Mannyè Liv Jòb Sa Édé Nou Lè Nou Ka Bay Konsèy

1-2. Lè sé twa «3» nonm-lan wè kondisyon Jòb, ès i té ézé pou yo ankouwajé’y, èk pouki?

LÈ JÒB pèd tout wichès li, nouvèl sala simen toupatou, èk an chay moun vini konnèt sa. Konsa twa «3» jan Jòb kité plas yo, èk yo alé an vil Òz pou wè Jòb èk pou ba’y on ti ankouwajman. Non sé twa «3» nonm sala sété Élifaz, Bildad, épi Zofa. Mé lè yo wivé èk yo wè kondisyon Jòb, yo wété bouch gwan ouvè.

² Paskè chonjé, Jòb té pèdi tout sé mouton-an, sé bèf-la, sé kanmèl-la, épi sé bouwik-la i té ni-an. Pwèskè tout sé sèvant li-a té mò, èk tout dis «10» ich li mò ansanm. Anfen, sé twa «3» jan’y-lan té sa jis wè kay-la ki té tonbé asou sé ich-la. Èk akwèdi sa pa té asé, Jòb té la ka soufè anba on mové maladi. Maladi-a té ka fè klou sòti toupatou asou kò’y, èk sé pa dé doulè sa té ka ba’y. Èk Jòb té ka gadé byen dékouwajé, koté i té asid atè-a an sann difé. Mé lè sé twa «3» nonm-lan wè kondisyon Jòb, kisa ou kwè yo fè? Ében, yo asid atè-a épi Jòb pou sèt «7» jou, mé yo pa di’y yon mo pawòl. (Jòb 2:12, 13) On jenn nonm yo té ka kwiyé Ilayou té vini wè Jòb osi, èk i asid toupwé sé twa «3» nonm-lan. Finalman, sé Jòb ki koumansé palé. Mé i té ni tèlman soufwans épi lapenn, i té ka mandé pou mò. I jis di, simyé i pa té janmen fèt. (Jòb 3:1-3, 11) Bon, sé twa «3» nonm-lan té adan on bon pozisyon pou bay Jòb ankouwajman-an i té bizwen-an. Mé annou wè kisa yo fè.

3. Kisa nou kay diskité an atik sala?

³ Jéhova fè Moziz ékwi sa sé twa «3»nonm-lan épi Ilayou té fè, èk sa yo té di Jòb. Bon, sa Ilayou té di, sété bagay Jéhova té vlé’y di. Mé, i sanm sé on vyé lèspwi ki fè Èlifaz di adan sé bagay-la i té di-a. (Jòb 4:12-16; 33:24, 25) Sé sa ki fè nou sa di, la ni moun ki bay an chay bon konsèy an liv Jòb, mé la ni moun ki bay mové konsèy osi. Konsa, an atik sala nou kay diskité mannyè liv Jòb ka édé nou pou konnèt kisa pou nou di, èk kisa nou pa sipozé di lè nou ka bay on moun konsèy. Èk sa sé yonn an sé pli bèl bennéfis-la nou sa twapé an liv sala. Mé pwèmyéman, nou kay diskité ègzanp sé twa «3» nonm-lan. Èk apwé sa, nou kay diskité bon ègzanp-lan Ilayou kité ban nou. Nou kay osi wè sé bennéfis-la jan Izwayèl té sa twapé an liv Jòb, èk sé bennéfis-la nou menm sa twapé an liv sala.

