Mannyè Liv Jòb Sa Édé Nou Pou Tjébé Fò Lè Nou Ka soufé

1-2. Pouki i bon pou nou li ében kouté liv Jòb?

LIV JÓB té ékwi plizyè mil lanné ki pasé. Mé magwé sa, an chay moun ka di, sa sé yonn an sé pli mèyè liv-la ki janmen ékwi. Èk yo ka glowifyé moun-lan ki ékwi’y, paskè i sèvi bèl ti pawòl ki senp èk ki ézé pou konpwann. Ében sé Moziz ki té ékwi liv Jòb. Mé vwéman, sé Jéhova ki méwité tout lonnè-a, paskè sé li ki bay Moziz enfòmasyon-an èk pouvwa-a, pou ékwi bèl liv sala.​—2 Tim. 3:16.

² Bon, liv Jòb sé on liv ki byen enpòtan an Bib-la. Pouki nou ka di sa? Ében pwèmyéman, silon sa ki an liv sala, tout moun ki asou latè, èk tout sé nanj-lan ni on dizisyon pou fè. Wi, yo ni pou désidé si yo kay kité lanmityé pou Jéhova pousé yo pou sèvi’y èk défann non’y, opa. Èk sa sé pli enpòtan dizisyon-an nou ni pou fè. Dézyènman, liv Jòb ka édé nou pou konpwann ki kalité moun Jéhova yé. Pou ègzanp i ka moutwé, Jéhova sé on Dyé ki ni an chay lanmityé, lasajès, épi pouvwa, èk i sé on Dyé ki jis. Osi, liv Jòb ka kwiyé Jéhova Dyé Toupisan-an plizyè, plizyè fwa. Èk liv sala ka ban nou sé wépons-lan pou an chay kwèstyon ki asou lidé moun. Kwèstyon tèl kon, pouki Bondyé ka pèwmité nou pou soufé?

3. Kisa nou sa apwann an liv Jòb?

³ Lè nou ka li ében kouté liv Jòb, sé akwèdi nou asou on montany. Paskè, lè’w anlè tèt on montany, ou adan on bon pozisyon pou’w wè tout sa ki oliwon’w a klè. An menm mannyè-a, liv Jòb ka édé nou pou wè soufwans épi lòt difikilté an mannyè-a nou sipozé wè yo. Sa vlé di, i ka édé nou pou gadé sé bagay sala menm mannyè-a Jéhova ka gadé yo. Konsa annou wè ki mannyè liv Jòb sa édé nou lè nou ka soufé. Nou kay wè sé bennéfis-la jan Izwayèl té sa twapé an listwa Jòb, èk sé bennéfis-la nou menm sa twapé. Osi, nou kay wè mannyè nou sa sèvi sa nou apwann an liv Jòb pou édé lézòt.

JÉHOVA PÈWMITÉ JÒB POU SOUFÈ

4. Ki gwo diféwans la té ni ant Jòb épi sé jan Izwayèl-la ki té an Éjip?

⁴ Jòb té ka viv diwan tan-an jan Izwayèl té anba èslavaj an péyi Éjip. I té ka wèsté an péyi Òz. Èk i sanm, péyi sala té toupwé Tè Pwonmèt-la asou kouté sòlèy lévan. Mé la té ni on gwo diféwans ant Jòb épi sé jan Izwayèl-la ki té an Éjip. Paskè, lè jan Izwayèl té an Éjip, adan di yo té ka adowé fo dyé. Mé Jòb pa janmen adowé fo dyé. I wèsté fidèl pou Jéhova diwan tout lavi’y. (Jòch. 24:14; Izik. 20:8) Anfen, Jòb té ka plè Bondyé si tèlman byen, Jéhova té di: ‘La pa ni pyès lòt moun kon Jòb asou latè.’a (Jòb 1:8) On lòt bagay nou konnèt konsèné Jòb sé sa, i té ni an chay wichès. Èk anpanmi tout sé moun-lan ki té ka wèsté an wèt sala, sé li ki té pli enpòtan. (Jòb 1:3) Ès ou sa imajiné mannyè Satan té anwajé, lè’y wè on gwo boug kon Jòb ka wèsté fidèl pou Jéhova!

