Pouki Non Jéhova Enpòtan Pou Jézi?

1-2. (a) Kisa Jézi té fè swè-a avan i mò? (b) Ki kèstyon nou kay diskité an atik sala?

I SÉTÉ Jédi swè, Nizan katòz «14», lanné twant twa «33» an lépòk nou, lè Jézi té ni an wipa spésyal épi sé zapòt fidèl li-a. Wi, Jézi té sav, touswit Jida té kay twayi’y, èk lèlmi’y té kay fè’y kwiyoté èk tjwé’y. Alò apwé wipa-a, i di sé zapòt li-a bagay pou ankouwajé yo. Èk avan yo kité, Jézi di an lapwiyè ki té byen enpòtan. Nou sa li lapwiyè sala an Jan chapit disèt «17».

² Konsa an atik sala nou ka wè bagay nou sa apwann konsèné lapwiyè Jézi. Pou ègzanp: Kisa ki té asou lidé’y avan i mò? Èk, kisa ki té pli enpòtan pou li, padan i té asou latè-a? Bon, annou diskité sé kèstyon sala. 

‘MWEN FÈ YO KONNÈT NON’W’

3. Lè Jézi di, ‘mwen fè yo konnèt non’w’, kisa sa vlé di? (Jan 17:6, 26 NWT)

³ Lè Jézi té ka pwédyé, dé «2» fwa i di Papa’y: ‘Mwen fè yo konnèt non’w.’ (Li Jan 17:6, 26 NWT.) Bon, ès sa di Jézi té ni pou fè sé disip li-a konnèt non Bondyé sé Jéhova? Ében non. Paski kon Jwif, yo té ha konnèt non Bondyé. Anfen, an sé lévanjil-la sé disip-la té ni-a non Bondyé té la plis pasé sèt mil «7,000» fwa. Konsa lè Jézi di, mwen fè yo konnèt non’w, Jézi té ka palé konsèné sa non Bondyé ka wépwézanté. Wi, i té ka édé sé disip li-a konnèt ki kalté Dyé Jéhova yé. Èvèk i té ka édé yo konnèt Jéhova pli mèyè. Pou ègzanp, i édé yo konnèt kisa Jéhova vlé pou latè-a èk pou lézòm, kisa i ha fè, kisa i vlé fè, èk sé kawaktè’y-la. Anfen Jézi té sa fè sa, paski sé sèlman li ki té konnèt Jéhova si tèlman byen.

4-5. (a) Ki mannyè non yon moun sa vini pli enpòtan pou nou? Ba yon ègzanp. (b) Ki mannyè non Jéhova té vini pli enpòtan pou sé disip Jézi-a?

⁴ Imajiné la ni yon ansyen non’y sé David. I sé an dòktè, èk ou konnèt li pou plizyè lanné. Mé yon jou ou tonbé byen malad èk lavi’w té an danjé. Yo mennen’w lopital-la èk menm ansyen sala fè’w lopowasyon èk sové lavi’w. Apwézan, David sé pa sèlman ansyen-an ou té konnèt avan, mé i sé dòktè-a ki sové lavi’w. Wi, chak kou ou tann non’y, non’y ni pli enpòtans pou ou, paski ou ka chonjé mannyè i sové lavi’w.

⁵ An menm mannyè-a, disip Jézi té ha konnèt Jéhova sé non Bondyé. Kanmenm, non sala té ni pli enpòtans pou yo, paski Jézi édé yo vini konnèt Jéhova pli mèyè. Alò, pouki nou ka di sa? Ében, sa sé paski, Jézi swiv ègzanp Papa’y an tout sa i té ka di èk fè. Konsa, lè sé disip-la té ka kouté sa Jézi té ka enstwi yo, èk yo té ka òbzòvé mannyè Jézi té ka twété lézòt moun, sa édé yo pou vini konnèt Jéhova pli mèyè.​—Jan 14:9; 17:3.