MANNYÈ SÉ TWA «3» NONM-LAN TÉ BAY JÒB KONSÈY

4. Pouki nou sa di, sé twa «3» nonm-lan pa té ankouwajé Jòb? (Gadé pòtwé-a osi.)

⁴ Kon nou ja di, lè sé twa «3» nonm-lan tann sa ki té wivé Jòb, yo alé wè’y pou yo ba’y on ti ankouwajman. (Jòb 2:11) Èk Jòb té byen bizwen ankouwajman-an. Mé lè yo wivé, pito yo ankouwajé’y, yo dékouwajé’y. Anfen, annou gadé yonndé bagay yo fè ki pa té bon. Pwèmyéman, lè yo wè sitiwasyon’y, andji pou yo kouté Jòb èk éséyé pou konpwann katjil li épi santiman’y, yo té ja fè lidé yo sé Jéhova ki té ka pini’y.a (Jòb 4:7; 11:14) On lòt bagay yo fè ki dékouwajé Jòb sé sa, yo sèvi an chay bèl pawòl ki té plen lasajès. Mé sé pa sa Jòb té bizwen tann a lè-a. Yo osi di’y an chay bagay ki blésé tjè’y. (Jòb 13:12) Pou ègzanp, Bildad di’y, i té ka palé twòp. (Jòb 8:2; 18:2) Èk Zofa di’y, i menm kon on moun ki pa ni sèvèl, èk ki pa ka konpwann. (Jòb 11:12) Bon, pitèt sé twa «3» nonm-lan pa té hélé dèyè Jòb. Mé an mannyè-a yo palé ba li, èk an sé bagay-la yo di’y, yo fè’y santi akwèdi i pa té vo anyen. Èk yo pa moutwé lanmityé épi wèspé pou li non plis. (Jòb 15:7-11) Anfen, pito sé nonm-lan gadé pou wè kisa yo té sa fè pou ankouwajé Jòb èk fòtifyé lafwa’y, yo té ka éséyé pou moutwé, Jòb té fè bagay ki pa bon.

5. Lè sé twa «3» nonm-lan fini palé, ki mannyè Jòb té ka santi?

⁵ Bon, sé twa «3» nonm-lan té di Jòb an chay bagay ki pa té an ling épi katjil Jéhova. Èk yo pa té twété Jòb épi konpasyon non plis. Imajiné sa: Yo té vini pou ankouwajé Jòb, mé yo kité Satan sèvi yo pou dékouwajé’y. (Jòb 2:4, 6) Èk pli yo akizé Jòb, sé pli i éséyé pou fè yo konpwann, i té inosan. Konsa lè yo fini palé, Jòb té pli dékouwajé pasé avan. Anfen, i mandé yo pou ki mizi tan yo té kay kontiné dékouwajé’y épi pawòl yo. (Jòb 19:2) Èk nou sa konpwann sa. Nou sa osi konpwann pouki Jòb té di yonndé bagay i pa té sipozé di. (Jòb 6:3, 26) Mé ki mannyè wakont sala té sa édé jan Izwayèl, èk ki mannyè i sa édé nou jòdi jou?

6. Kisa sé ansyen-an an Izwayèl té sa apwann an wakont Jòb?

⁶ Sé bennéfis-la jan Izwayèl té sa twapé. Lè Jéhova bay nasyon Izwayèl Lwa-a, i apwenté sé ansyen-an pou jijé pèp-la, èk pou édé yo obéyi lwa’y. (Dito. 1:15-18; 27:1) Konsa, sé ansyen-an an Izwayèl té ni on gwo wèskonsabilité asou zépòl yo. Pou ègzanp lè yo té ni pou jijé on kés, avan yo té sa pasé jijman ében bay sé moun-lan konsèy, yo té ni pou pwan tan pou byen kouté kés-la. (2 Kw. 19:6) Èk yo té ni pou mandé bon kwèstyon pou fè asiwé yo té ni enfòmasyon ki té aplon konsèné kés-la. (Dito. 19:18) Bon, lè sé moun-lan té vini oti yo pou èd, sé ansyen-an té ni pou palé adan on mannyè ki té janti èk wèspèktab. Èk sa sété on bagay ki té byen enpòtan, paskè si yo pa té fè sa, sé moun-lan pa té kay santi konfòtab pou palé épi yo. (Ègz. 22:22-24) Mé liv Jòb ka moutwé nou mannyè pou fè tout sé bagay sala. Konsa, si sé ansyen-an té pwan tan pou ègzanminé wakont Jòb, èk yo té éséyé pou sèvi sé bèl lison-an ki adan’y, yo té kay sa fè twavay yo byen konmifo.

