Pouki Non Jéhova Enpòtan Pou Nou?

1-2. Ki mannyè nou sav non Jéhova enpòtan pou Jézi?

BON. Non Jéhova byen enpòtan pou Jézi. Anfen, la pa ni pyès lòt moun ki ha fè moun konnèt non Jéhova kon Jézi. Kon nou té wè an atik-la avan, Jézi té pawé pou mò pou moutwé Jéhova sen, èk tout sa Jéhova ka fè dwèt. (Mak 14:36; Hib. 10:7-9) Èk apwé Jézi kondwi pou Mil Lanné-a, i kay bay Papa’y tout lotowité’y èk pouvwa’y déviwé, paski sé Jéhova i vlé twapé tout laglwa-a. (1 Kòr. 15:26-28) Wi, tout sa Jézi ha fè bay Jéhova ka moutwé a klè, i enmen Jéhova an chay.

² Jézi té vini asou latè-a pou di moun tout sé bagay-la Jéhova té vlé yo konnèt. (Jan 5:43; 12:13) Alò, an mannyè sala, i fè sé disip li-a konnèt ki moun Jéhova vwéman yé. (Jan 17:6, 26) Èk lè’y té ka enstwi moun èk fè miwak, i té ka fè’y klè sété Jéhova ki té ka ba’y lasajès-la èk pouvwa-a pou fè sé bagay sala. (Jan 10:25) Anfen, Jézi mandé Jéhova pou pwotéjé sé disip li-a pou ‘lapéti non’y’. (Jan 17:11) Wi, i a klè, non Jéhova té pli enpòtan pou Jézi pasé tout lòt bagay. Alò, ès an moun sa di i sé an Kwityen, si’y pa konnèt ében i pa ka sèvi non Jéhova?

3. Kisa nou kay diskité an atik sala?

³ Bon. Nou sé Kwityen ki vwé. Konsa nou ka swiv ègzanp Jézi, lè nou enmen non Jéhova èk moutwé non-an wèspé. (1 Pita 2:21) Alò an atik sala, nou kay diskité pouki Jéhova ha bay moun ki ka “pwéché Bon Nouvèl-la” non’y? (Maf. 24:14) Èk nou kay osi diskité, ki otan enpòtans non Jéhova sipozé ni pou chak di nou.

‘AN KONPANNI MOUN POU NON’Y’

4. (a) Kisa Jézi di sé disip li-a avan i viwé an syèl? (b) Ki kèstyon nou kay diskité?

⁴ Bon. Djòs avan Jézi viwé an syèl, i di sé disip li-a: “Lè Lèspwi [Bondyé] désann anlèʼw, ou kay wisivwè pouvwa épi ou kay sèvi mwen témwen douvan moun an Jérouzalèm, an tout Joudiya épi Sanmariya épi toupatou an latè-a.” (Twav. 1:8) Wi, sé disip li-a té kay pwéché Bon Nouvèl-la pa sèlman an Izwayèl, mé toupatou an latè-a. Èk sa té kay bay moun tout oliwon latè-a òpòtyounité-a pou vini disip Jézi. (Maf. 28:19, 20) Mé Jézi di sé disip li-a: “Ou kay sèvi mwen témwen.” Bon, ès sa vlé di moun ki vini disip Jézi té kay bay témwenyaj sèlman konsèné Jézi? Ében ès yo té kay ni pou vin konnèt Jéhova, èvèk bay témwenyaj konsèné’y tou? Ében nou kay twapé wépons-lan pou sé kèstyon sala an Twavay chapit 15.

5. Ki mannyè sé zapòt-la èk sé ansyen-an an Jérouzalèm moutwé a klè tout moun té ni pou konnèt non Jéhova? (Gadé pòtwé-a osi.)

