January

Kpɔ mi nɔ hyɛli komɛ yɔseɔ kaa e he hia nɛ asafo mi nikɔtɔmahi fuu nɛ a ngɔ be fuu kɛ tsɔse nyɛmimɛ nihewi kɛ nyumuhi konɛ a wa nɛ a da níhi a nya ngɛ asafo ɔ mi. Se eko ɔ, enɛ ɔ peemi he maa wa wawɛɛ. Mɛni he je? Ke asafo mi nɔkɔtɔma ji mo ɔ, atsinyɛ jemi ko be he kaa o le kaa e sa kaa o ná deka kɛ tsɔse nyɛmimɛ nyumuhi. O le hu kaa loko asafohi nɛ a ngɛ mwɔnɛ ɔ, kɛ asafohi nɛ a ma tsɔ hwɔɔ se ɔ tsuo a he maa wa a, e he hia nɛ wa ná nyɛmimɛ nyumuhi fuu. (Yes. 60:22) Baiblo ɔ tsɔɔ kaa e sa nɛ o “tsɔɔ ni kpahi” ní. Se kɛ̃ ɔ, e he ma nyɛ maa wa kaa o ma ná deka kɛ pee jã. E sa nɛ o tsu o weku mi bimɛ a hiami níhi a he ní kɛ ha mɛ, nɛ o tsu mo nitsɛ o ní tsumi hulɔ. E sa nɛ o tsu asafo ɔ mi hiami níhi kɛ ní kpahi hu nɛ a he hia a he ní. Se e he hia nɛ a tsɔse ni kpahi konɛ a tsu babauu ngɛ asafo ɔ mi. Ke a tsɔse nyɛmimɛ nyumuhi fuu konɛ a nyɛ nɛ a da níhi a nya ngɛ asafo ɔ mi ɔ, nɔ tsuaa nɔ ma ná he se. w15 4/15 1:2, 3

Ke a hla nɔ ko kaa asafo mi nɔkɔtɔma ehe ɔ, e ko susu kaa e sa nɛ e tsake níhi a hɛ mi. E sa nɛ e kai kaa loko a ma tsake níhi a hɛ mi ɔ, a daa asafo ɔ mi hiami níhi, aloo blɔ tsɔɔmi nɛ je Yehowa asafo ɔ ngɔ ɔ nɔ kɛ peeɔ jã. Ke a hla mo kaa asafo mi nɔkɔtɔma a, moo ngɔ níhi nɛ o tsɔɔli ɔmɛ je Baiblo ɔ mi kɛ tsɔɔ mo ɔ kɛ tsu ní, nɛ lɔ ɔ maa tsɔɔ kaa o ngɛ bumi kɛ ha asafo mi nikɔtɔmahi nɛ a ngɛ níhi a si kpami ɔ, nɛ o nyɛmimɛ nyumuhi kɛ yihi hu ma he mo maa ye. Ke o bɔni níhi a si kpami nami, nɛ e he hia kaa a pee tsakemi ko ngɛ asafo ɔ mi ɔ, e sa nɛ mo hu o fĩ se. Enɛ ɔ ma ha nɛ nyɛ we asafo ɔ kɛ Yehowa blɔ nya tomi ɔ nɛ ngɛ e hɛ mi yae ɔ maa nyɛɛ daa. Nɛ ngɛ be nɛ sa mi ɔ, eko ɔ, Yehowa maa ye bua mo nɛ o ma tsu ní po pe o tsɔɔli ɔmɛ.​—Yoh. 14:12. w15 4/15 2:17

Ke o kɛ si himi nɛ mi wa ngɛ kpee ɔ, e maa pee mo kaa bɔ nɛ e pee Paulo ɔ, nɛ e he maa hia kaa a je mo kɛ je “gbenɔ mi.” (2 Tim. 4:17) Ngɛ behi kaa jã mi ɔ, e he hia wawɛɛ nɛ o ngɔ o hɛ kɛ fɔ Yehowa nɔ. Kaa nɔ hyɛmi nɔ́ ɔ, eko ɔ, o ngɛ o weku no ko nɛ e be he wami hyɛe. O sɔleɔ kɛ haa Yehowa konɛ e ye bua mo nɛ o pee juɛmi nɛ da, nɛ o ná kã kɛ tsu níhi a he ní. Ke amlɔ nɛ ɔ, o na kaa Yehowa nu mo sisi, nɛ e le si himi mi nɛ o ngɛ ɔ, o tsui nɔɔ o mi. E maa ye bua mo konɛ o nyɛ nɛ o da si himi ɔ nya, konɛ o nyɛ nɛ o ye lɛ anɔkuale. Be komɛ ɔ, eko ɔ, o be nae kaa Yehowa ngɛ mo ye buae. Eko ɔ, dɔkitahi kɛ mo kpa we gbi ngɛ nɔ́ nɛ o suɔ kaa a pee ha mo ɔ he. Aloo eko ɔ, o hyɛ blɔ kaa o weku li nɛ a wo o bua, se a peeɔ níhi kɛ jɔ̃ɔ o kɔni mi mohu. Be tsuaa be ɔ, moo ngɔ o hɛ kɛ fɔ Yehowa nɔ, nɛ e maa wo mo he wami. Yaa nɔ nɛ o hɛ mo kɛ su Yehowa he. (1 Sam. 30:3, 6) Pee se ɔ, ke o yɔse kaa Yehowa ye bua mo ɔ, huɛ bɔmi nɛ ngɛ o kɛ lɛ nyɛ kpɛti ɔ mi maa wa. w15 4/15 4:10, 11

Wɔ Yehowa sɔmɔli lɛɛ, Satan nyɛ we nɛ e sisiɔ wɔ kaa lɛ Satan ɔ be. Wa le kaa Abosiami ngɛ nitsɛnitsɛ. Kɛ wa plɛ kɛ le kɛɛ? Baiblo ɔ tsɔɔ kaa Satan kɛ Hawa tu munyu kɛ gu sinɔ ko nɔ. (1 Mose 3:1-5) E kɛ Yehowa tu munyu, nɛ e tsɔɔ kaa pi juɛmi kpakpa nɛ Hiob kɛ ngɛ lɛ jae ɔ. (Hiob 1:9-12) Satan bɔ mɔde nɛ e ka Yesu. (Mat. 4:1-10) Nɛ benɛ a wo Yesu matsɛ ngɛ jeha 1914 ɔ, Satan hia “ta” kɛ si nihi nɛ a pɔ mɛ nu nɛ a piɛ ngɛ zugba a nɔ ɔ. (Kpoj. 12:17) Abosiami kɛ nihi nɛ a pɔ mɛ nu ɔ kɛ to kpa amɛ ngɛ ta nɛ ɔ hwue. E ngɛ mɔde bɔe kaa e ma puɛ a hemi kɛ yemi. Loko wa ma nyɛ maa ye kunimi ngɛ ta nɛ ɔ mi ɔ, e sa nɛ waa hwu kɛ si Satan, nɛ wa ha nɛ wa hemi kɛ yemi ɔ mi nɛ wa. Satan woɔ e he nɔ wawɛɛ nitsɛ. Bɔfo yayami nɛ ɔ te si kɛ wo he blɔ nɛ Mawu ngɛ kaa e yeɔ adebɔ níhi a nɔ ɔ. E bɔ mɔde kaa e ma ha nihi nɛ a ja lɛ mohu pe Yehowa. Nɔ ko nɔ ko be nɛ woɔ e he nɔ kɛ lɛ sɔ. Enɛ ɔ he ɔ, blɔ kake nɛ wa ma nyɛ maa gu nɔ kɛ hwu kɛ si Satan ji, nɛ wa be wa he nɔ woe, mohu ɔ, wa maa ba wa he si.​—1 Pet. 5:5. w15 5/15 2:3, 4