5. Pou ki wézon Jéhova pèwmité Jòb pou soufé? (Jòb 1:20-22; 2:9, 10)

⁵ Satan té di kon sa, si Jòb té ka soufé, i pa té kay kontiné adowé Jéhova. Sa sété on gwo akizasyon Satan té fè-a, èk sa lévé an chay lòt kèstyon ki té byen enpòtan. (Jòb 1:7-11; 2:2-5) Konsa, magwé Jéhova té enmen Jòb an chay, i bay Satan chans-lan pou moutwé, si sa’y té di konsèné Jòb té vwé. (Jòb 1:12-19; 2:6-8) Ében, Satan ladjé an chay gwo pwoblenm asou Jòb yonn dèyè lòt, èk i fè Jòb soufè an chay. Pwèmyé bagay i fè sé sa, i fè Jòb pèdi tout sé zannimo-a i té ni-an. Bon, Jòb té ni dis (10) ich, èk Satan tjwé yo tout ansanm. Lè’y fini, i bay Jòb on mové maladi. Maladi-a té ka fè klou sòti toupatou asou Jòb, dépi an tèt li pou wivé jis anba pyé’y. Sé pa dé soufè Jòb soufé. Mé, i wèsté fidèl pou Jéhova anba tout sé difikilté-a Satan mennen asou’y. (Li Jòb 1:20-22; 2:9, 10.) Apwé sa, Jéhova benni jòb. I bay Jòb bon santé, i bay pli wichès pasé sa’y té ni avan, i bay dis «10» lòt ich, èk Jòb enjwi on bon lavi pou yon san kawant «140» lanné pli. Osi, tout moun té ka wèspèkté Jòb ankò. (Jòb 42:10-13, 16) Vwéman, la ni bèl lison nou sa apwann an ègzanp Jòb. Mé ki mannyè listwa Jòb té sa édé sévant Bondyé an tan pasé? Èk ki mannyè i sa édé nou jòdi jou?

6. Ki mannyè ègzanp Jòb té sa édé jan Izwayèl? (Gadé pòtwé-a osi.)

⁶ Sé bennéfis-la jan Izwayèl té sa twapé. Jan Izwayèl té anba èslavaj an péyi Éjip, èk sé pa dé soufé yo soufé avan Jéhova délivwé yo. Konsa bagay pa té ézé pou yo pyès, èk moun tèl kon Jòchwa épi Kélèb pasé tout jennès yo ka soufé anba èslavaj. Apwé sa, yo té ni pou wèsté an savann sèk-la pou kawant «40» lanné, ansanm épi lèwèstan jan Izwayèl. Konsa ki mannyè ègzanp Jòb té sa édé yo? Ében, ègzanp Jòb té sa ankouwajé sé jan Izwayèl-la an chay, paskè i té kay édé yo pou wè, sé Satan ki ka annékòz moun pou soufé. Èk i té kay édé yo pou konpwann pouki Jéhova ka pèwmité nou pou soufé. Osi, listwa Jòb té kay moutwé yo mannyè Jéhova ka apwésyé moun ki ka wèsté fidèl, èk ki ka kontiné tjébé fò anba difikilté.

7-8. (a) Ba yon ègzanp ki ka moutwé, pouki an chay moun pa ka kwè an Bondyé. (b) Kisa nou sa apwann an liv Jòb konsèné soufwans?