“NONʼW-LAN, MENM NON-AN OU BAN MWEN-AN”

6. Lè Jézi di Jéhova ou ban mwen non’w, kisa sa vlé di? (Jan 17:11, 12)

⁶ Jézi osi pwédyé bay sé disip li-a, i di Papa’y: “Pwotèkté yo èk pouvwa-a ki an nonʼw-lan, menm non-an ou ban mwen-an.” (Li Jan 17:11, 12.) Bon, Ès sa vlé di nou sipozé kouyé Jézi Jéhova? Mé non. Chonjé, lè Jézi palé konsèné non Jéhova i di, “non’w-lan”. Konsa Jézi pa té twapé non-an Jéhova. Alò, lè Jézi di, Bondyé té ba li non’y, kisa i té ka di? Èben pwèmyéman, sé Jéhova ki voyé Jézi pou wépwézanté’y èk pou palé ba li. Wi, Jézi té vini an non Papa’y, èk i té fè an chay miwak an non Papa’y. (Jan 5:43; 10:25) Èk dézyenman, non Jézi vlé di “Jéhova Sé Salvasyon”, alò non-an Jézi, ni on konnèksyon épi non-an Jéhova.

7. Pouki Jézi té sa palé an non Jéhova? Ba yon ègzanp.

⁷ Bon. Pou édé nou kopwann pouki Jézi té sa palé an non Jéhova, katjilé asou ègzanp sala. Kondwitè yon péyi sa voyé an moun pou wépwézanté’y èk palé an non’y. Alò lè moun sala palé, i ni lotowité menm kon kondwitè-a. Èk an menm mannyè-a, Jézi té ni lotowité pou palé an non Jéhova paski sé Jéhova ki voyé’y èk i té ka wépwézanté Jéhova.​—Maf. 21:9; Louk 13:35.

8. Pouki Jéhova di non’y té ‘asou’ Jézi dépi avan Jézi té vini asou latè-a? (Ègzodòs 23:20, 21)

⁸ Bon. Bib-la ka kwiyé Jézi “Pawòl-la” paski Jéhova té sèvi’y kon konmisyonnè’y pou di sé nanj-lan èk lézòm bagay i té vlé yo konnèt èk fè. (Jan 1:1-3) Anfen pitèt Jézi sété nanj-lan Bondyé té sèvi pou otjipé jan Izwayèl an savann sèk-la. Èk lè Jéhova té di jan Izwayèl pou obéyi nanj sala, i di yo pouki yo té ni pou fè sa. I di yo: ‘Paski non mwen asou’y.’a (Li Ègzodòs 23:20, 21.) Wi, non Jéhova té asou Jézi paski i té ka palé an non Jéhova, èk i sé pwensipal moun-lan ki ka moutwé Jéhova sen èk i ka toujou fè sa ki dwèt.

‘PAPA, GLOWIFYÉ NON’W’

9. Pouki nou sa di non Jéhova té enpòtan pou Jézi?

⁹ Kon nou ha diskité, dépi avan Jézi vini asou latè-a, non Jéhova té byen enpòtan pou li. Osi, padan i té asou latè-a, i moutwé ki otan enpòtan non Jéhova té enpòtan pou li an tout sa i té ka fè. Èk lè i té pwèskè fini minis li asou latè-a i di: ‘Papa, glowifyé non’w.’ Èk la menm Papa’y wéponn hòd syèl épi an vwa ki té byen fò èk i di: ‘Mwen ja glowifyé non mwen, èk mwen kay glowifyé’y ankò.’​—Jan 12:28 NWT.

10-11. (a) Ki mannyè Jézi té glowifyé non Jéhova? (Gadé pòtwé-a osi.) (b) Pouki Jézi té ni pou bay pwèv ki, Jéhova té fè tout bagay dwèt èk moun té ni pou pòté non’y gwan wèspé?