Yehowa wo wɔ si kaa wa ma ná si himi kpakpa hwɔɔ se. Ke wa susu jamɛ a be ɔ he ɔ, wa bua jɔɔ, nɛ lɔ ɔ woɔ wɔ kã konɛ waa ya nɔ nɛ wa sɔmɔ lɛ. Ke o maa ya hiɔwe jio, o maa hi zugba nɛ ɔ nɔ jio, anɛ o nyɛɔ poɔ he foni ngɛ o juɛmi mi kaa o ngɛ níhi nɛ Yehowa wo mo si kaa o maa pee ɔ pee lo? Ke o hɛ nɔ kami ji kaa o maa hi zugba a nɔ kɛ ya neneene ɔ, moo po he foni kaa o piɛɛ o huɛmɛ a he kɛ ngɛ zugba a nɔ dlae kɛ pee abɔɔ ko nɛ ngɛ fɛu. Nihi nɛ a ngɛ ní tsumi nɛ ɔ nɔ hyɛe ɔ susuɔ o he. Nihi tsuo nɛ bɔle mo ɔ suɔ Yehowa kaa bɔ nɛ mo hu o suɔ lɛ ɔ. O ngɛ nɔmlɔ tso mi he wami kpakpa, o ngɛ kpakpataa, nɛ nɔ́ ko hɛwi mo. O ngɛ bua jɔmi, ejakaa o ma nyɛ maa ngɔ nyɛmi kɛ nile nɛ o ngɛ ɔ kɛ ye bua nihi, nɛ o kɛ ma nyɛ maa wo Yehowa hɛ mi nyami hulɔ. Eko ɔ, o ngɛ nihi nɛ a tle mɛ si ɔ ye buae momo konɛ a le Yehowa. (Yoh. 17:3; Níts. 24:15) Ke o poɔ ní nɛ ɔmɛ a he foni ngɛ o juɛmi mi ɔ, pi nlami nɛ o ngɛ nlae. Ní nɛ ɔmɛ tsuo maa ba mi, ejakaa jã ji bɔ nɛ Baiblo ɔ tsɔɔ.​—Yes. 11:9; 33:24; 35:5-7; 65:22. w15 5/15 3:15

Yesu gu nyakpɛ blɔ nɔ nɛ e ha nihi babauu wai kpakpa nɛ a nu. (Yoh. 2:6-11) Yesu kɛ he wami nɛ e ngɛ ɔ fo we lɛ pɛ e nɔ́ mi. Mo susu nɔ́ nɛ ba benɛ Abosiami ka Yesu kaa e ha nɛ tɛhi nɛ plɛ pee abolo ɔ he nɛ o hyɛ. Yesu pee we jã. (Mat. 4:2-4) Mohu ɔ, e suɔ kaa e kɛ e he wami ɔ nɛ tsu ní konɛ ni kpahi nɛ a ná he se. Kɛ wa ma plɛ kɛ kase Yesu konɛ wɔ hu wa fo ni kpahi a nɔ́ mi ha kɛɛ? Yesu tsɔɔ kaa e sa nɛ waa “ke wa sibi ní.” (Luka 6:38) Wa ma nyɛ maa pee jã kɛ gu ni kpahi nɛ wa ma tsɛ mɛ kɛ ba wa we mi konɛ waa kɛ mɛ nɛ ye ní ɔ nɔ. Jehanɛ hu ɔ, ke a kpa asafo mi kpe ɔ, wa ma nyɛ maa ye bua nɔ ko. Kaa nɔ hyɛmi nɔ́ ɔ, wa ma nyɛ maa ye bua nyɛmi ko kɛ kase ní peemi ko nɛ a ha lɛ. Aloo wa ma nyɛ maa ye bua nyɛmi ko, aloo wa ma tsɔse nyɛmi ko ngɛ fiɛɛmi ní tsumi ɔ mi. Ke wa bɔɔ mɔde nɛ wa jeɔ wa suɔmi mi kɛ yeɔ bua ni kpahi ɔ, lɔ ɔ tsɔɔ kaa wa ngɛ Yesu kasee, ejakaa Yesu haa nɔ nɔ́ faa. w15 6/15 1:3, 4, 6

Ke wa ya nɔ nɛ wa ye anɔkuale ɔ, wa maa na nyakpɛ ní nguanguahi nɛ pe kulaa a, a kpɛti kake. Lɔ ɔ ji kaa a maa baa wa yi ngɛ haomi ngua a mi! Ke Harmagedon ta a ba nyagbe pɛ ɔ, wa maa na nyakpɛ níhi babauu nɛ maa ya nɔ. Jamɛ a be ɔ mi ɔ, adesahi tsuo ma ná nɔmlɔ tso mi he wami kpakpa. (Yes. 35:5, 6; Kpoj. 21:4) Mo susu he nɛ o hyɛ. Be maa su nɛ nihi ma sake a hɛngmɛ nya glaasihi, dɛma tsohi, glɔtsɛmɛ a tsohi, libɔɔhi a sɛhi, kɛ níhi kaa jã a kɛ fɔ̃ he. Nihi nɛ a maa po Harmagedon ta a ma tsu ní tsumihi fuu. Mɛ ji nihi nɛ a ma dla zugba a nɔ nɛ a maa pee lɛ Paradeiso. (La 115:16) Ke “nimli asafo” ɔ nɛ a ngɛ mwɔnɛ ɔ kane Baiblo ɔ nɛ a na kaa Yesu tsa hiɔtsɛmɛ ɔ, e woɔ mɛ he wami wawɛɛ. (Kpoj. 7:9) Nyakpɛ ní nɛ ɔmɛ ha nɛ wa ná hɛ kɛ nɔ fɔmi nɛ mi wa kaa hwɔɔ se ɔ, a ma tsa wa he hiɔhi tsuo ha wɔ. Nyakpɛ ní nɛ ɔmɛ hu ha nɛ wa na kaa Mawu Bitɛte ɔ suɔ adesahi saminya. (Yoh. 10:11; 15:12, 13) Yesu mi mi nɛ sã lɛ ngɛ nihi a he ɔ tsɔɔ kaa Yehowa ngɛ suɔmi nɛ mi kuɔ kɛ ha e sɔmɔli ɔmɛ a ti nɔ tsuaa nɔ.​—Yoh. 5:19. w15 6/15 2:16, 17

Ngɛ jeha 1914 ɔ mi ɔ, ta te si ngɛ Yuropa, nɛ ngɛ be kpiti mi ɔ, e sã mahi tsuo nɛ ngɛ je ɔ mi ɔ. Ta a ngɔ hwɔ nɛ nya wa kɛ ba. Benɛ ta a ba nyagbe ngɛ jeha 1918 ɔ mi ɔ, gbenɔ hiɔ nɛ ji aja a hu sɛ nimli a kpɛti. E tane nihi a yi pe ta a po. Enɛ ɔmɛ tsuo piɛɛ “okadi” nɛ Yesu kɛ ha a he. Okadi nɛ ɔ ma nɔ mi kaa a wo Yesu Matsɛ ngɛ hiɔwe ngɛ jeha 1914 ɔ mi. (Mat. 24:3-8; Luka 21:10, 11) Ngɛ jamɛ a jeha a mi ɔ, Yesu ‘je kpo kaa kunimi yelɔ nɛ yaa gbe e kunimi yemi ɔ nya.’ (Kpoj. 6:2) Yesu sake Satan kɛ e daimonio ɔmɛ kɛ je hiɔwe ba fɔ zugba a nɔ. Kɛ je lɔ ɔ se ɔ, gbami nɛ ngɛ mwɔnɛ ɔ ngmami ɔ mi ɔ bɔni mi bami. w15 6/15 4:13