7. Apa di sé ansyen-an an Izwayèl, ki moun ankò ki té sa bay konsèy, èk kisa yo té sa apwann an wakont Jòb? (Pwovèb 27:9)

⁷ Mé kanmenm, sé pa sé ansyen-an tousèl ki té sa bay konsèy. Vwéman, tout moun an nasyon Izwayèl—jenn kon gwan, èk nonm kon madanm—yo tout té sa bay on jan konsèy pou édé moun-lan vansé pli pwé Jéhova, ében pou kowijé’y. (Sam 141:5) Wi, kon Bib-la ka moutwé, moun ki bon jan ka toujou pawé pou ba yonn a lòt bon konsèy. (Li Pwovèb 27:9.) Mé, si jan Izwayèl té katjilé asou mannyè-a sé twa «3» nonm-lan té palé épi Jòb, yo té sa apwann kisa pou yo pa di, èk kisa pou yo pa fè, lè yo ka bay on moun konsèy.

8. Lè nou ka bay on moun konsèy, kisa i bon pou nou chonjé? (Gadé sé pòtwé-a osi.)

⁸ Sé bennéfis-la nou sa twapé. Nou enmen sé fwè èk sè nou-an an chay. Konsa lè yo ka soufè, nou vlé soulajé yo èk nou toujou pawé pou fè tout sa nou pé pou édé yo. Mé si nou twété yo menm mannyè-a sé twa «3» nonm-lan té twété Jòb, nou pa kay soulajé yo. Konsa annou konsidiwé yonndé ti pwen i bon pou nou chonjé, lè nou ka bay on moun konsèy. Pwèmyéman, avan nou bay on moun konsèy, nou ni pou pwan tan pou byen kouté moun-lan. Èk nou ni pou fè asiwé, sa nou konnèt konsèné sitiwasyon-an sé enfòmasyon ki aplon. Dézyenman, pito pou nou annèk bay moun-lan lopinyon nou, kon Èlifaz té fè plizyè fwa, nou ni pou fè asiwé nou bazé konsèy-la nou ka bay-la asou Pawòl Bondyé. (Jòb 4:8; 5:3, 27) Twazyenm bagay-la nou ni pou chonjé sé sa, nou pa sipozé di anyen ki sa blésé santiman moun-lan, ében fè’y santi hont. Paskè, sé twa «3» nonm-lan té di Jòb yonndé bagay ki té vwé. Anfen pli ta, zapòt Pòl té jis sèvi adan sé pawòl-la Èlifaz té sèvi-a. (Gadé Jòb 5:13 épi 1 Kòrint 3:19.) Mé pwèskè tout sa yo té di konsèné Jéhova sété mansonj. Èk Jéhova di yo, yo pa té palé lavéwité-a. (Jòb 42:7, 8) Konsa, lè nou ka bay on moun konsèy, sé pa pou nou janmen fè akwèdi Jéhova sé on Dyé ki pa wézonnab. Èk sé pa pou nou janmen fè moun-lan santi akwèdi Bondyé pa enmen yo. Bon, apwézan annou wè kisa nou sa apwann an ègzanp Ilayou.

MANNYÈ ILAYOU TÉ BAY JÒB KONSÈY

9. Pouki sé twa «3» nonm-lan pa té ankouwajé Jòb, èk kisa Jéhova té fè pou édé’y?

⁹ Sé pa dé chikannen Jòb épi sé twa «3» jan’y-lan chikannen. Yo palé si tèlman, sé bagay-la yo di-a té asé pou plen vent wit «28» chapit an Bib-la. Èk an chay an sé bagay-la yo té di-a té ka moutwé, yo té byen faché. Wi, sé twa «3» nonm-lan té palé an chay. Mé wannman, Jòb pa té twapé ankouwajman-an, soulajman-an, épi kowijman-an i té bizwen. Konsa, kisa Jéhova fè pou édé Jòb? Ében Jéhova sèvi Ilayou pou bay Jòb konsèy. Mé, pouki Ilayou pwan tèlman tan avan i koumansé palé? Mi sé sa i di sé nonm-lan: “Mwen sé on jenn moun, èk zòt sé gwan nonm. Konsa, mwen ni wèspé pou zòt. Sé sa ki fè mwen tjébé dèyè, èk mwen pa pwan chans-lan pou di zòt sa mwen konnèt.” (Jòb 32:6, 7) Souvan, moun ki an laj ni pli lasajès épi pli èspéyans an lavi pasé jenn moun. Ilayou té konnèt sa. Konsa i pa té twò pwésé pou palé. Mé apwé i kouté sa Jòb épi sé jan’y-lan té ka di-a, i pa té sa tjenn ankò. I di yo: “Sé pa laj tousèl ki ka fè on moun ni lasajès. Ni sé pa gwan nonm tousèl ki ka konpwann sa ki dwèt.” (Jòb 32:9) Bon, kisa Ilayou di ankò, èk ki mannyè i palé lè’y té ka kowijé Jòb?