⁷ Sé bennéfis-la nou sa twapé. Malèwèzman, la ni an chay moun ki pa ka kwè an Bondyé, paskè yo pa sa konpwann pouki i ka kité bon moun soufé. Annou konsidiwé yon èpéyans ki ka moutwé sa. Hazelb sé on sè hòd péyi Rwanda. Lè sè sala té jenn, i té ka kwè an Bondyé. Mé lavi’y chanjé toubonnman lè manman’y épi papa’y dévosé. Manman’y mayé ankò, mé mawi manman-an té ka maltwété Hazel. On lòt bagay ki wivé Hazel sé sa, lè’y té on jennès on nonm anvyolé’y. Wi, Hazel soufé an chay. Èk, i té ka alé légliz paskè i té vlé soulajman, mé i pa jwenn konsolasyon la. Konsa Hazel désidé pou di Bondyé mannyè i té ka santi. I di’y: “Bondyé, mwen pwédyé èk mwen éséyé pou fè sa ki bon, mé ou kité mwen soufé. Konsa, mwen pa kay adowé’w ankò. Mwen kay annèk fè sa mwen vlé fè.” La ni an chay moun ki menm kon Hazel. Yo ka kwè sé Bondyé ki ka annékòz yo pou soufé. Lè nou jwenn moun kon sa yo ka fè nou lapenn, èk nou ka fè tout sa nou pé pou édé yo konnèt Bondyé.

⁸ Kanmenm, silon sa nou apwann an liv Jòb, sé Satan ki ka fè nou soufè—pa Bondyé! On lòt bagay nou ka apwann sé sa, lè moun ka soufè, sé pa pou nou kwè sé on bagay yo ka péyé pou. Kon lévanjil-la ka di, ‘mové mouman èk bagay nou pa té ka èspéyé ka wivé nou tout.’ Èk sé bagay sala sa wivé nou a népòt lè. (Éklé. 9:11; Jòb 4:1, 8) On lòt bèl lison nou ka apwann an listwa Jòb sé sa, lè nou wèsté fidèl anba difikilté, nou ka bay Jéhova on bèl òpòtyounité pou moutwé, Satan sé on mantè. (Jòb 2:3; Pwov. 27:11) Nou ka apwésyé sé bèl lison-an ki an listwa Jòb, paskè sa ka édé nou pou konpwann pouki Bondyé ka pèwmité nou pou soufé. Lè Hazel koumansé étidyé Bib-la épi Tenmwen Jéhova èk i koumansé konpwann, sé pa Bondyé ki té ka annékòz li pou soufè, sa chanjé lavi’y toubonnman. I di, i pwédyé ofon tjè’y èk i di Jéhova: “Lè mwen té di mwen té kay doubout sèvi’w, sé pa sa mwen té vwéman vlé fè. Mwen té di sé bagay sala paskè mwen pa té sav ki moun ou vwéman yé. Apwézan mwen ka kwè ou enmen mwen. Èk mwen ni tjè kontan.” Wi, nou kontan pou konnèt wézon-an pouki Jéhova ka pèwmité soufwans. Konsa, annou wè mannyè ègzanp Jòb sa édé nou lè nou ka soufè.

MANNYÈ ÈGZANP JÒB KA ÉDÉ NOU POU TJÉBÉ FÒ

9. An ki kondisyon Jòb té yé lè’y té malad? (Jémz 5:11)

⁹ Ès ou sa imajiné sitiwasyon-an Jòb té adan lè’y té malad? Katjilé asou sa: I té asid atè-a an sann difé. I té ni on mòso tèson ka gwaté kò’y. Tout kò’y té plen bobo, èk sé pa dé soufè i té ka soufè. Maladi-a fè lapou’y vini nwè, i té mèg kon on kayali, i pa té ni pyès fòs, èk tèt li té byen twakasé. Wonnman, i té vivan, èk sa ki té pli enpòtan sé sa, i té ka kontiné tjébé fò. (Li Jémz 5:11.) Mé kisa ki édé Jòb pou kontiné tjébé fò anba tout sé pwoblenm-lan i té ka èspéyansé-a?