Benɛ a to Kristofohi asafo ɔ sisi nɛ e sui jeha 100 lolo ɔ, hemi kɛ yemi kuami je sisi kaa bɔ nɛ a gba fɔ si ɔ. (Níts. 20:28-30; 2 Tes. 2:3, 4) Kɛ je lɔ ɔ se ɔ, e he ba wa wawɛɛ kaa nihi maa le nihi nɛ a jaa Mawu ngɛ anɔkuale mi ɔ a mi tso. Jeha lafahi ba be loko Yehowa gu Yesu nɔ kɛ ha nɛ nihi ba le ni nɛmɛ nɛ a ngɛ Mawu sɔmɔe ngɛ e mumi mi sɔlemi we ɔ a mi tso. Benɛ e ke e suu jeha 1919 ɔ, nihi ba le nihi nɛ Mawu kplɛɛ a nɔ nɛ a ngɛ sɔmɔe ngɛ e mumi mi sɔlemi we ɔ a mi tso heii. Nimli nɛ ɔmɛ pee tsakemi ngɛ a si himi mi konɛ Yehowa nɛ kplɛɛ jami nɛ a jaa lɛ ɔ nɔ saminya. (Yes. 4:2, 3; Mal. 3:1-4) Enɛ ɔ ha nɛ nina ko nɛ bɔfo Paulo na jeha lafahi abɔ nɛ be ɔ bɔni mi bami. A tu nina nɛ Paulo na a he munyu ngɛ 2 Korinto Bi 12:2-4. Ngɛ jamɛ a nina a mi ɔ, Yehowa tsɔɔ Paulo nɔ́ ko nɛ maa ya nɔ hwɔɔ se. w15 7/15 1:6-8

Anɛ enɛ ɔ tsɔɔ kaa a ma “sa” nihi nɛ a pɔ mɛ nu ɔ kɛ ho hiɔwe ya lo? Sɔlemi yali fuu susu kaa a ma sa Kristofohi kɛ ho hiɔwe ya kɛ a we adesa nɔmlɔ tso ɔ. A susu hu kaa Yesu maa kpale kɛ ba zugba a nɔ ba ye matsɛ nɛ a kɛ a hɛngmɛ maa na lɛ. Se Baiblo ɔ tsɔɔ heii kaa Yesu maa kpale kɛ ba ngɛ mumi mi. E de ke: “Nɔmlɔ Bi ɔ we okadi ɔ maa je kpo ngɛ hiɔwe” nɛ Yesu maa ba “ngɛ bɔku ɔmɛ a mi.” (Mat. 24:30) Baiblo ɔ tsɔɔ hu kaa “he lo kɛ muɔ nine be Mawu matsɛ yemi ɔ nɔ sue.” Enɛ ɔ he ɔ, e ma bi nɛ a ‘tsake nihi nɛ a maa ngɔ mɛ kɛ ho hiɔwe ya a ngɛ hɛngmɛfia mi ke nyagbe titimati ɔ pɛ.’ (1 Kor. 15:50-53) Wa be dee ke a ma “sa” mɛ kɛ ho, ejakaa munyungu nɛ ɔ kɛ lakpa Kristofohi a tsɔɔmi ngɛ tsakpa. Se kɛ̃ ɔ, a ma bua anɔkualetsɛmɛ nɛ a pɔ mɛ nu ɔ a nya ngɛ hɛngmɛfia mi. w15 7/15 2:14, 15

Matsɛ Yemi Asa amɛ a nɔ ji hehi titli nɛ nihi ma nyɛ maa kpe ngɛ kɛ ja Yehowa. Asafo mi kpehi nɛ wa peeɔ ɔ ji nike ní nɛ je Mawu ngɔ, nɛ kpe nɛ ɔmɛ yeɔ bua wɔ konɛ huɛ bɔmi nɛ ngɛ waa kɛ lɛ wa kpɛti ɔ mi nɛ wa. Ngɛ kpe nɛ ɔmɛ sisi ɔ, Yehowa asafo ɔ woɔ wɔ he wami, nɛ e kɛ blɔ tsɔɔmihi nɛ he hia hu haa wɔ. E ji he blɔ nɛ wa ná kaa daa otsi ɔ, Yehowa kɛ e Bi ɔ fɔɔ wɔ nine kɛ baa ‘Yehowa we okplɔɔ ɔ’ he. (1 Kor. 10:21) E sa nɛ wa kai be fɛɛ be kaa nine fɔmi nɛ ɔ se be. Yehowa ha nɛ wa le heii kaa e suɔ nɛ waa ba kpe nɛ ɔmɛ konɛ wa ba ja lɛ, nɛ waa wo wa sibi he wami hulɔ. (Heb. 10:24, 25) Akɛnɛ wa ngɛ bumi kɛ ha Yehowa he je ɔ, e sɛ nɛ waa ngɔ nɔ́ ko nɛ he hia we kɛ je wa nya nɛ waa po asafo mi kpehi a mi. Ke wa dlaa wa he saminya loko wa yaa asafo mi kpehi, nɛ wa bɔɔ mɔde kaa wa ma ha sanehi a heto ɔ, lɔ ɔ tsɔɔ kaa wa bua jɔ kpe nɛ ɔmɛ a he. w15 7/15 4:3, 4

Yesu fã e se nyɛɛli ɔmɛ kaa a ya nɔ nɛ a hwɔɔ. Enɛ ɔ he je ɔ, e he hia nɛ waa pee jã. Yehowa asafo ɔ hu yaa nɔ nɛ e kaiɔ wɔ konɛ ‘waa hi Mawu ligbi ɔ blɔ hyɛe nɛ e su mla,’ konɛ waa kɛ wa juɛmi nɛ ma je ehe ɔ nɛ Yehowa wo he si ɔ nɔ. (2 Pet. 3:11-13) Ke e he hia kaa Yesu se nyɛɛli nɛ a hi si ngɛ kaseli ɔmɛ a be ɔ mi ɔ po nɛ a ya nɔ nɛ a hyɛ Yehowa ligbi ɔ blɔ ɔ, lɛɛ be nɛ wa ngɛ mi nɛ ɔ ji be nɛ e he hia pe kulaa nɛ e sa kaa waa pee jã. Mɛni he je? Ejakaa okadi nɛ Yesu kɛ ha a maa nɔ mi kaa e bɔni Matsɛ yemi ngɛ Mawu Matsɛ Yemi ɔ nya kɛ je jeha 1914 ɔ mi, nɛ jehanɛ hu ɔ, wa ngɛ “je nɛ ɔ nyagbe be” ɔ mi. Kaa nɔ hyɛmi nɔ́ ɔ, Yesu gba kɛ fɔ si kaa je ɔ mi si himi he maa wa nɛ a maa fiɛɛ Matsɛ Yemi ɔ he sane kpakpa a kɛ kpa je ɔ mi tsuo. Gbami nɛ ɔ ngɛ mi bae. (Mat. 24:3, 7-14) Yesu tsɔɔ we be nɛ nyagbe ligbi ɔmɛ maa ba nyagbe. Enɛ ɔ he ɔ, e sa nɛ wa dla wa he kɛ to, ejakaa e be kɛe nɛ nyagbe ɔ maa ba. w15 8/15 2:4, 5

