Tit pi “Ceng me Lobo” bot Dano
1. Dero madit ango ma kitito pire con i Lok pa Lubanga, dok kare ango ma ywayo tam pa dano pi dero man?
1 Jehovah oloko con kun tiyo ki lanebi Icaya ni: “Jo ma yam gibedo i piny macol dong guneno dero ceng madit; ki jo ma yam bedo i lobo me mutu me piny macol licuc, ceng dong oryeny omenyogi.” (Ic. 9:2) ‘Dero madit-ti’ onen i tic pa Wod pa Lubanga, Yecu Kricito. Pwony ma en opwonyo i kare ma en tye i lobo kacel ki adwogi maber ma oa ki i tyero kwone, oloko kwo pa jo ma onongo gitye i col piny i yo me cwiny. Lakodi dero ma kit meno aye dano gimito i kare man me col piny-nyi. Kare maber me tito pi “ceng me lobo” bot dano obedo kare me kwero Cam pa Rwot me Otyeno. (Jon 8:12) I mwaka mukato-ni, dano milion mapol gunyuto niyegi ki ribbe kwedwa i lubo cik ma Yecu omiyo ni: “Wutim kuman me po pira.” (Luka 22:19) Kit macalo kwero nino me Nipo me mwaka-ni tye ka nyiko cok-ki, wan watwero nywako tic me tito pi dero madit ma Jehovah oweko tye ka ryeny-nyi nining?—Pil. 2:15.
2. Yo ango ma wan watwero medo kwede pwocwa pi tyer me ginkok, dok timo man bikelo adwogi ango?
2 Dong Cwiny me Bedo ki Pwoc: Kare me Nipo obedo kare ma rwatte tutwal me lwodo lok i kom mar madit ma Jehovah gin ki Yecu gunyuto pi dano pi tyer me ginkok. (Jon 3:16; 2 Kor. 5:14, 15) Bedo ka lwodo lok man ada bimedo pwocwa pi yub maleng man. Jo pa Lubanga ducu omyero gubedo ki miti me nongo kare me kwano ki dok lwodo lok i kom wang Baibul ma mako Nipo ma kiketogi i Examining the Scriptures Daily. Bedo ka tamo pi kit pa Jehovah mabeco ma en onyuto pi miyo ginkok weko wabedo ki awaka madit ni en aye obedo Lubangawa. Lwodo lok i kom kit ma ginkok man konyowa kwede ki acel acel, medo marwa i kom Lubanga kacel ki Wode dok weko watiyo mitine ki tekowa ducu.—Gal. 2:20.
3. I yo ango ma wan watwero nyuto kwede pwocwa pi nino me Nipo?
3 Ka ce waweko pwocwa pi mic ma Jehovah omiyo me larowa-ni odoko matut, ci mit komwa pi nino me Nipo-ni bigudo wa cwiny lutino kwanwa me Baibul, jo ma wadok cen ka limogi, wadiwa, jirani, lutino kwan luwotwa, lutic luwotwa, kacel ki jo mukene ma nongo walwongogi me bino i yub man. (Luka 6:45) Pi meno ket tek me lwongo jo magi ducu kun ipoko botgi karatac ma kiyubo me lwongo pi kwero nino me Nipo me poyo wigi. Jo mukene gicoyo ka gigwoko nying jo ma nongo gimaro lwongogi pi nino me Nipo kare ki kare ka dok gimedo iye nying jo manyen mwaka ki mwaka wek pe wigi owil woko i komgi. Ka watimo man ma nongo wayubbe maber dok wayelle me lwongo jo ma gitye ki miti ci meno nongo wanyuto pwocwa bot Lubanga Jehovah “pi motte maber ma pe wacce.”—2 Kor. 9:15.
4. Ngo ma bikonyowa me tic pi cawa malac i ticwa me pwony i Marci ki April?
4 Med Cawa me Ticci me Pwony: In mono itwero medo cawani i tic me pwony i Marci ki April? Yelle me nywako “lok me kwena maber i kom deyo pa Kricito” ki dano bikelo mot pa Lubanga. Jehovah ma en aye obedo Wang it me dero me lok me cwiny omiyo cik kun waco ni: “Lengo myero oryeny kun a i colpiny.” (2 Kor. 4:4-6) Ka tekke mitte, ci luelda bimedo yub me cokke me cito i ticwa me pwony i kabedo ki cawa mapat pat, kun nongo gitelo wi dano wek okony jo ma nongo gimito tero cawa malac i tic me pwony. Man kwako wa pwony i teng gudo i odiko nyo tic i kabedo ma kitimo iye biacara ki dong miyo caden ki cim i dyeceng nyo i otyeno abwora. Macalo kony me medo kareni i tic me pwony, omyero imok wel cawa ma nongo imito tiyone i dwe acel acel ci ilweny matek me cobone. Jo mapol ginongo ni miyo gin maber loyo i kwogi bot Jehovah obedo donyo i tic macalo painia pi tutunu.—Kol. 3:23, 24.
