February

Yehowa suɔ nɛ e sɔmɔli tsuo a bua nɛ jɔ. E ngɛ wa ti nɔ fɛɛ nɔ kasa nya, nɛ ke si fɔfɔɛ komɛ ha nɛ wa kɔni mi jɔ̃ ɔ, e toɔ he hɛ. (La 145:18, 19) Mo susu bɔ nɛ Yehowa nu gbalɔ Eliya sisi nɛ e ye bua lɛ ha a he nɛ o hyɛ. Nyumu anɔkualetsɛ nɛ ɔ hi si ngɛ be ko nɛ e mi wa wawɛɛ ngɛ Israel bi a yi nɔ sane mi. Mawu he nyɛli wa Yehowa sɔmɔli yi mi, nɛ a ngɛ hlae nɛ a gbe Eliya po. (1 Ma. 19:1, 2) Eko ɔ, nɔ́ kpa nɛ ha nɛ Eliya hao wawɛɛ ji kaa e susu kaa lɛ pɛ ji gbalɔ nɛ piɛ nɛ e ngɛ Yehowa sɔmɔe. (1 Ma. 19:10) Mawu tsu sane ɔ he ní amlɔ nɔuu. Yehowa tsɔ e bɔfo ko nɛ e ya ma nɔ mi kɛ ha e gbalɔ ɔ kaa Israel bi fuu ngɛ nɛ a yeɔ Mawu anɔkuale loloolo! (1 Ma. 19:5, 18) Yesu je suɔmi mi nɛ e ha nɛ e kaseli ɔmɛ le kaa a ma ná mumi mi weku ngua ko. (Maak. 10:29, 30) Nɛ Yehowa, wa hiɔwe Tsɛ ɔ hu wo si kaa e maa ye bua e sɔmɔli nɛ a suɔ nɛ a sɔmɔ lɛ ɔ.​—La 9:10. w21.06 8-9 ¶3-4

Nihi fuu a bua jɔɛ wa he ejakaa wa daa Baiblo ɔ nɔ kɛ kpaa lakpa tsɔɔmihi a he bo. Jami hɛ mi nyɛɛli komɛ tsɔɔ a we bi kaa Mawu gblaa yayami peeli a tue ngɛ hɛl la mi. A kɛ lakpa tsɔɔmihi lɛ kudɔɔ a we bi ɔmɛ. Se wɔ nɛ wa ji Yehowa sɔmɔli nɛ wa sɔmɔɔ Mawu nɛ ngɛ suɔmi ɔ lɛɛ, wa tsɔɔ nihi kaa tsɔɔmi nɛ ɔmɛ dɛ. Jehanɛ hu ɔ, jami hɛ mi nyɛɛli ɔmɛ tsɔɔ kaa susuma gbo we. Ke tsɔɔmi nɛ ɔ da a, lɛɛ e tsɔɔ kaa a be nɔ ko si tlee mɔ. Wa tsɔɔ nihi kaa tsɔɔmi nɛ ɔ dɛ Baiblo ɔ nɔ. Jamihi fuu tsɔɔ kaa Mawu loo he wami ko nɛ a nɛ ɔ lɛ to níhi nɛ yaa nɔ ngɛ je ɔ mi ɔ he blɔ nya kaa e ya jã. Se wa tsɔɔ kaa adesahi ma nyɛ maa hla kaa a ma sɔmɔ Mawu loo a be lɛ sɔmɔe. Kɛ jami hɛ mi nyɛɛli peeɔ a ní kɛɛ ke wa kpa a he bo kaa kikɛ? Behi fuu ɔ, a mi mi fuɔ wawɛɛ! Ke wa suɔ anɔkuale ɔ, e sa nɛ waa kplɛɛ níhi nɛ Mawu de ɔ nɔ. (Yoh. 8:45, 46) Wa sume nɛ wa kua anɔkuale ɔ kaa bɔ nɛ Satan pee ɔ. Wa sume nɛ waa pee nɔ́ ko nɛ kɛ wa hemi kɛ yemi kɔ we. (Yoh. 8:44) Mawu ngɛ hlae nɛ “nɔ́ yayami he nɛ pee [e we bi] tai” nɛ a “mɛtɛ nɔ́ kpakpa he” kaa bɔ nɛ Yesu pee ɔ.​—Rom. 12:9; Heb. 1:9. w21.05 10 ¶10-11

Ke wa yɔse kaa wa ngɛ wa he nɔ woe loo wa hɛ kɔ̃ɔ ɔ, mɛni e sa kaa waa pee? Wa ma nyɛ maa pee tsakemi! Bɔfo Paulo tsɔɔ kaa nihi nɛ Abosiami “nu mɛ hɛ ngmengmle” ɔ ma nyɛ maa je e klama a mi. (2 Tim. 2:26) O hɛ ko je nɔ kaa Yehowa he wa kulaa pe Satan. Lɔ ɔ he ɔ, ke wa kplɛɛ Yehowa yemi kɛ buami nɔ ɔ, wa ma nyɛ maa je Abosiami klama amɛ a mi. Ngɛ anɔkuale mi ɔ, e maa hi kaa wa maa yu wa he kulaa ngɛ Satan klama amɛ a he pe nɛ a maa du wɔ loko waa je mi. Mawu pɛ lɛ ma nyɛ maa ye bua wɔ nɛ waa yu wa he ngɛ Satan klama amɛ a he. Lɔ ɔ he ɔ, moo sɔle ha Yehowa daa ligbi nɛ e ye bua mo o hyɛ kaa o ngɛ su nɛ ɔmɛ eko kpo jee lo. (La 139:23, 24) Ko ha nɛ su nɛ ɔmɛ nɛ a ná o nɔ he wami kɔkɔɔkɔ! Jeha akpehi abɔ ji nɛ ɔ nɛ Satan pee e he detsɛ. Se e be kɛe nɛ a maa fĩ lɛ, nɛ nyagbenyagbe ɔ, a kpata e hɛ mi. (Kpj. 20:1-3, 10) Wa ngɛ jamɛ a ligbi ɔ blɔ hyɛe wawɛɛ. Se loko jamɛ a ligbi ɔ maa su ɔ, o hɛ nɛ hi Satan klama amɛ a nɔ. Bɔɔ mɔde nɛ o ko ha nɛ he nɔ womi loo hɛkɔ nɛ ná o nɔ he wami. Moo fia o pɛɛ si kaa o maa “te si kɛ wo Abosiami, nɛ e maa tu fo kɛ je [o] he.” w21.06 19 ¶15-17