Ngɛ je ehe ɔ mi ɔ, nɔ́ nɛ ma ha wɔ bua jɔmi pe kulaa ji, huɛ bɔmi nɛ maa hi waa kɛ Yehowa wa kpɛti ɔ. (Mat. 5:3) Waa kɛ Yehowa sɔmɔmi maa pee nɔ́ titli ngɛ wa si himi mi, nɛ wa ma ná Yehowa he bua jɔmi. Enɛ ɔ he ɔ, ke waa kɛ Yehowa sɔmɔmi pee nɔ́ titli ngɛ wa si himi mi amlɔ nɛ ɔ, wa ngɛ wa he dlae kɛ ha je ehe ɔ mi himi. (Mat. 6:19-21) Mɛni wa ma nyɛ maa pee konɛ waa kɛ bua jɔmi nɛ sɔmɔ Yehowa pe bɔ nɛ wa ngɛ pee nɛ ɔ? E sa kaa waa kɛ otihi nɛ ma wa hɛ mi. Ke o ji niheyo aloo zangmayo ɔ, mo susu bɔ nɛ o kɛ o wami ma nyɛ ma sɔmɔ Yehowa ha a he saminya. Mɛni he je nɛ o hla we níhi a mi ngɛ asafo ɔ womihi a mi konɛ o le be tsuo sɔmɔmi ní tsumi ɔ mimi slɔɔtoslɔɔtohi nɛ ngɛ ɔ? O ma nyɛ maa ngɔ eko kɛ ma o hɛ mi. O kɛ ni komɛ nɛ a kɛ a be tsuo sɔmɔ Yehowa jehahi babauu ɔ nɛ sɛɛ ní. Ke o sɔmɔ Yehowa o wami be tsuo ɔ, o ma ná tsɔsemi nɛ he maa ba se nami ha mo. Níhi a si kpami nɛ o ma ná a maa ye bua mo konɛ o sɔmɔ Yehowa ngɛ je ehe ɔ mi. w15 8/15 3:13, 14

Tsa pi suɔmi pɛ ji mumi ɔ yiblii nɛ e he hia. He jɔmi, he nɔ yemi, kɛ tsui si tomi hu he hia. (Gal. 5:23) Su nɛ ɔmɛ yeɔ bua Kristofo no nɛ e wa a nɛ e daa haomihi a nya nɛ e mi mi fu we. Ke níhi yɛ nɔ ha lɛ kaa bɔ nɛ e ngɛ blɔ hyɛe po ɔ, e kɔni mi jɔ̃ we. Ke Kristofo no nɛ e wa ngɛ dɛ he ní kasemi pee ɔ, e hlaa sisi tomi mlaahi nɛ ngɛ Baiblo ɔ mi nɛ ma nyɛ maa ye bua lɛ konɛ e le slɔɔto nɛ ngɛ kpakpa kɛ yayami a kpɛti. Kɛkɛ ɔ, ke e kɛ e he nile nɛ e kɛ Baiblo ɔ tsɔse ɔ tsu ní ɔ, e ma nyɛ maa mwɔ e yi mi kpɔ ngɛ blɔ nɛ da nɔ. Kristofo no nɛ e wa a baa e he si, enɛ ɔ he ɔ, be tsuaa be ɔ, e le kaa Yehowa blɔ tsɔɔmi kɛ e mlaahi hi pe lɛɛ e nɔ́. E fiɛɛɔ sane kpakpa a kɛ kã, nɛ e bɔɔ mɔde wawɛɛ nɛ e peeɔ níhi nɛ ma ha kake peemi maa hi asafo ɔ mi. Waa kɛ jeha babauu ngɛ Yehowa sɔmɔe jio, lingmi nɛ ɔ nɛ wa bɔni Yehowa sɔmɔmi jio, wɔ tsuo wa ma nyɛ ma bi wa he ke: ‘Anɛ e he hia kaa ma pee tsakemihi konɛ ma nyɛ nɛ ma kase Yesu saminya lo? Anɛ nɔ́ ko ngɛ nɛ e sa kaa ma pee konɛ ma ya ye hɛ mi lo?’ w15 9/15 1:6, 7

Kaseli ɔmɛ na Yesu nɛ e ngɛ nyɛɛe ngɛ Galilea Wo ɔ nɔ. Petro tsɛ Yesu, nɛ e de lɛ ke e ha nɛ e nyɛɛ nyu ɔ hɛ mi kɛ ba e ngɔ. Benɛ Yesu de Petro kaa e ba a, Petro je lɛ ɔ mi nɛ e bɔni nyɛɛmi kɛ yaa Yesu ngɔ. Se amlɔ nɔuu ɔ, Petro bɔni mumi kɛ yaa nyu ɔ sisi. Mɛni he je? Ejakaa e na kaa kɔɔhiɔ ɔ nya wa, nɛ oslɔke ɔ hu nya wa, lɔ ɔ he ɔ, e tsui po. Petro kpa ngmlaa kɛ tsɛ Yesu ke e ye bua lɛ. Yesu pɛtɛ e he nɛ e de lɛ munyu nɛ ngɛ mwɔnɛ ɔ ngmami ɔ mi ɔ. (Mat. 14:24-32) Petro ngɛ hemi kɛ yemi nɛ mi wa. Mɛni he je nɛ wa ma nyɛ ma de jã a? Benɛ Yesu tsɛ Petro ɔ, Petro je lɛ ɔ mi nɛ e nyɛɛ nyu ɔ hɛ mi. E ngɛ hɛ kɛ nɔ fɔmi kaa ngɛ Mawu he wami nya a, lɛ hu e ma nyɛ maa nyɛɛ nyu ɔ hɛ mi kaa bɔ nɛ Yesu pee ɔ. Jã kɛ̃ nɛ benɛ Yesu tsɛ wɔ ke wa ba nyɛɛ e se ɔ, wa jɔɔ wa he nɔ ha Yehowa, nɛ wa ha nɛ a baptisi wɔ. Mɛni he je? Ejakaa wa ngɛ hemi kɛ yemi ngɛ Yehowa kɛ Yesu tsuo a mi, nɛ wa ngɛ hɛ kɛ nɔ fɔmi kaa a maa ye bua wɔ.​—Yoh. 14:1; 1 Pet. 2:21. w15 9/15 3:1, 3

Tsɛ nɛ ngɛ suɔmi ɔ poɔ e bimɛ a he piɛ konɛ nɔ́ ko nɛ ko ye mɛ awi. Jã pɛpɛɛpɛ nɛ wa Tsɛ Yehowa hu peeɔ. Mo susu he nɛ o hyɛ: Kaa bɔ nɛ o hɛngmɛ he jua wa ha mo nɛ o yeɔ oya kɛ poɔ he piɛ ɔ, jã kɛ̃ nɛ Yehowa hu yeɔ oya kɛ poɔ e we bi a he piɛ, ejakaa a he jua wa ha lɛ. (Zak. 2:8) Ngɛ anɔkuale mi ɔ, Yehowa sɔmɔli komɛ kaa kaselɔ Stefano kɛ ni kpahi gbo ngɛ a we anɔkuale yemi ɔ he je. Tsa pi be fɛɛ be nɛ Yehowa tsiɔ si himihi kaa jã a nya. Se e buɔ e we bi a he kaa kuu, nɛ e bɔɔ mɛ kɔkɔ ngɛ níhi nɛ Satan bɔɔ mɔde kaa e ma kɛ sisi mɛ ɔ a he. (Efe. 6:10-12) Wa kaneɔ kɔkɔ bɔmi nɛ ɔmɛ ngɛ Baiblo ɔ kɛ womihi nɛ Yehowa asafo ɔ pee ɔ a mi. Kaa nɔ hyɛmi nɔ́ ɔ, wa kase haomihi nɛ waa kɛ ma nyɛ maa kpe ngɛ bɔ nɛ waa kɛ Intanɛti ɔ tsuɔ ní ha, sika suɔmi, sinihi, womihi, fiɛmihi nɛ je mi bami yaya kɛ yi wu tso ní peepeehi ngɛ mi ɔ a he. E ngɛ heii kaa Yehowa suɔ wɔ, nɛ e suɔ kaa e maa po wa he piɛ. w15 9/15 4:15, 17