10. Ki mannyè nou sav Jòb té ka santi byen konfòtab pou palé épi Jéhova?

¹⁰ Ében Jòb pa tjébé dèyè pou’y di Jéhova tout sa ki té an tjè’y. (Jòb 10:1, 2; 16:20) Pou ègzanp, an chapit 3 i ka èspliké mannyè i té an lapenn akòz di sé bagay-la ki té wivé’y-la, èk i di sé Jéhova ki té mennen tout soufwans sala asou’y. Bon, lè sé twa «3» jan’y-lan té ka di’y, sé Bondyé ki té ka pini’y pou mové bagay i té ja fè an lavi’y, Jòb kontiné ka fè défans pou kò’y douvan Jéhova. Anfen, silon sa’y di sé jan’y-lan, i ka jis sanm Jòb té ka kwè i té pli bon pasé Bondyé. (Jòb 10:1-3; 32:1, 2; 35:1, 2) Mé kon Jòb menm di, délè sé bétiz i té ka palé lè’y té ka éséyé pou défann kò’y. (Jòb 6:3, 26) Èk an chapit 31 Jòb ka di kon sa, i vlé Bondyé di’y pouki i té ka soufé kon sa paskè pou li, i pa té méwité pinisyon sala. Mé vwéman, Jòb pa té ni pyès dwa pou mandé Bondyé kwèstyon sala, akwèdi Bondyé té oblijé wéponn li.

11. Kisa Jéhova fè lè’y tann sé bagay-la Jòb té di-a?

¹¹ San dout, Jòb té ni on bon wilasyon épi Jéhova èk i té ni konfyans ki, Jéhova té kay jijé’y adan on mannyè ki dwèt. Sé sa ki fè i té sa di Jéhova sé bagay-la i té di’y-la. Mé lè Jéhova wéponn Jòb, i pa ba’y pyès détay konsèné sé wézon-an pouki i té ka soufé. Èk Jéhova pa pini Jòb pou sé bagay-la i té di-a non plis. Pito sa, Jéhova moutwé Jòb jantiyès. I kowijé’y menm kon on bon papa, èk i édé Jòb pou chanjé katjil li. Ében, sé sa Jòb té bizwen. Mannyè-a Jéhova twété’y édé’y pou wéyalizé i pa té konnèt tout bagay, èk sa pousé’y pou wépanti pou sé bagay-la i té di-a. (Jòb 31:6; 40:4, 5; 42:1-6) Mé ki mannyè listwa Jòb té sa édé sévant Bondyé an tan pasé? Èk, ki mannyè i sa édé nou jòdi jou?

12. Ki bennéfis jan Izwayèl té sa twapé an listwa Jòb?

¹² Sé bennéfis-la jan Izwayèl té sa twapé. La ni an chay bèl lison Moziz épi jan Izwayèl té sa apwann an listwa Jòb. Pou ègzanp, Moziz té ni gwo wèskonsabilité-a pou djidé nasyon Izwayèl. Èk sa pa té anyen ki té alèz paskè, jan Izwayèl té dézobéyisan, èk yo té ka toujou bougonnen kont Jéhova. Mé pito Moziz bougonnen, i té ka pwédyé èk i té ka mandé Jéhova pou édé’y. (Ègz. 16:6-8; Lim. 11:10-14; 14:1-4, 11; 16:41, 49; 17:5) Ègzanp Jòb té sa osi édé Moziz pou aksèpté kouwijman Jéhova. Pou ègzanp, lè jan Izwayèl té toupwé Tè Pwonmèt-la, yo fè Moziz tèlman faché i di yo on bagay i pa té sipozé di, èk i pa bay Jéhova lonnè-a i té méwité-a. (Sam 106:32, 33) Akòz di sa Jéhova kowijé Moziz, èk i pa kité’y antwé an Tè Pwonmèt-la. (Dito. 32:50-52) San dout, sa fè Moziz lapenn. Mé, i aksèpté kowijman Jéhova épi tout tjè’y. Jan Izwayèl ki viv apwé tan Moziz té sa apwann an listwa Jòb osi. Si yo té mèdité asou listwa Jòb, yo té kay apwann mannyè pou palé épi Jéhova ofon tjè yo. Èk ègzanp Jòb té kay fè yo chonjé, yo pa té sa janmen pli bon pasé Jéhova. Yo té kay osi apwann mannyè pou moutwé imilité, èk aksèpté kowijman Jéhova.

