January

Yesu kã jami hɛ mi nyɛɛli nɛ a hi si ngɛ e be ɔ mi ɔ a hɛ mi, ejakaa a tsɔɔ we nihi blɔ kpakpa nɔ nɛ e sa nɛ a gu kɛ ja Yehowa. Kaa nɔ hyɛmi nɔ́ ɔ, Yesu tsɛ Farisi bi ɔmɛ kaa osatotsɛmɛ, ejakaa a susuɔ blɔ nɔ nɛ a maa gu kɛ fɔ a nine he ɔ he pe a fɔli a nɔ nɛ a maa hyɛ. (Mat. 15:1-11) E ngɛ mi kaa jami hɛ mi nyɛɛli ɔmɛ a mi mi fu Yesu mohu lɛɛ, se lɔ ɔ ha we nɛ e kpa anɔkuale ɔ tumi. Jehanɛ hu ɔ, Yesu kpa lakpa tsɔɔmihi a he bo. E tsɔɔ we kaa níhi nɛ jami ɔmɛ heɔ yeɔ tsuo ji níhi nɛ Mawu kplɛɛ nɔ. Mohu ɔ, e tsɔɔ kaa nihi fuu maa nyɛɛ blɔ nɛ e nɔ ngɛ gbajaa nɛ e kɛ nɔ yaa hɛ mi kpatami mi ɔ nɔ, nɛ nihi bɔɔ ko pɛ nɛ a maa nyɛɛ blɔ nɛ ngɛ tokofii nɛ kɛ nɔ yaa wami mi ɔ nɔ. (Mat. 7:13, 14) E ha nɛ e pee heii kaa ni komɛ ma de ke a ngɛ Mawu sɔmɔe, se ngɛ anɔkuale mi ɔ, a sɔmɔ we lɛ. E bɔ kɔkɔ ke: “Nyɛɛ hyɛ nyɛ he nɛ hi ngɛ lakpa gbali a he. A ngɔɔ jijɔ he womi kɛ haa a he kɛ baa nyɛ ngɔ, se a mi mi je ɔ, a ji ogbeteehi nɛ hwɔ ngɛ mɛ yee wawɛɛ. Yiblii nɛ a woɔ ɔ nɛ nyɛɛ kɛ ma yɔse mɛ.”​—Mat. 7:15-20. w21.05 9 ¶7-8

Mo susu Hana nɔ hyɛmi nɔ́ ɔ he nɛ o hyɛ. E kɛ Levi no ko nɛ a tsɛɛ lɛ ke Elkana a sɛ gba si himi mi. Elkana suɔ Hana wawɛɛ nitsɛ, se e ngɛ yo kpa ko nɛ a tsɛɛ lɛ ke Penina. Elkana suɔ Hana pe Penina; “Penina ngɛ bimɛ, se Hana lɛɛ e fɔ we.” Enɛ ɔ he ɔ, Penina “yeɔ e he fɛu nɛ e yeɔ e tsui.” Hana hao wawɛɛ! Ke e ba lɛ jã a, “e ma fo ya nɛ e ma kua ní yemi.” Se kɛ̃ ɔ, Baiblo ɔ de we nɔ́ ko nɛ tsɔɔ kaa Hana bɔ mɔde kaa e maa pee Penina nɔ́ ko kɛ tsɔ́. Mohu ɔ, e je e tsui mi nɛ e sɔle ha Yehowa, nɛ e ná hɛ kɛ nɔ fɔmi kaa Yehowa maa ye bua lɛ. (1 Sam. 1:2, 6, 7, 10) Mɛni wa ma nyɛ maa kase ngɛ Hana sane ɔ mi? Ke nɔ ko bɔɔ mɔde kaa e kɛ wɔ ma si koli ngɛ nɔ́ ko he ɔ, mo kai kaa mo ji nɔ nɛ o ma nyɛ maa pee si fɔfɔɛ ɔ he nɔ́ ko. E sɛ nɛ o kɛ lɛ nɛ si koli. Moo bɔ mɔde nɛ o ha nɛ tue mi jɔmi nɛ hi o kɛ nɔ ɔ nyɛ kpɛti, mohu pe nɛ o maa ngɔ yayami kɛ to yayami nane mi. (Rom. 12:17-21) Ke nɔ ɔ tsakee we po ɔ, moo lɛɛ o tue mi maa jɔ mo. w21.07 17 ¶13-14

Hɛkɔ ha nɛ Yuda Iskariot ba pee nɔ se blɔ tsɔɔlɔ. Sisije ɔ, pi nɔmlɔ yayami ji lɛ. (Luka 6:13, 16) Yesu he lɛ ye ejakaa lɛ nɛ e hyɛɛ a sika nɔ. Yesu bɔ mɛ kɔkɔ si abɔ ngɛ hɛkɔ he, se e ba su be ko ɔ, Yuda bɔni sika a jumi. (Maak. 7:22, 23; Luka 11:39; 12:15) Yuda pee níhi nɛ tsɔɔ kaa e hɛ kɔ̃ɔ wawɛɛ benɛ e piɛ bɔɔ nɛ a maa gbe Yesu ɔ. Yesu kɛ e kaseli ɔmɛ nɛ Maria kɛ Marta hu piɛɛ he ɔ ya ngɛ ní yee ngɛ Simon kpititsɛ ɔ we mi. Benɛ a ngɛ ní ɔ yee ɔ, Maria ngɔ nu kɛ e he via nɛ e he jua wa kɛ ba pue Yesu yi mi. Yuda kɛ kaseli kpa amɛ a mi mi fu wawɛɛ. Eko ɔ, kaseli kpa amɛ susu kaa sika nɛ a kɛ he nu nɛ ɔ ma nyɛ maa ye bua mɛ ngɛ fiɛɛmi ní tsumi ɔ mi. Se Yuda lɛɛ e hɛɛ juɛmi kpa. “Julɔ ji lɛ,” nɛ e suɔ nɛ e ju sika nɛ ngɛ daka a mi ɔ.​—Yoh. 12:2-6; Mat. 26:6-16; Luka 22:3-6. w21.06 18 ¶12-13

Anɛ be komɛ ɔ, o nuɔ he kaa ní tsumi fuu ngɛ o kuɛ nɔ nɛ e he waa ha mo kaa o ma tsu a he ní lo? Ke jã nɛ e ji ngɛ o blɔ fa mi ɔ, lɛɛ o maa nu Paulo sane ɔ sisi. E pee yeyeeye ngɛ “asafo ɔmɛ tsuo a he.” (2 Kor. 11:23-28) Anɛ hiɔ ko hii o nya gbae wawɛɛ nɛ lɔ ɔ ha nɛ o be bua jɔmi lo? Paulo ngɛ nyagba ko nɛ ngɛ kaa “mio ko ngɛ [e] he lo ɔ mi.” Enɛ ɔ ma nyɛ maa pee hiɔ ko nɛ ngɛ e nya gbae wawɛɛ nɛ e ná nɛ e je. (2 Kor. 12:7-10) Anɛ o gbɔjɔmihi haa nɛ be komɛ ɔ, o kɔni mi jɔ̃ɔ lo? Paulo nu he jã be komɛ. Paulo tsɔɔ kaa e ji “nɔmlɔ nɛ e ní ngɛ mɔbɔ” ejakaa e he waa ha lɛ kaa e maa pee nɔ́ nɛ da. (Rom. 7:21-24) Paulo kɛ nyagba slɔɔtohi kɛ si fɔfɔɛhi nɛ jɔ̃ɔ nɔ kɔni mi kpe, se kɛ̃ ɔ, e ya nɔ nɛ e sɔmɔ Yehowa. Mɛni lɛ wo lɛ he wami? Paulo le e gbɔjɔmihi, se kɛ̃ ɔ, e ngɛ hemi kɛ yemi nɛ mi wa ngɛ kpɔmi nɔ́ ɔ mi. w21.04 22 ¶7-8

