KʼUTUNIK 05
Chupa ri Biblia kʼo wi rutziij upixabʼ ri Dios chaqe ri oj
Jehová uyaʼom jun chomilaj sipanik chaqe: e ri Biblia. Ri Biblia kʼo 66 libro che. Laj kachʼobʼ laa: «¿Pa nawi petinaq wi ri Biblia? ¿China nawi xʼanaw re?». Qilaʼ ri kʼulubʼal uwach kuya ri Biblia, pero nabʼe kojchʼaʼt puwiʼ kʼa pa oponinaq wi ri utzilaj taq tziij pa ri qʼiij ojkʼo wi.
1. We achijaabʼ xetzʼibʼan re ri Biblia, ¿suʼchaak nawi kaqabʼiʼij kʼu riʼ ruukʼ ri Dios petinaq wi?
E 40 achijaabʼ xetzʼibʼan re ri Biblia. Rike jujun taq wi ri kichaak xkiʼano, jujun chike e ajchajal bʼexex, e ajchapal kar y jujun chik e reyes. Xkijeq utzʼibʼaxik pa ri junabʼ 1513 kʼamajaʼ kakʼun ri Cristo. Xkikʼis utzʼibʼaxik pa ri junabʼ 98 kʼuninaq chik ri Cristo. Xukʼam bʼi 1.600 junabʼ re utzʼibʼaxik ri Biblia y ronoje ri kʼo chupa lik qatziij. ¿Suʼchaak nawi kaqabʼiʼij waʼ? Ma ruukʼ ri Dios petinaq wi ri Biblia (chila laa 1 Tesalonicenses 2:13). Achijaabʼ xetzʼibʼan re ri Biblia na kinaʼoj ta rike ri xkitzʼibʼaj. Ma rike «xechʼaʼtik e chirij janipa ri xuqʼalajisaj ri Ruxlabʼixel ri Dios chike» (2 Pedro 1:21).a Ruukʼ ri ruxlabʼixel ri Dios waʼ achijaabʼ xkitzʼibʼaj runaʼoj ri Dios (2 Timoteo 3:16).
2. ¿Utz nawi riʼ konoje ri tikaweex kakʼojiʼ pa kiqʼabʼ juna ki-Biblia?
Konoje ri «e kʼo che ruwachulew, konoje ri taq tinamit y konoje rukʼiyal kiwach taq ri tikawex che ronoje rukʼiyal uwach chʼaʼtemal» utz kakimajo ri utzilaj taq tziij kubʼiʼij ri Biblia (chila laa Apocalipsis 14:6). E ri Dios uyaʼom ri Biblia pa ukʼiyal uwach chʼaʼtemal. Ri Biblia e ri wuuj más qʼatisaam pa jujun chik chʼaʼteem chwach juna chik wuuj. Ruma laʼ, tobʼ pa e kʼo wi ri tikaweex kechʼaʼt pa ri kichʼaʼteem, utz kakimajo ri kubʼiʼij ri Biblia.
3. ¿Saʼ xuʼan ri Jehová chaʼ na kasach ta uwach ri Biblia?
Ojertan rachijaabʼ xkichapabʼeej jubʼotaj utzʼumaal chikop y uxaq cheʼ ubʼiʼ papiro, ruukʼ waʼ xkitzʼibʼaj ri Biblia, ruma laʼ na kakowin taj. Pero e kʼo achijaabʼ lik kʼax xkinaʼ ri Biblia, rike xkitzʼibʼaj kʼiyal taq copia re ri Biblia ruukʼ uwi taq kiqʼabʼ. E kʼo achijaabʼ xkaaj xkisachisaj uwach ri Biblia, pero e kʼo jujun chik achijaabʼ xkiya ri kikʼaslemaal chaʼ xkichajij ri Biblia. Mijunoq kuqʼatej ri Jehová chaʼ kachʼaʼt quukʼ ri oj. Ri Biblia kubʼiʼij: «Ruchʼaʼteem ri qa-DIOS na kasach ta kʼana uwach» (Isaías 40:8).
NIMARISAJ RI NAʼOJ LAA
Chupa wa kʼutunik kaqamajo e ri Biblia petinaq ruukʼ ri Dios, rire xebʼuchaʼ jujun achijaabʼ chaʼ xkitzʼibʼaj runaʼoj chupa ri Biblia. Qilaʼ saʼ xuʼan ri Dios chaʼ na kasach ta uwach ri Biblia y saʼ kitoʼik ri tikaweex xuʼano chaʼ kakʼojiʼ ri Biblia pa kiqʼabʼ.
4. Ri Biblia kubʼiʼij chaqe pa petinaq wi
Chila alaaq ri VIDEO. Tekʼuchiriʼ chila alaaq 2 Timoteo 3:16 y chʼaʼta alaaq puwiʼ ri taq tzʼonobʼenik:
We achijaabʼ xetzʼibʼan re ri Biblia, ¿suʼchaak nawi kaqabʼiʼij kʼu riʼ e Utziij Upixabʼ ri Dios?
¿Saʼ kachʼobʼ laa, e nawi ri Dios xuqʼalajisaj runaʼoj chike rachijaabʼ xetzʼibʼan re rutziij upixabʼ?