¹⁰ Bon. An ki mannyè Jézi té glowifyé non Papa’y? Èben i fè sa lè i di lézòt moun konsèné bèl kawaktè Jéhova èk tout sé bèl bagay-la i ka fè. Mé Jézi té ni pou fè pli pasé sa. I té ni pou bay pwèv ki, Jéhova ha fè tout bagay dwèt èk moun sipozé pòté non’y wèspé. Anfen, Jézi moutwé ki otan enpòtan sa té yé lè i enstwi sé disip li-a pou pwédyé: ‘Papa nou ki an syèl, nou ka pwédyé pou moun pòté non’w gwan wèspé.’​—Maf. 6:9 NWT.

¹¹ Bon. Pouki Jézi té ni pou bay pwèv ki, Jéhova té fè tout bagay dwèt èk moun té ni pou pòté non’y gwan wèspé? Èben sa sé paski, an jaden Édenn Satan té manti asou Jéhova. I di Jéhova sé an mantè èk i pa té vlé Adanm èk Èv enjwi bagay ki bon. (Jen. 3:1-5) Èk lè Satan fè sa, i té ka di Jéhova pa té ka kondwi adan an mannyè ki dwèt. Bon. Sé mansonj sala Satan di asou Jéhova ka fè moun kwè Bondyé pa an bon moun. Osi, pli ta, an tan Jòb, Satan di, moun ka sèvi Jéhova sèlman paski i ka benni yo. Anfen i jis di moun pa vwéman enmen Jéhova, èk si yo èspéyansé difikilté yo té kay doubout sèvi’y. (Jòb 1:9-11; 2:4) Bon, tan té ni pou pasé pou moun sav kilès ki té ka manti, Jéhova èben Satan.

“MWEN PAWÉ POU MÒ”

12. Paski Jézi té enmen non Papa’y, kisa i té pawé pou fè?

¹² Bon. Jézi té pawé pou mò pou bay pwèv ki, Jéhova sen èk tout sa i ka fè dwèt.b (Jan 10:17, 18) Adanm épi Èv té dézobéyi Jéhova èk yo swiv Satan. Mé lè Jézi vini asou latè-a, i obéyi Jéhova an tout sa i té fè èk di. (Hib. 4:15; 5:7-10) Wi, i wèsté fidèl bay Jéhova jis o lanmò’y. (Hib. 12:2) Èk an mannyè sala i bay pwèv ki, i té vwéman enmen Jéhova èk non’y.

13. Pouki Jézi sété pli mèyè moun-lan pou bay pwèv ki Satan sé an mantè? (Gadé pòtwé-a osi.)

¹³ Bon, tout bagay Jézi fè moutwé a klè vyé mantè-a sété Satan èk pa Jéhova! (Jan 8:44) Chonjé Jézi té konnèt Jéhova pli mèyè pasé tout lòt moun. Alò si pyès an sé bagay-la Satan té di konsèné Jéhova té vwé, i té kay sav. Mé Jézi té détèminé pou fè défans wépitasyon Papa’y. Anfen, magwé Jéhova té tiwé pwotèksyon’y asou Jézi, Jézi té pawé pou mò èk wèsté fidèl bay Papa’y.​—Maf. 27:46.c

“MWEN JA FINI TWAVAY-LA OU BAN MWEN FÈ-A”

14. Ki mannyè Jéhova benni Jézi paski i wèsté fidèl?

¹⁴ Swè-a avan Jézi mò i té ka palé bay Papa’y an lapwiyè. Èk i di Papa’y: “Mwen ja fini twavay-la ou ban mwen fè-a.” Bon. Jézi té ni asiwans-lan ki Jéhova té kay benni’y paski i té wèsté fidèl pou li. (Jan 17:4, 5) Wi, Jézi té ni konfyans an Papa’y, èk Jéhova pa té dézapwenté’y. Anfen i wésisité Jézi. (Twav. 2:23, 24) Èk i ba li on pozisyon ki pli ho pasé tout lòt pozisyon an syèl. (Filip. 2:8, 9) Èvèk apwé an tan, i fè Jézi Wa an Gouvèdman’y. Èk an Mafyou 6:10, Jézi enstwi nou pou pwédyé ‘pou gouvèdman sala kondwi latè-a, pou volonté Bondyé fèt asou latè-a menm kon i ka fèt an syèl.’