Yehowa bua jɔɔ ke nɔ ko kplɛɛ Baiblo mi anɔkuale ɔ nɔ, nɛ e de ni kpahi níhi nɛ e ngɛ kasee ɔ. (Abɛ 23:15, 16) Ke Yehowa na bɔ nɛ e we bi ngɛ fiɛɛe nɛ́ a ngɛ nihi ní tsɔɔe ha mwɔnɛ ɔ, e bua jɔɔ wawɛɛ! Kaa nɔ hyɛmi nɔ́ ɔ, ngɛ hiɔ nɛ gbɛ fia je ɔ mi ngɛ jeha 2020 sɔmɔmi jeha a mi tsuo se ɔ, wa pee Baiblo mi ní kasemi 7,705,765 nɛ nihi 241,994 jɔɔ a wami nɔ ha Yehowa nɛ a ha nɛ a baptisi mɛ. Kaseli ehe nɛ ɔmɛ hu kɛ ni kpahi maa kase Baiblo ɔ nɛ a maa pee nihi fuu kaseli. (Luka 6:40) Wa ma nyɛ ma de kɛ nɔ mi mami kaa ke waa kɛ wa he wo kaselɔ peemi ní tsumi ɔ mi ɔ, Yehowa bua jɔɔ. Kaselɔ peemi ní tsumi ɔ be gbɔjɔɔ, se ngɛ Yehowa yemi kɛ buami nya a, wa ma nyɛ maa tsɔɔ ni kpahi ní nɛ a ba suɔ wa hiɔwe Tsɛ ɔ. Anɛ waa kɛ ma nyɛ maa pee oti ngɛ wa si himi mi kaa waa kɛ nɔ kake maa je Baiblo mi ní kasemi sisi lo? Ke waa kɛ he blɔ fɛɛ he blɔ nɛ wa ma ná a bi nihi nɛ waa kɛ kpeɔ ɔ kaa a maa suɔ nɛ a kɛ wɔ nɛ kase Baiblo ɔ, nɔ́ nɛ ma nyɛ maa je mi kɛ ba a maa pee wɔ nyakpɛ. w21.07 6-7 ¶14-16

Matsɛ David ngɔ sika fuu kɛ níhi nɛ a he jua wa kɛ fĩ sɔlemi we ɔ mami ní tsumi ɔ se. (1 Kron. 22:11-16) Ke wa be he wami nɛ waa kɛ maa ye bua kɛ ma teokrase tsu ko ɔ, wa ma nyɛ maa ya nɔ nɛ wa ha yemi kɛ buami kɛ fĩ ní tsumi nɛ ɔ se. Wa ma nyɛ maa ngɔ níhi a si kpamihi nɛ wa ná a kɛ ye bua nihewi kɛ yihewi. Nyɛ ha nɛ waa hyɛ nɔ́ nɛ bɔfo Paulo hu pee kɛ tsɔɔ kaa e haa nɔ nɔ́ faa. Paulo fɔ Timoteo nine kaa e ba piɛɛ e he kɛ tsu ma se sane kpakpa fiɛɛmi ní tsumi ɔ, nɛ e tsɔɔ lɛ bɔ nɛ e fiɛɛɔ kɛ bɔ nɛ e tsɔɔ ní ha a. (Níts. 16:1-3) Tsɔsemi nɛ Paulo kɛ ha Timoteo ɔ ha nɛ Timoteo he be ngɛ sane kpakpa fiɛɛmi ní tsumi ɔ mi. (1 Kor. 4:17) Timoteo hu ngɔ tsɔsemi nɛ e ná kɛ je Paulo ngɔ ɔ kɛ ye bua ni kpahi. w21.09 12 ¶14-15

Mɛni wa ma nyɛ maa kase ngɛ kaselɔ Apolo kɛ bɔfo Paulo a nɔ hyɛmi nɔ́ ɔ mi? Nyumu enyɔ nɛ ɔmɛ tsuo le Ngmami ɔ mi wawɛɛ. A le mɛ ni enyɔ ɔmɛ tsuo saminya, nɛ mɛ tsuo a le ní tsɔɔmi hulɔ. Mɛ tsuo a ye bua nihi babauu nɛ a ba pee kaseli. Se a hɛ kɔɛ a sibi a nɔ. (Níts. 18:24) Ngɛ anɔkuale mi ɔ, benɛ Apolo je Korinto ɔ, be komɛ a se ɔ, Paulo de lɛ kaa e ya lejɛ ɔ ekohu. (1 Kor. 16:12) Apolo ngɔ nyɛmihi nɛ e ngɛ ɔ kɛ tsu ní ngɛ blɔ kpakpa nɔ, nɛ́ lɔ ɔ ji kaa e kɛ fiɛɛ sane kpakpa a, nɛ e kɛ wo e nyɛmimɛ he wami. Wa ma nyɛ ma ná nɔ mi mami hu kaa Apolo ji nyumu nɛ baa e he si. Kaa nɔ hyɛmi nɔ́ ɔ, nɔ́ ko be Baiblo ɔ mi nɛ tsɔɔ kaa e mi mi fu benɛ Akuila kɛ Priskila “tsɔɔ lɛ Mawu blɔ ɔ fitsofitso pe bɔ nɛ e le ɔ.” (Níts. 18:24-28) Bɔfo Paulo le ní tsumi kpakpa nɛ Apolo tsu ɔ. Se Paulo susuu we kaa nihi ma de ke Apolo bɔɔ mɔde pe lɛ. Ke wa kane sɛ womi nɛ Paulo ngma kɛ ya ha Korinto asafo ɔ, wa naa kaa Paulo baa e he si, e peeɔ e he humi, nɛ e nuɔ nɔ́ sisi.​—1 Kor. 3:4-6. w21.07 18-19 ¶15-17

Adam kɛ Hawa je blɔ nɛ a gbo Yehowa nɔ tue, lɔ ɔ he ɔ, e da blɔ kaa e je mɛ ngɛ e weku ɔ mi. Se a nina hu nɛɛ? Yehowa je suɔmi mi nɛ e to blɔ nya konɛ Adam bimɛ nɛ a maa pee tue bumi kɛ ha lɛ ɔ nɛ a ba piɛɛ e weku ɔ he ekohu. E pee enɛ ɔ kɛ gu e Bi kake too ɔ kpɔmi afɔle sami ɔ nɔ. (Yoh. 3:16) Jehanɛ hu ɔ, kɛ gu Yesu kpɔmi afɔle sami ɔ nɔ ɔ, Yehowa maa ngɔ nimli 144,000 nɛ a maa ye anɔkuale kɛ ya si nyagbe ɔ kɛ pee e bimɛ. (Rom. 8:15-17; Kpoj. 14:1) Jehanɛ hu ɔ, adesa anɔkualetsɛmɛ ayɔhi abɔ ngɛ Mawu suɔmi nya ní pee. A hɛ kɛ nɔ fɔmi ji kaa a maa hi Mawu weku ɔ mi kɛ ya neneene ke a ye anɔkuale ngɛ nyagbe ka a mi ngɛ Jeha Akpe Nɔ Yemi ɔ nyagbe. (La 25:14; Rom. 8:20, 21) Amlɔ nɛ ɔ po ɔ, a tsɛɛ Yehowa nɛ ji a Bɔlɔ ɔ ke a “Tsɛ.” (Mat. 6:9) Nihi nɛ a ma tle mɛ si ɔ hu ma ná he blɔ kɛ kase nɔ́ nɛ Yehowa ngɛ hlae nɛ a pee. A kpɛti nihi nɛ a kɛ Yehowa blɔ tsɔɔmi ɔmɛ ma tsu ní ɔ hu ma ba pee e weku ɔ mi bimɛ. w21.08 5 ¶10-11