Benɛ Adam nɛ e ye mluku ɔ pee yayami ɔ, he blɔ nɛ e ngɛ kaa e maa hi si kɛ ya neneene ɔ bɔ lɛ. Se pi lɛ pɛ, he blɔ nɛ ɔ bɔ e nina hulɔ. Adam be nya jemi ko ngɛ yayami nɛ e pee ɔ he. E je blɔ nɛ e pee yayami. Se a bimɛ nɛ a fɔ ɔ hu nɛɛ? Mɛɛ lɛɛ a pee we yayami ko, nɛ pi mɛ nɛ a ha nɛ Adam pee yayami ɔ hulɔ. (Rom. 5:12, 14) Adam pee yayami, lɔ ɔ he ɔ, e sa gbenɔ. Se anɛ Yehowa ma nyɛ maa pee nɔ́ ko kɛ kpɔ̃ Adam bimɛ konɛ a nyɛ nɛ a hi si kɛ ya neneene lo? Ee! Benɛ Adam pee yayami pɛ ɔ, Yehowa tsɔɔ blɔ nɔ nɛ e maa gu kɛ kpɔ̃ Adam bimɛ ngɛ yayami kɛ gbenɔ dɛ mi. (1 Mose 3:15) Huɛ bɔmi kpakpa ma nyɛ maa hi waa kɛ Yehowa wa kpɛti ngɛ kpɔmi nɔ́ ɔ he je. A maa gu kpɔmi nɔ́ ɔ nɔ kɛ puɛ Abosiami ní tsumi ɔmɛ tsuo. (1 Yoh. 3:8) Yehowa yi mi tomi nitsɛnitsɛ ngɛ zugba a he ɔ maa ba mi ngɛ kpɔmi nɔ́ ɔ he je. Zugba a tsuo maa pee paradeiso. w21.04 14 ¶1; 19 ¶17

Nyumuhi kɛ yihi babauu hia blɔ kɛ ya Yerusalem. A je ma slɔɔtoslɔɔtohi a nɔ, nɛ a tuɔ gbi slɔɔtoslɔɔtohi hulɔ. Nyakpɛ nɔ́ ko ya nɔ jamɛ a ligbi ɔ. Si kake too ɔ, Yuda bi komɛ bɔni nibwɔhi nɛ a ba a a je gbi tumi! Enɛ ɔ pee nibwɔ ɔmɛ nyakpɛ wawɛɛ. Se nɔ́ nɛ pee mɛ nyakpɛ pe kulaa ji nɔ́ nɛ Yuda bi ɔmɛ ngɛ mɛ dee, kɛ nɔ́ nɛ bɔfo Petro ngɛ mɛ dee ɔ. Sɛ gbi nɛ a nu ɔ eko ji kaa ke a ná hemi kɛ yemi ngɛ Yesu Kristo mi ɔ, a ma nyɛ ma he a yi wami. Sɛ gbi nɛ ɔ ta nimli asafo ɔ a tsui he wawɛɛ. Enɛ ɔ he ɔ, ni ɔmɛ bi ke: “Mɛni e sa kaa waa pee?” Petro de mɛ ke: “Nyɛ ti nɔ fɛɛ nɔ nɛ e ha nɛ a baptisi lɛ.” (Níts. 2:37, 38) Nɔ́ nɛ tsa nɔ jamɛ a ligbi ɔ sa kadimi wawɛɛ. Nihi maa pee 3,000 ha nɛ a baptisi mɛ, nɛ a ba pee Kristo kaseli. Enɛ ɔ ji kaselɔ peemi ní tsumi ɔ nɛ Yesu fã e se nyɛɛli kaa a tsu ɔ sisije. Kɛ ba si mwɔnɛ ɔ, Yesu kaseli ngɛ ní tsumi nɛ ɔ tsue. w21.06 2 ¶1-2

Eko ɔ, e he wa ha wɔ kaa waa kɛ nihi maa je Baiblo mi ní kasemi sisi ngɛ wa zugba kpɔ ɔ mi. Ni komɛ a bua jɔɛ wa sɛ gbi ɔ he, nɛ a teɔ si kɛ woɔ wɔ po. Mɛni maa ye bua wɔ nɛ wa ná juɛmi nɛ da ke wa ngɛ zugba kpɔ nɛ a bui sɛ gbi ɔ tue ngɛ mi ɔ mi? Mo kai kaa nihi a si fɔfɔɛ ma nyɛ ma tsake ngɛ je yaya nɛ ɔ mi. Nihi nɛ be ko nɛ be ɔ a bua jɔɛ wa sɛ gbi ɔ he ɔ ma nyɛ ma ba yɔse kaa e he hia nɛ a le Mawu. (Mat. 5:3) Ni komɛ nɛ a bua jɔɛ wa womi ɔmɛ a he be ko nɛ be ɔ ba kplɛɛ Baiblo mi ní kasemi nɔ. Wa le hu kaa Yehowa ji Nyɔmtsɛ nɛ hyɛɛ ní kpami ní tsumi ɔ nɔ. (Mat. 9:38) E suɔ nɛ waa ya nɔ nɛ wa du ní nɛ wa pue nɔ nyu, se lɛ nɛ e ma ha nɛ e wa. Ke wa nyɛ we nɛ waa kɛ nɔ ko nɛ kase Baiblo ɔ amlɔ nɛ ɔ po ɔ, nyɛ ha nɛ wa kai kaa Yehowa jɔɔ wɔ ngɛ mɔde nɛ wa bɔɔ kaa wa maa ye bua nihi ɔ he, se pi nihi abɔ nɛ waa kɛ mɛ kaseɔ ní ɔ. w21.07 6 ¶14

Yehowa ha adesahi nyɛmi nɛ a kɛ fɔ bimɛ, nɛ e ha mɛ blɔ nya ní tsumi kaa a tsɔɔ a bi ɔmɛ nɛ a suɔ lɛ nɛ a sɔmɔ lɛ. E ngɛ mi kaa Yehowa jɔɔ hiɔwe bɔfohi wawɛɛ mohu lɛɛ, se a be he blɔ nɛ wa ngɛ nɛ ɔ. Enɛ ɔ he ɔ, ke fɔlɔ ji mo ɔ, lɛɛ e sa nɛ o bua nɛ jɔ he blɔ nɛ o ngɛ kaa o ma tsɔse o bimɛ ɔ he. Yehowa kɛ he blɔ klɛdɛɛ wo fɔli a dɛ kaa a tsɔse a bimɛ ngɛ “Yehowa tsɔsemi kɛ e ga womi mi.” (Efe. 6:4; 5 Mose 6:5-7) Mawu asafo ɔ da Baiblo ɔ nɔ kɛ to níhi fuu a he blɔ nya kɛ ha fɔli konɛ a nyɛ nɛ a pee enɛ ɔ. Ní nɛ ɔmɛ ekomɛ ji womihi, videohi, lahi kɛ Intanɛti nɔ níhi. E ngɛ heii kaa wa hiɔwe Tsɛ ɔ kɛ e Bi ɔ suɔ jokuɛwi a sane wawɛɛ. (Luka 18:15-17) Ke fɔli ngɔ a hɛ kɛ fɔ Yehowa nɔ, nɛ a pee nɔ́ fɛɛ nɔ́ nɛ a ma nyɛ kɛ hyɛ a bimɛ nɛ a he jua wa a nɔ ɔ, Yehowa bua jɔɔ wawɛɛ. Jehanɛ hu ɔ, ke fɔli pee jã a, lɔ ɔ ma nyɛ ma ha nɛ a bi ɔmɛ hu nɛ a piɛɛ Yehowa weku ɔ he kɛ ya neneene! w21.08 5 ¶9