Yehowa yeɔ bua e we bi nɛ a nyɛɔ fãa sane kpakpa fiɛɛmi ní tsumi ɔ he ngɛ mlaa nya hulɔ. (Filip. 1:7, NW) Kaa nɔ hyɛmi nɔ́ ɔ, ke ma nɔ yeli komɛ bɔ mɔde kaa a maa tsi fiɛɛmi ní tsumi ɔ nya a, waa kɛ sane ɔ yaa kojomi he. Ke e hí kulaa a, ngɛ je ɔ mi tsuo ɔ, wa ye nguɔ si kakaaka 268 ngɛ kojomi he nguahi. Ngɛ European Court of Human Rights ɔ pɛ ɔ, kɛ je jeha 2000 ɔ mi kɛ ma nɛ ɔ, wa ye nguɔ si kakaaka 24. E ngɛ heii kaa nɔ ko nɔ ko be nyɛe ma je Mawu nine ngɛ e we bi a he! (Yes. 54:17) Sane kpakpa a nɛ wa ngɛ fiɛɛe ngɛ je kɛ wɛ ɔ hu ji nɔ́ kpa ko nɛ tsɔɔ kaa Mawu nine ngɛ e we bi a he. (Mat. 24:14; Níts. 1:8) Kake peemi ngɛ Yehowa we bi nɛ a ngɛ je mahi tsuo a mi ɔ a kpɛti. Kaa Yehowa yi bua e we bi ɔ, jinɛ e be nyɛe maa ba jã. O be kake peemi nɛ ɔ nae ngɛ he ko he ko! Nihi nɛ a ja we Yehowa po deɔ ke: “Niinɛ, Mawu kɛ nyɛ ngɛ!” (1 Kor. 14:25) Wa ngɛ níhi fuu nɛ wa ma nyɛ maa da nɔ kɛ tsɔɔ kaa Mawu kɛ e we bi ngɛ.​—Yes. 66:14. w15 10/15 1:13, 14

Baiblo ɔ bɔ wɔ kɔkɔ kaa wa ko ha nɛ je ɔ nɛ he wa juɛmi. Enɛ ɔ hu tsɔɔ kaa e sɛ nɛ wa puɛ wa be fuu ngɛ níhi nɛ ngɛ je ɔ mi ɔ a he. (1 Kor. 7:29-31) Tɔmi be ní nɛ ɔmɛ ekomɛ a he, se a ma nyɛ ma puɛ wa be. Kaa nɔ hyɛmi nɔ́ ɔ, eko ɔ, wa bua jɔ hɛja jemi komɛ, womi kanemi, tiivi hyɛmi, si slaami, ní hemi, klamahi nɛ ba nɔ a hlami, aloo ní nguanguahi a he. Nihi fuu a bua jɔɔ he kaa a kɛ sɛ gbi maa mane ngɛ Intanɛti ɔ aloo a fon nɔ, aloo a maa le níhi nɛ ngɛ nɔ yae ngɛ je ɔ mi, kɛ bɔɔlu fiami kɛ fiɛmi kpahi a mi. Ní nɛ ɔmɛ ma nyɛ ma he ni komɛ a juɛmi. (Fiɛlɔ 3:1, 6) Ke wa puɛɔ be fuu ngɛ níhi nɛ se nami be he tsɔ a he ɔ, waa kɛ wa juɛmi be nyɛe maa ma nɔ́ nɛ he hia wawɛɛ nɛ ji Yehowa jami ɔ nɔ. (Efe. 5:15-17) Satan ngɛ mɔde bɔe wawɛɛ konɛ e ha nɛ níhi nɛ ngɛ e je ɔ mi ɔ nɛ je wa juɛmi kɛ je Yehowa sɔmɔmi nɔ. E pee jã ngɛ kaseli ɔmɛ a be ɔ mi nɛ mwɔnɛ ɔ lɛɛ, e mi pa wa wawɛɛ nitsɛ. (2 Tim. 4:10) Lɔ ɔ he ɔ, e sa nɛ waa ngɔ ga nɛ mwɔnɛ ɔ ngmami ɔ ngɛ wɔ woe ɔ kɛ tsu ní. w15 10/15 3:7, 8

Yehowa bɔfo ko ba de Manoa yo ɔ kaa e ma fɔ binyumu. Benɛ Manoa nu manye munyu nɛ ɔ, e bua jɔ wawɛɛ nitsɛnitsɛ. Se e susu nɔ́ nɛ Yehowa ngɛ blɔ hyɛe kaa e pee kaa bitsɛ ɔ he wawɛɛ hulɔ. Jamɛ a be ɔ mi ɔ, Israel bi fuu ngɛ ní yayamihi pee. Kɛ Manoa kɛ e yo ɔ ma plɛ kɛ tsɔse a binyumuyo ɔ ha kɛɛ konɛ e ná suɔmi kɛ ha Yehowa, nɛ e sɔmɔ lɛ? Manoa kpa Yehowa pɛɛ kaa e ha nɛ bɔfo ɔ nɛ kpale kɛ ba. E de ke: “I kpa mo pɛɛ, Mawu nɔmlɔ ɔ nɛ o tsɔ ɔ, ha nɛ e kpale ba wa ngɔ ekohu nɛ e ba tsɔɔ wɔ bɔ nɛ wa maa hɛɛ jokuɛ nyumuyo ɔ nɛ a ma fɔ ɔ ha.” (Many. 13:1-8) Ke fɔlɔ ji mo ɔ, eko ɔ, o maa nu Manoa sisi. Mo hu blɔ nya ní tsumi ngɛ o kuɛ nɔ kaa o maa ye bua o bimɛ konɛ a le Yehowa, nɛ a ná suɔmi ha lɛ. (Abɛ 1:8) Ke nyɛ ngɛ Weku Mawu Jami pee ɔ, o ma nyɛ maa ye bua o bimɛ ɔmɛ konɛ a ya nɔ nɛ a kase Baiblo ɔ kɛ Yehowa he ní. Ngɛ anɔkuale mi ɔ, e he hia nɛ o pee babauu pe Baiblo ɔ nɛ o kɛ o bimɛ maa kase daa otsi ɔ kɛkɛ (5 Mose 6:6-9) Anɛ o ma nyɛ ma tsɔse o bimɛ nɛ a ná suɔmi kɛ ha Yehowa nɛ a sɔmɔ lɛ lo? w15 11/15 1:1, 2