A tu ní tsumi ko kɛ wo bɔfo Paulo dɛ, nɛ lɔ ɔ ji fiɛɛmi ní tsumi ɔ nɛ. Ngɛ jeha nyɔngmahi abɔ nɛ e kɛ tsu fiɛɛmi ní tsumi ɔ mi ɔ, e na ní tsumi nɛ ɔ kaa e he hia pe kulaa. E fiɛɛ ngɛ “ma hɛ mi kɛ we fɛɛ we mi.” (Níts. 20:20) Ngɛ anɔkuale mi ɔ, e fiɛɛ be fɛɛ be, kɛ ngɛ he fɛɛ he nɛ e maa na nihi ngɛ! Kaa nɔ hyɛmi nɔ́ ɔ, benɛ Paulo ngɛ e huɛmɛ mlɛe ngɛ Atene ɔ, e fiɛɛ kɛ ha kuu ko nɛ a ji nimli nguahi, nɛ a kpɛti ni komɛ kplɛɛ sane kpakpa a nɔ. (Níts. 17:16, 17, 34) Benɛ a ‘wo lɛ tsu’ po ɔ, e fiɛɛ kɛ ha nihi nɛ a bɔle lɛ ɔ. (Filip. 1:13, 14; Níts. 28:16-24) Paulo kɛ e be tsu ní saminya. E pɔɔ nihi nine fɔmi konɛ a ba piɛɛ e he kɛ tsu fiɛɛmi ní tsumi ɔ. Kaa nɔ hyɛmi nɔ́ ɔ, ngɛ e kekleekle ma se sane kpakpa fiɛɛmi ní tsumi ɔ mi ɔ, e ngɔ Yohane nɛ a tsɛɛ lɛ ke Marko ɔ kɛ piɛɛ e he; nɛ ngɛ enyɔne ɔ mi ɔ, e ngɔ Timoteo kɛ piɛɛ e he. (Níts. 12:25; 16:1-4) Paulo pee nɔ́ fɛɛ nɔ́ nɛ e ma nyɛ kɛ tsɔɔ nyɛmimɛ nyumuhi nɛ ɔmɛ bɔ nɛ e sa nɛ a to níhi a blɔ nya ha ngɛ asafo ɔ mi, bɔ nɛ e sa nɛ a slaa nyɛmimɛ ɔmɛ nɛ a wo mɛ he wami ha, kɛ nɔ́ nɛ a ma nyɛ maa pee konɛ a ní tsɔɔmi nɛ nu tso.​—1 Kor. 4:17. w22.03 27 ¶5-6

Ni komɛ he we yi kaa Bɔlɔ ko ngɛ, ejakaa a tsɔɔ kaa níhi nɛ a naa kɛ a hɛngmɛ pɛ nɛ a heɔ yeɔ. Se ngɛ anɔkuale mi ɔ, a ngɛ hemi kɛ yemi ngɛ ní komɛ nɛ a nɛ kɛ a hɛngmɛ ɔ mi. Kaa nɔ hyɛmi nɔ́ ɔ, a ngɛ hemi kɛ yemi ngɛ gravity nɛ ji he wami nɛ gblaa níhi kɛ jeɔ hiɔwe kɛ baa zugba a nɔ ɔ mi, akɛnɛ a ngɛ odase nitsɛnitsɛ nɛ tsɔɔ kaa he wami nɛ ɔ ngɛ ɔ he je. Hemi kɛ yemi nɛ Baiblo ɔ tu he munyu ɔ daa si ngɛ níhi nɛ wa nɛ kɛ wa hɛngmɛ se odase tsɔɔ kaa a ngɛ nitsɛnitsɛ ɔ nɔ. (Heb. 11:1) E heɔ be nɛ e biɔ mɔde bɔmi hulɔ loko nɔ ko ma nyɛ ma hla odase nɛ ɔmɛ kɛ ha e he. Se nihi fuu sume nɛ a pee jã. Nɔ ko nɛ e hla we odasehi nɛ tsɔɔ kaa Bɔlɔ ko ngɛ ɔ ma nyɛ maa ma nya si kaa Mawu be. Benɛ je mi si kpali komɛ hla níhi a mi se ɔ, a ba ná nɔ mi mami kaa Mawu lɛ bɔ je ɔ. Ngɛ anɔkuale mi ɔ, ni komɛ susu kaa Bɔlɔ ko be, ejakaa a tsɔɔ we mɛ ngɛ yunivɛsiti. Se kɛ̃ ɔ, ni komɛ ba le Yehowa, nɛ a ba suɔ lɛ amlɔ nɛ ɔ. E sa nɛ wɔ tsuo waa fia wa hemi kɛ yemi ngɛ Bɔlɔ ɔ mi ɔ kɛ ma si, wa ya sukuu kɛ ya tsitsaa jio, wa yɛ sukuu kɛ yɛ tsitsaa jio. w21.08 14 ¶1; 15-16 ¶6-7

Yesu ngɔ nɔ́ he tomi nɔ́ nɛ kɔɔ bi ko bɔlɔ ɔ he ɔ kɛ tsɔɔ bɔ nɛ Yehowa naa nɔ mɔbɔ ha a mi. Yesu tsɔɔ kaa binyumu ɔ je we mi nɛ “e ya ba e je mi basabasa nɛ e kɛ kpata e weto ní ɔ hɛ mi.” (Luka 15:13) Pee se ɔ, e pia e he, e ba e he si nɛ e kpale kɛ ba we mi. Kɛ e tsɛ ɔ pee e ní ha kɛɛ? Yesu de ke: “Benɛ [binyumu ɔ] ngɛ blɔ nɔ tsitsaa kɛ ma a, e tsɛ ɔ hɛ ngmɛ gba e nɔ, nɛ e ní pee lɛ mɔbɔ, nɛ e kɛ fo ya fua lɛ, nɛ e fĩɔ e nya he.” Bitsɛ ɔ pue we e bi ɔ hɛ mi si, mohu ɔ, e na lɛ mɔbɔ nɛ e ngɔ e tɔmi kɛ ke lɛ nɛ e nya e he kɛ ba we ɔ mi ekohu. Bi ko bɔlɔ ɔ pee yayami nɛ hɛdɔ ngɛ he, se akɛnɛ e tsake e tsui he je ɔ, e tsɛ ɔ ngɔ e yayami kɛ ke lɛ. Yehowa ji bitsɛ ɔ nɛ e naa nɔ mɔbɔ ngɛ nɔ́ he tomi nɔ́ ɔ mi ɔ nɛ. Yesu ngɔ nɔ́ he tomi nɔ́ nɛ taa nɔ tsui he nɛ ɔ kɛ tsɔɔ bɔ nɛ e Tsɛ ɔ pee klaalo kaa e kɛ yayami peeli nɛ a tsake a tsui niinɛ ɔ a he yayami maa ke mɛ ha.​—Luka 15:17-24. w21.10 8 ¶4; 9 ¶6