Ni komɛ susu kaa hemi kɛ yemi tsɔɔ kaa o maa ngɔ o hɛ kɛ fɔ nɔ́ ko nɔ be mi nɛ o be odase ko nɛ tsɔɔ kaa nɔ́ ɔ ngɛ. Se ngɛ Baiblo ɔ nya a, tsa pi hemi kɛ yemi nitsɛnitsɛ ji lɔ ɔ. Hemi kɛ yemi nɛ wa ngɛ ngɛ Yehowa, Yesu, hiɔwe Matsɛ Yemi ɔ kɛ ní kpahi nɛ wa nɛ kɛ wa hɛngmɛ ɔ a mi ɔ daa si ngɛ odasehi nɛ plɛɔ nɔ yi mi ɔ nɔ. (Heb. 11:3) Je mi si kpalɔ ko nɛ e ba pee Yehowa Odasefo no ɔ de ke: “Yehowa Odasefohi ngɛ níhi nɛ a heɔ yeɔ a he odase. Nɛ a ma we a hɛ kɛ fɔɛ níhi a mi hlami nɛ je mi si kpali pee nɛ a ji anɔkuale ɔ a nɔ.” Eko ɔ wa ma bi ke, ‘Ke odasehi ngɛ nɛ tsɔɔ kaa Bɔlɔ ko ngɛ ɔ, lɛɛ mɛni he je mɔ nɛ nihi fuu he we yi kaa Mawu lɛ bɔ níhi tsuo nɛ wami ngɛ a mi ɔ?’ E kpiti pomi ji kaa ni komɛ hla we níhi a mi konɛ a na odasehi nɛ tsɔɔ kaa Bɔlɔ ko ngɛ. Robert nɛ amlɔ nɛ ɔ e ji Yehowa Odasefo no ɔ de ke: “Akɛnɛ a tsɔɔ we adebɔ he nɔ́ ko ngɛ sukuu gblee he je ɔ, i ngɔ lɛ kaa Bɔlɔ ko be. Se benɛ i ye jeha 22 ɔ, i ba na kaa Baiblo ɔ tsɔɔ yi mi tomi komɛ a he je nɛ wa ma nyɛ ma he ye kaa Mawu lɛ bɔ nɔ́ fɛɛ nɔ́.” w21.08 15 ¶4-5

Wa ma nyɛ maa kase Yehowa kpakpa peemi ɔ he ní kɛ gu Baiblo ɔ kɛ ni kpahi a níhi a si kpami nɛ wa maa bu tue ɔ nɔ. Se ke wa suɔ nɛ waa na Yehowa kpakpa peemi ɔ, jã wɔ nitsɛmɛ wa ‘sa wa nya.’ Kaa nɔ hyɛmi nɔ́ ɔ, ngɔɔ lɛ kaa wa ngɛ hlae nɛ waa ngɔ wa he kɛ wo be tsuo sɔmɔmi ní tsumi ɔ mi, se loko wa ma nyɛ maa su jamɛ a oti ɔ he ɔ, jã wa pee wa si himi kpokploo. Wa le Yesu si womi nɛ tsɔɔ kaa ke wa ngɔ Matsɛ Yemi ɔ kɛ ye kekle blɔ he ngɛ wa si himi mi ɔ, Yehowa ma ha wɔ wa hiami níhi ɔ. Se wa nɛ kaa si womi nɛ ɔ ba mi ngɛ wa blɔ fa mi. (Mat. 6:33) Se ke wa ngɛ hemi kɛ yemi ngɛ si nɛ Yesu wo ɔ mi ɔ, wa ma gbɔ sika nɛ wa puɛɔ nɔ, wa maa pee tsakemi ngɛ wa ní tsumi mi, nɛ wa maa pee babauu ngɛ fiɛɛmi ní tsumi ɔ mi. Ke wa pee jã a, wa maa na kaa Yehowa ma ha wɔ wa hiami níhi, nɛ wɔ nitsɛmɛ wa maa ‘sa wa nya’ Yehowa kpakpa peemi ɔ. w21.08 26 ¶2

Anɛ wa naa nyagba nɛ ɔ mwɔnɛ ɔ lo? Ee. Jami hɛ mi nyɛɛli fuu a bua jɔɔ ke nihi nɛ a naa mɛ kaa a he hia, niatsɛmɛ, kɛ nihi nɛ a buu mɛ kaa ní leli ngɛ je ɔ mi ɔ ba a jami ɔ mi. A le kaa nimli nɛ ɔmɛ a je mi bami kɛ Mawu mlaa amɛ kɔ we, se kɛ̃ ɔ, a haa nɛ a ba piɛɔ a jami ɔ he. Jami hɛ mi nyɛɛli ɔmɛ bui nihi nɛ a kɛ kã ngɛ Yehowa sɔmɔe nɛ a je mi bami he tsɔ ɔ, ejakaa nihi fuu susu kaa a he hia we ngɛ je ɔ mi. Paulo tsɔɔ kaa Mawu hla nihi nɛ je ɔ “gbeɔ a he guɛ ɔ.” (1 Kor. 1:26-29) Ngɛ Yehowa hɛ mi ɔ, e sɔmɔli anɔkualetsɛmɛ tsuo a he jua wa. Mɛni wa ma nyɛ maa pee konɛ je ɔ susumi ɔ nɛ ko ná wa nɔ he wami? (Mat. 11:25, 26) Ko ha nɛ bɔ nɛ je ɔ naa Mawu we bi ha a nɛ ná o nɔ he wami. Mo kadi kaa Yehowa kɛ nihi nɛ a baa a he si ɔ lɛ tsuɔ ní. (La 138:6) Mo susu ní slɔɔtohi nɛ Yehowa gu nihi nɛ je ɔ naa mɛ kaa a li ní ɔ a nɔ kɛ tsu ɔ he nɛ o hyɛ. w21.05 8 ¶1; 9 ¶5-6

Bɔfo Paulo bua jɔ wawɛɛ kaa nyɛmimɛ ɔmɛ ye bua lɛ. E ba e he si, nɛ e kplɛɛ yemi kɛ buami nɛ e nyɛmimɛ nyumuhi kɛ yihi kɛ ha lɛ ɔ nɔ. (Filip. 2:19-22) Nyɛmimɛ nɛ nyɛ wa ngɛ jeha mi, nyɛ ma nyɛ maa pee ní slɔɔtohi kɛ tsɔɔ kaa nyɛ hɛ sa níhi nɛ nihewi kɛ yihewi peeɔ ngɛ nyɛ we asafo ɔ mi ɔ. Ke a suɔ nɛ a ye bua nyɛ ngɛ blɔ hiami mi, jua yemi mi, loo ní kpahi a peemi mi ɔ, nyɛɛ kɛ bua jɔmi nɛ kplɛɛ nɔ. Nyɛɛ na jamɛ a yemi kɛ buami ɔ kaa e ji suɔmi nɛ Yehowa ngɛ kpo jee kɛ tsɔɔ nyɛ. E maa pee nyɛ nyakpɛ kaa huɛ bɔmi gbagbanii ma ba hi nyɛɛ kɛ nihi nɛ a ngɛ nyɛ yee buae ɔ nyɛ kpɛti. Nyɛɛ bɔ mɔde nɛ nyɛɛ ye bua nyɛ huɛ nɛ ɔmɛ be fɛɛ be nɛ a hɛ kɛ su Yehowa he. Nɛ nyɛ de mɛ bɔ nɛ nyɛ bua jɔɔ ha ke nyɛ na kaa nihewi kɛ yihewi ngɛ a he mɔde bɔe kaa a maa pee babauu ngɛ Yehowa asafo ɔ mi. Nyɛ ná be kɛ ha mɛ, nɛ nyɛ de mɛ níhi nɛ ya nɔ ngɛ nyɛ si himi mi. Ke nyɛ pee jã a, nyɛ maa “pee nyɛ he nihi nɛ a le sina,” nɛ nyɛ maa na Yehowa si kaa e gbla nihewi kɛ yihewi babauu kɛ ba asafo ɔ mi.​—Kol. 3:15; Yoh. 6:44; 1 Tɛs. 5:18. w21.09 11-12 ¶12-13