5. Jo mapol gitye ka nongo ber pa dwoko cawa pi painia pi tutunu nining?
5 In Itwero Tic Calo Painia pi Tutunu? Dong odoko mwaka makato abiro kulu, cakke ma kidwok kwede cawa pa jo ma gitiyo calo painia pi tutunu piny. Alokaloka man oweko jo mapol bene dong gucako nongo mot ma a ki i bedo painia pi tutunu. In tika dong mono itemo? Jo mukene dong guloko timo man odoko kitgi mwaka ki mwaka. I kacokke mukene, lutit kwena mapol gipongo fom man lawangacel, man doko kare ma nongo kacokke meno otiyo pi kare malac loyo i mwaka moni-ni. Nyo gwok itwero yubo yub me tic macalo painia pi tutunu i kare man me kwero Nipo-ni? April romo bedo dwe maber tutwal bot jo mukene kit macalo tye ki Ceng Abicel ki Cabit abic kulu-ni.
6. Kit yub maber ango ma kityeko ketone?
6 Gwok nyo laneno me adwol bilimo kacokkewu i Marci nyo April ba? Ka tye kumeno, ci iromo nongo mot mo maber adada. Kit ma kitito kwede i lok angeyo mo mukato, i mwaka 2006 jo ma gibibedo painia pi tutunu i dwe ma nongo laneno me adwol limo iye kacokkegi-ni, gibibedo i nucu me cokke ma laneno me adwol bibedo kwede ki painia i cabit me lim-mi. Labongo akalakala, ngec me lok me cwiny ma kibimiyone i cokke man bikonyo jo ma gubedo painia pi tutunu me medde me doko painia marii. Medo i kom meno, i Marci wabibedo ki yomcwiny me tic ki buk manyen me Baibul Mono Ada Pwonyo Gin Ango? me konyo dano wek gunen dero me cwiny. Pingo pe iket odok yubbi me cako kwano Baibul ki dano kun itiyo ki buk man manyen-ni?
7, 8. (a) Ngo ma twero konyowa me keto yub me bedo macalo painia pi tutunu? (b) Winye i kin jo me odi konyo nining, dok ginongo adwogi maber nining?
7 Ka itye ka tamo pi cawa 50 ma mitte pi painia pi tutunu, ci yer yub ma nongo twero mini kare me tic pi cawa 12 i ticwa me pwony i cabit acel acel. Peny tam ki bot jo ma dong gutemo timone ci gucobo maber kacel ki jo mukene bene. Man bicuko cwiny jo mukene me ribbe kwedi i tic man. Lutit kwena matino ki madongo-gu ma dong gutyeko nongo batija ducu gunongo ni twere kara me cobone. Leg pire, ci igo yubbi maber wek inong mit pa bedo painia pi tutunu!—Mal. 3:10.
8 Jo me odi mapol gutyeko nongo ni ka winye maber tye i kingi ci olo ngat acel mo twero timo tic man. Jo ot acel mo gutamo ni omyero jo abic ducu ma gunongo batija-ni omyero gudony i tic macalo painia pi tutunu. Lutino aryo mukene ma onongo peya gunongo batija guketo tek me medo ticgi. Dong kit kony ango ma tic man okelo i otgi? Gin gucoyo ni: “Dwe meno obedo dwe me yomcwiny, dok wanongo ni man ojingo wat i kinwa. Wapwoyo Jehovah pi mot madit man!”
9. Watwero weko derowa ryeny nining i kare me Nipo man?
9 Mono tic i yo ma kit man i Marci ki April bibedo me cuko cwiny kun nongo nyikowa cok bot Wonwa me polo? Man bicung i kom kit ma wadongo kwede mar pi Lubanga gin ki Wode kacel ki medo ticwa i tic me pwony. Dong wan bene omyero wabed calo laco Jabuli ma owaco ni: “Abimiyo pwoc bot Rwot ki dwan malongo; abipake i dye lwakke ka ma gucokke iye.” (Jab. 109:30) Jehovah bigoyo laane i kom ticwa pi kare me Nipo man. Pi meno dong, wawek dero madit oryeny wek jo mapol gua woko ki i col piny ci gubed “ki ceng me kwo.”—Jon 8:12.