Mwɔnɛ ɔ, jami hɛ mi nyɛɛli fuu peeɔ nɔ́ fɛɛ nɔ́ nɛ a ma nyɛ konɛ nihi ko le kaa Mawu ngɛ biɛ nitsɛnitsɛ. A je Mawu biɛ ɔ ngɛ a Baiblo sisi tsɔɔmihi a mi, nɛ ngɛ jami ɔ ekomɛ a blɔ fa mi ɔ, a ha we nɛ nihi kɛ Mawu biɛ ɔ nɛ tsu ní. Anɛ nɔ ko ma nyɛ maa je he atsinyɛ kaa Yehowa Odasefohi pɛ ji nihi nɛ a ngɛ bu nɛ sa kɛ ha Mawu biɛ ɔ lo? Wa ha nɛ nihi le Mawu biɛ ɔ wawɛɛ pe jami kpahi tsuo! Kɛ gu blɔ nɛ ɔ nɔ ɔ, wa ngɛ wa biɛ nɛ ji Yehowa Odasefohi ɔ nya ní tsue. (Yes. 43:10-12) Wa pee New World Translation of the Holy Scriptures ɔ ayɔ 240 kɛ se. Baiblo nɛ ɔ kɛ Yehowa biɛ tsu ní ngɛ hehi nɛ a je biɛ ɔ ngɛ Baiblo kpa amɛ a mi ɔ. Nɛ wa pee Baiblo kasemi níhi nɛ a kɛ Yehowa biɛ ɔ tsu ní ngɛ mi ngɛ gbihi 1,000 kɛ se mi! w21.10 20-21 ¶9-10

Ke wa ye bua wa nyɛmimɛ Kristofohi nɛ e fi mɛ ɔ, lɔ ɔ tsɔɔ kaa wa ngɛ Yehowa jae. Yehowa wo si kaa Israel bi nɛ a jeɔ a tsui mi kɛ yeɔ bua ohiatsɛmɛ ɔ, e maa to mɛ nane mi. (5 Mose 15: 10) Ngɛ anɔkuale mi ɔ, be fɛɛ be nɛ wa maa ye bua wa nyɛmi ko nɛ e fi lɛ ɔ, Yehowa naa lɛ kaa e ji nike ní nɛ waa kɛ ngɛ lɛ hae. (Abɛ 19:17) Kaa nɔ hyɛmi nɔ́ ɔ, benɛ Kristofohi nɛ a ngɛ Filipi ɔ mane nike ní kɛ ya ha Paulo benɛ a wo lɛ tsu ɔ, e de ke e ji, “afɔle nɛ sa, nɛ́ Mawu bua jɔ he wawɛɛ.” (Filip. 4:18) Mo susu nihi nɛ a ngɛ o we asafo ɔ mi ɔ a he, nɛ́ o bi o he ke, ‘Anɛ nɔ ko ngɛ nɛ ma nyɛ ma ye bua lɛ lo?’ Yehowa bua jɔɔ ke e na kaa wa ngɔ wa be, wa he wami, wa nyɛmi, kɛ níhi nɛ wa ngɛ kɛ ye bua nihi nɛ e fi mɛ ɔ. E naa lɛ kaa wa jami ɔ fã. (Yak. 1:27) Anɔkuale jami heɔ be kɛ mɔde bɔmi. Se tsa pi tlomi. (1 Yoh. 5:3) Mɛni he je? Ejakaa wa peeɔ ja kɛ tsɔɔ kaa wa suɔ Yehowa kɛ wa nyɛmimɛ Kristofohi. w22.03 24 ¶14-15

Loko wa mi mi maa sã wɔ ngɛ wa nyɛmimɛ a he ɔ, jã wa susu nyagbahi nɛ a kɛ ngɛ kpee ɔ a he. Kaa nɔ hyɛmi nɔ́ ɔ, eko ɔ, nyɛmiyo ko be he wami wawɛɛ. E tui e nyagba a he munyu, se e maa suɔ hu kaa nɔ ko nɛ ye bua lɛ. Anɛ wa ma nyɛ maa hoo ní kɛ ha lɛ aloo wa ma nyɛ ma dla e we ɔ mi ha lɛ lo? Eko ɔ, nyɛminyumu ko ní tsumi ngmɛɛ lɛ. Ke e ba jã a, anɛ wa ma nyɛ ma ha lɛ sika nɛ wa be hae nɛ e le he nɛ e je, nɛ́ waa ye bua lɛ kɛ ya si be nɛ e ma ná ní tsumi kpa lo? E sɛ nɛ waa mlɛ nɛ wa nyɛmimɛ nyumuhi kɛ yihi nɛ a bi wɔ yemi kɛ buami loko wa mi mi nɛ sã wɔ ngɛ a he. Kaa bɔ nɛ Yehowa peeɔ ɔ, wa ma nyɛ maa ye bua mɛ po loko a bi wɔ yemi kɛ buami. Wa bi we Yehowa kaa e ha nɛ pu ɔ nɛ tso, se e haa nɛ pu ɔ tsoɔ kɛ haa wɔ daa ligbi, nɛ nihi nɛ a jeɔ hɛsa kpo kɛ nihi nɛ a je we hɛsa kpo ɔ tsuo náa pu la a he se. Wa hiami níhi nɛ Yehowa haa wɔ ɔ tsɔɔ kaa e suɔ wɔ wawɛɛ. Wɔ hu wa suɔ Yehowa, ejakaa e mi mi jɔ nɛ e haa nɔ nɔ́ faa! w21.09 22-23 ¶12-13

Mawu suɔmi nɛ se pui ɔ haa nɛ e kɛ tɔmihi keɔ. Ke Yehowa na kaa yayami peelɔ ko tsake e tsui nɛ e kpa ní yayahi peemi ɔ, e suɔmi nɛ se pui ɔ haa nɛ e kɛ nɔ ɔ he yayami keɔ lɛ. La polɔ David de ngɛ Yehowa he ke: “E gbla we wa tue bɔ nɛ sa wɔ; wa yayami ɔmɛ hu e wui wɔ a he hiɔ bɔ nɛ sa wɔ.” (La 103:8-11) David nitsɛ le bɔ nɛ ke nɔ ko he nile ngɛ lɛ fɔ bue ɔ, e ma nyɛ maa hao nɛ e ye aywilɛho ha. Se jehanɛ hu ɔ, e le kaa Yehowa kɛ “yayami paa nɔ.” Mɛni haa nɛ Yehowa kɛ yayamihi keɔ? Heto ɔ ngɛ mwɔnɛ ɔ ngmami ɔ mi. Niinɛ kaa bɔ nɛ David de ɔ, Yehowa kɛ tɔmi keɔ ejakaa e suɔmi nɛ se pui ɔ hiɛ babauu ngɛ nihi nɛ a kpaa pɛɛ kaa e ngɔ a tɔmihi kɛ ke mɛ ɔ a nɔ. Ke wa tɔ̃ ɔ, e hi nɛ e da kaa wa ma pia wa he. E haa nɛ wa tsakeɔ wa tsui nɛ wa kpaleɔ kɛ jeɔ wa blɔ yaya a nɔ. w21.11 5 ¶11-12