Yehowa suɔ wa nyɛmimɛ nyumuhi kɛ yi ɔmɛ. Se pi be fɛɛ be nɛ e ngɛ gbɔjɔɔ kaa wa maa suɔ mɛ nɛ wa ha nɛ a na kaa wa suɔ mɛ. Enɛ ɔ peemi yee be komɛ akɛnɛ e slo he nɛ a tsɔse wɔ ngɛ kɛ wa kusumihi ɔ he je. Wɔ tsuo wa peeɔ níhi nɛ ma nyɛ maa wo ni kpahi a mi mi la nɛ e be hae nɛ a bua nɛ jɔ. Se kɛ̃ ɔ, wa ma nyɛ maa pee níhi nɛ ma ha nɛ suɔmi nɛ ngɛ wa mumi mi weku ɔ mi ɔ mi nɛ wa. Ngɛ mɛni blɔ nɔ? Kɛ gu wa hiɔwe Tsɛ ɔ nɛ wa maa kase lɛ nɛ wa ma je suɔmi kpo kɛ tsɔɔ wa nyɛmimɛ nyumuhi kɛ yihi ɔ nɔ. (Efe. 5:1, 2; 1 Yoh. 4:19) Nɔ nɛ e mi mi sãa lɛ ɔ hlaa blɔhi a nɔ nɛ e maa gu kɛ ye bua nihi, nɛ e wo a bua. Yesu tsɔɔ kaa e mi mi sãa lɛ kaa bɔ nɛ e Tsɛ ɔ peeɔ ɔ kɛ gu bɔ nɛ e kɛ nihi hi si ha a nɔ. (Yoh. 5:19) Be ko benɛ Yesu na asafo kuu ko ɔ, “a he pee lɛ mɔbɔ, ejakaa a plaa mɛ, nɛ a gbɛ fĩa kaa jijɔhi nɛ a be hyɛlɔ.” (Mat. 9:36) Pi nɛ Yesu mi mi sã lɛ ngɛ a he kɛkɛ, e pee nɔ́ ko kɛ ye bua mɛ. E tsa hiɔtsɛmɛ, nɛ e ye bua nihi nɛ a “tloo tlomi nɛ e ngɛ [mɛ] gbee ɔ” nɛ a he mi jɔ mɛ.​—Mat. 11:28-30; 14:14. w21.09 22 ¶10-11

Yehowa naa nɔ mɔbɔ ejakaa e suɔ wɔ. Bɔfo Paulo ngma ke, Mawu “mɔbɔ nami ɔ hiɛ babauu.” Ngɛ ngmami nɛ ɔ mi ɔ, Paulo tsɔɔ kaa Mawu naa nɔ mɔbɔ akɛnɛ e ha adesahi nɛ a yi mluku nɛ a pɔ mɛ nu ɔ hiɔwe hɛ nɔ kami ɔ. (Efe. 2:4-7) Se Yehowa mɔbɔ nami ɔ yaa tsitsaa pe jã. La polɔ David de ke: ‘Yehowa peeɔ nɔ tsuaa nɔ kpakpa, nɛ e nuɔ nɔ́ he ha níhi tsuo nɛ e bɔ ɔ.’ (La 145:9) Akɛnɛ Yehowa suɔ adesahi he je ɔ, e naa nɔ mɔbɔ ke e he ba hia nɛ e pee jã. Yesu le bɔ nɛ Yehowa naa nɔ mɔbɔ ha pe nɔ fɛɛ nɔ. Yehowa kɛ Yesu hi hiɔwe jehahi babauu loko Yesu ba zugba a nɔ. (Abɛ 8:30, 31) Yesu na bɔ nɛ e Tsɛ ɔ na adesahi nɛ a ji yayami peeli ɔ mɔbɔ ha si abɔ. (La 78:37-42) Ke Yesu ngɛ ní tsɔɔe ɔ, behi fuu ɔ, e haa nɛ nihi naa e Tsɛ ɔ su kpakpa nɛ ɔ. w21.10 8-9 ¶4-5

Yehowa nitsɛ ha jamɛ a sɔlemi ɔ heto kɛ gbi nɛ nya wa kɛ je hiɔwe, nɛ e wo si kaa e maa wo e biɛ ɔ hɛ mi nyami. Ngɛ Yesu fiɛɛmi ní tsumi ɔ mi tsuo ɔ, e wo e Tsɛ ɔ biɛ ɔ hɛ mi nyami. (Yoh. 17:26) Lɔ ɔ he ɔ, anɔkuale Kristofohi le kaa e ji he blɔ ngua nɛ a ná kaa a kɛ Mawu biɛ ɔ ma tsu ní nɛ a ha nɛ nihi nɛ a le. Benɛ a to Kristofohi asafo ɔ sisi ngɛ kaseli ɔmɛ a be ɔ mi ɔ se bɔɔ pɛ nɛ Yehowa “ngɔ e juɛmi kɛ ya je ma amɛ a nɔ, konɛ e ngɔ ni komɛ kɛ je a kpɛti kɛ ha e biɛ ɔ.” (Níts. 15:14) Kristofo nɛ ɔmɛ bua jɔ kaa a kɛ Mawu biɛ ɔ ma tsu ní, nɛ́ a ha nɛ ni kpahi nɛ a le. Bɔfo ɔmɛ kɛ kaseli ɔmɛ kɛ Mawu biɛ ɔ tsu ní ngɛ fiɛɛmi mi kɛ be nɛ a ngɛ Baiblo womi ɔmɛ ngmae ɔ. Kɛ gu blɔ nɛ ɔ nɔ ɔ, a tsɔɔ kaa mɛ pɛ ji nihi nɛ a ha nɛ nihi le Mawu biɛ ɔ. (Níts. 2:14, 21) Mwɔnɛ ɔ hu ɔ, jã kɛ̃ nɛ Yehowa Odasefohi ha nɛ nihi le Mawu biɛ ɔ. w21.10 20-21 ¶8-10