⁵ Bon. An lanné kawant nèf «49» an lépòk nou, sé zapòt-la èk sé ansyen-an an Jérouzalèm jwenn ansanm, pou diskité sa moun ki pa Jwif èk ki pa sikonsayz ni pou fè, pou yo sa vini Kwityen. Mé an bout diskasyon-an, tann sa Jémz, fwè Jézi di: ‘Simon Pita ja di nou an détay, mannyè Bondyé tounen antansyon’y asou sé moun-lan ki pa Jwif-la, pou chwazi anpami yo an konpanni moun pou non’y.’ Bon. Non ki moun Jémz té ka palé konsèné-a? Ében Jémz di sa pwofèt Amòs té ékwi, i di: ‘Pou sé moun-lan ki wété-a chaché pou Jéhova épi tout tjè yo ansanm épi sé moun-lan ki pa Jwif-la ki ka pòté non mwen. Sé sa Jéhova ki ka fè tout sé bagay sala di.’ (Twav. 15:14-18 NWT) Konsa, sa ka moutwé a klè, sé disip nèf-la pa té kay sèlman apwann konsèné Jéhova, mé yo té kay osi ‘pòté non’y’. Sa vlé di, yo té kay fè moun konnèt non Bondyé, èk moun té kay konnèt yo kon moun ki ka wépwézanté non sala.

6-7. (a) Pouki Jézi vini asou latè-a? (b) Kisa ki pli gwo wézon-an Jézi vini asou latè-a?

⁶ Bon. Non-an Jézi vlé di “Jéhova sé Salvasyon”. Alò, Jéhova ka sèvi Jézi pou sové tout moun ki mété lafwa ni an li ni an Jézi. Wi, Jézi vini asou latè-a pou bay lavi’y pou sové lézòm. (Maf. 20:28) Èk an mannyè sala, i fè’y posib pou lézòm twapé pawdonnasyon pou péché yo, èk pou twapé lavi étonnèl.​—Jan 3:16.

⁷ Mé pouki lézòm té bouzwen wanson-an? Èben sa sé paski Adanm épi Èv té dézobéyi Jéhova, èk yo té pèd òpòtyounité-a pou viv pou tout tan, èvèk a kòz di sa tout désandan yo éwityé péché èk lanmò. (Jen. 3:6, 24) Mé kanmenm, Jézi vini asou latè-a pou fè an bagay ki té jis pli enpòtan pasé pou sové lézòm. Chonjé, Satan té manti asou Jéhova. (Jen. 3:4, 5) Konsa, pli gwo wézon-an Jézi vini asou latè-a, sété pou fè volonté Bondyé, èk pou fè lézòm konnèt Bondyé pa té fè anyen mové. Wi, Jéhova sé an Dyé ki sen èk an Papa ki plen lanmityé.

8. Kisa tout Kwityen té ni pou aksèpté?

⁸ Bon. Tout moun ki té vini disip Jézi, té ni pou aksèpté Sous salvasyon yo sé Jéhova, Papa Jézi. (Jan 17:3) Èvèk menm kon Jézi, yo té kay ni pou pòté non Jéhova. Èk yo té kay ni pou konpwann ki otan enpòtan i yé pou wèspèkté non sala. Anfen, salvasyon yo ka dépan asou sa. (Twav. 2:21, 22) Alò, tout Kwityen ni pou apwann konsèné ni Jéhova ni Jézi. Konsa nou sa konpwann pouki Jézi fini lapwiyè’y an Jan chapit disèt «17» épi sé pawòl sala: ‘Mwen fè yo konnèt non’w, èk mwen kay kontiné fè yo konnèt li, pou yo enmen yonn a lòt menm kon ou enmen mwen, èk pou mwen menm sa an lilyon épi yo.’​—Jan 17:26 NWT.

‘ZÒT SÉ TÉMWEN MWEN’

9. Si nou vlé swiv Jézi, kisa nou ni pou fè?

⁹ Si nou vlé swiv Jézi, nou ni pou wèspèkté non Jéhova. (Maf. 6:9, 10) Anfen, non Jéhova sipozé pli enpòtan non-an pou nou. Èk nou ni pou moutwé sa. Mé ki mannyè nou sa wèspèkté non Bondyé èk moutwé sa Satan di konsèné’y pa vwé?

10. Kisa nou ka li konsèné an Izaya chapit 42 pou 44? (Izaya 43:9; 44:7-9) (Gadé pòtwé-a osi.)

¹⁰ Bon. An liv Izaya chapit kawant dé «42» pou kawant kat «44», nou ka li konsèné sa nou sa fè pou wèspèkté non Bondyé. An sé chapit sala, Jéhova ka mandé sé moun-lan ki pa ka adowé’y, pou bay èvidans pou moutwé dyé yo wéyèl. Èk menm kon moun ka mandé pou témwen an lodyans, Bondyé mandé yo si la ni pyès témwen ki sa bay èvidans dyé yo wéyèl. Mé la pa té ni pyès!​—Li Izaya 43:9; 44:7-9.