Yehowa suɔ e biɛ ɔ, nɛ e suɔ nɛ nɔ fɛɛ nɔ nɛ ná bu kɛ ha e biɛ ɔ. (Yes. 42:8) Se jeha akpe ekpa ji nɛ ɔ nɛ a gbe e biɛ kpakpa a he guɛ. (La 74:10, 18, 23) Enɛ ɔ je sisi benɛ Abosiami (nɛ e sisi ji “Nɔ He Guɛ Gbelɔ”) tsɔɔ kaa Mawu ngɔ nɔ́ kpakpa ko nɛ Adam kɛ Hawa hia kɛ laa mɛ ɔ. (1 Mose 3:1-5) Kɛ je lɔ ɔ se kɛ ma a, a po Yehowa nya kaa e ngɔ níhi nɛ adesahi hia nitsɛnitsɛ ɔ kɛ laa mɛ. Yesu hao ngɛ bɔ nɛ a ngɛ e Tsɛ ɔ biɛ ɔ he guɛ gbee ha a he. Yehowa ji nɔ nɛ ngɛ he blɔ kaa e yeɔ hiɔwe kɛ zugba a tsuo nɔ, nɛ blɔ nɔ nɛ e guɔ kɛ yeɔ nɔ ɔ ji blɔ nɛ hi pe kulaa. (Kpoj. 4:11) Se Abosiami bɔ mɔde kaa e maa sisi hiɔwe bɔfohi kɛ adesahi nɛ a susu kaa Mawu be he blɔ kaa e yeɔ nɔ. E be kɛe nɛ nihi tsuo maa na kaa Mawu ji nɔ nɛ ngɛ he blɔ kaa e yeɔ je ɔ tsuo nɔ. Nihi tsuo ma ba le kaa blɔ nɔ nɛ Yehowa guɔ kɛ yeɔ nɔ ɔ ji blɔ nɛ hi pe kulaa. Nɛ e Matsɛ Yemi ɔ pɛ nɛ ma ha nɛ adesahi nɛ a ná tue mi jɔmi nitsɛnitsɛ nɛ a hi si slɔkee ngɛ zugba a nɔ. w21.07 9 ¶5-6

Ngɛ anɔkuale mi ɔ, wekuyi fɛɛ wekuyi suɔ nɛ e ha e yo kɛ e bimɛ niye ní, heha ní, kɛ hwɔ he. Anɛ o kɛ sika he nyagba ngɛ kpee lo? Ke jã a, lɛɛ o ná we lɛ gbɔjɔɔ kulaa. Se o ma nyɛ maa ngɔ be nɛ ɔ kɛ fia o hemi kɛ yemi ɔ kɛ ma si. Moo sɔle nɛ o kane Yesu munyuhi nɛ ngɛ Mateo 6:25-34 ɔ nɛ o pue o yi mi tɛ ngɛ he. Mo susu nɔ hyɛmi níhi nɛ ngɛ mwɔnɛ ɔ nɛ tsɔɔ bɔ nɛ Yehowa ye bua nihi nɛ a kɛ teokrase ní tsumihi ye kekleekle blɔ he ha a he. (1 Kor. 15:58) Ke o pee jã a, o ma ná nɔ mi mami nɛ mi wa kaa o hiɔwe Tsɛ ɔ maa ye bua mo kaa bɔ nɛ e ye bua nihi nɛ a kɛ jamɛ a si fɔfɔɛ ɔ eko kpe ɔ. E le níhi nɛ o hia nɛ e le blɔ nɔ nɛ e maa gu kɛ tsu he ní. Ke o na bɔ nɛ Yehowa ngɛ mo ye buae ha amlɔ nɛ ɔ, o hemi kɛ yemi ɔ mi maa wa nɛ o ma nyɛ maa da kahi nɛ a mi wa pe jã po a nya hwɔɔ se. w21.11 20 ¶3; 21 ¶6

Kpɔmi nɔ́ ɔ he ní nɛ Kristofohi fuu kase ɔ ha nɛ a hemi kɛ yemi ɔ mi wa wawɛɛ. E ngɛ mi kaa a kɛ ka slɔɔtohi kɛ si temi kɛ womi ngɛ kpee ngɛ a si himi mi mohu lɛɛ, se a yaa nɔ nɛ a fiɛɛɔ. Mo susu bɔfo Yohane nɔ hyɛmi nɔ́ ɔ he nɛ o hyɛ. E kɛ anɔkuale yemi fiɛɛ anɔkuale nɛ kɔɔ Kristo kɛ kpɔmi nɔ́ ɔ he ɔ maa pee jeha 60 kɛ se. E ngɛ mi kaa e piɛ bɔɔ nɛ Yohane maa ye jeha 100 mohu lɛɛ, se Roma Nɔ Yemi ɔ susu kaa e ji nɔ ko nɛ he ngɛ gbeye, lɔ ɔ he ɔ, a wo lɛ tsu ngɛ Patmɔs zugba kpɔ nɛ wo bɔle lɛ ɔ nɔ. Mɛni he je nɛ a wo lɛ tsu? A wo lɛ tsu ngɛ “Mawu he munyu nɛ [e] ngɛ tue kɛ Yesu he odase nɛ [e] ngɛ yee ɔ he je.” (Kpoj. 1:9) Enɛ ɔ ji hemi kɛ yemi kɛ si fimi he nɔ hyɛmi nɔ́ nɛ se be! Ngɛ Baiblo mi womihi nɛ Yohane ngma a mi ɔ, e tu bɔ nɛ e suɔ Yesu wawɛɛ ha, kɛ bɔ nɛ e hɛ sa kpɔmi nɔ́ ɔ ha a he munyu. E tu kpɔmi nɔ́ ɔ, loo se nami nɛ ngɛ kpɔmi nɔ́ ɔ he ɔ he munyu si 100 kɛ se. (1 Yoh. 2:2) Ngɛ anɔkuale mi ɔ, Yohane bua jɔ kpɔmi nɔ́ ɔ he wawɛɛ. w21.04 17 ¶9-10

Yehowa suɔ nɛ wa je mi mi jɔmi kpo kɛ tsɔɔ nihi nɛ a je kpá. Kaa nɔ hyɛmi nɔ́ ɔ, Yehowa de Israel bi ɔmɛ kaa a ko gbiɛ nɔ nɛ e tue nui nɔ. Ke a ngɛ nɔ ko gbiɛe ɔ, e tsɔɔ kaa a ngɛ dee ke nɔ́ yayami ko nɛ ba e nɔ aloo a ngɛ nɔ ɔ he gbeye woe kaa nɔ́ yayami ko maa ba e nɔ. Ke o pee nɔ́ nɛ ɔ kɛ si nɔ ko nɛ e tue nui nɔ́ ɔ, e hí kulaa! E be nyɛe maa nu nɔ́ nɛ o de kɛ si lɛ ɔ, lɔ ɔ he ɔ, e be nyɛe ma fã e he. Jehanɛ hu ɔ, ngɛ 3 Mose 19:14 ɔ mi nɔuu ɔ, Mawu de e sɔmɔli kaa a ko “fɔ hɛ yuyuilɔ blɔ mi tso.” Womi ko de kɛ kɔ nihi nɛ a je kpá a he ke: “Ngɛ blema Israel kpɔ ɔ mi ɔ, a waa nihi nɛ a je kpá a yi mi nɛ a kɛ mɛ hí si nɛ hi.” Eko ɔ, nɔ ko nɛ e yi mi wa a maa ngɔ tso kɛ fɔ hɛ yuyuilɔ ko blɔ mi konɛ e plaa lɛ loo konɛ nihi nɛ a muɔ lɛ. Enɛ ɔ tsɔɔ we mi mi jɔmi kulaa! Mlaa nɛ ngɛ kuku 14 ɔ ye bua Yehowa we bi nɛ a na kaa e sa nɛ a mi mi nɛ sã mɛ ngɛ nihi nɛ a je kpá a he. w21.12 8-9 ¶3-4