Mawu suɔmi nɛ se pui ɔ ngɛ kɛ yaa neneene. Ngɛ La 136, a kɛ munyu nɛ ji suɔmi [nɛ se pui] ɔ tsu ní si 26 sɔuu. Kaa nɔ hyɛmi nɔ́ ɔ, kekleekle kuku ɔ de ke: ‘Nyɛɛ na Yehowa si; ejakaa Yehowa hi, nɛ e suɔmi nɛ se pui ɔ ngɛ kɛ yaa neneene!’ (La 136:1) Nɛ a kɛ “e suɔmi [nɛ se pui] ɔ ngɛ kɛ yaa neneene” ɔ tsu ní ngɛ kuku 2 kɛ ya si 26 mi. Ke wa ngɛ la nɛ ɔ kanee ɔ, wa maa na blɔ slɔɔtohi a nɔ nɛ Yehowa guɔ kɛ jeɔ e suɔmi nɛ se pui ɔ kpo nɛ e kpa we. “E suɔmi [nɛ se pui] ɔ ngɛ kɛ yaa neneene” nɛ́ a kɛ tsu ní si abɔ ɔ haa nɛ wa náa nɔ mi mami kaa Mawu suɔmi nɛ se pui ɔ tsakee we. E ji bua jɔmi sane kaa Yehowa kɔni gbo we ngɛ e sɔmɔli a he! Mohu ɔ, e piɛɛɔ nihi nɛ a sɔmɔɔ lɛ ɔ a he, nɛ e mɛtɛɔ a he titli ɔ, ngɛ haomi behi a mi. Lemi nɛ wa le kaa Yehowa mɛtɛɔ wa he ɔ haa nɛ wa bua jɔɔ, nɛ wa náa he wami kɛ daa kahi a nya, nɛ wa yaa nɔ nɛ wa nyɛɛɔ wami blɔ ɔ nɔ.​—La 31:7. w21.11 4 ¶9-10

Anɛ be komɛ ɔ, o peeɔ yeyeeye ngɛ níhi nɛ maa ba hwɔɔ se kaa lakpa jami hɛ mi kpatami, Gog nɛ je Magog tuami ɔ kɛ Harmagedon ta a he lo? Anɛ o bi o he sane nɛ ɔ hyɛ lo? ‘Ke behi nɛ a mi wa nɛ ɔmɛ ba a, ma nyɛ ma ya nɔ nɛ ma ye anɔkuale kɛ ya si nyagbe lo?’ Ke sane nɛ ɔ ba o juɛmi mi hyɛ ɔ, lɛɛ Yesu munyu nɛ e tu nɛ ngɛ mwɔnɛ ɔ ngmami ɔ mi ɔ maa ye bua mo wawɛɛ. E de ke: “Nyɛ ko ye tsui. Nyɛ he . . . ye.” Hemi kɛ yemi nɛ mi wa maa ye bua wɔ nɛ wa fĩ si ngɛ si fɔfɔɛ fɛɛ si fɔfɔɛ nɛ waa kɛ maa kpe hwɔɔ se ɔ a mi. Ke wa susuɔ níhi nɛ wa peeɔ amlɔ nɛ ɔ ke waa kɛ wa hemi kɛ yemi he kahi kpe ɔ he ɔ, e maa ye bua wɔ nɛ waa le nɔ́ nɛ wa ma nyɛ maa pee kɛ wo wa hemi kɛ yemi mi he wami. Kɛkɛ ɔ wa ma nyɛ maa le hehi nɛ e sa nɛ waa wo wa hemi kɛ yemi ɔ mi he wami ngɛ. Ke wa da ka ko nya a, e haa nɛ wa hemi kɛ yemi mi waa, nɛ e maa ye bua wɔ nɛ wa nyɛ nɛ wa fĩ si ngɛ kahi nɛ waa kɛ maa kpe hwɔɔ se ɔ a mi. w21.11 20 ¶1-2

Bɔfo Paulo wo Timoteo kɛ Kristofohi tsuo he wami kaa a tsu sɔmɔmi ní tsumi ɔ kɛ pi si. (2 Tim. 4:5) Se waa kɛ nyagbahi kpeɔ. Mo susu wa nyɛmimɛ nɛ a ngɛ hehi nɛ a tsi wa ní tsumi ɔ fã ko aloo tsuo nya ngɛ ɔ a he nɛ o hyɛ. Yehowa we bi kɛ nyagbahi fuu nɛ ma nyɛ ma jɔ̃ a kɔni mi ɔ kpeɔ. Kaa nɔ hyɛmi nɔ́ ɔ, a kpɛti nihi fuu kɛ be babauu tsuɔ ní loko a náa a weku ɔ he lo nya hiami níhi. A suɔ nɛ a pee babauu ngɛ fiɛɛmi ní tsumi ɔ mi, se ke otsi ɔ ke baa nyagbe ɔ kɛkɛ pɔ tɔ a he. A kpɛti ni komɛ ngɛ nɛ hiɔ nɛ nya wa ko ngɛ a nya gbae, loo a wa ngɛ jeha mi, loo eko ɔ, a tlɔ we mi, lɔ ɔ he ɔ, a nyɛ we nɛ a pee babauu. Ni komɛ hu susuɔ kaa a he hia we Yehowa. Ngɛ nyagba fɛɛ nyagba nɛ waa kɛ ngɛ kpee ɔ mi ɔ, Yehowa ma nyɛ ma ha wɔ he wami nɛ wa hia a konɛ waa ya nɔ nɛ waa pee nɔ́ nɛ wa ma nyɛ ngɛ e sɔmɔmi mi. w21.05 20 ¶1-3

Be komɛ ɔ, ni kpahi ma nyɛ maa nyɛ wa nɔ konɛ waa pee nɔ́ ko nɛ be hae nɛ wa sɔmɔ Yehowa kaa bɔ nɛ e suɔ nɛ wa sɔmɔ lɛ ɔ. Ke e ba jã a, e sa nɛ waa mwɔ yi mi kpɔ nɛ da. Nyɛ ha nɛ wa susu sisi tomi mlaa ko nɛ he hia nɛ ngɛ 3 Mose 19:19 ɔ fã ko he. E de ke: “Nyɛ ko wo tade nɛ a kɛ nɔ́ slɔɔto enyɔ lo bo ɔ.” Mlaa nɛ ɔ ha nɛ Israel bi ɔmɛ je ekpa ngɛ mahi nɛ a bɔle mɛ ɔ a he. Mwɔnɛ ɔ, wa be mlaa a sisi, enɛ ɔ he ɔ, tɔmi ko be he kaa wa maa wo tade nɛ a kɛ bo slɔɔtoslɔɔto pee. Se e sɛ nɛ waa pee wa ní kaa bɔ nɛ nihi nɛ a hemi kɛ yemi kɛ a ní peepee kɛ Baiblo blɔ tsɔɔmi kpa we gbi ɔ peeɔ ɔ. Ngɛ anɔkuale mi ɔ, wa suɔ wa weku li nɛ wa suɔ ni kpahi hulɔ, se yi mi kpɔhi nɛ wa mwɔɔ ɔ tsɔɔ kaa wa suɔ nɛ waa bu Yehowa tue ke lɔ ɔ ma ha nɛ waa je ekpa ngɛ nihi nɛ waa kɛ mɛ ngɛ he kake ɔ a he po. Enɛ ɔ he hia wawɛɛ, ejakaa ke wa suɔ nɛ waa pee wa he klɔuklɔu ɔ, lɛɛ e he hia nɛ waa ngɔ wa he kɛ ha kaa wa maa pee Mawu suɔmi nya ní pɛ.​—2 Kor. 6:14-16; 1 Pet. 4:3, 4. w21.12 5 ¶14; 6 ¶16

