¿Sa (wach) uʼanik kakiriq kiʼkotemal ri afamilia?

1. ¿Bʼuchak lik rajawaxik katzʼibʼaxik ri kʼulanikil ruukʼ ri ajqʼatol tzij?

Jehová are ri Dios kakiʼkotik. Ruukʼ Rire petinaq wi kʼiyal utzilaj taq tzij. Rire karaj ri taq familia kekiʼkotik (1 Timoteo 1:11). Rire xuʼan ri nabʼe kʼulanikil. Ri katzʼibʼaxik ri kʼulanikil ruukʼ ri qʼatol tzij kuʼan chike ri tat y nan y ri kalkʼoʼal kekiʼkotik y kʼaxkakinaʼ kibʼ. Ri tijoxelabʼ re ri Jesús rajawaxik kakiʼano ri kubʼij ri qʼatol tzij re kakitzʼibʼaj ri kʼulanikil. Chawilaʼ Lucas 2:1, 4, 5.

¿Saʼ (wach) urilik kuʼan ri Dios ri kʼulanikil? Rire karaj ri achi y ri ixoq e kʼulanik na kakijach ta kibʼ. Jehová karaj ri achijil y ri ixoqil kekʼojiʼ jusukʼ chikiwach ike (Hebreos 13:4). Rire tzel karilo we ri e kʼulanik kakitzʼibʼaj ri wuj re jachbʼal kibʼ (Malaquías 2:16). Rire kuyaʼ luwar che jun winaq kutzʼibʼaj ri wuj re jachbʼal ibʼ y kakʼuliʼ tan chik we ri rachijil o ri rixoqil kakotzʼi ruukʼ jun chik. Chawilaʼ Mateo 19:3-6, 9.

2. ¿Saʼ (wach) uʼanik kʼaxkakinaʼ kibʼ ri achijil y ri ixoqil?

Jehová xuʼan ri achi y ri ixoq re kakitoʼ kibʼ pa ri kʼulanikil (Génesis 2:18). Ri achijil ujolom re ri familia, ruma laʼ ri achijil kutzukuj ri kakitij ri ufamilia y kukʼut chike ri ufamilia re ri Dios. Kutzukuj saʼ (wach) kuʼano re kʼaxnabʼal ukʼuʼx re ri rixoqil. Ri achijil y ri ixoqil kʼaxkakinaʼ kibʼ y kakiʼan ri utz chikiwach ike. Ketaʼam xa e makunel, ruma laʼ rajawaxik kikuy kibʼ re kakiriq kiʼkotemal pa ri kʼulanikil. Chawilaʼ Efesios 4:31, 32; 5:22-25, 33, y 1 Pedro 3:7.

3. ¿Kakʼis uwach ri kʼulanikil we jinta kiʼkotemal chikixol?

We kariq kʼaxkʼoliil pa ri akʼulanikil, junam chixchakunoq re kʼaxchinaʼa iwibʼ (1 Corintios 13:4, 5). Ri Biblia na kuyaʼ ta chi kakijach kibʼ ri e kʼulanik re kakiyijbʼa ri chʼaʼoj ri kakikʼulumaj pa kikʼulanikil. Chawilaʼ 1 Corintios 7:10-13.

4. Akʼalabʼ, ¿saʼ (wach) karaj ri Dios chiwe?

Jehová karaj katkiʼkotik. Ala y ali, ri Jehová kuyaʼ chawe utzilaj pixabʼanik re kariq kiʼkotemal. Karaj kachapebʼeej ri naʼoj re ri atat y ri anan (Colosenses 3:20). Jehová karaj kanaʼo ri kiʼkotemal re kaʼan ri uchak rire y ri Ukʼajol. Chawilaʼ Mateo 19:13-15, y 21:15, 16.

5. Tat, nan, ¿saʼ uʼanik katoʼo ri awalkʼoʼal re kakiriq kiʼkotemal?

Tat, nan, kaʼan achuqʼabʼ katchakunik re kayaʼ kiwa, kachoch y kiqʼuqʼ ri awalkʼoʼal (1 Timoteo 5:8). We kawaj ri awalkʼoʼal kakiriq kiʼkotemal, rajawaxik kakʼut chike kʼaxkakinaʼ ri Dios y kaketamaj puwiʼ rire (Efesios 6:4). Ruukʼ ri akʼutunik kaʼano re kʼaxkanaʼ ri Dios kok pa kanimaʼ ri awalkʼoʼal. We ri akʼutunik esam pa ri Biblia, kuʼan utz ri kinojbʼal ri awalkʼoʼal. Chawilaʼ Deuteronomio 6:4-7 y 2 Timoteo 3:15.

Ri awalkʼoʼal rajawaxik kayaʼ kichuqʼabʼ y kabʼij chomalaj tzij chike ruma ri utz ri kichak kakiʼano. Kʼo jujun taq mul che rajawaxik kebʼapixabʼaj ri awalkʼoʼal, re na kakiʼan ta jun mak kuʼan kʼax chike (Proverbios 22:15). Pero na ruukʼ ta oyowal. Chawilaʼ Colosenses 3:21.

Ri testigos re Jehová kiʼanom kʼi taq wuj re kajawax chike ri tat y ri nan y ri kalkʼoʼal. Ronoje esam loq pa ri Biblia. Chawilaʼ 2 Timoteo 3:16.