Yakob hao ejakaa e susu kaa loloolo ɔ, e nyɛminyumu ɔ mi mi fu lɛ. Enɛ ɔ he ɔ,e sɔle wawɛɛ ngɛ sane ɔ he kɛ ha Yehowa. Lɔ ɔ se ɔ, e je e tsui mi nɛ e ngɔ nike ní kɛ mane Esau. (1 Mose 32:9-15) Nɛ benɛ e na Esau ɔ, e je bumi kpo kɛ tsɔɔ lɛ. E kpla si nɛ e ngɔ e hɛ mi kɛ bu si, pi si kake, nɛ pi si enyɔ, se si kpaago sɔuu! Yakob ba e he si nɛ e je bumi kpo kɛ tsɔɔ Esau nɛ e dla e kɛ lɛ a kpɛti. (1 Mose 33:3, 4) Wa ma nyɛ maa kase nɔ́ ko ngɛ bɔ nɛ Yakob dla e he ha loko e kɛ e nyɛminyumu Esau ya kpe, kɛ bɔ nɛ e pee e ní ha benɛ e kɛ lɛ kpe ɔ mi. Yakob je he si bami mi kɛ bi Yehowa yemi kɛ buami. Nɛ e tsu e sɔlemi ɔ nya ní kɛ gu níhi nɛ e pee konɛ e kɛ dla e kɛ e nyɛminyumu ɔ a kpɛti ɔ nɔ. Benɛ a kpe ɔ, Yakob kɛ Esau sã we nya konɛ a hyɛ nɔ nɛ e nɔ́ da kɛ nɔ nɛ e nɔ́ dɛ. Oti nɛ Yakob kɛ ma e hɛ mi ji kaa e ma dla e kɛ e nyɛminyumu ɔ a kpɛti. Anɛ o ma nyɛ maa kase Yakob nɔ hyɛmi nɔ́ ɔ lo?​—Mat. 5:23, 24. w21.12 25 ¶11-12

Ke o susu gbomi nɛ Yesu ba gbo ngɛ o he yayami ɔmɛ a he ɔ he ɔ, eko ɔ, o ma de ke, ‘I he we yi kaa i sa nike ní nɛ he jua wa nɛ ɔ?’ Mɛni he je nɛ o ma nyɛ maa nu he jã a? Wa tsui nɛ yi mluku ɔ ma nyɛ maa sisi wɔ nɛ wa susu kaa wa he be se nami loo Yehowa sume wɔ. (1 Yoh. 3:19) Ke wa bɔni susumi nɛ ɔ nami pɛ ɔ, e sa nɛ wa kai kaa “Mawu kle pe wa tsui ɔ.” Ke wa susu kaa Yehowa sume wɔ loo e kɛ wa he yayamihi be wɔ kee po ɔ, lɔ ɔ tsɔɔ we kaa e sume wɔ. Wa hiɔwe Tsɛ ɔ suɔ wɔ, nɛ e kɛ wa he yayami maa ke wɔ. E sa nɛ wa ná nɔ mi mami kaa Yehowa suɔ wɔ. Loko wa ma nyɛ maa pee jã a, ja wa pɔɔ e Munyu ɔ kanemi, wa sɔleɔ be fɛɛ be, nɛ waa kɛ nihi nɛ a kɛ anɔkuale yemi sɔmɔɔ lɛ ɔ bɔɔ be fɛɛ be. Mɛni he je nɛ e he hia nɛ waa pee ní nɛ ɔmɛ? O maa na Yehowa su kpakpa amɛ heii. O maa na bɔ nɛ e suɔ mo ha. Ke o pueɔ o yi mi tɛ ngɛ níhi nɛ o kaseɔ ngɛ Mawu Munyu ɔ mi daa ligbi ɔ he ɔ, e ma ‘dla’ o tsui kɛ o juɛmi.​—2 Tim. 3:16. w21.04 23-24 ¶12-13

Hemi kɛ yemi nɛ wa ma ná a biɔ babauu pe ní kasemi pɛ. E sa nɛ wa pue wa yi mi tɛ ngɛ nɔ́ nɛ wa ngɛ kasee ɔ he. Mo susu nɔ nɛ ngma La 77 ɔ níhi a si kpami ɔ he nɛ o hyɛ. E hao ejakaa e nu he kaa Yehowa kua e kɛ e nyɛmimɛ Israel bi ɔmɛ. Jamɛ a susumi ɔ ha nɛ e nyɛ we nɛ e hwɔ mahe nyɔ mi. (Kuku 2-8) Mɛni nɛ e pee ngɛ he? E de Yehowa ke: “Ma susu níhi tsuo nɛ o pee ɔ a he; nyakpɛ níhi nɛ o pee blema a ma kai.” (Kuku 12) Ngɛ anɔkuale mi ɔ, la polɔ ɔ le níhi nɛ Yehowa pee kɛ ha e we bi blema a, se nyumu nɛ hao nɛ ɔ bi ke: “Anɛ Mawu hɛ je nɔ kaa e maa na mɔbɔ lo? Anɛ jehanɛ lɛɛ abofu ba da mɔbɔ nami nane mi lo?” (Kuku 9) La polɔ ɔ pue e yi mi tɛ ngɛ níhi nɛ Yehowa pee kɛ bɔ nɛ e mi mi sã lɛ ngɛ e we bi a he ha, nɛ e je mi mi jɔmi kpo kɛ tsɔɔ mɛ blema a he. (Kuku 11) Mɛni je mi kɛ ba? La polɔ ɔ ba ná nɔ mi mami kaa Yehowa be e we bi kuae. (Kuku 15) w22.01 30-31 ¶17-18