Wa ma nyɛ maa na blɔ ɔ nɛ kɛ nɔ yaa wami mi ɔ. Yesu de ke: “Ke nyɛ hi si ngɛ ye munyu ɔ nya a, lɛɛ ye kaseli nitsɛnitsɛmɛ ji nyɛ, nɛ nyɛ maa le anɔkuale ɔ, nɛ anɔkuale ɔ ma ha nɛ nyɛ maa ye nyɛ he.” (Yoh. 8:31, 32) E hi kaa o pee we o ní kaa bɔ nɛ nihi fuu peeɔ ɔ, mohu ɔ, o hla anɔkuale ɔ se blɔ. O bɔni Mawu Munyu ɔ kasemi wawɛɛ nɛ o kase nɔ́ nɛ Mawu ngɛ hlae kaa o pee, nɛ o bu Yesu tsɔɔmi ɔmɛ tue. O ba le kaa Yehowa suɔ nɛ wa kua lakpa tsɔɔmihi nɛ wa kpa gbijlɔhi nɛ a je wɔ jami mi ɔ yemi. Jehanɛ hu ɔ, o kase kaa e be gbɔjɔɔ kaa wa maa pee Yehowa suɔmi nya ní, nɛ́ wa je wa he kɛ je níhi nɛ e kplɛɛ we nɔ ɔ a he. (Mat. 10:34-36) Benɛ o ngɛ tsakemi nɛ ɔmɛ pee ɔ, eko ɔ, o nɛ lɛ gbɔjɔɔ. Se o bɔ mɔde nɛ o pee tsakemi ejakaa o suɔ wa hiɔwe Tsɛ ɔ. Hyɛ bɔ nɛ e bua maa jɔ o he ha!​—Abɛ 27:11. w21.12 22 ¶3; 23 ¶5

Mose tɔ̃ tɔmi nɛ hɛdɔ ngɛ he, se e kplɛɛ ga womi nɔ. Enɛ ɔ ji nɔ hyɛmi nɔ́ kpakpa kɛ ha wɔ. Ligbi ko ɔ, e mi mi fu wawɛɛ nɛ e wui Yehowa hɛ mi nyami. Enɛ ɔ ha nɛ Yehowa ngmɛ́ lɛ blɔ nɛ e ya su si Womi Zugba a nɔ. (4 Mose 20:1-13) Benɛ Mose de Yehowa kaa e susu yi mi kpɔ nɛ e mwɔ ɔ he ekohu ɔ, Yehowa de lɛ ke: “Koo wo nɔ́ nɛ ɔ nɔ ta hu!” (5 Mose 3:23-27) Mose mi mi fu we ngɛ nɔ́ nɛ Yehowa de ɔ he. Mohu ɔ, e kplɛɛ yi mi kpɔ nɛ Yehowa mwɔ ɔ nɔ, nɛ Yehowa ya nɔ nɛ e kɛ lɛ tsu ní kɛ nyɛɛ Israel bi ɔmɛ a hɛ mi. (5 Mose 4:1) Mose kplɛɛ ga womi nɔ. Enɛ ɔ ji nɔ hyɛmi nɔ kpakpa nɛ wa ma nyɛ maa kase. Benɛ he blɔ ngua ko bɔ Mose ɔ, e ya nɔ nɛ e ye anɔkuale kɛ tsɔɔ kaa e kplɛɛ Yehowa ga womi nɔ. Ke wa kase anɔkualetsɛmɛ kaa Mose a nɔ hyɛmi nɔ́ ɔ, wa ma ná he se wawɛɛ. (Abɛ 4:11-13) Wa nyɛmimɛ nyumuhi kɛ yihi fuu kase a nɔ hyɛmi nɔ́ ɔ. w22.02 11 ¶9-10

Yesu huɛ Lazaro nu hiɔ nɛ e gbo ngɛ ahlabata be mi ngɛ jeha 32 ɔ mi. (Yoh. 11:3, 14) Lazaro ngɛ nyɛmimɛ yihi enyɔ nɛ ji Maria kɛ Marta, nɛ Yesu suɔ weku nɛ ɔ saminya. Benɛ Marta nu kaa Yesu ma lejɛ ɔ, e tu fo nɛ e kɛ lɛ ya kpe. Hyɛ bɔ nɛ e maa hi aywilɛho yee ha benɛ e de ke: “Nyɔmtsɛ, kaa o ngɛ hiɛ ɔ, jinɛ ye nyɛminyumu ɔ ko gbo we” ɔ. (Yoh. 11:21, 32, 33) Benɛ Yesu na bɔ nɛ Lazaro gbenɔ ɔ ná Maria kɛ Marta a nɔ he wami ha a, e wɔle vo nyu. Ke o suɔlɔ ko gbo hyɛ ɔ, Yehowa le bɔ nɛ o nuɔ he ha. Yesu ji bɔ nɛ e Tsɛ ɔ “ngɛ ha tutuutu ɔ henɔ pɛpɛɛpɛ.” (Heb. 1:3) Ya nɛ Yesu fo ɔ ha nɛ wa na bɔ nɛ Yehowa nuɔ he ha ke wa suɔlɔ ko gbo. (Yoh. 14:9) Ke o suɔlɔ ko gbo ɔ, o ma nyɛ ma ná nɔ mi mami kaa pi aywilɛho nɛ o ngɛ yee ɔ pɛ nɛ Yehowa naa, se e dɔɔ lɛ hulɔ. Enɛ ɔ he ɔ, e suɔ nɛ e tsa o tsui nɛ ku ɔ.​—La 34:18; 147:3. w22.01 15 ¶5-7

Ke o ná be nɛ o kɛ Yehowa sɛɛ ní, o bu lɛ tue nɛ o susu e he ɔ, o ma ná he se wawɛɛ. Kekleekle ɔ, e maa ye bua mo nɛ o mwɔ yi mi kpɔ nɛ da. Baiblo ɔ ha nɛ wa ná nɔ mi mami kaa “nɔ nɛ kɛ ní leli nyɛɛɔ ɔ, e leɔ ní.” (Abɛ 13:20) Enyɔne, o maa pee tsɔɔlɔ kpakpa. Ke waa kɛ nɔ ko ngɛ Baiblo ɔ kasee ɔ, oti ko nɛ he hia nɛ waa kɛ maa wa hɛ mi ji kaa wa maa ye bua nɔ ɔ nɛ e hɛ kɛ su Yehowa he. Ke waa kɛ Yehowa sɛɛɔ ní nɛ wa kaseɔ e he ní ɔ, e ma ha nɛ suɔmi nɛ wa ngɛ kɛ ha lɛ ɔ mi maa wa, nɛ wa ma nyɛ maa tsɔɔ wa Baiblo kaseli ɔmɛ ní konɛ mɛ hu a suɔ lɛ. Mo susu Yesu nɔ hyɛmi nɔ́ ɔ he nɛ o hyɛ. Bɔ nɛ e je e tsui mi kɛ tu Yehowa he munyu ha a ye bua e kaseli ɔmɛ nɛ mɛ hu a ná suɔmi kɛ ha Yehowa. (Yoh. 17:25, 26) Etɛne, o hemi kɛ yemi mi maa wa. Mo susu nɔ́ nɛ yaa nɔ ke o bi Mawu kaa e ha mo blɔ tsɔɔmi ngɛ nɔ́ ko he, e wo o bua loo e ye bua mo ɔ he nɛ o hyɛ. Be fɛɛ be nɛ Mawu ma ha jamɛ a sɔlemi ɔ heto ɔ, e haa nɛ o hemi kɛ yemi mi waa.​—1 Yoh. 5:15. w22.01 30 ¶15-17