E ngɛ mi kaa o be nyɛe maa le nɔ́ nɛ ngɛ nihi a tsui mi kaa bɔ nɛ Yesu pee ɔ mohu lɛɛ, se o ma nyɛ ma kɔ nɔ́ se. Yehowa ma nyɛ maa ye bua mo kɛ hla su kpakpahi ngɛ o bi ɔ he. Ke o bi ɔ pee we níhi nɛ o ngɛ blɔ hyɛe kaa e pee ɔ po ɔ, ko de kɔkɔɔkɔ kaa bi yayami aloo sanetsɛ ji lɛ. Ko ha nɛ e ba o juɛmi mi jã kɔkɔɔkɔ. Mohu ɔ, mo de lɛ kaa o na su kpakpa komɛ ngɛ e he, nɛ o ngɛ nɔ mi mami kaa e suɔ nɛ e pee nɔ́ nɛ da. Mo yɔse níhi nɛ e ngɛ pee konɛ e nyɛ nɛ e ya e hɛ mi ɔ, nɛ́ o je e yi. Moo ye bua lɛ konɛ e ya e hɛ mi ngɛ su kpakpahi nɛ e ngɛ ɔ mi. Ke e maa hi ɔ, o kɛ blɔ nya ní tsumi fuu nɛ wo e dɛ konɛ e nyɛ nɛ e pee jã. Jã nɛ Yesu kɛ e kaseli ɔmɛ hi si. Benɛ Yesu kɛ Natanael kpe jeha kake kɛ fã se ɔ, e kɛ blɔ nya ní tsumi ko nɛ e he hia wo e dɛ. E ngɔ Natanael kɛ piɛɛ e bɔfo ɔmɛ a he, nɛ Natanael kɛ anɔkuale yemi tsu ní tsumi nɛ Yesu kɛ wo e dɛ ɔ. (Luka 6:13, 14; Níts. 1:13, 14) Enɛ ɔ he ɔ, ko ha nɛ o bi ɔ nɛ nu he kaa e be nɔ́ kpakpa ko nyɛe maa pee gblee, mohu ɔ, mo je e yi nɛ o wo lɛ he wami. Ha nɛ e nu he kaa e ma nyɛ ma ha nɛ o kɛ Yehowa tsuo nyɛ bua maa jɔ, nɛ e ma nyɛ ma sɔmɔ Yehowa kɛ e nyɛmi tsuo. w15 11/15 2:15, 16

Nyagbe ligbi ɔmɛ je sisi ngɛ jeha 1914 ɔ mi. Jamɛ a be ɔ mi ɔ, Mawu sɔmɔli maa pee 5,000 pɛ nɛ a ngɛ. Akɛnɛ nyɛmimɛ nyumuhi kɛ yihi nɛ a pɔ mɛ nu nɛ ɔ suɔ nɔmlɔ, nɛ Mawu mumi klɔuklɔu ɔ hu yeɔ bua mɛ he je ɔ, e ngɛ mi kaa a he pi lɛɛ se a nyɛ nɛ a fiɛɛ Matsɛ Yemi ɔ he sane kpakpa a ngɛ kahi nɛ a kɛ kpe ɔ tsuo se. Mɛni je jã nɛ a pee ɔ mi kɛ ba? Mwɔnɛ ɔ, a ngɛ nimli asafo nɛ a ngɛ hɛ nɔ kami kaa a maa hi zugba a nɔ kɛ ya neneene ɔ nya buae. Wa ngɛ Odasefohi maa pee 8,000,000 ngɛ asafohi nɛ hiɛ pe 115,400 a mi ngɛ je kɛ wɛ. Yibɔ nɛ ɔ ngɛ nɔ puee daa jenanɛɛ. Kaa nɔ hyɛmi nɔ́ ɔ, ngɛ jeha 2014 sɔmɔmi jeha a mi ɔ, a baptisi Odasefohi ehehi nɛ hiɛ pe 275,500. Ngɛ akɔtaa bumi nya a, daa otsi ɔ, a baptisiɔ nihi maa pee 5,300. Yehowa asafo ɔ yi ngɛ blie, ejakaa wa ngɛ hemi kɛ yemi ngɛ Mawu mi, nɛ wa kplɛɛ Baiblo ɔ nɔ kaa e ji Mawu Munyu. (1 Tes. 2:13) Satan sume wa sane kulaa nɛ e teɔ si kɛ woɔ wɔ mohu lɛɛ, se loloolo ɔ, Yehowa ngɛ wɔ jɔɔe.​—2 Kor. 4:4. w15 11/15 4:12, 14, 16

Baiblo he ní leli hyɛ Baiblohi nɛ a kɛ nine ngma a akpehi abɔ, kɛ Baiblohi nɛ a kɛ nine ngma a fã komɛ, kɛ blema Baiblohi nɛ a tsɔɔ sisi ɔ a mi fitsofitso. Benɛ a ngɔ womi nɛ ɔmɛ kɛ to a sibi a he ɔ, a na kaa ngmami kakaaka komɛ pɛ lɛ a je ekpa bɔɔ ngɛ ekomɛ a he. Slɔɔto bɔɔ nɛ ngɛ mi ɔ hu tsakee we sɛ gbi nɛ ngɛ Baiblo ɔ mi ɔ. Níhi a mi hlami nɛ ɔmɛ nɛ a pee ɔ ha nɛ nihi nɛ a bua jɔ Baiblo ɔ kasemi he ɔ ná nɔ mi mami kaa Yehowa Munyu lɛ ngɛ Baiblo ɔ nɛ a hɛɛ mwɔnɛ ɔ mi ɔ nɛ. Ngɛ mɔde nɛ nihi bɔ kaa a ma kpata Baiblo ɔ hɛ mi ɔ tsuo se ɔ, a tsɔɔ Baiblo ɔ sisi kɛ ya gbihi nɛ hiɛ pe 2,800 mi. E ngɛ mi kaa nihi fuu be hemi kɛ yemi ngɛ Mawu mi mohu lɛɛ, se kɛ̃ ɔ, Mawu Munyu ɔ ji womi ko nɛ a gbaa kɛ haa nihi pe womi kpahi tsuo. E ngɛ mi kaa Baiblo sisi tsɔɔmi komɛ a sisi numi yee, loo a dɛ tsɔ mohu lɛɛ, se lɔ ɔ ji kaa mɛ tsuo a haa nɛ nihi a nine suɔ sɛ gbi nɛ haa nɔ hɛ kɛ nɔ fɔmi kɛ neneene wami nɔ. w15 12/15 1:13, 14

Munyu nɛ wa tuɔ ɔ ma nyɛ ma tsa nihi nɛ e ma nyɛ maa ye nihi awi hulɔ. Nihi fuu nɛ a ngɛ Satan je ɔ mi ɔ tuɔ “munyu yaya” nɛ ngɛ kaa “kɛ̃ɛ̃ mi bihi,” aloo “klaate” ejakaa a suɔ kaa a maa ye nihi a tsui, nɛ a wo a mi mi la. (La 64:3) Nihi fuu kaseɔ munyu yaya nɛ ɔmɛ kɛ jeɔ sinihi kɛ tiivi nɔ ní peepeehi nɛ a hyɛɛ ɔ mi. Se e sɛ nɛ Kristofo no ko nɛ e de nɔ́ ko nɛ maa hao nɔ ko, ke nɔ́ nɛ e ma de ɔ ji muɔ nɔ́ po. Tɔmi ko be he kaa wa maa wo nihi a nya muɔ. E ma nyɛ ma ha nɛ nihi a bua maa jɔ munyu nɛ wa tuɔ ɔ he wawɛɛ. Se e sɛ nɛ waa tu munyu kɛ gbe nihi zo, loo wa jɛ nɔ kɛ wo nihi a nya muɔ. Baiblo ɔ wo Kristofohi mlaa kaa a ngmɛɛ “nɔ jɛmi” he. E de hu ke: “Munyu nɛ maa je nyɛ ti nɔ ko nya a, e ko pee nɔ́ nɛ ma puɛ nɔ, se mohu nɔ́ nɛ hi, nɛ e he hia, nɛ nɔ́ kpakpa ko maa je mi kɛ wo nɔ he wami. Kɛkɛ ɔ, e maa pee dloomi kɛ ha nihi nɛ ngɛ nyɛ tue bue ɔ.”​—Efe. 4:29, 31. w15 12/15 3:10

