manjé pou yo manjé. Mé Jézi éséyé pou édé yo konpwann, la ni on bagay ki otan pli enpòtan pasé manjé. I enstwi yo mannyè yo té sa twapé lavi étonnèl. Jézi jis di yo, lé mò té kay wésisité asou dènyé jou-a, èk yo té kay viv pou tout tan. Mé asou lokazyon sala, Jézi pa té ka palé bay on ti gwoup moun kon’y té kay fè pli ta diwan Wipa Senyè-a. Pito sa, i té ka palé konsèné sé bennédiksyon-an tout moun té kay sa twapé. Anfen, i té di: “Si pyèsonn manjé pen sala, i kay viv pou tout tan. Pen sala mwen kay ba li manjé-a sé lachè mwen. Mwen ka bay lachè mwen pou sé jan latè-a sa jwenn lavi étonnèl.”—Jan 6:51.c

12. Silon sa Jézi di, kisa on moun ni pou fè pou’y twapé lavi étonnèl?

¹² Ès Jézi té ka di, tout moun té kay twapé lavi étonnèl? Mé non! I té di, sé moun ‘ki manjé pen-an.’ Sa vlé di, sé sèlman moun ki kwè an li ki té kay twapé lavi étonnèl. Èk an chay moun ki ka kwiyé kò yo Kwityen ka di, yo kay sovè paski yo ka kwè an Jézi, èk yo aksèpté’y kon sovè yo. (Jan 6:29) Mé sa pa asé, paskè an chay an sé moun-lan ki té an Galili té ka kwè an Jézi, mé apwé on ti tan yo abandonnen’y. Pouki yo té fè sa?

13. Pou vini disip Jézi, kisa on moun ni pou fè?

¹³ Pwèskè tout sé moun-lan Jézi té swen-an té kontan pou swiv li dépi i té ka ba yo sa yo té vlé. Wi, yo té vlé’y fè miwak pou djéwi yo, ba yo manjé pou anyen, èk yo té vlé’y di yo sé bagay-la yo té kontan tann-lan. Mé Jézi té moutwé a klè, moun ki té vwéman disip li té bizwen fè pli pasé sa. Èvèk i fè yo konnèt, i pa té vini asou latè-a senpliman pou bay moun sa yo té vlé. Konsa si yo té vwéman vlé vini disip li, yo té kay ni pou kouté’y, èk yo té kay ni pou obéyi tout sé bagay-la i té ka enstwi yo-a.​—Jan 5:40; 6:44.

14. Kisa nou ni pou fè pou nou sa twapé bennéfis an san Jézi, épi an lachè’y?

¹⁴ Jézi fè gwoup moun-lan an Galili konpwann, i té enpòtan pou yo moutwé yo té ni lafwa. Mé lafwa an kisa? Ében, Jézi té enstwi yo lavéwité-a ki, i té kay bay laché’y épi san’y kon yon sakwifis pou fè’y posib pou yo viv pou tout tan. Konsa, i té byen enpòtan pou yo moutwé yo té ni lafwa an lavéwité sala. Jòdi jou, i osi enpòtan pou nou ni lafwa an sakwifis Jézi. (Jan 6:40) Wi, silon Jan 6:53, pou twapé bennéfis an san Jézi épi an lachè’y, nou ni pou moutwé nou ni lafwa an wanson-an. Èk sé pa tibwen moun ki ni òpòtyounité-a pou twapé sé bennéfis sala!​—Èfés. 1:7.

15-16. Ki lison enpòtan nou apwann an Jan chapit 6?

¹⁵ An Jan chapit 6, nou apwann anpil bagay ki vwéman enpòtan, èk ki ka ankouwajé nou. Pou ègzanp, lè Jézi té an Galili, i djéwi moun ki té malad, i enstwi yo konsèné Wéyòm Bondyé, èk i ba yo sa yo té bizwen pou manjé. (Louk 9:11; Jan 6:2, 11, 12) Sa ka moutwé nou, Jézi ni an chay konpasyon pou moun. Mé sa ki pli enpòtan sé sa, Jézi fè moun konnèt, sé li ki “pen lavi-a.”​—Jan 6:35, 48.

¹⁶ Bon, sé moun-lan Jézi té kwiyé sé ‘lòt mouton-an,’ pa ka manjé pen-an èk bwè diven-an diwan Wipa Senyè-a, èk yo pa ni dwa pou fè sa nonplis. (Jan 10:16) Mé wonnman, yo ka twapé bennéfis an san Jézi épi an lachè’y, lè yo mété lafwa an sakwifis li, èk an sé bèl bagay-la sakwifis li ka pòté. (Jan 6:53) Sé sèlman sé moun-lan ki annonté-a ki ka manjé pen-an èk bwè diven-an diwan Wipa Senyè-a. Sa sé paskè yo an agwéman nèf-la, èk yo ni èspwa pou alé an syèl pou kondwi an Wéyòm-lan. Mé, nou tout bizwen moutwé lafwa an wanson-an pou nou sa twapé lavi étonnèl. Alò, ki nou ni èspwa pou viv asou latè-a ében an syèl, enfòmasyon an Jan chapit 6 ni an chay enpòtans pou nou.