13. Ki mannyè listwa Jòb ka édé nou pou kontiné tjébé fò? (Hibrou 10:36)

¹³ Sé bennéfis-la nou sa twapé. Nou ka viv an tan ki byen difisil, èk nou ka soufé an plizyè diféwan mannyè. Pou ègzanp, adan di nou byen malad, ében nou ka soufé anba dipwèsyon. La ni sa ki ka èspéyansé diféwan pwoblenm an fanmi yo, ében yo pèd on moun yo enmen an lanmò. An plis di sa, paditan nou anba on pwoblenm, on moun pé di ében fè on bagay ki ka fè sitiwasyon-an pli mové pou nou ankò. (Pwov. 12:18) Konsa, si nou vlé westé fidèl pou Jéhova, nou ni pou pwan pasyans, èk nou ni pou kontiné tjébé fò. (Li Hibrou 10:36.) Mé yon bagay nou ka apwann an liv Jòb sé sa, nou sa vidé tjè nou bay Jéhova an lapwiyè, èk nou sa ni konfyans ki, i kay kouté nou. (1 Jan 5:14) Menm si délè nou fè menm kon Jòb èk nou koumansé palé bétiz lé nou ka palé bay Jéhova, i pa kay kondanné nou pou sa. Pito sa, i kay ban nou fòs-la épi kouway-la nou bizwen pou nou sa kontiné tjébé fò. (2 Kw. 16:9; Jémz 1:5) Èk menm kon Jéhova té kowijé Jòb, i pé sèvi Bib-la, sé piblikasyon nou-an, yon ansyen, ében on lòt bon jan pou ban nou kowijaman-an nou bizwen. (Hib. 12:5-7) Ègzanp Jòb ka moutwé nou mannyè i enpòtan pou nou kontiné tjébé fò lè Jéhova kowijé nou. Si nou fè sa, nou kay ni tjè kontan menm kon Jòb. (2 Kòr. 13:11) Mi bèl lison nou ka apwann an liv Jòb! Apwézan, annou wè ki mannyè nou sa sèvi listwa Jòb pou édé lézòt.

SÈVI LISTWA JÒB POU ÉDÉ LÉZÒT

14. Si on moun mandé’w pouki bon moun ka soufé, kisa ou sa di yo?

¹⁴ Bon, si on moun mandé’w pouki bon moun ka soufé, ki mannyè ou té kay wéponn kwèstyon sala? Ében, pitèt ou kay di yo sa ki té fèt an jaden Édenn lé Satan té manti asou Bondyé, èk i fè Adanm épi Èv tounen do yo asou Bondyé. (Jen. 3:1-6) Èk ou kay di yo, sé dézobéyisans Adanm épi Èv ki mennen soufwans épi lanmò asou nou. (Ronm 5:12) Apwé sa, pitèt ou kay di moun-lan, Bondyé p’òkò doubout soufwans épi lanmò, paskè i ka kité asé tan pasé pou tout moun sa wè, sa Satan té di-a sété on mansonj. Mé paditan Bondyé ka èspéyé pou doubout tout movézté épi soufwans, i ka bay tout moun òpòtyounité-a pou tann bon nouvèl-la ki, si yo obéyi’y èk yo vansé pwé’y atjwèlman, yo kay sa enjwi on bon lavi pou tout tan. (Wév. 21:3, 4) Ében si sé kon sa ou wéponn moun-lan, sa té kay byen bon. Anfen, èsplikasyon sala ja édé an chay moun pou konpwann pouki bon moun ka soufé.