10. Kisa Ilayou té fè avan’y té bay Jòb konsèy? (Jòb 33:6, 7)

¹⁰ Avan Ilayou koumansé bay Jòb konsèy, i fè’y santi konfòtab. Ki mannyè i fè sa? Ében Bib-la ka di, Ilayou té byen faché lè’y tann sé kalité bagay-la Jòb épi sé twa «3» jan’y-lan té ka di-a. (Jòb 32:2-5) Konsa pwèmyé bagay i fè sé sa, i pwan tan pou bésé kòlè’y. Sé sa ki fè i té sa palé épi Jòb adan on mannyè ki té dous èk janti. Wi, i abésé kò’y èk i palé épi Jòb kon on bon jan. Pou ègzanp, i di Jòb: “Gadé! Douvan Bondyé, mwen sé on nonm menm kon ou.” (Li Jòb 33:6, 7.) On lòt bon bagay Ilayou té fè sé sa, i moutwé Jòb i té ka byen kouté’y. Anfen, i jis wépété yonndé an sé gwo pwen-an Jòb té fè lè’y té ka palé. (Jòb 32:11; 33:8-11) Èk i fè pwèskè menm bagay-la lòt kou-a i té ka bay Jòb konsèy.​—Jòb 34:5, 6, 9; 35:1-4.

11. Ki bon bagay Ilayou fè lè’y té ka kowijé Jòb? (Jòb 33:1)

¹¹ La ni an chay bon lison nou sa apwann an mannyè-a Ilayou té kowijé Jòb. Pwèmyéman, i pa janmen fè Jòb santi akwèdi i pa té vo anyen. Pito sa, i moutwé Jòb wèspé, èk i adwésé Jòb pa non’y. Sé twa «3» nonm-lan pa té fè sa. (Li Jòb 33:1.) San dout, Ilayou chonjé mannyè i menm té anvi palé lè Jòb épi sé twa «3» jan’y-lan té la ka chikannen. Konsa i bay Jòb chans pou palé. (Jòb 32:4; 33:32) On lòt bon bagay Ilayou fè sé sa, i moutwé Jòb sé wézon-an pouki adan sé bagay-la li Jòb té di-a pa té bon, èk i fè Jòb chonjé an chay bon bagay konsèné Jéhova. Bagay tèl kon, kantité lasajès, pouvwa, èk lanmityé fidèl Jéhova ni, èk mannyè Jéhova ka toujou fè sa ki dwèt. (Jòb 36:18, 21-26; 37:23, 24) Mé Ilayou fè sa adan on mannyè ki té byen janti. Konsa Ilayou kalmé Jòb èk san dout, i fè’y pli ézé pou Jòb aksèpté lòt konsèy Jéhova té kay ba li. (Jòb 38:1-3) Mé, ki mannyè ègzanp Ilayou té sa édé jan Izwayèl an tan pasé, èk ki mannyè i sa édé nou jòdi jou?

12. Kisa Jéhova té ka sèvi sé pwofèt-la pou fè bay pèp li, èk kisa sé pwofèt-la èk anfen tout jan Izwayèl té sa apwann an ègzanp Ilayou?

¹² Sé bennéfis-la jan Izwayèl té sa twapé. Jéhova té ka sèvi sé pwofèt-la pou enstwi jan Izwayèl èk pou kowijé yo. Pou ègzanp, la té ni on madanm yo té ka kwiyé Dèbra, èk i té ka wann sèvis kon yon pwofèt diwan tan sé jij-la. Jéhova sèvi Dèbra sala pou bay pèp li bon diwèksyon. Osi, dépi Sanmyèl té on jenn tibway, Jéhova koumansé sèvi’y pou enstwi jan Izwayèl. (Jij 4:4-7; 5:7; 1 Sm 3:19, 20) Èk diwan tan-an sé wa-a té ka kondwi an Izwayèl, Jéhova sèvi sé pwofèt-la pou édé pèp-la adowé’y an mannyè-a yo té sipozé adowé’y. Èk lè sé moun-lan té dézobéyi Jéhova, i té ka voyé sé pwofèt-la pou kowijé yo. (2 Sm 12:1-4; Twav. 3:24) Konsa, sé pwofèt-la té ni gwo wèskonsabilité. Mé, si sé pwofèt-la èk anfen tout jan Izwayèl té konsidiwé ègzanp Ilayou, yo té kay apwann kisa pou di, èk ki mannyè pou palé lè yo ka kowijé on moun, ében lè yo ka bay konsèy.