15. Kisa Jézi kay fè an tan pou vini?

¹⁵ Touswit an ladjè Anmagèdonn, Jézi kay goumen kont lèlmi Bondyé èk détwi yo. (Wév. 16:14, 16; 19:11-16) Apwé sa, Jézi kay jété Satan “an gwo twou-a ki pa ni bout-la”, koté i pa kay sa fè anyen ankò. (Wév. 20:1-3) Èvèk Jézi kay kondwi latè-a pou yon mil lanné «1000», èk i kay mennen lapé asou latè-a èk édé lézòm vini pawfé. Osi i kay wésisité lé mò. Èk i kay fè latè-a vini an bèl Pawadi. Wi, volonté Bondyé kay fèt asou latè-a menm kon i ka fèt an syèl!​—Wév. 21:1-4.

16. Ki mannyè lavi kay yé apwé Jézi kondwi pou Mil Lanné-a?

¹⁶ Bon. Apwé Jézi kondwi pou Yon Mil Lanné, lézòm pa kay ni péché ankò. Konsa, nou pa kay bizwen Jézi kon Chèf Pwèt nou ankò. Èben asistans san kawant kat mil «144,000» pwèt-la ki ka kondwi épi Jézi. An plis di sa, ‘dènyé lèlmi-an lanmò pa kay la ankò’. Èk lé mò kay wésisité. Wi, tout moun asou latè-a kay vini pawfé.—1 Kòr. 15:25, 26.

17-18. (a) Ki lòt bagay ki kay fèt an bout Mil Lanné-a? (b) Kisa Jézi kay fè, lè lè-a wivé pou’y doubout kondwi kon Wa? (1 Kòrint 15:24, 28) (Gadé pòtwé-a osi.)

¹⁷ An bout Mil Lanné-a, an bagay ki byen spésyal kay fèt. Bon, kisa sa yé? Èben chonjé, an jaden Édenn Satan té kwiyé Bondyé an mantè, èk i té di Bondyé pa ka kondwi épi lanmityé. Èk dépi tan sala plizyè sèvant Jéhova ha bay pwèv ki Jéhova sé pli mèyè kondwitè-a. Kanmenm, an bout Mil Lanné-a, tout moun kay pòté non Bondyé gwan wèspé. Èvèk tout moun kay wè a klè Jéhova sé an Papa ki plen lanmityé, i sen, èk tout bagay i ka fè dwèt.

¹⁸ An bout Mil lanné-a, tout moun kay sav tout sa Satan té di asou Jéhova sété mansonj. Bon, kisa Jézi kay fè, lè lè-a wivé pou’y doubout kondwi kon Wa? Ès i kay swiv ègzanp Satan, èk wébèl kont Jéhova? Awa! (Li 1 Kòrint 15:24, 28.) Wi, Jézi kay bay Papa’y Wéyòm-lan déviwé. Èvèk pito Jézi swiv mové ègzanp Satan, i kay abésé kò’y. Èk i kay bay Jéhova tout lotowité’y èk pouvwa’y, paski i enmen Papa’y.

19. Kisa nou apwann an atik sala konsèné Jézi?

¹⁹ Bon. Nou sa konpwann pouki Bondyé mété non’y asou Jézi. Èk sa sé paski, Jézi té wépwézanté’y adan an mannyè ki té pawfé. Anfen, non Jéhova sé bagay-la ki pli enpòtan pou Jézi. Wi, i jis mò pou non sala. Èk i kay abésé kò’y èk bay Papa’y Wéyòm-lan déviwé an bout Mil Lanné-a. Alò, ki mannyè nou sa swiv ègzanp Jézi? Ében nou kay twapé wépons-lan pou kwèsyon sala an lòt atik-la.