E ri ajtzʼibʼ xutzʼibʼaj ri carta, pero ri naʼoj kʼo chupa ri carta re ri ajwach. E mismo ri Biblia: achijaabʼ xetzʼibʼan re, pero ri naʼoj kʼo chupa ri Biblia petinaq ruukʼ ri Dios.
5. Na xkisachisaj ta uwach ri Biblia
Ri Biblia petinaq ruukʼ ri Dios, ruma laʼ rire xuchajij chaʼ na xsach ta uwach. Ojertan e kʼo taq gobierno xkaaj kakisachisaj uwach ri Biblia. Y e kʼo ajwach re ri taq iglesia na xkaaj taj e taq ri tikaweex kakil upa ri Biblia. Ruma laʼ xkaaj kekamisax konoje ri kakil upa ri Biblia. Pero, e kʼo tikaweex xkiya ri kikʼaslemaal chaʼ xkichajij ri Biblia. Kʼo jun achi xuya rukʼaslemaal chaʼ xuchajij ri Biblia, chila alaaq ri VIDEO y chʼaʼta alaaq puwiʼ ri taq tzʼonobʼenik:
Ri xqil pa ri video lik xʼaniʼ jun nimalaj chuqʼabʼ chaʼ na xsach ta uwach ri Biblia. ¿Kaʼaj nawi laa kil laa upa ri Biblia? ¿Suʼchaak nawi kanaʼ laa waʼ?
Chila alaaq Salmo 119:97 y chʼaʼta alaaq puwiʼ ri tzʼonobʼenik:
¿Suʼchaak nawi e kʼi ri tikaweex kiyaʼom ri kikʼaslemaal re uqʼatisaxik y ujachik ri Biblia?
6. Konoje ri tikaweex utz kakʼojiʼ juna Biblia pa kiqʼabʼ
Ri Biblia e ri wuuj más qʼatisaam pa kʼiyal taq chʼaʼteem y e ri wuuj más jachoom che ronoje ruwachulew. Chila alaaq Hechos 10:34, 35 y chʼaʼta alaaq puwiʼ ri taq tzʼonobʼenik:
¿Suʼchaak nawi ri Dios karaaj e Rutziij Upixabʼ kaqʼatisax pa kʼiyal taq chʼaʼteem y suʼchaak nawi lik karaaj kajach pa kʼiyal taq tinamit?
¿Saʼ kukʼul kʼuʼx laa che ri Biblia?
Ya laj
konoje
ri tikaweex che ruwachulew
utz kakil upa ri Biblia pa ri kichʼaʼteem chaʼ kakikʼam usukʼ
Ri Biblia kʼo pa más re
3 mil
chʼaʼteem,
kikʼisom o xa pa nikʼaaj esaam loq
5 mil millones
Wa’ e rajilab’al ri Biblia esaam chuloq.
Na jinta juna wuuj más esaam loq chwach juna chik pachaʼ ri Biblia
RI KAKIBʼIʼIJ JUJUN CHIK: «Ri Biblia xa jun wuuj re ojertan y xa unaʼoj winaq kʼo chupa».
¿Saʼ kabʼiʼij laa?
¿Suʼchaak nawi etaʼam laa e ri Biblia petinaq ruukʼ ri Dios?
RI XMAJ LAA
Ri Biblia petinaq ruukʼ ri Jehová Dios y rire uyaʼom ri Biblia pa kiqʼabʼ konoje ri tikaweex.
Kojchʼaʼt che ri xmaj laa
We achijaabʼ xetzʼibʼan re ri Biblia, ¿suʼchaak nawi kaqabʼiʼij ruukʼ ri Dios petinaq wi?
E kʼi ri tikaweex kakaaj kakisachisaj uwach ri Biblia, pero ¿suʼchaak nawi na kasach ta uwach ri Biblia? Ri Biblia kʼo pa kʼiyal taq chʼaʼteem che ronoje ruwachulew. ¿Saʼ kachʼobʼ laa che?
¿Saʼ kanaʼ laa pa animaʼ laa ma ri Dios lik xuchajij ri Biblia chaʼ na kasach ta uwach ma rire lik karaaj kil laa upa rutziij upixabʼ?
KAMAJ LAA MÁS
Saʼ uʼanik xtzʼibʼax lo ri Biblia ojertan y pa ri qʼiij ojkʼo wi.
Ri Biblia xkitzʼibʼaj lo ojertan, ¿saʼ ruʼanik xuchʼij ronoje ri xukʼulumaj? Chila laa wa jun wuuj.
“La Biblia. Una historia de supervivencia” (La Atalaya, núm. 4 2016)
Chila laa e kʼo jujun taq tikaweex xkiriq ri kʼax echiriʼ xkiqʼatisaj ri Biblia.
Ri Biblia xkiqʼatisaj pa kʼiyal taq chʼaʼteem. ¿Qatziij nawi na xkijalkʼatij taj ruchʼaʼteem ri Dios?
“¿Se ha cambiado o manipulado la Biblia?” (Chila laa pa jw.org)
a Ri ruxlabʼixel ri Dios e ruchuqʼabʼ ri Dios. Pa ri kʼutunik 07 kamaj laa más puwiʼ ri ruxlabʼixel ri Dios.