Bɔ Nɛ O Kɛ Womi Wayoo Nɛ ɔ Ma Tsu Ní Ha

Ngɛ ba fahi nɛ nyɛɛ se ɔ a mi ɔ, o maa na Baiblo ngmamihi kɛ ha ligbi tsuaa ligbi, kɛ a mi tsɔɔmihi. E ngɛ mi kaa wa ma nyɛ maa kane ngmami ɔ kɛ e mi tsɔɔmi ɔ be saisaa mohu lɛɛ, se nihi fuu na kaa ke a pee jã mɔtu ɔ, e yeɔ bua mɛ wawɛɛ. Lɔ ɔ haa nɛ a nyɛɔ susuɔ ngmami ɔ mi munyu ɔmɛ a he ligbi ɔ tsuo. Ke weku mi bimɛ tsuo blaa kɛ susuɔ ngmami ɔ he ɔ, e yeɔ bua mɛ wawɛɛ nitsɛ. Betel weku ɔ mi bimɛ nɛ a ngɛ je kɛ wɛ ɔ peeɔ jã ke a ngɛ mɔtu ní yee.

A je munyu ɔmɛ kɛ je Hwɔɔmi Mɔ (w) ɔmɛ nɛ a je kpo ngɛ April 2016 kɛ ya si March 2017 ɔmɛ a mi. Yibɔ okadi nɛ nyɛɛ be nɛ a pee Hwɔɔmi Mɔ ɔ se ɔ, tsɔɔ munyu nɛ a kase nɛ lɔ ɔ mi a je ngmami ɔ kɛ je ɔ. (Kaa nɔ hyɛmi nɔ́ ɔ, nɔma 1 ji kekleekle munyu nɛ a kase, nɔma 2 ji munyu enyɔne nɛ a kase, nɔma 3 ji munyu etɛne nɛ a kase, nɔma 4 ji munyu eywiɛne nɛ a kase, nɔma 5 ji munyu enuɔne nɛ a kase.) Yibɔ okadi nɛ nyɛɛ lɔ ɔ hu se ɔ tsɔɔ kuku nɛ a je munyu ɔ kɛ je mi. (Hyɛ nɔ hyɛmi nɔ́ nɛ ngɛ sisi ɔ.) Ke o ngɛ hlae maa le níhi fuu ngɛ munyu nɛ a ngɛ he susue ɔ he ɔ, o ma nyɛ maa kane Hwɔɔmi Mɔ ɔ nɛ a je munyu ɔ kɛ je mi ɔ. Ke o ngɛ hlae maa le ba fa nɛ a je munyu ɔ ngɛ ɔ, o ma nyɛ maa hyɛ Hwɔɔmi Mɔ ɔ ba fa nɛ ji kekleekle nɔ́ ɔ, loo enyɔne ɔ.