13. Ki bennéfis nou sa twapé an ègzanp Ilayou?

¹³ Sé bennéfis-la nou sa twapé. Ében adan on mannyè nou sa di, Kwityen ki vwé ka fè on twavay menm kon sé pwofèt-la. Paskè, nou ka sèvi Bib-la pou édé moun konnèt Bondyé, èk nou ni wèskonsabilité-a pou ankouwajé èk konsolé yonn a lòt. (1 Kòr. 14:3) Bon délè, lè on moun ni tèt cho ében yo dékouwajé, yo ka di népòt sa ki vini an lidé yo. Konsa sé ansyen-an ni pou pwan bon pokosyon épi pawòl yo, sitou lè yo ka palé épi on fwè ében on sè ki dékouwajé. (1 Tèsa. 5:14; Jòb 6:3) Mé, si nou swiv ègzanp Ilayou, nou kay apwann mannyè pou sèvi bèl ti pawòl pou ankouwajé, èk fòtifyé sé fwè èk sè nou-an.

14-15. Ki mannyè sé ansyen-an sa swiv ègzanp Ilayou, lè yo ka palé épi on moun ki dékouwajé?

¹⁴ Bon, annou di, dé «2» ansyen alé wè on sè ki dékouwajé. Paditan yo ka palé épi sè-a i di yo kon sa, magwé i ka pwéché èk i ka atandé tout sé mitin-lan, i pa ni tjè kontan. Kisa sé fwè-a kay fè lè yo tann sa?

¹⁵ Ében pwèmyé bagay-la yo kay fè sé sa, yo kay fè tout sa yo pé pou yo konpwann sitiwasyon sè-a. Konsa, yo pé mandé’y yonndé kwèstyon, èk yo kay pwan tan yo pou byen kouté sa sè-a ka di. Pitèt yo kay apwann, sè-a ka santi i pa vo anyen, èk i ka kwè Jéhova pa enmen’y. Ében pitèt yo kay wè, sè-a twakasé paskè lavi’y tèlman wèd. (Louk 21:34) Dézyenman, sé ansyen-an kay félicité sè-a pou éfò-a i ka fè pou atandé sé mitin-lan, pou pwéché, èk pou lòt bon bagay i ka kontiné fè, magwé i dékouwajé. Twazyenm bagay-la sé fwè-a kay fè sé sa, apwé yo byen konpwann sitiwasyon sè-a, yo kay sèvi Bib-la pou ankouwajé’y, èk pou fòtifyé konfyans li ki, Jéhova enmen’y an chay.​—Gal. 2:20.

KONTINÉ APWANN SÉ BÈL TI LISON-AN KI AN LIV JÒB

16. Ki mannyè nou sa kontiné jwenn bennéfis an liv Jòb?

¹⁶ Mi bèl lison nou apwann an liv Jòb! Pou ègzanp, an atik-la avan sala, nou apwann wézon-an pouki Bondyé ka pèwmité soufwans, èk mannyè nou sa kontiné tjébé fò lè nou anba soufwans. Èk an atik sala nou apwann kisa pou nou di, èk ki mannyè pou nou palé, lè nou ka bay on moun konsèy. Konsa, ki mannyè nou sa kontiné jwenn bennéfis an liv Jòb? Ében, avan nou bay on moun konsèy, i kay bon pou nou wivizé sé bèl lison-an nou apwann an liv sala. Èk si’y ni tjèk tan dépi ou li liv Jòb, nou ka ankouwajé’w pou fè sa. Ou sa asiwé, la ni an chay lòt bèl lison ou kay apwann an liv Jòb.