Ngɛ gbi komɛ a mi ɔ, a tsɔɔ nyagbe munyu nɛ ngɛ sɛ womi nɛ blɔ tsɔɔmi ajla toli ɔmɛ nɛ hi si ngɛ kaseli ɔmɛ a be ɔ mi ɔ ngma a sisi ke, “Nyɛ ná nɔmlɔ tso mi he wami kpakpa.” Wa suɔ wawɛɛ kaa wa ma ná nɔmlɔ tso mi he wami kpakpa. Akɛnɛ wa yi mluku he je ɔ, wa be nyɛe maa tu hiɔhi tsuo a nya fo. Nɛ ke wa be he wami ɔ, wa hyɛ we blɔ kaa Yehowa nɛ tsa wɔ ngɛ nyakpɛ blɔ nɔ. Se wa ma nyɛ maa hyɛ blɔ kaa hwɔɔ se ɔ, Yehowa ma tsa wa he hiɔhi tsuo ha wɔ. Ngɛ Kpojemi 22:1, 2 ɔ, bɔfo Yohane tu “nyu nɛ haa nɔ wami” kɛ ‘tsohi nɛ haa nɔ wami’ nɛ ma tsa nɔ fɛɛ nɔ ɔ he munyu. Tsa pi zugba tsopahi nɛ wa ma nyɛ maa nu mwɔnɛ ɔ, aloo ngɛ je ehe ɔ mi konɛ wa ná tsami ɔ he munyu nɛ a ngɛ tue. Mohu ɔ, e daa si kɛ ha níhi tsuo nɛ Yehowa kɛ Yesu maa pee konɛ wa nyɛ nɛ waa hi si kɛ ya neneene ɔ.​—Yes. 35:5, 6. w15 12/15 4:17, 18

Yehowa tsɔɔ kaa ngɛ wa be nɛ ɔ mi ɔ, “ni nyɔngma ma ba nu Yuda no kake nɛ a maa pɛtɛ e tade he, nɛ a ma de lɛ ke, ‘Waa kɛ mo maa ya, ejakaa wa nu kaa Mawu kɛ nyɛ ngɛ.’” (Zak. 8:23) “Yuda no” ɔ daa si kɛ ha nihi nɛ Mawu kɛ e mumi klɔuklɔu ɔ pɔ mɛ nu ɔ. A tsɛɛ mɛ hu ke ‘Mawu Israel.’ (Gal. 6:16) Kaa bɔ nɛ gbalɔ Zakaria de ɔ, Yesu hu tsɔɔ kaa Mawu we bi maa pee kake. E tsɛ nihi nɛ a ngɛ hɛ nɔ kami kaa a maa ya hiɔwe ɔ ke “kuu nyafii,” kɛ nihi nɛ a ngɛ hɛ nɔ kami kaa a maa hi zugba a nɔ ɔ ke ‘to kpahi.’ Se Yesu tsɔɔ kaa mɛ tsuo a maa pee “to kuu kake” nɛ a maa nyɛɛ lɛ nɛ ji ‘to hyɛlɔ kake’ ɔ se.​—Luka 12:32; Yoh. 10:16. w16.01 4:1, 2

E he hia nɛ waa po huɛ bɔmi nɛ ngɛ waa kɛ Yehowa wa kpɛti ɔ he piɛ. Wa ngɛ Satan je mi, nɛ wa yi mluku hulɔ. Enɛ ɔ he ɔ, e be yee ha wɔ kaa wa ma susu níhi a he nɛ wa maa pee wa ní kaa bɔ nɛ je ɔ peeɔ ɔ. Si himi nɛ wa ngɛ mi ɔ ngɛ kaa nɔ ko nɛ e ngɛ slee kɛ ngɛ nyu dɔ kpee. Enɛ ɔ he ɔ, e sa nɛ waa kɛ wa he wami tsuo nɛ sle konɛ nyu ɔ nɛ ko wo wɔ. Jã kɛ̃ nɛ e he hia nɛ waa bɔ mɔde wawɛɛ konɛ waa yu wa he ngɛ Satan je ɔ he. Kɛ fiɛɛmi ní tsumi ɔ poɔ wa he piɛ ha kɛɛ? Ke wa tu Yehowa kɛ Baiblo ɔ he munyu kɛ tsɔɔ nihi ɔ, waa kɛ wa juɛmi maa níhi nɛ a he hia kɛ ní kpakpahi a nɔ, se pi níhi nɛ ma gbɔjɔ wa hemi kɛ yemi ɔ. Fiɛɛmi haa nɛ wa hemi kɛ yemi ɔ mi waa, ejakaa e haa nɛ wa juɛmi hiɔ Mawu si womihi kɛ mlaahi nɛ e je suɔmi mi nɛ e wo ɔ nɔ. E yeɔ bua wɔ konɛ waa ya nɔ nɛ wa je suhi nɛ ma ha nɛ waa po wa he piɛ ngɛ Satan kɛ e je ɔ he ɔ kpo hulɔ. (Efe. 6:14-17) Ke wa haa nɛ níhi nɛ waa maa pee kɛ ye bua nihi ngɛ asafo ɔ mi ɔ heɔ wa be tsuo ɔ, wa be deka náe kɛ susu níhi nɛ haoɔ wɔ ɔ a he nɛ waa pee yeyeeye tsɔ. w16.01 5:12, 13

Mo kadi suɔmi nɛ Rut ná kɛ ha Yehowa a. Pee se ɔ, Boaz hu to suɔmi nɛ ɔ he hɛ nɛ e je e yi kaa e ‘ba sa we ngɛ Yehowa ngɔ.’ (Rut 2:12) Eko ɔ, munyu nɛ Boaz tu ɔ ha nɛ wa kai bɔ nɛ lohwe pɛlitsɛ ya saa we ngɛ e nyɛ pɛli sisi ɔ. (La 36:7; 91:1-4) Jã kɛ̃ nɛ Yehowa hu je suɔmi mi kɛ po Rut he piɛ nɛ e jɔɔ lɛ, akɛnɛ e ngɛ hemi kɛ yemi ngɛ Yehowa mi ɔ he je. Rut pia we e he hyɛ kaa e mwɔ yi mi kpɔ ko kaa jã. Mwɔnɛ ɔ, nihi fuu kaseɔ Yehowa he ní, se a pee we a juɛmi kaa a maa sa we ngɛ e ngɔ. A gblaa a nane si kaa a maa jɔɔ a wami nɔ ha lɛ nɛ a baptisi mɛ. Ke e peeɔ mo jã a, lɛɛ mo susu he nɛ o hyɛ kaa mɛni lɛ ha nɛ o ngɛ o nane si gblae ɔ. Nɔ fɛɛ nɔ sɔmɔɔ mawu ko kɛ̃. (Yosh. 24:15) Juɛmi ngɛ mi kaa wa maa mwɔ wa yi mi kpɔ kaa wa ma sɔmɔ anɔkuale Mawu ɔ. Ke o jɔɔ o he nɔ ha Yehowa a, lɔ ɔ tsɔɔ kaa o ngɛ hemi kɛ yemi kaa e maa pee wesa he ha mo. Ke o pee jã a, Yehowa maa ye bua mo konɛ o nyɛ nɛ o sɔmɔ lɛ ngɛ haomihi nɛ o kɛ maa kpe ɔ tsuo se. Jã nɛ Mawu pee ha Rut. w16.02 2:6, 7