Akɛnɛ Yehowa suɔ wɔ wawɛɛ nɛ e suɔ nɛ wa bua nɛ jɔ ngɛ si himi mi he je ɔ, e woɔ wɔ he wami kaa wa je susumi yayami kɛ je wa juɛmi mi nɛ wa kua je mi bami yaya. (Yes. 48:17, 18) E le kaa ke wa ha nɛ susumi yayami ná wa nɔ he wami ɔ, e ma nyɛ maa ye wɔ nitsɛmɛ kɛ ni kpahi awi. Ke wa ye wɔ nitsɛmɛ wa he awi loo ni kpahi awi ɔ, e dɔɔ lɛ. Eko ɔ, be komɛ ɔ, wa huɛmɛ kɛ wa weku li maa ye wa he fɛu akɛnɛ wa ngɛ tsakemi komɛ pee ɔ he je. (1 Pet. 4:3, 4) Eko ɔ, a ma de ke wa ngɛ he blɔ nɛ wa peeɔ nɔ́ nɛ wa suɔ, nɛ e sɛ nɛ nɔ ko nɛ tsɔɔ wɔ nɔ́ nɛ waa pee. Se ngɛ anɔkuale mi ɔ, nihi nɛ a kɛ Yehowa mlaa tsu we ní ɔ be he yemi nitsɛnitsɛ. Anɔkuale sane ji kaa a ha nɛ je ɔ nɛ Satan ngɛ nɔ yee ɔ ngɛ mɛ kudɔe. (Rom. 12:1, 2) Wɔ tsuo wa ngɛ he blɔ nɛ wa hlaa nɔ́ nɛ wa suɔ. Wa ma nyɛ maa hla kaa wa maa wo su momo ɔ nɛ yayami kɛ Satan je ɔ ngɛ lɛ kudɔe ɔ, aloo wa maa ngmɛ blɔ nɛ Yehowa nɛ e tsake wɔ nɛ waa ba wa je mi saminya amlɔ nɛ ɔ.​—Yes. 64:8. w22.03 3 ¶6-7

Ke wa pue wa yi mi tɛ ngɛ Mawu Munyu ɔ he ɔ, e yeɔ bua wɔ nɛ wa náa juɛmi nɛ da ngɛ wa nyagba amɛ a he. Ha nɛ waa hyɛ bɔ nɛ Baiblo ɔ ye bua yalɔyo ko nɛ e ngɛ aywilɛho yee ɔ ha. Asafo mi nɔkɔtɔma ko wo lɛ ga kaa ke e kane Hiob womi ɔ nɛ e pue e yi mi tɛ ngɛ he ɔ, e ma nyɛ maa kase níhi fuu ngɛ mi. Benɛ e kane ɔ, e he sɔ kɛ kojo Hiob kaa e ná susumi nɛ dɛ. Benɛ e ngɛ Hiob si fɔfɔɛ ɔ he foni poe ɔ, e de ke: “Hiob! Ko ná juɛmi nɛ dɛ!” Se pee se ɔ, e ba na kaa lɛ hu e ngɛ e ní pee kaa Hiob. Nɔ́ nɛ e pee ɔ ye bua lɛ nɛ e dla e susumi, nɛ e wo lɛ he wami nɛ e nyɛ da e huno ɔ gbenɔ ɔ he dɔdɔɛ ɔ nya. Yehowa guɔ wa nyɛmimɛ Kristofohi hu a nɔ kɛ woɔ e sɔmɔli he wami. Paulo tsɔɔ kaa e ngɛ hlae nɛ e na e nyɛmimɛ ɔmɛ konɛ ‘a wo a sibi he wami.’​—Rom. 1:11, 12. w21.05 22 ¶10-11; 24 ¶12

A de blema Israel bi ɔmɛ ke: ‘Nyumu ɔmɛ tsuo kulaa nɛ a bua a he nya si etɛ ngɛ jeha mi ngɛ he kake ɔ nɛ Yehowa, nyɛ Mawu ɔ to nɛ a ja lɛ ngɛ ɔ.’ (5 Mose 16:16) E he ba hia nɛ a je a wehi kɛ a ngmɔ ɔmɛ a he be mi nɛ nɔ ko be nɛ maa bu he. Se Yehowa wo mɛ si ke: ‘Ke o ba Yehowa o Mawu ɔ hɛ mi ɔ, nɔ ko hɛ be o zugba a nɔ kɔe.’ (2 Mose 34:24) Akɛnɛ Israel bi ɔmɛ he Yehowa ye he je ɔ, a yaa gbijlɔ nɛ́ a yeɔ lɛ daa jeha a, nɛ a náa he se ngɛ blɔ slɔɔtohi fuu a nɔ. Kaa nɔ hyɛmi nɔ́ ɔ, a kaseɔ Mawu mlaa a he ní fuu, a tsɔɔ mɛ bɔ nɛ Yehowa pee mɛ kpakpa ha, nɛ a bua jɔɔ huɛ bɔmi nɛ a kɛ nihi nɛ a suɔ Yehowa náa a he. Wɔ hu ke wa bɔ mɔde nɛ wa ya Kristofohi a kpehi ɔ, wa náa he se. Nɛ hyɛ bɔ nɛ Yehowa bua jɔɔ ha ke wa dla wa he kɛ ha ní kasemi ɔ loko wa ba asafo mi kpe nɛ wa ha heto kpiti nɛ nu tso. w22.03 22 ¶9

Yehowa ngɛ Yesu tsɔsee kɛ ha he blɔ nɛ e ma ná kaa Osɔfo Nɔkɔtɔma Pe Kulaa a. Yesu na bɔ nɛ e he wa kaa nɔ ko maa bu Mawu tue ha ke e kɛ ka nɛ nya wa ngɛ kpee. E na nɔ́ wawɛɛ, lɔ ɔ he ɔ, e kɛ “ngmlaa kpami nɛ nya wa kɛ vo nyu sɔle.” Akɛnɛ Yesu na nɔ́ wawɛɛ nɛ e hao hyɛ he je ɔ, e le wa hiami níhi nɛ e “ma nyɛ ma ba ye bua” wɔ ke a “ngɛ [wɔ] kae.” Wa bua jɔ wawɛɛ kaa Yehowa hla Osɔfo Nɔkɔtɔma Pe Kulaa nɛ naa nɔ mɔbɔ nɛ e “maa nu wa gbɔjɔmi ɔmɛ a he ha wɔ”! (Heb. 2:17; 4:14-16; 5:7-10) Yehowa ngmɛ blɔ nɛ e Bi ɔ ba na nɔ́ wawɛɛ konɛ e kɛ ha sane bimi nɛ he hia nɛ ɔ heto: Anɛ adesahi ma nyɛ maa ya nɔ maa ye Yehowa anɔkuale ke e kɛ kahi nɛ nya wa ngɛ kpee lo? Satan ha sane bimi nɛ ɔ heto ke dɛbi! E tsɔɔ kaa adesahi sɔmɔɔ Mawu ngɛ níhi nɛ a náa ngɛ e ngɔ ɔ he je, nɛ a sume Yehowa. (Hiob 1:9-11; 2:4, 5) Yesu ya nɔ nɛ e ye anɔkuale, nɛ e kɛ tsɔɔ kaa Satan ji lakpatsɛ. w21.04 16-17 ¶7-8