15. Ki mannyè nou sa sèvi ègzanp Jòb pou édé moun konpwann pouki nou ka soufé? (Gadé sé pòtwé-a osi.)

¹⁵ On lòt bagay nou sa sèvi pou édé moun konpwann pouki nou ka soufé, sé ègzanp Jòb. Konsa, si on moun mandé’w kwèstyon sala, fè moun-lan konnèt, sa sé on kwèstyon ki byen enpòtan. Apwé sa ou sa di’y, Jòb sété on bon moun mé i soufé an chay. Èk i té vlé konnèt pouki bon moun ka soufé. Anfen, Jòb té ka jis kwè sé Bondyé ki té ka annékòz li pou soufé. (Jòb 7:17-21) Pitèt moun-lan kay byen kontan pou konnèt, sé pa jòdi ni yè moun ka mandé kwèstyon sala. Apwé sa, ou sa di moun-lan sa Satan té fè Jòb, paskè i té ka kwè soufwans épi difikilté té kay fè Jòb tounen do’y asou Jéhova. Ou sa osi di moun-lan, lè Jéhova pèwmité Jòb pou soufé i moutwé i té ni konfyans ki, sévant li kay wèsté fidèl anba difikilté èk yo kay moutwé Satan sé on mantè. Finalman, ou sa di moun-lan, Jéhova té benni Jòb adan on mannyè ki té èstòdinè, paskè i té wèsté fidèl anba tout soufwans-lan i té ni-an. Konsa, magwé Jéhova ka pèwmité soufwans, i pa ka janmen annékòz nou pou soufé. Fè asiwé ou édé moun-lan pou byen konpwann pwen sala.

16. Ba yon èspéyans ki ka moutwé mannyè ègzanp Jòb sa ankouwajé on moun ki ka soufé.

¹⁶ Bon, annou gadé mannyè ègzanp Jòb té ankouwajé yon nonm yo ka kwiyé Mario. An lanné dé mil ventenyen «2021», on sè té ka sèvi fonn-lan pou pwéché. Pwèmyé limowo-a i kwiyè, sé Mario ki wéponn. Sè-a li on lévanjil ba li èk i di’y, Bondyé ka kouté lapwiyè nou èk i kay fè an chay bon bagay ban nou an tan pou vini. Lè sè-a mandé Mario kisa ki katjil li asou lévanjil-la i li bay li-a, Mario di sè-a, a lè-a i kwiyé-a i té la ka ékwi on lèt, paskè i té kay tjwé kò’y èk i té vlé di fanmi’y i enmen yo avan i fè’y. Mario di, “Mwen ka kwè an Bondyé, mé bonmaten sala mwen té ka santi akwèdi Bondyé pa mélé épi mwen.” Dézyenm kou-a sè-a kwiyé Mario, yo palé konsèné sa ki té wivé Jòb, èk Mario désidé pou li liv Jòb. Konsa, sè-a voyé on “link” ba li, pou’y sa li Bib-la asou jw.org. Apwézan, Mario ka étidyé Bib-la, èk i byen kontan pou apwann pli konsèné Dyé-a ki mélé épi’y.

17. Pouki ou kontan pou wè, Jéhova mété ègzanp Jòb an Bib-la? (Jòb 34:12)

¹⁷ Vwéman, Pawòl Bondyé ni an pil pouvwa. Wi, i sa édé nou fè gwo chanjman an lavi nou, èk i sa konsolé nou lè nou ka soufé. (Hib. 4:12) Ében, Jòb té mandé Jéhova pou mété listwa’y an Bib-la, èk sé pa dé kontan nou kontan Jéhova fè sa Jòb té mandé’y pou fè-a! (Jòb 19:23, 24) Paskè, la ni an chay bèl bagay nou sa apwann an liv Jòb. Pou ègzanp, liv sala ka ban nou asiwans ki, ‘Jéhova pa ka janmen fè méchansté.’ (Li Jòb 34:12.) I ka édé nou pou konpwann pouki Bondyé ka pèwmité soufwans, èk i ka moutwé nou kisa nou sa fè pou nou kontiné tjébé fò lè nou ka soufé. Osi, nou sa sèvi liv Jòb pou konsolé moun ki ka soufé. An lòt atik-la, nou kay wè mannyè liv Jòb sa édé nou lè nou ni pou kowijé on moun, ében lè nou vlé ba yo bon konsèy.