11. Kisa Jéhova di pèp li an Izaya 43:10-12?

¹¹ Li Izaya 43:10-12. Wi, Jéhova di pèp li: ‘Zòt sé témwen mwen èk sé mwen ki Bondyé.’ Alò Jéhova ka mandé yo pou wéponn kèstyon sala: ‘Apa di mwen, ès la ni pyès lòt Dyé’? (Izay. 44:8) Konsa nou ni gwan lonnè-a pou wéponn kèstyon sala. Alò, pa sa nou di èk sa nou fè nou ka moutwé a klè Jéhova sé sèl Dyé vwé-a, èk non’y anho tout lòt non. Èvèk nou ka osi moutwé nou vwéman enmen Jéhova èk nou kay wèsté fidèl pou li menm si Satan vlé doubout nou. Èk an sé mannyè sala nou ka moutwé non Bondyé gwan wèspé.

12. Ki mannyè pwofèsi-a an Izaya 40:3, 5 té fèt vwé?

¹² Bon, pwòfèt Izaya té di: ‘On moun [té kay] pwépawé wout-la pou Jéhova!’ (Izay. 40:3) Alò, ki mannyè sa té fèt? Èben sa té fèt lè Jan Batis té pwépawé sé moun-lan pou aksèpté Jézi. Kanmenm chonjé, Jézi té vini an non Jéhova èk i té palé an non Jéhova. Alò lavéwité-a sé sa: Jan té ka pwépawé wout-la pou Jéhova. (Maf. 3:3; Mak 1:2-4; Louk 3:3-6) Bon. Pwòfèt Izaya té osi di: ‘Moun kay vini konnèt laglwa Jéhova.’ (Izay. 40:5) Alò ki mannyè sa té fèt? Èben sa té fèt vwé lè Jézi té vini asou latè-a. Wi, Jézi té swiv ègzanp Papa’y si tèlman byen, sé konmsi sété Jéhova menm ki té asou latè-a. Konsa lè moun vini konnèt Jézi, sé konmsi yo té ka vini konnèt laglwa Jéhova. (Jan 12:45) Alò annou kontiné swiv ègzanp Jézi, èk pòté non Bondyé wèspé.

13. Ki mannyè nou sa swiv ègzanp Jézi?

¹³ Wi, nou sé témwen Jéhova menm kon Jézi. Osi, nou ka pòté non Jéhova, èk nou ka di tout moun konsèné sé bon bagay-la i ha fè-a. Kanmenm, pou nou sa bay an bon témwenyaj konsèné Jéhova nou osi vlé di moun tout sé bagay-la Jézi ha fè pou onnowé non Jéhova. (Twav. 1:8) Chonjé, la pa ni pyèsonn ki ja bay an pli mèyè témwenyaj konsèné Jéhova pasé Jézi. (Wév. 1:5) Kanmenm an ki lòt mannyè nou sa moutwé non Jéhova enpòtan pou nou?

LÒT MANNYÈ NOU SA MOUTWÉ NON JÉHOVA ENPÒTAN POU NOU

14. Silon Sam 105:3, pouki nou si tèlman kontan pou pòté non Jéhova?

¹⁴ Nou kontan pou pòté non Jéhova. (Li Sam 105:3.) Pa dé kontan Jéhova ka kontan lè nou ka bavadé konsèné’y. (Jér. 9:23, 24; 1 Kòr. 1:31; 2 Kòr. 10:17) Èvèk i sé an lonnè pou di lézòt Jéhova sen. Konsa nou pa janmen vlé santi hont pou di moun nou ka twavay épi, moun nou ka alé lékòl épi, sé vwézinaj nou-an èben lézòt moun nou sé Témwen Jéhova! Bon. Satan pa vlé nou di moun konsèné Jéhova. (Jér. 11:21; Wév. 12:17) Anfen, Satan èk sé fo pwòfèt li-a vlé fè moun obliyé non Jéhova. (Jér. 23:26, 27) Mé paski nou enmen Jéhova nou ka kontiné wéjwi an non’y ‘tout lajounen’. ​—Sam 5:11; 89:16.