Kɛ Yehowa nuɔ he ha kɛɛ ngɛ e sɔmɔli anɔkualetsɛmɛ nɛ a gbo ɔ a he? E hɛ ngɛ jae ngɛ a he, nɛ e suɔ nɛ e na mɛ ekohu! (Hiob 14:15) Poo he foni nɛ o hyɛ bɔ nɛ Yehowa hɛ ngɛ jae ngɛ e huɛ Abraham he ha! (Yak. 2:23) Aloo moo hyɛ bɔ nɛ e ngɛ hlae nɛ e kɛ Mose, nɔ nɛ e kɛ lɛ “tu munyu hɛ mi kɛ hɛ mi” ɔ nɛ tu munyu ekohu ha! (2 Mose 33:11) Aloo moo hyɛ bɔ nɛ e ngɛ hlae nɛ e nu David kɛ la poli kpahi a yi jemi la ngɔngɔɛ ɔmɛ ekohu ha! (La 104:33) E ngɛ mi kaa Mawu huɛmɛ nɛ ɔmɛ gbo mohu lɛɛ, se Yehowa hɛ ji a nɔ. (Yes. 49:15) E kaiɔ bɔ nɛ a ngɛ ha a pɛpɛɛpɛ. E ma tle mɛ si kɛ ba wami mi ligbi ko, e maa bu sɔlemi nɛ a maa je a tsui mi kɛ sɔle ɔ tue, nɛ e maa kplɛɛ a jami nɔ́ ekohu. Ke o suɔlɔ ko gbo ɔ, mo ha nɛ munyu nɛ ɔmɛ nɛ a wo o bua. Benɛ a tsɔ atua ngɛ Eden abɔɔ ɔ mi ɔ, Yehowa le kaa níhi ma ba puɛ kulaa loko e ma ba hi ekohu. Yehowa hiɔ yi wu tso ní peepee, dami sane nɛ a yi, kɛ basabasa peemi nɛ yaa nɔ ngɛ je ɔ mi mwɔnɛ ɔ. w21.07 10 ¶11; 12 ¶12

Ke wa suɔ wa nyɛmimɛ ɔmɛ ɔ, lɔ ɔ hu maa tsɔɔ kaa wa hɛ sa kpɔmi nɔ́ ɔ. Mɛni he je? Ejakaa Yesu ngɔ e wami kɛ ha ngɛ wa nyɛmimɛ ɔmɛ hu a he. Akɛnɛ Yesu ngɔ e wami kɛ ha ngɛ wa nyɛmimɛ ɔmɛ hu a he he je ɔ, lɔ ɔ tsɔɔ kaa a he jua wa ha lɛ. (1 Yoh. 3:16-18) Bɔ nɛ waa kɛ wa nyɛmimɛ maa hi si ha a maa tsɔɔ kaa wa suɔ mɛ. (Efe. 4:29, 31–5:2) Kaa nɔ hyɛmi nɔ́ ɔ, ke a be he wami loo a kɛ kahi nɛ nya wa nɛ adebɔ mi oslaahi piɛɛ he ɔ ngɛ kpee ɔ, wa yeɔ kɛ buaa mɛ. Ke nyɛmi ko ngɛ asafo ɔ mi ɔ de wɔ nɔ́ ko aloo e pee wɔ nɔ́ ko nɛ dɔ wɔ ɔ, mɛni e sa nɛ waa pee? Anɛ e he waa ha mo kaa o kɛ tɔmi maa ke lo? (3 Mose 19:18) Ke jã a, lɛɛ ga womi nɛ nyɛɛ se nɛ ɔ maa ye bua mo: “Ke nɔ ko ngɛ nɔ́ ko nɛ e maa da nɔ kɛ tu munyu kɛ si nɔ kpa ko po ɔ, nyɛɛ ya nɔ nɛ nyɛ ná nyɛ sibi a he tsui nɛ nyɛɛ ngɔ kɛ pa nyɛ sibi faa. Kaa bɔ nɛ Yehowa ngɔ kɛ pa nyɛ faa a, e sa nɛ nyɛ hu nyɛɛ pee jã nɔuu.” (Kol. 3:13) Be fɛɛ be nɛ wa maa ngɔ wa nyɛmi ko he tɔmi kɛ ke lɛ ɔ, lɔ ɔ ma ha nɛ wa hiɔwe Tsɛ ɔ maa na kaa wa hɛ sa kpɔmi nɔ́ ɔ niinɛ. w21.04 18 ¶12-13

Eko ɔ, wa tsu ní wawɛɛ kɛ ha Yehowa, nɛ wa ye bua nihi babauu nɛ a ha nɛ a baptisi mɛ. Wa le kaa Yehowa lɛ ye bua wɔ nɛ wa nyɛ nɛ wa pee enɛ ɔ, se pi wɔ nitsɛmɛ wa he wami nya. Se nɔ́ kpa ko hu ngɛ nɛ wa ma nyɛ maa kase ngɛ Apolo kɛ bɔfo Paulo a sane ɔ mi. Ke wa ngɛ sɔmɔmi he blɔhi fuu ngɛ asafo ɔ mi ɔ, lɔ ɔ tsɔɔ kaa wa ngɛ he blɔhi fuu nɛ waa kɛ maa baa tue mi jɔmi yi ngɛ asafo ɔ mi. Wa bua jɔɔ wawɛɛ ke asafo mi sɔmɔli kɛ asafo mi nikɔtɔmahi bɔ mɔde nɛ a baa tue mi jɔmi nɛ ngɛ asafo ɔ mi ɔ yi. A peeɔ enɛ ɔ kɛ gu a ga womihi tsuo nɛ a kɛ daa Baiblo ɔ nɔ ɔ nɔ. A gblɛ juɛmi kɛ yɛ mɛ nitsɛmɛ a nɔ, mohu ɔ, a yeɔ bua asafo ɔ konɛ a bu Kristo Yesu tue nɛ a nyɛɛ e nɔ hyɛmi nɔ́ ɔ se! (1 Kor. 4:6, 7) Yehowa ha wa ti nɔ fɛɛ nɔ nyɛmi ko. Eko ɔ, wa maa nu he kaa nɔ́ nɛ wa nyɛɔ peeɔ ɔ pi. Se e sa nɛ wa kai kaa ní nyafinyafihi nɛ wa peeɔ kɛ haa nɛ kake peemi hiɔ asafo ɔ mi ɔ ngɛ kaa kpã nɛ a kɛ kpɛɛ bo nɛ a poo kɛ peeɔ tade nɛ ngɛ fɛu. Enɛ ɔ he ɔ, nyɛ ha nɛ waa bɔ mɔde wawɛɛ nɛ wa je koli simi su ngɛ wa mi. Nyɛ ha nɛ waa pee nɔ́ fɛɛ nɔ́ nɛ wa ma nyɛ kɛ baa tue mi jɔmi kɛ kake peemi nɛ ngɛ asafo ɔ mi ɔ yi.​—Efe. 4:3. w21.07 19 ¶18-19

O ma nyɛ ma ná nɔ mi mami kaa o maa na o suɔli nɛ a gbo ɔ ekohu. Mɛni wa ma nyɛ maa kase ngɛ ya nɛ Yesu fo benɛ e ngɛ e huɛmɛ nɛ a ngɛ aywilɛho yee ɔ a bua woe ɔ mi? Wa kaseɔ kaa e ngɛ e tsui nɔ kaa e ma tle nihi nɛ a gbo ɔ si! (Yoh. 11:35) O ma nyɛ maa ye bua nihi nɛ a suɔli gbo ɔ. Benɛ Maria kɛ Marta ngɛ ya foe ɔ, Yesu kɛ mɛ fo, se pi lɔ ɔ pɛ, e bu mɛ tue, nɛ e wo a bua hulɔ. (Yoh. 11:25-27) Wɔ hu waa kɛ nihi nɛ a ngɛ ya foe ɔ ma nyɛ ma fo. Dan nɛ ji asafo mi nɔkɔtɔma nɛ ngɛ Australia de ke: “Benɛ ye yo ɔ gbo ɔ, i hia yemi kɛ buami. Nyɛmimɛ fuu kɛ a yihi pee klaalo kaa a maa ye bua mi. A ngmɛɛ mi blɔ nɛ i yeɔ aywilɛho, nɛ ke i ngɛ ya foe ɔ, e pee we mɛ zo. A yeɔ bua mi kɛ fɔɔ ye lɔle ɔ he, a ya heɔ ní kɛ ba haa mi, nɛ a yeɔ bua mi kɛ hooɔ ní ke i nyɛ we nɛ ma pee jã. Nɛ a kɛ mi sɔleɔ be fɛɛ be. A ní peepee tsɔɔ kaa a ji huɛmɛ kpakpahi nɛ ‘a si we mi ngɛ haomi be mi.’”​—Abɛ 17:17. w22.01 16 ¶8-9