Abishai suɔ kaa e maa ye David anɔkuale nɛ lɔ ɔ he je nɛ e ngɛ hlae maa gbe Saul ɔ nɛ. Se akɛnɛ David le kaa e ji tɔmi kaa nɔ ko maa gbe ‘nɔ nɛ Yehowa pɔ lɛ nu’ he je ɔ, e ha we nɛ Abishai nɛ gbe matsɛ ɔ. (1 Sam. 26:9-11) Enɛ ɔ haa nɛ wa kaseɔ nɔ́ ko nɛ he hia: Ke e he hia nɛ waa pee juɛmi ngɛ nɔ nɛ e sa kaa waa ye lɛ anɔkuale kekleekle ɔ he ɔ, e sa nɛ wa susu Baiblo sisi tomi mlaahi nɛ ma nyɛ maa ye bua wɔ ɔ he. Ngɛ wa bɔ su nya a, wa suɔ kaa wa maa ye nɔ ko nɛ wa suɔ lɛ kaa wa huɛ, aloo wa weku no anɔkuale. Se akɛnɛ wa yi mluku he je ɔ, wa tsui ma nyɛ maa sisi wɔ. (Yer. 17:9) Enɛ ɔ he ɔ, ke wa suɔlɔ ko ngɛ nɔ́ yaya pee nɛ e kua anɔkuale ɔ, e sa nɛ wa kai kaa e he hia wawɛɛ kaa wa maa ye Yehowa anɔkuale pe bɔ nɛ wa maa ye ni kpahi anɔkuale.​—Mat. 22:37. w16.02 4:5, 6

Ke o kase nɔ hyɛmi nɔ́ nɛ Timoteo pee ɔ, lɔ ɔ ma nyɛ maa ye bua mo. E yayo kɛ e na tsɔɔ lɛ Ngmami ɔ, enɛ ɔ he ɔ, e le Ngmami ɔ mi saminya. Se Paulo de Timoteo ke: ‘Anɔkuale ɔ nɛ a tsɔɔ mo nɛ o he ye ɔ, yaa nɔ nɛ o pɛtɛ he.’ (2 Tim. 3:14, 15) Munyu nɛ ji “he ye” ɔ tsɔɔ “nɔ mi mami nitsɛnitsɛ nɛ a náa ngɛ nɔ́ ko mi kaa jamɛ a nɔ́ ɔ ji anɔkuale.” Enɛ ɔ he ɔ, Timoteo ná nɔ mi mami kaa e ma nyɛ maa na anɔkuale ɔ ngɛ Ngmami ɔ mi. Tsa pi e yayo kɛ e na a nɛ a de lɛ kaa e kplɛɛ anɔkuale ɔ nɔ. Mohu ɔ, e susu níhi nɛ e heɔ yeɔ ɔ a he, nɛ e ná nɔ mi mami kaa a ji anɔkuale. (Rom. 12:1) Jã kɛ̃ nɛ ke o toɔ o tsui si kɛ peeɔ dɛ he ní kasemi ɔ, lɔ ɔ maa ye bua mo nɛ o ma nyɛ ma ha sane bimihi a heto, o yi mi be mo enyɔɔnyɔ pee, nɛ o ma ná nɔ mi mami kaa níhi nɛ o heɔ yeɔ ɔ ji anɔkuale.​—Níts. 17:11. w16.03 2:3, 4, 7

Ke Israel bi ɔmɛ ho Yerusalem ya konɛ a ya ye gbijlɔ ɔ, a kɛ a sibi peeɔ kake. A toɔ nɔ́ fɛɛ nɔ́ nɛ maa hia mɛ ngɛ a blɔ hiami ɔ mi ɔ he blɔ nya. Lɔ ɔ se ɔ, a peeɔ kake kɛ hiaa blɔ ɔ, nɛ a yeɔ bua a sibi. Ke a ya sɔlemi we ɔ, mɛ tsuo a peeɔ kake kɛ jeɔ Yehowa yi nɛ a sɔmɔɔ lɛ. Mwɔnɛ ɔ, benɛ wa ngɛ wa he dlae kɛ ha je ehe ɔ mi himi ɔ, e sa nɛ waa pee nɔ́ tsuaa nɔ́ nɛ wa ma nyɛ konɛ kake peemi nɛ hi waa kɛ wa nyɛmimɛ wa kpɛti. Kake peemi be nihi nɛ a ngɛ je ɔ mi mwɔnɛ ɔ a kpɛti nɛ a nɔɔ kunɔ ngɛ níhi fuu a he. Se wa naa Yehowa si kaa e ye bua wɔ nɛ tue mi jɔmi ngɛ wa kpɛti, nɛ wa nu anɔkuale ɔ sisi! Yehowa sɔmɔli nɛ a ngɛ je ɔ mi tsuo ɔ ngɛ lɛ sɔmɔe ngɛ blɔ nɛ e suɔ nɔ. Nɛ titli ɔ, ngɛ nyagbe ligbi nɛ ɔmɛ a mi ɔ, kake peemi ngɛ Yehowa we bi a kpɛti pe be ko nɛ be ɔ. Kaa bɔ nɛ Yesaya kɛ Mika gba kɛ fɔ si ɔ, wa pee kake kɛ ngɛ ‘Yehowa yo ɔ kuɔe.’ (Yes. 2:2-4; Mika 4:2-4) Hwɔɔ se ɔ, hyɛ bɔ nɛ wa bua maa jɔ ha ke nihi tsuo nɛ a ngɛ zugba a nɔ pee kake kɛ ngɛ Yehowa sɔmɔe kaa bɔ nɛ ‘nɔmlɔ tso ɔ kpɔ nya kpɔ nya amɛ tsuo tsaa a sibi a nya a’! w16.03 3:16, 17

Eko ɔ, e he maa wa ha asafo mi nikɔtɔma komɛ kaa a ma ná deka kɛ tsɔse nyɛmimɛ nyumuhi ngɛ asafo ɔ mi. Eko ɔ, a ma de ke: ‘Asafo ɔ mi ní tsumi komɛ ngɛ nɛ a he hia wawɛɛ nɛ e sa kaa a tsu he ní mla. Enɛ ɔ he ɔ, ke i tsɔse we nyɛmimɛ nyumuhi amlɔ nɔuu ɔ, lɔ ɔ be nɔ́ ko puɛe ngɛ asafo ɔ mi.’ Anɛ e ji anɔkuale lo? Eko ɔ, ní komɛ ngɛ nɛ e he maa hia kaa asafo mi nikɔtɔmahi nɛ tsu a he ní amlɔ nɔuu mohu lɛɛ, se ke a gbla a nane si ngɛ nyɛmimɛ nyumuhi a tsɔsemi he ɔ, e ma nyɛ maa ye asafo ɔ awi. E sa nɛ asafo mi nikɔtɔmahi nɛ a tsu níhi nɛ a he hia a a he ní mla. Ke asafo mi nikɔtɔmahi tsɔse we nyɛmimɛ nyumuhi mla a, e maa su be nɛ a be nyɛmimɛ nyumuhi fuu nɛ a tsɔse mɛ náe konɛ a tsu níhi a he ní ngɛ asafo ɔ mi. Enɛ ɔ he ɔ, ko susu kaa e he hia we nɛ a tsɔse nyɛmimɛ nyumuhi amlɔ nɔuu. Asafo mi nikɔtɔmahi nɛ a hyɛɛ nɔ́ kɛ yaa tsitsaa nɛ a náa deka kɛ tsɔseɔ ni kpahi ɔ ngɛ nile, nɛ nyɛmimɛ nyumuhi kɛ yihi tsuo náa a he se.​—1 Pet. 4:10. w15 4/15 1:4, 6, 7