Loko a maa baptisi Baiblo kaselɔ ko ɔ, jã e kɛ níhi nɛ e ngɛ kasee ngɛ Baiblo ɔ mi ɔ tsuɔ ní. Ke Baiblo kaselɔ ko kɛ níhi nɛ e kaseɔ ɔ tsuɔ ní ɔ, e ma ba pee kaa “nyumu ní lelɔ” nɛ e tsua si nɛ e mi kuɔ nɛ e ma e tsu ngɛ tɛ sa nɔ nɛ Yesu tu e he munyu ngɛ e nɔ́ he tomi nɔ́ ko mi ɔ. (Mat. 7:24, 25; Luka 6:47, 48) Moo ye bua o Baiblo kaselɔ nɛ e pee tsakemihi ngɛ e si himi mi. (Maak. 10:17-22) Yesu le kaa e he maa wa ha niatsɛ ko kaa e maa jua e níhi tsuo nɛ e ngɛ ɔ. (Maak. 10:23) Se kɛ̃ ɔ, Yesu de nyumu ɔ kaa e pee tsakemi ngua nɛ ɔ ngɛ e si himi mi. Mɛni he je? Ejakaa Yesu ná suɔmi ha lɛ. Be komɛ ɔ, e he ma nyɛ maa wa ha wɔ kaa wa maa wo wa Baiblo kaselɔ ko he wami nɛ e ngɔ níhi nɛ e ngɛ kasee ɔ kɛ tsu ní, ejakaa wa susuɔ kaa e pee we klaalo kaa e maa pee tsakemi. (Kol. 3:9, 10) Se ke o kɛ Baiblo kaselɔ ɔ sɛɛ ní nɛ ɔmɛ a he ní mla a, e ma nyɛ maa ye bua lɛ nɛ e bɔni tsakemi peemi mla. Ke o kɛ lɛ susu ní nɛ ɔmɛ a he ɔ, lɔ ɔ tsɔɔ kaa o susuɔ e he.​—La 141:5; Abɛ 27:17. w21.06 3 ¶3, 5

Bɔfo Petro tu nɔ hyɛmi nɔ́ kpakpa nɛ Yesu pee kɛ gu si nɛ e fĩ ngɛ nɔ́ nami mi ɔ he munyu; se kɛ̃ ɔ, Yesu pee ní kpahi fuu nɛ wa ma nyɛ maa kase. (1 Pet. 2:18-25) Ngɛ anɔkuale mi ɔ, níhi tsuo nɛ Yesu de kɛ níhi tsuo nɛ e pee ngɛ e si himi mi ɔ ji nɔ́ ko nɛ wa ma nyɛ maa kase. Anɛ adesahi nɛ a yi mluku ɔ ma nyɛ maa kase Yesu nɔ hyɛmi nɔ́ ɔ lo? Ee, a ma nyɛ. Mo kai kaa Petro wo wɔ he wami kaa waa “nyɛɛ [Yesu] nane mami he ɔmɛ a se haa,” se pi kaa nihi nɛ a ye mluku. Ke wa nyɛɛ e nane mami he ɔmɛ a se, nɛ ji kaa wa pee nɔ́ fɛɛ nɔ́ nɛ wa ma nyɛ nɛ waa kɛ e blɔ tsɔɔmihi tsu ní ɔ, lɔ ɔ tsɔɔ kaa waa kɛ bɔfo Yohane munyu nɛ ji kaa waa “ya nɔ [nɛ waa] nyɛɛ kaa bɔ nɛ jamɛ a nɔ ɔ [Yesu] nyɛɛ ɔ” ngɛ ní tsue. (1 Yoh. 2:6) Ke wa nyɛɛ Yesu nane mami he ɔmɛ a se ɔ, wa maa hɛ kɛ su Yehowa he haa. Mɛni he je wa ma nyɛ ma de jã a? Yesu pee nɔ hyɛmi nɔ́ kpakpa ngɛ blɔ nɔ nɛ nɔ ko maa gu kɛ sa Mawu hɛ mi ɔ he. (Yoh. 8:29) Enɛ ɔ he ɔ, ke wa nyɛɛ Yesu nane mami he ɔmɛ a se ɔ, wa maa sa Yehowa hɛ mi. Nɛ wa ma nyɛ ma ná nɔ mi mami kaa wa hiɔwe Tsɛ ɔ maa hɛ kɛ su nihi nɛ a ngɛ mɔde bɔe kaa a maa hɛ kɛ su e he ɔ he.​—Yak. 4:8. w21.04 3 ¶4-6

Yehowa le su kpakpahi nɛ wa ngɛ, e le wa nyɛmihi, nɛ e yeɔ bua wɔ konɛ waa pee e huɛmɛ. Ke wa ya nɔ nɛ wa ye lɛ anɔkuale ɔ, wa ma nyɛ maa pee e huɛmɛ kɛ ya neneene! (Yoh. 6:44) Ke wa ná nɔ mi mami kaa Yehowa suɔ wɔ nɛ e yeɔ bua wɔ ɔ, e maa wo wɔ he wami nɛ waa ya nɔ nɛ waa kɛ wa tsui tsuo nɛ sɔmɔ lɛ ngɛ nyagbahi nɛ waa kɛ maa kpe ɔ tsuo se. Se ke wa be nɔ mi mami kaa Yehowa suɔ wɔ ɔ, wa “he wami nɔ ma gbɔ.” (Abɛ 24:10, NW) Ke wa kɔni mi jɔ̃ nɛ wa he we yi kaa Mawu suɔ wɔ ɔ, wa be nyɛe maa da Satan tuami ɔmɛ a nya. (Efe. 6:16) Wa nyɛmimɛ komɛ bɔni susumi kaa Yehowa sume mɛ nɛ e susuu we a he, nɛ enɛ ɔ ha nɛ a hemi kɛ yemi mi gbɔjɔ. Ke wa be nɔ mi mami kaa Mawu suɔ wɔ ɔ, mɛni e sa nɛ waa pee? E sa nɛ wa je jamɛ a susumi ɔ kɛ je wa juɛmi mi amlɔ nɔuu! Mo bi Yehowa nɛ e ye bua mo konɛ o ngɔ ‘Mawu tue mi jɔmi ɔ nɛ maa bu o tsui kɛ o juɛmi he’ ɔ kɛ da “susumihi nɛ haoɔ” mo ɔ nane mi. (La 139:23, NW; Filip. 4:6, 7) Nɛ o kai kaa pi mo pɛ nɛ o nuɔ he jã. w21.04 20 ¶1; 21 ¶4-6

Mɛni blɔ nɔ o gu kɛ ba pee Yehowa Odasefo no? Eko ɔ, o nu “sane kpakpa” a kɛ gu o fɔli, nihi nɛ o kɛ mɛ tsuɔ ní loo nihi nɛ o kɛ mɛ yaa sukuu ɔ a nɔ. Aloo kɛ gu wehi a mi fiɛɛmi ní tsumi ɔ nɔ. (Maak. 13:10) Lɔ ɔ se ɔ, nɔ ko kɛ mo ba kase Baiblo ɔ, nɛ enɛ ɔ he be babauu kɛ mɔde bɔmi. Benɛ ní kasemi ɔ ngɛ nɔ yae ɔ, o ba ná suɔmi kɛ ha Yehowa, nɛ o ba na hu kaa e suɔ mo. Yehowa gbla mo kɛ ba anɔkuale ɔ mi, nɛ amlɔ nɛ ɔ, o ba pee Yesu Kristo kaselɔ, nɛ o ngɛ hɛ nɔ kami kaa o ma ná neneene wami hwɔɔ se. (Yoh. 6:44) O bua jɔ wawɛɛ kaa Yehowa wo nɔ ko he wami nɛ e kɛ mo ba kase Baiblo ɔ, nɛ Yehowa kplɛɛ o nɔ kaa e sɔmɔli ɔmɛ a kpɛti nɔ kake. Amlɔ nɛ ɔ nɛ wa ba na anɔkuale ɔ, wɔ hu wa ná he blɔ kaa wa maa ye bua ni kpahi nɛ a ba piɛɛ wa he kɛ nyɛɛ wami blɔ ɔ nɔ. Eko ɔ, wa bua jɔ wehi a mi fiɛɛmi ɔ he, se e he ma nyɛ maa wa ha wɔ kaa wa ma bi nɔ ko kaa e maa suɔ nɛ waa kɛ lɛ nɛ kase Baiblo ɔ aloo waa kɛ nɔ ko nɛ pee Baiblo mi ní kasemi. w21.07 2 ¶1-2