Yehowa suɔ nɛ e hi ha wɔ. (Abɛ 4:20-22) Ke e gu e Munyu ɔ, Baiblo kasemi womi aloo Kristofo no ko nɛ e nane pi si ɔ nɔ kɛ wo wɔ ga a, lɔ ɔ tsɔɔ kaa e ngɛ suɔmi kpo jee kɛ ngɛ wɔ tsɔɔe. (Heb. 12:9, 10) Ngɔɔ o juɛmi kɛ ma ga womi ɔ nɔ se pi blɔ nɔ nɛ a gu kɛ wo mo ga a. Be komɛ ɔ, blɔ nɔ nɛ a gu kɛ wo wɔ ga a ma nyɛ ma ha nɛ wa bua be ga womi ɔ he jɔe. Ngɛ anɔkuale mi ɔ, ke nɔ ko maa wo nɔ ko ga a, e sa nɛ e bɔ mɔde nɛ e ha nɛ ga womi ɔ nɔ kplɛɛmi nɛ ko ye ha nɔ nɛ e ngɛ lɛ ga a woe ɔ. (Gal. 6:1) Ke wɔ nɛ a ngɛ wɔ ga woe, nɛ wa susu kaa nɔ nɛ ngɛ wɔ ga a woe ɔ ko nyɛ ko gu blɔ kpa ko nɔ kɛ pee jã po ɔ, e sa nɛ waa ngɔ wa juɛmi kɛ ma ga womi ɔ nitsɛ nɔ. Wa ma nyɛ ma bi wa he ke: ‘Ke ye bua jɔɛ blɔ nɔ nɛ nɔ ɔ gu kɛ wo mi ga a he po ɔ, anɛ nɔ́ ko ngɛ nɛ ma nyɛ ma kase ngɛ ga womi ɔ mi lo? Anɛ ma nyɛ ma je ye juɛmi ngɛ nɔ nɛ ngɛ mi ga a woe ɔ e fã tɔmihi a nɔ nɛ ma kase nɔ́ ko kɛ je ga womi ɔ mi lo?’ Ke a wo wɔ ga a, nile ngɛ mi kaa wa maa hyɛ nɔ́ nɛ wa ma nyɛ maa kase ngɛ mi, nɛ wa kɛ tsu ní. w22.02 12 ¶13-14

Yehowa le kaa e ma he be, nɛ e biɔ mɔde bɔmi wawɛɛ loko wa nyɛ ma je wa he kɛ je susumi kɛ ní peepeehi nɛ a dɛ ɔ he. (La 103:13, 14) Se kɛ gu e Munyu ɔ, e mumi ɔ, kɛ e we asafo ɔ nɔ ɔ, Yehowa ha wɔ juɛmi, he wami kɛ yemi kɛ buami nɛ wa hia konɛ wa kɛ pee tsakemi nɛ e sa. Moo ngɔ Baiblo ɔ kɛ kpa o mi. Mawu Munyu ɔ ngɛ kaa ahuhuɛ. E ma nyɛ maa ye bua mo nɛ o susu o munyu tumi kɛ o ní peepee he, nɛ e ma nyɛ maa ye bua mo nɛ o hyɛ bɔ nɛ o susuɔ níhi a he ha a saminya. (Yak. 1:22-25) Yehowa pee klaalo be fɛɛ be kaa e maa ye bua mo. E le blɔ nɛ e hi pe kulaa nɛ e maa gu nɔ kɛ ye bua mo. Nɛ e le nɔ́ nɛ ngɛ o tsui mi. (Abɛ 14:10; 15:11) E sa nɛ e pee o su kaa o maa sɔle ha lɛ be fɛɛ be, nɛ́ o kase e Munyu ɔ daa ligbi. Mo ná nɔ mi mami kaa Yehowa mlaa amɛ da kɛ pi si. Wa ma nyɛ ma ná nɔ́ fɛɛ nɔ́ nɛ Yehowa ma de wɔ ke waa pee ɔ he se. Nihi nɛ a kɛ e mlaa amɛ tsuɔ ní ɔ, nihi buu mɛ, a le yi mi tomi he je nɛ a ngɛ si himi mi, nɛ a ngɛ bua jɔmi nitsɛnitsɛ​—La 19: 8-11. w22.03 4 ¶8-10

Ke wa ye bua kɛ ma Matsɛ Yemi Asahi kɛ kpe peemi asahi, nɛ wa ye bua kɛ dla níhi nɛ a puɛ ngɛ a nɔ ɔ, lɔ ɔ tsɔɔ kaa wa ngɛ Yehowa jae. Baiblo ɔ tsɔɔ kaa kpe he bo tsu ɔ mami kɛ níhi nɛ ngɛ mi ɔ tsuo a peemi ɔ ji ‘ní tsumi klɔuklɔu.’ (2 Mose 36:1, 4) Mwɔnɛ ɔ hu ɔ, Yehowa naa Matsɛ Yemi Asahi nɛ a maa kɛ asafo ɔ tsu kpahi nɛ a maa a kaa wa jami ɔ fã. Nyɛmimɛ nyumuhi kɛ yihi komɛ ngɔɔ be fuu kɛ tsuɔ ní tsumi nɛ ɔ. Wa hɛ sa ní tsumi nɛ he hia nɛ ɔ nɛ a tsuɔ kɛ fĩɔ Matsɛ Yemi ní tsumi ɔ se ɔ he wawɛɛ. Ngɛ anɔkuale mi ɔ, a tsuɔ fiɛɛmi ní tsumi ɔ hulɔ. Eko ɔ, a kpɛti ni komɛ suɔ nɛ a sɔmɔ kaa daa blɔ gbali. Ke nyɛmimɛ nɛ ɔmɛ a he su kaa a ma sɔmɔ kaa daa blɔ gbali ɔ, e sɛ nɛ asafo nikɔtɔmahi nɛ a to tsle kaa a maa hla mɛ kaa a sɔmɔ kaa daa blɔ gbali. Ke wa ngɛ nyɛmi nɛ waa kɛ maa ye bua kɛ ma asafo ɔ tsuhi jio, wa be jamɛ a nyɛmi ɔ jio, wɔ tsuo wa ma nyɛ maa ye bua kɛ dla Matsɛ Yemi Asa a nɔ konɛ e he nɛ tsɔ aloo kɛ dla níhi nɛ a puɛ ngɛ Matsɛ Yemi Asa a nɔ ɔ. w22.03 22 ¶11-12