15. Kisa i vlé di pou kwiyé asou non Jéhova?

¹⁵ Nou ka kontiné kwiyé asou non Jéhova. (Jow. 2:32; Ronm 10:13, 14) Pou kwiyé asou non Jéhova vlé di plis pasé pou konnèt non-an Jéhova èk pou sèvi non-an. Nou ni pou vin konnèt Jéhova kon an Dyé ki ni santiman èk bèl kawaktè, èk nou ni pou dévlopé an bon wilasyon épi’y. Osi, lè nou ka kwiyé asou non Jéhova nou ka apwann pou konfyé’y èk nou ka dépan asou’y pou édé èk djidé nou. (Sam 20:7; 99:6; 116:4; 145:18) An plis di sa, nou ka di lézòt konsèné non’y èk kawaktè’y, èk nou ka édé yo pou chanjé lavi yo pou yo sa plè Jéhova èk twapé lavi étonnèl.​—Izay. 12:4; Twav. 2:21, 38.

16. Ki mannyè nou sa moutwé Satan sé an mantè?

¹⁶ Nou pawé pou soufè pou bay non Jéhova laglwa. (Jémz 5:10, 11) Lè nou ka soufè èk nou ka wèsté fidèl bay Jéhova, sa ka moutwé Satan sé an vyé mantè. Chonjé, an tan Jòb Satan di: ‘Dépi yon moun wè lanmò douvan’y, i kay bay tout sa i ni pou sové lavi’y.’ (Jòb 2:4) Wi, Satan di, nou ka sèvi Jéhova sèlman lè bagay ka alé byen ban nou. Mé si nou ka èspéyansé difikilté nou kay abandonnen’y. Kanmenm Jòb moutwé Satan té ka manti. Èk jòdi jou menm si nou ka èspéyansé difikilté èben Satan ka éséyé dékouwajé nou, nou osi kay kontiné sèvi Jéhova. Wi, nou ni konfyans-lan ki, Jéhova kay gadé apwé nou paski nou ka fè bagay ki ka bay non’y laglwa.​—Jan 17:11.

17. Silon 1 Pita 2:12, an ki lòt mannyè nou sa bay non Jéhova laglwa?

¹⁷ Nou ka fè tout sa nou pé pou bay non Jéhova laglwa. (Pwov. 30:9; Jér. 7:8-11) Chonjé, paski nou ka wépwézanté Jéhova èk nou ka pòté non’y, sa nou fè sa swé bay Jéhova laglwa èben sali non’y. (Li 1 Pita 2:12.) Konsa menm si nou pa pawfé, nou vlé glowifyé Jéhova an tout sa nou ka fè èk di.

18. An ki lòt mannyè nou sa moutwé non Jéhova enpòtan pou nou? (Gadé nòt-la an bout paj-la osi.)

¹⁸ Nou ka onnowé non Jéhova menm si moun pa enmen sa. (Sam 138:2) Byen souvan lè nou ka fè bagay ki ka plè Jéhova, moun pa ka enmen sa, èk yo ka jis di bagay mové asou nou.a Pou ègzanp, Jézi té sav moun té ka di mové bagay konsèné’y, èk mannyè-a i té kay mò, moun té kay gadé’y kon on kwiminèl. Mé i té pawé pou mò pou glowifyé non Papa’y. Wi, Jézi pa té anbété kò’y konsèné sa moun té ka di konsèné’y. (Hib. 12:2-4) Sèl sa i té vlé fè sété pou plè Papa’y. (Maf. 26:39) Èvèk menm kon Jézi, nou vlé onnowé non Jéhova pito nou fiksé asou sa moun ka di konsèné nou.

19. Ki mannyè ou ka santi konsèné non Jéhova èk pouki?

¹⁹ I sé an lonnè pou nou sèvi Jéhova èk pou moun konnèt nou kon Témwen Jéhova. Anfen paski non Jéhova si tèlman enpòtan pou nou, nou kay kontiné glowifyé’y menm si moun ka kwititjé nou. Èk menm si Satan ka éséyé dékouwajé èk doubout nou, annou fè lidé nou pou kontiné glowifyé Jéhova. Èvèk si nou fè sa nou kay moutwé a klè, non Jéhova enpòtan pou nou menm kon i enpòtan pou Jézi.