Ceng Aryo, Sektemba 2
Cwiny maleng ngiyo jami ducu, kadi wa tam ma Lubanga okano i iye ka matut.—1 Kor. 2:10.
Ka itye i kacokke madit dok iwinyo ni pol kare pe kicimmi me miyo lagam, itwero tamo ni myero dong ijuk miyo lagam woko. Ento pe ijuk tuteni me miyo lagam. Itwero yubo lagam mapol pi cokke acel acel. Dong ka pe kicimmi me miyo lagam i acakki me cokke, pud ibibedo ki kare me miyo lagam ka cokke tye ka wot anyim. Ka itye ka yubo Wi Lubele ma kibinyamo i cokke, tam i kom kit ma paragraf acel acel kubbe kwede ki wi lok me pwony meno. Ka itimo meno, ci itwero bedo ki lagam mabeco ma itwero miyone i cawa mo keken. Medo i kom meno, itwero yubbe me miyo lagam i paragraf mogo ma nyamo pwony me Baibul ma tere tut dok titone tek. Pingo? Pien jo manok keken aye giromo dyere me miyo lagam i paragraf ma kit meno. Ento ket kong ni, pud inongo ni pe kicimmi me miyo lagam i nge cokke mapol. Lok ki lador cokke ma peya cokke ocakke ci ititte pi lapeny ma imito gamone. w23.04 21-22 ¶9-10
Ceng Adek, Sektemba 3
Yucepu . . . otimo kit macalo lamalaika pa Rwot ocike kwede; okwanyo dakone otero bote.—Mat. 1:24.
Yucepu kare ducu onongo keto tira pa Jehovah i tic, dok meno oweko en obedo won gang maber. Tyen adek mapatpat, en onongo tira ki bot Lubanga ma kwako jo me ode. Tyen adek magi ducu, en olubo tira meno cutcut kadi bed timone onongo tek. (Mat. 1:20; 2:13-15, 19-21) Lubo tira pa Lubanga oweko Yucepu ogwoko Maliam, okonye, dok omine jami me kom ma mitte. Tam kong kit ma jami ma Yucepu otimo oweko mar ki woro pa Maliam pire odongo matek! Wun co, wutwero lubo lanen pa Yucepu ka wuyenyo tira ma jenge i kom Baibul ka odok i kom gwoko jo me odiwu. Ka iketo tam man i tic, kadi bed timone pe yot, inyuto marri pi dakoni dok ijingo nyomwu. Laminwa mo ma bedo i lobo Vanuatu, ma dong orii i nyom pi mwaki makato 20 owaco ni: “Ka cwara yenyo dok keto i tic tira pa Jehovah, worona pire dongo matek. Awinyo ni atye agonya dok abedo ki gen matek i kom tam ma en moko.” w23.05 21 ¶5
Ceng Angwen, Sektemba 4
Yo gudo bibedo madit kunnu, yo ma gicako nyinge ni “Yo Maleng.” —Ic. 35:8.
Lujudaya ma gudwogo ki i Babilon onongo gibidoko “jo maleng” bot Lubangagi. (Nwo. 7:6) Ento meno onongo pe te lokke ni, pe mitte ni gutim alokaloka me yomo cwiny Jehovah. Pol pa Lujudaya onongo kinywalogi i Babilon dok onongo gungi woko ki tam kacel ki rwom me kwo pa Lubabilon. Mwaki mapol i nge dwogo pa gurup mukwongo i Icrael, Gabuna Nekemia obedo ki ur me niang ni lutino ma kinywalogi i Icrael onongo pe gupwonyo leb pa Lujudaya. (Nwo. 6:6, 7; Nek. 13:23, 24) Lutino magi onongo gibipwonnye me maro ki woro Jehovah nining ka pe gitwero niang leb Ibru—ma en aye leb ma kicoyo iye Lok pa Lubanga? (Ejira 10:3, 44) Dong onongo mitte ni Lujudaya gutim alokaloka madongo, ento timo man onongo bibedo yot pien dong gibedo i lobo Icrael, ka ma onongo kitye ka roco iye woro me ada motmot.—Nek. 8:8, 9. w23.05 15 ¶6-7